Makuri gud an sitwasyon hadton sensitibo ha pahamot. Posible gud nga diri nira malilikyan nga makaamyon hin pahamot tikang ha mga tawo nga ira iginkikita ngan iginkakaupod kada adlaw. Pero may pipira nga nagpakiana kon mahimo ba hangyoon an kabugtoan nga diri gumamit hin pahamot kon natambong ha Kristiano nga mga katirok, asembleya, ngan kombensyon.

Sigurado nga diri karuyag han usa nga Kristiano nga magin hinungdan hiya nga makurian an iba ha pagtambong ha mga katirok. Kinahanglan naton ngatanan an pagparig-on nga aton nakakarawat ha mga katirok. (Heb. 10:24, 25) Salit an usa nga nag-aantos tungod ha pagin sensitibo ha pahamot nga tungod hito nauulang na an iya pagtambong ha mga katirok bangin maruyag makiistorya ha mga tigurang mahitungod hito. Bisan kon diri Kasuratanhon o angayan an paghimo hin mga surundon may kalabotan ha paggamit hin pahamot kon natambong ha katirok, an mga tigurang mahimo magtagana hin impormasyon basi mabuligan an kabugtoan nga masabtan an problema nga naieksperyensyahan han iba. Depende ha kahimtang, an mga tigurang mahimo magdesisyon nga hisgotan an usa nga impormasyon ha aton publikasyon may kalabotan hito ha bahin han lokal nga mga panginahanglan durante han Katirok ha Pag-alagad, o mahimo hira maghimo hin mataktika nga pahibaro may kalabotan hito. * Pero, diri hira sadang maghimo hin sugad nga pahibaro hin agsob. Ha aton mga katirok, pirme may mga interesado ngan bisita nga natambong nga diri maaram han problema, ngan karuyag naton ipaabat ha ira nga nalilipay kita nga tinambong hira. Diri naton karuyag nga makonsensya an bisan hin-o tungod han paggamit hin igo nga kadamu hin pahamot.

Kon igintutugot han kahimtang, an lawas han mga tigurang bangin puydi maghimo hin kahikayan para ha mga sensitibo ha pahamot nga lumingkod ha iba nga dapit han Kingdom Hall nga bulag ha kadam-an. Pananglitan, bangin may second hall diin puydi hira lumingkod basi magpahimulos ha katirok. Kon diri la gihapon masulbad an problema ngan nag-aantos pa gihapon an pipira, bangin mahimo irekord han kongregasyon an mga katirok para ha ira o maghikay nga mapamatian nira ito pinaagi ha telepono, sugad han ginbubuhat para ha iba nga diri nakakagawas ha ira balay tungod hin problema ha kahimsog.

May kalabotan hini nga butang, kinahanglan liwat naton magpakita hin espesyal nga konsiderasyon kon natambong ha regional nga mga kombensyon. Tungod kay kadam-an han kombensyon ginhihimo ha air-conditioned nga mga pasilidad, ngan tungod kay kasagaran nga diri posible ha sugad nga mga pasilidad an pagtagana hin dapit para hadton sensitibo ha pahamot, maipapakita naton an gugma kon aton lilimitahan an paggamit hin pahamot durante hini nga mga okasyon. Kondi diri ini sadang himoon nga surundon ha mga katirok ha kongregasyon, ngan diri ini sadang hunahunaon nga sugad hito.

Samtang nagkikinabuhi kita hini nga sistema, kita ngatanan nag-aantos han mga epekto han pagkadiri-hingpit. Gin-aapresyar gud naton an pangalimbasog han iba basi maibanan an aton pag-antos! Bangin sakripisyo para ha pipira an diri paggamit hin pahamot basi diri makurian an usa nga bugto ha pagtambong ha mga katirok. Kondi an gugma mag-aaghat ha aton nga buhaton ito.

Kilala hi Ponsio Pilato han magbarasa han Biblia tungod han iya papel ha pagbista ngan pagpatay kan Jesus. (Mat. 27:1, 2, 24-26) Pero makikita liwat hin damu ka beses an iya ngaran ha iba pa nga rekord han kasaysayan nga kadungandungan han Biblia. Sumala ha The Anchor Bible Dictionary, an sekular nga mga rekord mahitungod ha iya “mas damu ngan mas detalyado kay ha bisan hin-o nga Romano nga gobernador han Judea.”

An ngaran ni Pilato agsob makita ha mga sinurat han Judio nga historyador nga hi Josephus, nga naghisgot hin tulo nga hitabo may kalabotan ha mga problema nga gin-atubang ni Pilato han gobernador hiya ha Judea. An ikaupat nga hitabo igindugang han Judio nga historyador nga hi Philo. An Romano nga parasurat nga hi Tacitus, nga nagrekord han kasaysayan han mga emperador han Roma, nagpamatuod nga hi Pilato an nagpapatay kan Jesus durante han pagmando ni Tiberio.

Han 1961, an mga arkeologo nakabiling ha kadaan nga Romano nga teatro ha Cesarea, Israel, hin ginamit na nga tipak nga bato diin nakasurat an ngaran ni Pilato ha Latin. An nakaukit (nga makikita dinhi) diri kompleto pero ginhuhunahuna nga ini an orihinal nga nakasurat: “Igindedikar ni Ponsio Pilato, nga Gobernador han Judea, (ini) nga Tiberieum ha dungganon nga mga dios.” Ini nga bilding posible nga usa nga templo nga nagpapasidungog ha Romano nga emperador nga hi Tiberio.

Ha “Mga Pakiana Tikang ha mga Magbarasa” han Hulyo 15, 2002 nga The Watchtower, gin-unabi nga an usa nga sister sadang magpandong ha pagdumara hin pag-aram ha Biblia kon may presente nga lalaki nga magwarali, bawtismado man ito o diri. An dugang nga pag-usisa may kalabotan hini nga butang nagpapakita nga angayan bag-uhon ini nga giya.

Kon bawtismado an lalaki nga magwarali nga kaupod han sister ha pagdumara hin regular nga pag-aram ha Biblia, sigurado nga maruruyag an sister magpandong. Ha pagbuhat hito, iginpapakita niya an pagtahod ha kahikayan ni Jehova han pagkaulo ha sulod han Kristiano nga kongregasyon tungod kay nagbubuhat hiya hin usa nga butang nga kasagaran nga responsabilidad han bugto nga lalaki. (1 Cor. 11:5, 6, 10) Pero puydi liwat hangyoon han sister an bugto nga lalaki nga magdumara han pag-aram kon kwalipikado ito ngan kon makakahimo ito.

Ha luyo nga bahin, kon an usa nga sister may kaupod nga lalaki nga diri-bawtismado nga magwarali nga diri niya bana, diri hiya gin-oobligar han Kasuratan nga magpandong. Kondi an konsensya han pipira nga sister bangin mag-aghat ha ira nga magpandong bisan ha sugad nga mga kahimtang.