1. Kay ano nga kinahanglan naton tipigan nga marig-on an aton relasyon kan Jehova?

BAWTISMADO ka ba nga Saksi ni Jehova? Kon oo, may-ada ka presyoso nga panag-iya—an imo personal nga relasyon ha Dios. Pero ito nga relasyon mahimo magluya tungod ha mga pagsulay han kalibotan ni Satanas pati han aton mismo pagkadiri-hingpit. Salit, kinahanglan tipigan han ngatanan nga Kristiano an marig-on gud nga relasyon kan Jehova.

2. (a) Ano an kahulogan han relasyon? (Kitaa an footnote.) (b) Paonan-o naton mapaparig-on an aton relasyon kan Jehova?

² Mationan-o katinuod ha imo an imo relasyon kan Jehova? Karuyag mo ba ito parig-unon? Ginsusumatan kita han Santiago 4:8 kon paonan-o ito bubuhaton: “Magin duok kamo ha Dios, ngan magigin duok hiya ha iyo.” Tigamni nga ikaw ngan hi Jehova an nahiuupod hito. * Samtang nangangalimbasog kita nga magin duok ha Dios, nagios liwat hiya basi magin duok ha aton. Kon pirme naton  ito bubuhaton, magigin mas marig-on an aton relasyon ha iya. Sugad nga resulta, magigin tinuod gud ha aton ito nga relasyon. Aabaton liwat naton an pagsarig nga inabat ni Jesus han hiya nagsiring: “An nagpakanhi ha akon amo an matuod. . . . . Nakilala ako ha iya.” (Juan 7:28, 29, Baraan nga Kasuratan) Kondi, ano an kinahanglan mo buhaton basi magin duok ka kan Jehova?

3. Paonan-o kita nakikiistorya kan Jehova, ngan paonan-o hiya nakikiistorya ha aton?

³ An regular nga komunikasyon kan Jehova importante nga bahin basi magin duok ha iya. Paonan-o ka makikigkomunikar ha iya? Aw, paonan-o ka nakikigkomunikar ha usa nga sangkay nga aadto ha hirayo nga lugar? Posible nga agsob kamo magsuratay ngan mag-istorya ha telepono. Nakikiistorya ka kan Jehova pinaagi han imo agsob nga pag-ampo ha iya. (Basaha an Salmo 142:2.) Ngan gintutugotan mo hi Jehova nga makiistorya ha imo kon regular nga ginbabasa ngan ginpapamalandong mo an iya Pulong. (Basaha an Isaias 30:20, 21.) Aton hisgotan kon paonan-o ini nga komunikasyon niyo nga duha ni Jehova magpaparig-on han imo relasyon ha iya ngan mabulig ha imo nga abaton nga tinuod hiya nga Sangkay.

4, 5. Paonan-o nakikigkomunikar hi Jehova ha imo pinaagi han iya Pulong? Paghatag hin ehemplo.

⁴ Sigurado nga mauyon ka nga an Biblia nagsusulod han mensahe han Dios para ha katawohan ha kabug-osan. Pero iginpapakita ba liwat han Biblia kon paonan-o ka personal nga magigin duok kan Jehova? Oo. Paonan-o? Samtang regular nga ginbabasa ngan gin-aadman mo an Biblia, tagda an imo reaksyon ha mga ginsisiring hito ngan hunahunaa kon paonan-o mo ito maiaaplikar. Hini nga paagi, gintutugotan mo hi Jehova nga makiistorya ha imo ngan mabulig ini nga magin mas duok ka ha iya.—Heb. 4:12; San. 1:23-25.

⁵ Pananglitan, basaha ngan pamalandonga an ginsiring ni Jesus nga “ayaw na kamo pagtinirok hin bahandi ha tuna.” Kon ginbubuhat mo na an imo gimaopayi ha pag-una kan Jehova ha imo kinabuhi, aabaton mo nga nalilipay hiya ha imo. Pero, kon nasantop mo nga kinahanglan mo pasimplihon an imo kinabuhi ngan mas magpokus ha pag-alagad, ginbubuligan ka ni Jehova nga makita an usa nga butang nga kinahanglan mo pauswagon basi magin mas duok ka ha iya.—Mat. 6:19, 20.

6, 7. (a) Paonan-o an pag-aram ha Biblia nakakaapekto ha aton gugma kan Jehova ngan ha iya gugma ha aton? (b) Ano an sadang naton magin tumong ha pag-aram han Biblia?

⁶ An pag-aram ha Biblia diri la nabulig ha  aton nga makita an mga bahin nga kinahanglan naton pauswagon may kalabotan ha aton pag-alagad kan Jehova. Nabulig liwat ito nga maghilarom an aton apresasyon ha iya makaruruyag nga personalidad ngan pamaagi, salit mas ginhihigugma naton hiya. Ngan samtang naghihilarom an aton gugma ha iya, naghihilarom liwat an iya gugma ha aton. Tungod hito, nagigin mas marig-on an aton relasyon ha iya.—Basaha an 1 Corinto 8:3.

⁷ Pero basi magin duok kan Jehova, kinahanglan may-ada kita husto nga tumong ha pag-aram ha Biblia. An Juan 17:3 nasiring: “Nangangahulogan ini hin kinabuhi nga waray kataposan, an ira pagkilala ha imo, an amo la nga totoo nga Dios, ngan ha imo ginsugo, hi Jesu-Kristo.” Salit, an aton tumong ha pag-aram kinahanglan diri la an pagkaada kahibaro kondi an “pagkilala” kan Jehova hin mas maopay sugad nga Persona.—Basaha an Eksodo 33:13; Sal. 25:4.

8. (a) Ano an mahimo hunahunaon han pipira mahitungod ha ginbuhat ni Jehova kan Hadi Asaria? (b) Kon kilala mo hi Jehova, ano an imo aabaton mahitungod ha iya mga ginbubuhat?

⁸ Kon kilala gud naton hi Jehova, diri kita mababaraka kon diri iginsasaysay han Biblia an rason kon kay ano nga ginbuhat niya an usa nga butang. Pananglitan, ano an imo reaksyon ha ginbuhat ni Jehova kan Hadi Asaria han Juda? (2 Hadi 15:1-5) Tigamni nga bisan kon “an katawohan ha gihapon naghalad ngan nagsunog han insenso didto ha higtaas nga mga lugar,” hi Asaria padayon nga “nagbuhat hadton matadong ha paniplatan ni Jehova.” Kondi “hinampak ni Jehova an hadi, . . . nga hiya nasanlahon ngada ha adlaw ha iya kamatay.” Kay ano? Waray ginsiring an asoy. Sadang ba kita mabaraka o maghunahuna nga ginsirotan ni Jehova hi Asaria nga waray makatadunganon nga hinungdan? Diri naton ito huhunahunaon kon kilala gud naton hi Jehova. Maaram kita nga pirme husto an iya disiplina. (Jer. 30:11) Salit bisan kon diri kita maaram kon kay ano nga ginsirotan ni Jehova hi Asaria, sigurado kita nga matadong an Iya desisyon.

9. Ano nga mga detalye an nabulig ha aton nga masabtan kon kay ano nga ginsirotan ni Jehova hi Asaria hin liprosi?

⁹ An Biblia naghahatag hin dugang nga detalye mahitungod kan Hadi Asaria, nga kilala liwat sugad nga hi Hadi Usiya. (2 Hadi 15:7, 32) Ha asoy ha 2 Kronikas 26:3-5, 16-21 (Maupay nga Sumat), hibabaroan naton nga bisan kon ha pipira ka panahon hi Usiya ‘nagbuhat han nakakalipay’ kan Jehova, ha urhi “nagmapinahitas-on hiya ngan nagdalan ini ngadto han iya pagkapukan.” Ginbuhat niya an usa nga butang nga mga saserdote la an sadang magbuhat. Otsenta-y-uno nga saserdote an nagsaway ngan nangalimbasog pagtadong ha iya. Ano an iya reaksyon? Nagpahitaas gud hiya. “Nasina hiya” ha mga saserdote. Diri urusahon nga ginsirotan hiya ni Jehova hin sanla o liprosi.

10. Kay ano nga diri naton kinahanglan pirme hibaroan an mga hinungdan han mga ginbubuhat ni Jehova? Paonan-o maghihilarom an aton pagsarig nga pirme ginbubuhat ni Jehova an husto?

¹⁰ Ano nga importante nga leksyon an aton hibabaroan? Ha asoy mahitungod kan Hadi Asaria may-ada kita igo nga detalye nga nabulig ha aton nga masabtan kon kay ano nga ginsirotan hiya ni Jehova. Pero kumusta man kon diri gin-uunabi han Biblia an ngatanan nga detalye, ano an imo reaksyon? Kukwestyunon mo ba an pagkamatadong ni Jehova? O huhunahunaon mo nga an Biblia may-ada igo nga impormasyon nga nagpapasarig ha aton nga pirme ginbubuhat ni Jehova an husto? (Deut. 32:4) Samtang mas nakikilala naton hi Jehova sugad nga Persona, mas naghihilarom an aton gugma ngan pagsarig ha iya. Ngan diri mo na kinahanglan hibaroan an mga hinungdan han  ngatanan niya nga ginbubuhat. Samtang gin-aadman mo an Biblia, magigin mas tinuod ha imo hi Jehova ngan magigin mas duok ka ha iya.—Sal. 77:12, 13.

11-13. Paonan-o kita nahibaro nga namamati hi Jehova ha mga pag-ampo? (Kitaa an retrato ha tinikangan hini nga artikulo.)

¹¹ Pinaagi ha pag-ampo, nagigin duok kita kan Jehova. Gindadayaw naton hiya, ginpapasalamatan, ngan ginhahangyo nga giyahan kita. (Sal. 32:8) Pero basi magin duok ka kan Jehova, kinahanglan kombinsido ka nga namamati hiya ha mga pag-ampo.

¹² Para ha pipira, nagpapaopay la han pag-abat an pag-ampo. Natoo hira nga nabulig la ito ha imo nga hunahunaon hin maopay an imo problema, ngan makabiling hin kalugaringon nga solusyon. Tinuod, an pag-ampo mahimo makabulig ha imo hito nga paagi. Pero kon nag-aampo ka kan Jehova, namamati gud hiya ha imo. Paonan-o ka makakasiguro hito?

¹³ Tagda ini: Antes magin tawo, naobserbaran mismo ni Jesus kon paonan-o ginbaton ni Jehova an mga pag-ampo han Iya mga surugoon ha tuna. Ngan durante han ministeryo ni Jesus ha tuna, nag-ampo hiya ha iya Amay ha langit basi isumat an iya panhunahuna ngan mga pagbati. Bubuhaton ba niya ito—nag-ampo pa ngani hiya hin bug-os nga gab-i—kon naghunahuna hiya nga diri namamati hi Jehova? (Luc. 6:12; 22:40-46) Tututdoan ba niya an iya mga disipulo nga mag-ampo kon naghunahuna hiya nga nagpapaopay la ito han pag-abat? Matin-aw, maaram hi Jesus nga an pag-ampo tinuod nga komunikasyon kan Jehova. Nagsiring pa ngani hi Jesus: “Amay, nagpapasalamat ako ha imo nga ginpapamatian mo ako. Maaram ako nga ginpapamatian mo ako pirme.” Makakasarig liwat kita nga namamati gud hi Jehova ha aton mga pag-ampo.—Juan 11:41, 42; Sal. 65:2.

14, 15. (a) Paonan-o kita nagpapahimulos kon espisipiko an aton mga pag-ampo? (b) Paonan-o nakabulig kan Kathy an pag-ampo basi magin duok hiya kan Jehova?

¹⁴ Kon espisipiko an imo mga pag-ampo, mahibabaroan mo dayon an baton hito ni Jehova, bisan kon bangin diri ito abat. Kon nakikita mo nga ginbabaton ni Jehova an imo mga pag-ampo, nagigin mas tinuod hiya ha imo. Dugang  pa, samtang mas iginpapahayag mo ha iya an imo gihilarumi nga mga pagbati, magigin mas duok hiya ha imo.

¹⁵ Tagda an eksperyensya ni Kathy. * Bisan kon regular hiya nga nakikigbahin ha ministeryo, diri hiya nalilipay hito. Hiya nagsiring: “Diri ko karuyag an pagsangyaw. Karuyag ko sidngon, nadiri gud ako hito. Han nagretiro ako ha trabaho, ginsidngan ako han usa nga tigurang nga unta magregular payunir ako; gintagan pa ngani niya ako hin aplikasyon. Nagdesisyon ako magpayunir, pero adlaw-adlaw liwat ako nga nag-ampo nga buligan ako ni Jehova nga maruyagan ko an pagsangyaw.” Ginbaton ba ni Jehova an iya pag-ampo? Hiya nagsiring: “Tulo ka tuig na ako nga payunir. Tungod ha paggahin hin dugang nga panahon ha ministeryo ngan ha paghibaro tikang ha iba nga sister, hinay-hinay nga nag-uswag an akon abilidad ha pagsangyaw. Yana, diri la ako naruruyag ha pagsangyaw—nalilipay gud ako hito. Dugang pa, mas duok na gud an akon relasyon kan Jehova yana.” Oo, an mga pag-ampo ni Kathy nakabulig ha iya nga magin tinuod an iya relasyon kan Jehova.

16, 17. (a) Ano an kinahanglan naton buhaton basi padayon nga magin marig-on an aton relasyon kan Jehova? (b) Ano an aton hihisgotan ha sunod nga artikulo?

¹⁶ An pagpangalimbasog nga magin mas duok kan Jehova sadang magpadayon ha aton bug-os nga kinabuhi. Kinahanglan gumios kita basi magin duok kan Jehova kon karuyag naton nga gumios liwat hiya basi magin duok ha aton. Salit, tipigan naton an regular nga komunikasyon ha iya pinaagi ha pag-aram ha Biblia ngan pag-ampo. Kon bubuhaton naton ito, an aton relasyon kan Jehova magigin mas marig-on pa gud, ngan mabulig ito ha aton nga malamposan an mga pagsari.

¹⁷ Pero usahay, bangin magpadayon an mga problema bisan pa han aton sinsero nga mga pag-ampo. Ha sugad nga mga panahon, bangin hinay-hinay nga mawara an aton pagsarig kan Jehova. Bangin magruhaduha kita kon namamati gud ba hiya ha aton mga pag-ampo ngan kon gintatagad gud ba kita niya nga sangkay. Kon naabat ka hin sugad hito, ano an mahimo mo buhaton? Mabubuligan ka han sunod nga artikulo.