An pipira nga solo nga surugoon han Dios nagkomento liwat hin sugad hito. Pero maaram gud hira han sagdon ni apostol Pablo nga mag-asawa hin “sumurunod la han Ginoo”—sagdon nga sadang sundon han ngatanan nga Kristiano. (1 Cor. 7:39) Kon sugad, kay ano nga nagkukomento hira hin sugad hito?

Adton nagkukomento hin sugad hito bangin naabat nga mas damu an solo nga kabugtoan nga babaye kay ha lalaki. Ito an kahimtang ha damu nga nasud. Tagda an duha nga ehemplo: Ha Korea, 57 porsyento han solo nga kabugtoan an babaye ngan 43 porsyento an lalaki. Ngan ha Colombia, 66 porsyento han mga Saksi an babaye ngan 34 porsyento an lalaki.

Ha iba nga nasud, may mga kag-anak nga diri Saksi nga nangangaro hin daku nga bugay, salit bangin nakukurian ha pag-asawa an mga brother nga diri riko. Tungod hini nga mga hinungdan, bangin abaton han usa nga sister nga gutiay la an posibilidad nga makaasawa hiya hin ‘sumurunod han Ginoo.’ Salit bangin magpakiana hiya, “Reyalistiko pa ba an paghunahuna nga makakabiling ako hin angayan nga maarasawa nga Saksi?” *

Kon sugad hito an imo inaabat, makakasarig ka nga maaram gud hito hi Jehova ngan nasasabtan niya an imo sitwasyon.—2 Kron. 6:29, 30.

Bisan pa hito, ginsusugo pa gihapon kita ni Jehova nga mag-asawa hin iya la magsiringba. Kay ano? Tungod kay maaram hiya han makakaopay ha aton. Diri la niya karuyag nga malikyan naton an makasurubo  nga resulta han diri maaramon nga mga desisyon kondi karuyag liwat niya nga magin malipayon kita. Ha panahon ni Nehemia, damu nga Judio an nag-asawa hin kababayin-an nga diri nag-aalagad kan Jehova. Salit gin-unabi ni Nehemia an maraot nga ehemplo ni Solomon. Bisan kon hi Solomon “hinigugma han iya Dios, . . . ginhimo han mga kababayin-an nga dumuruong nga makasala bisan hiya.” (Neh. 13:23-26) Maaram hi Jehova nga mapulsanon para ha aton an iya mga pahinumdom, salit ginsusugo kita niya nga mag-asawa hin iya la magsiringba. (Sal. 19:7-10; Isa. 48:17, 18) Mapasalamaton gud kita ha Dios tungod han iya mahigugmaon ngan masasarigan nga giya. Kon nagpapasakop kita kan Jehova sugad nga aton Magmarando, ginkikilala naton hiya sugad nga an Soberano ha Uniberso.—Prob. 1:5.

Sigurado nga lilikyan mo gud nga “magpas-an hin yugo” upod han usa nga mahimo magpahirayo ha imo ha Dios. (2 Cor. 6:14) Pirme mapulsanon an mga sagdon ni Jehova, ngan napamatud-an han damu nga Kristiano nga nagsunod han iya sugo nga maaramon an ira desisyon. Kondi may pipira nga diri nasugot.

Hi Maggy, * usa nga sister ha Australia, nagtikang pakig-date ha usa nga diri tumuroo. Hiya nagsiring: “Agsob ako diri makatambong ha mga katirok tungod ha pakig-upod ha iya. Nagluya gud an akon espirituwalidad.” Hi Ratana nga taga-India, nakigrelasyon ha iya kaklase nga nagtikang pag-aram han Biblia. Kondi, nag-aram la ngay-an ito han Biblia basi magin mag-uyab hira. Ha urhi, hi Ratana binaya ha kamatuoran ngan nagpakombirte ha iba nga relihiyon basi hira makasal.

Usa pa nga ehemplo hi Ndenguè nga taga-Cameroon. Disi-noybe anyos hiya han nag-asawa hiya hin diri Saksi. Antes han ira kasal, nagsaad ito ha iya nga diri hiya hito didid-an ha pag-alagad. Pero duha ka semana katapos han ira kasal, gindid-an hiya hito nga tumambong ha Kristiano nga mga katirok. Hiya nagsiring: “Nagin masurub-on ako ngan pirme ako nagtatangis. Nasantop ko nga diri ko na kontrolado an akon kinabuhi. Nagbabasol gud ako.”

Syempre diri ngatanan nga diri Saksi nga bana nagigin madarahog ngan diri makatadunganon. Pero bisan kon waray mo maeksperyensyahi an sugad nga mga resulta han pag-asawa hin diri Saksi, ano an epekto hito ha imo relasyon ha imo mahigugmaon nga Amay ha langit? Ano an imo aabaton nga waray ka mamati ha sagdon nga iya igintagana para ha imo kaopayan? Kondi labaw han ngatanan, ano an iya aabaton ha imo ginbuhat?—Prob. 1:33.

Mapapamatud-an han kabugtoan ha bug-os nga kalibotan nga an pag-asawa hin “sumurunod la han Ginoo” amo an pinakamaopay nga desisyon. An solo nga kabugtoan determinado gud nga mapalipay an kasingkasing han Dios pinaagi ha pag-asawa hin iya magsiringba. Hi Michiko, usa nga sister ha Japan, ginkinombinse han iya mga paryente nga mag-asawa hin diri Saksi. Labot pa hito, an iba han iya kasangkayan ngan kakilala nakaasawa hin igkasi-tumuroo. Hiya nagsiring: “Pirme ko ginsisidngan an akon kalugaringon nga hi Jehova ‘malipayon nga Dios,’ salit an aton kalipay diri nadepende ha aton pagin inasaw-an o diri. Natoo liwat ako nga ginhahatag niya an mga hingyap han aton kasingkasing. Salit kon diri kita nakakabiling hin maarasawa bisan kon karuyag naton mag-asawa, maopay gud nga magpabilin la anay kita nga solo.” (1 Tim. 1:11) Ha urhi, hi Michiko nakaasawa hin maopay nga brother, ngan nalipay hiya nga naghulat hiya.

May mga brother liwat nga naghulat anay antes nakabiling hin angayan nga padis. Usa hito hi Bill nga taga-Australia. Nagsiring hiya nga may mga naruyagan hiya nga diri Saksi. Pero ginlikyan gud niya nga magin duok ha ira. Kay ano? Tungod kay diri niya karuyag himoon an siyahan nga pitad nga magriresulta ha iya ‘pagpas-an hin yugo’ upod hin diri-tumuroo. Ha sulod hin mga tuig, may naruyagan hiya nga mga sister, pero waray hira maruyag ha iya. Naghulat hiya hin 30 ka tuig antes niya nakilala an usa nga sister nga pariho ha iya an mga tumong. Hiya nagsiring: “Waray ako ginbabasolan. Nalilipay gud ako tungod kay magkaupod kami ha pagministeryo, pag-aram, ngan pag-alagad. Nalilipay liwat ako nga makilala ngan makaupod an kasangkayan han akon asawa tungod kay hira ngatanan magsiringba ni Jehova. Ginpaparig-on namon an amon relasyon pinaagi ha pag-aplikar han mga prinsipyo ha Biblia.”

Ano an mahimo mo buhaton samtang igintatapod mo kan Jehova an imo kahimtang? Mahimo mo pamalandungon kon kay ano nga waray ka pa asawa. Kon ginhuhunahuna mo nga tungod ito kay ginsusunod mo an sugo ni Jehova nga mag-asawa hin “sumurunod la han Ginoo,” angay ka kumendasyonan. Sarig nga nalilipay hi Jehova ha imo determinasyon nga sundon an iya Pulong. (1 Sam. 15:22; Prob. 27:11) Padayon nga mag-ampo kan Jehova ngan isumat ha iya an imo inaabat. (Sal. 62:8) Magigin mas may kahulogan an imo mga pag-ampo samtang sinsero ngan padayon ka nga nangangamuyo ha iya. Padayon nga magigin marig-on an imo relasyon ha Dios ha kada adlaw samtang gin-aatohan mo an mga pagsulay ngan sayop nga mga hingyap. Makakasarig ka nga nagtatagad gud hi Jehova ha imo mga hingyap ngan panginahanglan tungod kay presyoso ka ha iya. Waray hiya magsaad ha bisan kan kanay nga magtatagana hiya hin maarasawa. Pero kon kinahanglan mo gud hin asawa, maaram hi Jehova han pinakamaopay nga paagi ha pagtagbaw han imo panginahanglan.—Sal. 145:16; Mat. 6:32.

Usahay bangin abaton mo an pariho han gin-abat ni David, nga nagsiring: “Dagmita an imo pagbaton ha akon, O Jehova; an akon espiritu naghihimaluya: Ayaw tagoa an imo nawong tikang ha akon.” (Sal. 143:5-7, 10) Ha sugad nga higayon, tagi an imo langitnon nga Amay hin panahon nga ipakita kon ano an iya kaburut-on para ha imo. Mahihimo mo ito pinaagi ha paggahin hin panahon ha pagbasa ngan pagpamalandong han iya Pulong. Hibabaroan mo an iya mga sugo ngan kon paonan-o niya ginbuligan an iya katawohan ha naglabay. Pinaagi ha pagpamati ha iya, magkakaada ka mas marig-on nga pagsarig nga maaramon gud an pagsunod ha iya.

Ano pa an mahimo mo buhaton basi magin malipayon ngan mapulsanon an imo pagin solo? Mahimo mo kultibaron an espirituwal nga pagsabot, pagkamahinatagon, pagin maduruto, pagin masayon pakiangayan, diosnon nga debosyon, ngan maopay nga reputasyon—mga kalidad nga importante ha pagkaada hin malipayon nga pamilya. (Gen. 24:16-21; Rut 1:16, 17; 2:6, 7, 11; Prob. 31:10-27) Unaha an pagpamiling han Ginhadian pinaagi ha bug-os nga pakigbahin ha pagsangyaw ngan ha iba pa nga buruhaton ha kongregasyon. Mabulig ini ha imo nga malikyan an pakahimo hin diri maaramon nga desisyon. Hi Bill nga gin-unabi kanina nagsiring mahitungod han panahon nga karuyag niya mag-asawa: “Madagmit la ito nga linabay! Gin-gamit ko an akon panahon ha pag-alagad kan Jehova sugad nga payunir.”

Oo, reyalistiko pa gihapon an pag-asawa hin “sumurunod la han Ginoo.” Pinaagi ha pagsunod hito nga sugo, mapapasidunggan mo hi Jehova ngan maieksperyensyahan mo an nagpapadayon nga kalipay. An Biblia nasiring: “Mahimayaon an tawo nga nahadlok kan Jehova, nga naglilipay hin daku ha iya mga sugo. An kabahandianon ngan an kamanggaran aada ha iya balay; ngan an iya kamatadong nagpapadayon ha waray kataposan.” (Sal. 112:1, 3) Salit magin determinado nga sundon an sugo han Dios nga mag-asawa hin “sumurunod la han Ginoo.”