1, 2. Ano an naobserbaran han mga paramangno han sirkito ha damu nga kongregasyon?

MATATAPOS na an pakigmiting han paramangno han sirkito ha lawas han mga tigurang. Samtang ginkikita niya hira, inabat hiya hin hilarom nga gugma para hinin maduruto nga kabugtoan, nga an iba lagas na ngan sugad na hin iya tatay. Pero may-ada liwat hiya ginkakabarak-an, salit nagpakiana hiya, “Mga kabugtoan, ano na an iyo nahimo ha pagbansay ha iba basi magin kwalipikado para hin dugang nga responsabilidad ha kongregasyon?” Nahinumdoman han mga tigurang nga ginsagda hira han paramangno han sirkito ha iya naglabay nga pagbisita nga maggahin hin panahon ha pagbansay ha iba. Usa nga tigurang an nagsiring, “Ha tinuod la, haros diri namon ito nahihimo.” Inuyon hito an iba pa nga tigurang.

² Kon usa ka nga tigurang, bangin sugad gihap hito an imo baton. Naobserbaran han mga paramangno han sirkito ha iba-iba nga  nasud nga ha damu nga kongregasyon, kinahanglan maggahin an mga tigurang hin dugang nga panahon ha pagbansay ha kabugtoan nga kalalakin-an—batan-on man o may edad—basi makabulig pag-ataman ha kongregasyon. Pero bangin diri gud ini masayon. Kay ano?

3. (a) Paonan-o iginpapakita han Kasuratan nga importante an pagbansay ha iba, ngan kay ano nga kita ngatanan sadang magin interesado hito? (Kitaa an footnote.) (b) Kay ano nga bangin makuri para ha pipira nga tigurang an pagbansay ha iba?

³ Sugad nga tigurang, sigurado nga maaram ka nga importante gud an pagbansay ha iba. * Maaram ka nga kinahanglan an dugang nga kabugtoan nga kalalakin-an basi an mga kongregasyon magpabilin nga marig-on ha espirituwal ngan basi makagporma hin bag-o nga mga kongregasyon. (Basaha an Isaias 60:22.) Maaram ka liwat nga ginsasagda ka han Biblia nga ‘magtutdo ha iba.’ (Basaha an 2 Timoteo 2:2.) Pero bangin makurian ka ha pagbuhat hito pariho han mga tigurang nga gin-unabi kanina. Tungod ha pag-asikaso han panginahanglan han imo pamilya, han imo trabaho, responsabilidad ha kongregasyon, ngan iba pa nga importante nga butang, baga hin waray ka na panahon ha pagbansay ha iba. Salit hisgotan naton kon kay ano nga importante an paggahin hin panahon ha pagbansay ha iba ha kongregasyon.

4. Usahay, kay ano nga ginlalangan han mga tigurang an pagbansay ha iba?

⁴ Kay ano nga bangin makuri para ha pipira nga tigurang an paggahin hin panahon ha pagbansay ha iba? An iba bangin naghuhunahuna: ‘Importante an pagbansay, pero may iba nga butang ha kongregasyon nga mas kinahanglan unahon. Kon diri ko dayon bansayon an iba, diri man maaapektohan an kongregasyon.’ Tinuod, may mga butang nga kinahanglan mo asikasuhon dayon, pero an paglangan ha pagbansay ha iba mahimo makadaot han espirituwalidad han kongregasyon.

5, 6. Ano an aton hibabaroan ha ehemplo han usa nga drayber ngan ha iya pagmintinar han iya sarakyan? Paonan-o naton ini maipapariho ha pagbansay han mga tigurang ha iba?

⁵ Tagda ini nga ehemplo: Maaram an usa nga drayber nga basi mamintinar an iya sarakyan ngan matipigan nga maopay an kondisyon han makina hito, kinahanglan niya regular nga liwanan an asyete. Pero bangin abaton niya nga mas kinahanglan niya unahon an pagpagasolina, tungod kay diri na madalagan an iya sarakyan kon diri hiya magpagasolina. Bangin maghunahuna hiya, ‘Kon diri ako makagliwan han asyete, madalagan pa man gihapon an sarakyan.’ Kondi kay ano nga peligroso ito? Kon pirme maglalangan an drayber ha pagliwan han asyete, diri mag-iiha, madadaot an iya sarakyan. Kon mahitabo ito, magkikinahanglan hiya hin daku nga panahon ngan kwarta ha pagpaayad han iya sarakyan. Ano an leksyon?

⁶ Damu an importante nga buruhaton han mga tigurang nga kinahanglan asikasuhon dayon; kay kon diri, maaapektohan gud an kongregasyon. Pariho han drayber nga kinahanglan pirme magpagasolina, kinahanglan liwat han mga tigurang nga ‘siguruhon an mas importante nga mga butang.’ (Fil. 1:10) Pero an iba nga tigurang bangin sagipo hinduro ha importante nga mga butang nga tungod hito waray na hira panahon ha pagbansay ha iba—an pagmintinar han makina, siring pa. Kondi kon padayon nga maglalangan an mga tigurang ha pagbansay ha iba, diri mag-iiha, magkukulang hin kwalipikado nga kabugtoan nga kalalakin-an nga  mag-aasikaso han mga buruhaton ha kongregasyon.

7. Ano an sadang naton magin pagtagad ha mga tigurang nga naggagahin hin panahon ha pagbansay ha iba?

⁷ Matin-aw, diri gud naton sadang hunahunaon nga diri prayoridad an pagbansay ha iba. An mga tigurang nga naghuhunahuna han makakaopay han kongregasyon ha tidaraon ngan naggagahin hin panahon ha pagbansay ha iba maaramon nga mga surugoon ngan bendisyon gud ha kongregasyon. (Basaha an 1 Pedro 4:10.) Paonan-o nakakapahimulos an kongregasyon?

8. (a) Ano nga mga hinungdan an nag-aaghat ha mga tigurang ha pagbansay ha iba? (b) Ano nga responsabilidad an kinahanglan buhaton dayon han mga tigurang nga binalhin ha lugar nga mas daku an panginahanglan? (Kitaa an kahon nga “ Usa nga Misyon nga Kinahanglan Buhaton Dayon.”)

⁸ Sadang mapainubsanon nga karawaton bisan hadton eksperyensyado gud nga mga tigurang nga samtang nagtitikalagas hira, hinay-hinay nga nalilimitahan an ira nahihimo para ha kongregasyon. (Mika 6:8) Dugang pa, sadang nira hunahunaon nga an panahon ngan diri ginlalaoman nga mga panhitabo mahimo tigda nga makagbag-o han ira kapas ha pagtuman han ira responsabilidad ha kongregasyon. (Ekles. 9:11, 12; San. 4:13, 14) Salit tungod ha gugma ngan pagtagad ha katawohan ni Jehova, nangangalimbasog gud an mga tigurang ha pagtutdo ha burobata nga kabugtoan nga kalalakin-an han ira hinbaroan durante han ira matinumanon nga pag-alagad.—Basaha an Salmo 71:17, 18.

9. Importante an pagbansay tungod ha ano nga panhitabo ha tidaraon?

⁹ Ano an usa pa nga hinungdan nga bendisyon ha panon an mga tigurang nga nagbabansay ha iba? Ginpaparig-on nira an kongregasyon. Ha ano nga paagi? Tungod han ira pagbansay ha iba, nagkakaada dugang nga kabugtoan nga kalalakin-an nga andam pagbulig ha kongregasyon basi magin marig-on ngan nagkakaurosa ito, diri la yana kondi labi na durante han daku nga kasakitan. (Esek. 38:10-12; Mika 5:5, 6) Salit hinigugma nga mga tigurang, ginhahangyo namon kamo nga regular nga maggahin hin panahon ha pagbansay ha iba tikang yana.

10. Basi magkaada panahon ha pagbansay ha iba, ano an bangin kinahanglan buhaton han usa nga tigurang?

¹⁰ Nasasabtan namon nga puno na an imo eskedyol tungod han importante nga mga buruhaton ha kongregasyon. Salit bangin kinahanglan mo ibanan an panahon nga imo ginagamit para hito basi magkaada ka panahon ha pagbansay ha iba. (Ekles. 3:1) Ha pagbuhat hini, maaramon nga ginagamit mo an imo panahon.

11. (a) Ano an makapainteres may kalabotan han mga suhestyon mahitungod ha pagbansay nga iginhatag han mga tigurang tikang ha iba-iba nga nasud? (b) Sumala ha Proberbios 15:22, kay ano nga mapulsanon an paghisgot han mga suhestyon han iba nga mga tigurang?

¹¹ Hinin bag-o la, may mga tigurang nga malampuson ha pagbansay ha iba an ginpakianhan kon paonan-o nira ito ginhihimo. * Bisan kon iba-iba an kahimtang hini nga kabugtoan, parapriho gud an ira sagdon. Ano an iginpapakita hini? Iginpapakita hini nga an basado ha Biblia nga pagtutdo mapulsanon ha mga ginbabansay “ha tagsa nga kongregasyon ha bisan diin.” (1 Cor. 4:17) Salit hini ngan ha masunod nga artikulo, hihisgotan naton an pipira nga suhestyon hito nga mga tigurang.—Prob. 15:22.

12. Ano an kinahanglan iandam han tigurang, ngan kay ano?

 ¹² An usa nga tigurang kinahanglan mag-andam hin angayan nga mga kahimtang para ha pagbansay. Sugad la nga kinahanglan iandam han hardinero an tuna antes tamnan, kinahanglan iandam anay han tigurang an kasingkasing han iya babansayon antes tutdoan. Salit paonan-o iaandam han tigurang an angayan nga mga kahimtang para ha pagbansay? Pinaagi ha pagsubad han ginbuhat han usa nga propeta ha kadaan nga panahon. Ano ito?

13-15. (a) Ano nga toka an nakarawat ni propeta Samuel? (b) Paonan-o gintuman ni Samuel an iya toka? (Kitaa an retrato ha tinikangan hini nga artikulo.) (c) Kay ano nga mapulsanon ha mga tigurang yana ini nga asoy ha Biblia mahitungod kan Samuel?

¹³ Usa ka adlaw, mga 3,000 ka tuig na an naglabay, ginsidngan ni Jehova an edaran na nga hi propeta Samuel: “Buwas ha sugad hini nga takna akon ipadadara ha imo in usa ka tawo tikang ha tuna ha Benjamin, ngan imo hiya dihogan ha pagkaprinsipe ha bawbaw han akon katawohan [nga] Israel.” (1 Sam. 9:15, 16) Nasantop ni Samuel nga natapos na an iya papel sugad nga lider ngan gintokahan hiya ni Jehova nga dihogan an masaliwan ha iya. Bangin naghunahuna hi Samuel, ‘Paonan-o ko iaandam ito nga tawo para ha iya toka?’ Nagkaada hiya ideya ngan naghimo hin plano.

¹⁴ Kinabuwasan, han nakita ni Samuel hi Saul, ginsidngan ni Jehova an propeta: “Kitaa, an tawo.” Katapos, ginbuhat gud ni Samuel an iya plano. Gin-imbitar niya hi Saul ngan an iya surugoon ha pangaon ngan iginhatag ha ira an pinakamaopay nga mga lingkoran ngan pinakamaopay nga parti han karne. Hi Samuel nagsiring: “Kaona ini. Ginggahin ko ini para ha imo basi kaonon mo hini nga takna.” Katapos, iya gin-imbitar hi Saul ha iya balay. Samtang nagbabaktas, nagkaada hira hin makalilipay nga pag-istorya. Pag-abot nira ha balay ni Samuel, kinadto hira ha atop, ngan hi Samuel padayon nga ‘nakighimangraw kan Saul didto ha bawbaw han balay’ tubtob han ira pangaturog. Kinabuwasan, gindihogan ni Samuel hi Saul, ginharokan hiya, ngan gintagan hin dugang nga instruksyon. Kahuman, ginpalakat niya hi Saul nga andam na ha sunod nga mga mahitatabo.—1 Sam. 9:17-27; Maupay nga Sumat; 10:1.

¹⁵ Syempre, an pagdihog ha usa basi magin lider han nasud diri pariho ha pagbansay ha usa basi magin tigurang o ministeryal nga surugoon ha kongregasyon. Bisan pa hito, an mga tigurang may mahibabaroan nga mapulsanon nga mga leksyon ha ginhimo ni Samuel. Hisgotan naton an duha hito.

16. (a) Ano an inabat ni Samuel han nagsiring an mga Israelita nga karuyag nira hin hadi? (b) Ano an nagin disposisyon ni Samuel han gintuman niya an iya toka ha pagdihog kan Saul?

¹⁶ Magin andam, ayaw pag-alang. Han hinbatian ni Samuel nga karuyag han mga Israelita hin tawo nga hadi, nasubo hiya ngan inabat nga ginsalikway hiya han katawohan. (1 Sam. 8:4-8) Ngani, nadiri gud hiya han karuyag han katawohan salit tulo ka beses nga ginsidngan hiya ni Jehova nga mamati ha ira. (1 Sam. 8:7, 9, 22) Bisan pa hito, waray hiya mangabugho o masina ha tawo nga masaliwan ha iya sugad nga lider. Han ginsugo hiya ni Jehova nga dihogan hi Saul, waray hiya pag-alang. Kinaburut-on nga ginsunod niya ito diri la tungod kay kinahanglan niya ito buhaton, kondi tungod kay hinigugma niya hi Jehova.

17. Paonan-o ginsusubad han mga tigurang yana an disposisyon ni Samuel, ngan ano an ira inaabat ha pagbuhat hito?

¹⁷ Pariho kan Samuel, an eksperyensyado nga mga tigurang yana nagbabansay ha iba ha mahigugmaon nga paagi. (1 Ped. 5:2) Diri hira nag-aalang ha pagbansay ha iba tungod ha kahadlok nga maibanan an ira mga pribilehiyo  ha kongregasyon. Gintatagad han buotan nga mga tigurang an ira ginbabansay diri sugad nga mga kakompetensya, kondi sugad nga “mga igkasi-magburuhat”—presyoso nga mga regalo ha kongregasyon. (2 Cor. 1:24; Heb. 13:16) Ngan nalilipay gud inin diri makikalugaringon nga mga tigurang kon ginagamit han mga ginbabansay an ira mga abilidad para ha kapulsanan han kongregasyon.—Buh. 20:35.

18, 19. Paonan-o maiaandam han tigurang an kasingkasing han iya babansayon, ngan kay ano nga importante an pagbuhat hito?

¹⁸ Magin usa nga sangkay, diri la parabansay. Han nakita ni Samuel hi Saul, puydi unta hiya kumuha dayon hin lana, ibubo ito ha ulo ni Saul, ngan palakton hiya sugad nga bag-o nga dinihogan nga hadi—pero diri gud andam ha iya toka. Lugod, gin-andam anay ni Samuel an kasingkasing ni Saul. Antes niya dihogan hi Saul, nangaon hira, nagbaktas nga malipayon, nag-istorya hin maiha, ngan nagpahuway. Naghulat hi Samuel han angayan nga panahon ha pagdihog ha bag-o nga hadi.

¹⁹ Ha pariho nga paagi, antes tikangan han tigurang an pagbansay, sadang anay hiya maggahin hin panahon ha pakigsangkay ha iya babansayon. Iba-iba an paagi nga mahimo buhaton han mga tigurang basi magin komportable ha ira an ira ginbabansay, depende ha kahimtang ngan kultura. Pero diin ka man naukoy, kon naggagahin ka hin panahon para ha imo ginbabansay bisan kon sagipo ka, sugad hin ginsisidngan mo hiya, “Importante ka ha akon.” (Basaha an Roma 12:10.) Sigurado nga aabaton ito han imo ginbabansay ngan papabilhan gud niya ito.

20, 21. (a) Paonan-o mo ihuhulagway an usa nga malampuson nga parabansay? (b) Ano an hihisgotan ha sunod nga artikulo?

²⁰ Mga tigurang, alayon hinumdumi: An malampuson nga parabansay diri la adton naruruyag pagtutdo ha iba kondi adton nahigugma liwat ha ira ginbabansay. (Itanding an Juan 5:20.) Kon inaabat han imo ginbabansay an imo gugma ha iya, magigin andam gud hiya ha pagkarawat han imo pagtutdo. Salit hinigugma nga mga tigurang, pangalimbasog nga diri la magin parabansay kondi magin usa liwat nga sangkay.—Prob. 17:17; Juan 15:15.

²¹ Katapos iandam an kasingkasing han ginbabansay, mahimo na hiya tutdoan han tigurang. Ano nga pamaagi an mahimo gamiton han tigurang? Hihisgotan ito ha sunod nga artikulo.