1, 2. (a) Ano an iginsumat ni Jesus mahitungod han kataposan nga mga adlaw? (b) Ano nga mga pakiana an aton hihisgotan?

HANDURAWA hi Jesus nga nalingkod ha Bukid han mga Olibo diin nakikita an templo ha Jerusalem. Kaupod niya an upat han iya mga apostol, hira Pedro, Andres, Santiago, ngan Juan. Namamati hira hin maopay kan Jesus samtang ginsusumatan niya hira hin urusahon nga tagna mahitungod ha tidaraon. Ginsumatan niya hira hin damu nga impormasyon may kalabotan ha kataposan nga mga adlaw hinin maraot nga sistema, an panahon nga magmamando hiya ha Ginhadian han Dios. Ginsidngan niya hira nga durante hiton makatirigamnan nga panahon, an iya “matinumanon ngan maaramon nga uripon” magrirepresentar ha iya ha tuna ngan maghahatag hin napapanahon nga espirituwal nga pagkaon ha iya mga surugoon.—Mat. 24:45-47.

² Katapos, hito gihap nga tagna, iginsumat niya an parabola mahitungod han napulo nga birhen. (Basaha an Mateo 25:1-13.) Hini nga artikulo, aton hihisgotan ini nga mga pakiana: (1) Ano an nangunguna  nga mensahe han parabola? (2) Paonan-o gin-aaplikar han matinumanon nga mga dinihogan an sagdon han parabola, ngan ano an resulta? (3) Paonan-o an tagsa ha aton makakapahimulos ha parabola ni Jesus?

3. Ha naglabay, paonan-o iginsaysay han aton mga literatura an parabola mahitungod han napulo nga birhen, ngan ano an posible nga resulta hito?

³ Hinbaroan naton ha nauna nga artikulo nga hinin naglabay pa la nga mga dekada, hinay-hinay nga ginbag-o han matinumanon nga uripon an paagi han pagsaysay ha pipira nga asoy ha Biblia. Mas nakapokus na hira ha praktikal nga mga leksyon kay han posible nga simboliko o matagnaon nga mga kahulogan hito. Pananglitan ha naglabay, gintagan hin espisipiko nga simboliko nga kahulogan han aton mga literatura bisan an gudtiay nga detalye han parabola ni Jesus mahitungod han napulo nga birhen, upod na an lampara, lana, surudlan han lana, ngan iba pa. Pero posible ba nga natabonan an simple ngan importante nga mensahe han parabola tungod han aton pagpokus ha gudtiay nga detalye hito? Importante an baton hini nga pakiana.

4. Ha parabola, paonan-o naton hibabaroan kon hin-o (a) an karaslon nga lalaki? (b) an mga birhen?

⁴ Aton usisahon an nangunguna nga mensahe han parabola ni Jesus. Siyahan, tagdon naton an mga tawohan. Hin-o an karaslon nga lalaki ha parabola? Hi Jesus. Maaram kita hito tungod kay ha iba nga higayon gin-unabi ni Jesus an iya kalugaringon sugad nga an karaslon nga lalaki. (Luc. 5:34, 35) Hin-o an mga birhen? Ha parabola, hi Jesus nagsiring nga sadang magin andam an mga birhen ngan kinahanglan naglalaga an ira lampara pag-abot han karaslon nga lalaki. Tigamni an pariho nga instruksyon nga iginhatag ni Jesus ha “gutiay nga panon,” an iya dinihogan nga mga sumurunod: “Pag-epron ngan pag-andam kamo, palagaha an iyo mga lampara, ngan magin pariho kamo ha kalalakin-an nga naghuhulat ha pag-abot han ira agaron tikang ha kasal.” (Luc. 12:32, 35, 36) Dugang pa, giniyahan hira apostol Pablo ngan apostol Juan nga ipariho an dinihogan nga mga sumurunod han Kristo ha putli nga mga birhen. (2 Cor. 11:2; Pah. 14:4) Matin-aw, iginsumat ni Jesus an parabola ha Mateo 25:1-13 basi sagdonan ngan pahamangnoan an iya dinihogan nga mga sumurunod.

5. Ano an ginsiring ni Jesus nga mabulig ha aton nga hibaroan an peryodo han panahon diin naaplikar ini nga parabola?

⁵ Sunod, ha ano nga peryodo hin panahon naaplikar an parabola ni Jesus? Hibabaroan naton an baton hito ha ginsiring ni Jesus ha ikatarapos han iya parabola: “Inabot an karaslon nga lalaki.” (Mat. 25:10) Sugad han ginhisgotan ha Hulyo 15, 2013 nga gowa hini nga magasin, an tagna ni Jesus nga nakarekord ha Mateo kapitulo 24 ngan 25 walo ka beses nga nag-uunabi han iya ‘pag-abot’; hito ngatanan, pariho la nga Griego nga pulong an gin-gamit. Ha kada pag-unabi hito ni Jesus, gintutudlok niya an panahon durante han daku nga kasakitan diin maabot hiya basi hukman ngan bungkagon inin maraot nga sistema. Salit matin-aw nga ini nga parabola naaplikar durante hinin kataposan nga mga adlaw, pero an pag-abot ni Jesus mahitatabo durante han daku nga kasakitan.

6. Sumala ha konteksto, ano an nangunguna nga mensahe han parabola?

⁶ Ano an nangunguna nga mensahe han parabola? Tagda an konteksto. Ginhisgotan pa la ni Jesus an mahitungod han iya “matinumanon ngan maaramon nga uripon.” Usa ito nga gutiay nga grupo han dinihogan nga kalalakin-an nga mangunguna ha mga sumurunod han Kristo durante han kataposan nga mga adlaw. Ginpahamangnoan niya ito nga kalalakin-an nga  kinahanglan magpabilin hira nga matinumanon. Sunod, gin-gamit niya an parabola basi sagdonan an ngatanan nga dinihogan ha kataposan nga mga adlaw nga ‘padayon nga magbantay’ basi diri mawara an ira presyoso nga balos. (Mat. 25:13) Aton usisahon an parabola ngan kitaon kon paonan-o gin-aaplikar han mga dinihogan an sagdon hito.

7, 8. (a) Ano an duha nga kalidad nga nakabulig ha maaramon nga mga birhen? (b) Paonan-o iginpapakita han mga dinihogan nga andam hira?

⁷ Ha parabola, ginpapabug-atan ni Jesus nga an maaramon nga mga birhen nakaandam ha pag-abot han karaslon nga lalaki diri pariho ha diri maaramon nga mga birhen. Kay ano? Tungod han duha nga kalidad: an pagin andam ngan pagin mabinantayon. An mga birhen nga igintoka ha paghulat ha karaslon nga lalaki kinahanglan magtipig han ira lampara nga naglalaga ngan magpabilin nga alerto durante han gab-i. Diri pariho han diri maaramon nga mga birhen, andam an lima nga maaramon nga birhen tungod kay nagdara hira hin reserba nga lana para ha ira lampara. Andam ba liwat an matinumanon nga mga dinihogan ha pag-abot ni Jesus?

⁸ Oo! Hinin kataposan nga mga adlaw, an mga dinihogan nagios pariho han maaramon nga mga birhen, andam gud ha pagtuman han ira toka tubtob ha kataposan. Maaram hira nga ha ira pag-alagad ha Dios, kinahanglan nira isakripisyo an materyal nga mga butang nga mahimo unta nira makarawat ha kalibotan ni Satanas. Determinado gud hira nga maunungon nga mag-alagad kan Jehova, diri tungod kay hirani na an kataposan, kondi tungod kay hinigugma nira hiya ngan an iya Anak. Gintitipigan nira an ira integridad ngan ginsasalikway an materyalistiko, imoral, ngan makikalugaringon nga disposisyon hinin maraot nga kalibotan. Hito nga paagi, nagpapabilin hira nga andam, padayon nga ‘naglalamrag sugad hin mga sugâ,’ ngan mapailubon nga naghuhulat ha karaslon nga lalaki bisan kon baga hin nalalangan ito.—Fil. 2:15.

9. (a) Ano nga pahamangno an iginhatag ni Jesus mahitungod ha tendensya nga mahingaturog? (b) Paonan-o nagios an mga dinihogan uyon ha singgit: “Aadi na an karaslon nga lalaki”? (Kitaa liwat an footnote.)

⁹ An ikaduha nga kalidad nga nakabulig ha maaramon nga mga birhen amo an pagin mabinantayon. Posible ba mahingaturog an tagsa nga dinihogan nga Kristiano durante ha paghulat ha gab-i? Oo. Tigamni nga hi Jesus nagsiring nga an napulo nga birhen ‘ginpiraw ngan nanhingaturog’ han baga hin nalangan an pag-abot han karaslon nga lalaki. Maaram hi Jesus nga bisan kon andam ngan disidido an usa, mahimo ito manluya ngan diri makapokus samtang naghuhulat han iya pag-abot. Salit mas nangangalimbasog pa gud an magtinumanon nga dinihogan nga magpabilin nga mabinantayon. Ha parabola, an ngatanan nga birhen ginios han may nagsinggit: “Aadi na an karaslon nga lalaki!” Pero adton maaramon la nga mga birhen an nagpabilin nga mabinantayon. (Mat. 25:5, 6; 26:41) Durante hinin kataposan nga mga adlaw, an matinumanon nga mga dinihogan nagios liwat uyon ha singgit nga “Aadi na an karaslon nga lalaki!” Kombinsido gud hira ha marig-on nga mga ebidensya nga hirani na umabot hi Jesus ngan andam hira ha iya pag-abot. * Sunod, aton usisahon an kataposan nga bahin han parabola ni Jesus nga nakapokus ha mas espisipiko nga peryodo han panahon.

10. Ano nga pakiana an nabangon may kalabotan ha pag-istorya han maaramon ngan han diri maaramon nga mga birhen?

¹⁰ Ha ikatarapos han parabola, an diri maaramon nga mga birhen nangaro ha maaramon nga mga birhen hin lana para ha ira lampara. Pero waray hira tagi han maaramon nga mga birhen. (Basaha an Mateo 25:8, 9.) Salit nabangon an pakiana: “Ha kasaysayan han katawohan han Dios, may panahon ba nga nagdumiri an magtinumanon nga dinihogan ha pagbulig ha mga nanginginahanglan?” Hinumdumi an peryodo han panahon nga naaplikar an parabola. An Karaslon nga Lalaki, hi Jesus, maabot ha ikatarapos han daku nga kasakitan basi magpadapat hin paghukom. Salit, posible ba nga ini nga bahin han parabola nagtutudlok ha mahitatabo antes gud han kataposan han daku nga kasakitan? Posible ito tungod kay hito nga panahon an mga dinihogan nakakarawat na han ultimo nga pagselyo.

11. (a) Ano an mahitatabo antes gud han pagtikang han daku nga kasakitan? (b) Ano an iginpapasabot han maaramon nga mga birhen han ginsidngan nira an mga diri maaramon nga lumakat ngan pumalit hin lana?

¹¹ Salit, antes magtikang an daku nga kasakitan, nakarawat na han ngatanan nga matinumanon nga dinihogan ha tuna an ultimo nga pagselyo. (Pah. 7:1-4) Tikang hito nga panahon, sigurado na an ira paglaom. Pero hunahunaa an mga katuigan antes han daku nga kasakitan. Ano an mahitatabo ha mga dinihogan nga diri magpapabilin nga mabinantayon ngan diri magigin matinumanon? Mawawara an ira langitnon nga balos. Matin-aw nga diri hira makarawat han ultimo nga pagselyo antes han daku nga kasakitan. Hito nga panahon, didihogan an iba nga matinumanon. Ha pagtikang han kasakitan, bangin mahipausa an mga diri maaramon ha kabungkagan han Babilonya nga Gamhanan. Bangin hito la nga higayon nira masantop nga diri hira andam ha pag-abot han Karaslon nga Lalaki. Ano an mahitatabo kon mangaro hira hin bulig hito nga panahon? Ginbabaton ito han parabola ni Jesus. An maaramon nga mga birhen nagdumiri paghatag hin lana ha mga diri maaramon. Lugod, ginsidngan nira ito nga lumakat ngan pumalit. Pero, hinumdumi nga “katutnga [na adto] han gab-i.” May-ada pa ba nagbabaligya hin lana hito nga oras? Waray na. Urhi na gud ito!

12. (a) Durante han daku nga kasakitan, ano an makasurubo nga mahitatabo ha bisan hin-o nga dinihogan nga diri magpapabilin nga matinumanon antes han ultimo nga pagselyo? (b) Ano an mahitatabo hadton magigin pariho ha diri maaramon nga mga birhen?

¹² Ha pariho nga paagi, durante han daku nga kasakitan, an matinumanon nga mga dinihogan diri makakabulig hadton nagin diri matinumanon. Urhi na gud an ngatanan. Kon sugad, ano an mahitatabo ha mga diri matinumanon? Iginsumat ni Jesus an nahitabo ha diri maaramon nga mga birhen han lumakat ito basi pumalit hin lana: “Inabot an karaslon nga lalaki, ngan an mga birhen nga andam na inupod ha iya ngadto ha panagtawo ha kasal, ngan ginsadhan an purtahan.” Kon umabot na hi Jesus ha iya himaya ha ikatarapos han daku nga kasakitan, titirukon niya an iya magtinumanon nga dinihogan ngadto ha langit. (Mat. 24:31; 25:10; Juan 14:1-3; 1 Tes. 4:17) Oo, sarado na gud an purtahan para ha diri magtinumanon. Pariho ha diri maaramon nga mga birhen, bangin magsinggit liwat hira: “Ginoo, Ginoo, abrihi kami!” Pero ano an ibabaton ni Jesus? An iya baton pariho han iya isisiring ha damu hinduro nga sugad-kanding nga mga tawo hito nga panahon han paghukom: “Susumatan ko kamo han kamatuoran, diri ako nakilala ha iyo.” Makasurubo gud ito!—Mat. 7:21-23; 25:11, 12.

13. (a) Kay ano nga diri naton sadang hunahunaon nga damu han dinihogan nga mga sumurunod han Kristo an magigin diri matinumanon? (b) Kay ano nga an pahamangno ni Jesus nagpapakita han iya pagsarig ha mga dinihogan? (Kitaa an retrato ha tinikangan hini nga artikulo.)

¹³ May kalabotan ha aton mga ginhisgotan, iginpapasabot ba ni Jesus nga damu han mga dinihogan an magigin diri matinumanon ngan  kinahanglan saliwnan? Diri. Hinumdumi nga ha Mateo kapitulo 24, ginpahamangnoan niya an iya “matinumanon ngan maaramon nga uripon” nga diri magin maraot nga uripon. Diri ini nagpapasabot nga ginlalaoman niya nga magigin maraot an mga dinihogan. Ha pariho nga paagi, ini nga parabola usa nga mapwersa nga pahamangno. Sugad la nga lima nga birhen an maaramon ngan lima an diri maaramon, an tagsa nga dinihogan may kagawasan ha pagpili nga magin andam ngan mabinantayon o magin diri maaramon ngan diri matinumanon. Hi apostol Pablo naghatag hin pariho nga pahamangno ha iya dinihogan nga kabugtoan. (Basaha an Hebreo 6:4-9; itanding an Deuteronomio 30:19.) Tigamni nga marig-on gud an pahamangno ni Pablo, pero iginpahayag liwat niya an iya pagsarig nga “may-ada mas maopay nga mga butang” nga ira makakarawat. An pahamangno ha parabola ni Jesus nagpapakita liwat nga may-ada hiya pagsarig ha mga dinihogan. Maaram an Kristo nga an tagsa nga dinihogan mahimo makapabilin nga matinumanon ngan makakarawat han makalilipay nga balos!

14. Kay ano nga makakapahimulos liwat an “iba nga mga karnero” ha parabola mahitungod han napulo nga birhen?

¹⁴ Tungod kay an parabola ni Jesus nakapokus ha mga dinihogan, sadang ba naton hunahunaon nga diri makakapahimulos hito an “iba nga mga karnero” han Kristo? (Juan 10:16) Diri! Tigamni nga simple an mensahe han parabola: “Padayon kamo nga magbantay.” Naaplikar la ba ito ha mga dinihogan? Makausa, hi Jesus nagsiring: “An akon ginyayakan ha iyo, ginyayakan ko ha ngatanan: Padayon nga magbantay.” (Mar. 13:37) Gin-oobligar ni Jesus an ngatanan niya nga sumurunod nga magin andam ngan mabinantayon. Ngan mahimo subaron han ngatanan nga Kristiano an maopay nga susbaranan han mga dinihogan nga gin-uuna ha ira kinabuhi an ministeryo. Sadang liwat naton hinumdoman nga an diri maaramon nga mga birhen nangaro hin lana ha maaramon nga mga birhen. Nagpapahinumdom ito ha aton nga waray bisan hin-o nga mahimo magin matinumanon para ha aton, magpabilin ha kamatuoran para ha aton, o magin mabinantayon para ha aton. An tagsa ha aton maatubang ha matadong nga Hukom nga ginpili ni Jehova. Kinahanglan magin andam kita. Hirani na gud hiya umabot!

15. Kay ano nga makalilipay para ha ngatanan nga Kristiano an kasal han Kristo ha iya maarasawa?

¹⁵ An ngatanan nga Kristiano makakapahimulos liwat ha importante nga panhitabo ha parabola ni Jesus. Aw, hin-o ba ha aton an diri nalilipay pagpamulat hiton tiarabot nga kasal? An mga dinihogan makadto ha langit. Katapos han Armagedon, ikakasal hira ha Kristo. (Pah. 19:7-9) An ngatanan dinhi ha tuna makakapahimulos hito nga kasal ha langit tungod kay naggagarantiya ito hin hingpit nga gobyerno para ha ngatanan. Anoman an aton paglaom—ha langit man o ha tuna—magin determinado kita nga magin andam ngan magpabilin nga mabinantayon. Kon bubuhaton naton ito, mapapahimulosan naton an urusahon nga tidaraon nga igin-andam ni Jehova para ha aton!