1-3. Paonan-o naparig-on an pagsarig ni Pablo kan Jehova? (Kitaa an retrato hini nga pahina.)

PELIGROSO adto nga panahon para ha mga Kristiano ha Roma. Gintitimaraot gud hira han mga Romano tungod kay hira an gintatahapan nga nagpatikang han sunog ha syudad han 64 C.E. ngan gin-aakusaran nga napupungot hira ha mga tawo. Damu ha ira an gin-aresto. An iba ginkuniskunis hin mga hayop, samtang an iba iginraysang ha kahoy ngan ginsunog nga buhi basi magin panpalamrag ha gab-i. Kon usa ka nga Kristiano han siyahan nga siglo, kada adlaw maaram ka nga puydi liwat ito mahitabo ha imo.

² Posible nga hinin makuri nga panahon napriso hi apostol Pablo ha Roma ha ikaduha nga higayon. Bubuligan ba hiya han iya Kristiano nga kabugtoan? Posible nga nagruhaduha hiya, kay nagsurat hiya kan Timoteo: “Ha akon siyahan nga pagdepensa waray dinapig ha akon, lugod ginbayaan ako nira ngatanan—hinaot diri hira magkaada baratunon.” Bisan pa hito, nakakarawat hi Pablo hin bulig tikang kan Jesus. Hiya nagsurat: “Pero an Ginoo tinindog hirani ha akon ngan gintagan ako hin gahum.” Oo, gintagan ni Jesus hi Pablo  hin kusog nga iya ginkikinahanglan. Nagsurat pa ngani hi Pablo nga ‘gintalwas hiya tikang ha baba han leon.’—2 Tim. 4:16, 17. *

³ An paghinumdom hito nga eksperyensya sigurado nga nagparig-on kan Pablo ngan nakabulig ha iya nga sumarig nga paparig-unon hiya ni Jehova basi mailob an mga pagsari nga iya gin-aatubang ngan aatubangon pa. Ngani, hiya nagsiring: “An Ginoo magtatalwas ha akon tikang ha ngatanan nga karaotan.” (2 Tim. 4:18) Oo, kombinsido hi Pablo nga bisan kon waray kabugtoan nga makakabulig ha iya, makakasarig hiya nga pirme hiya bubuligan ni Jehova ngan ni Jesus!

4, 5. (a) Hin-o an pirme makakahatag han imo ginkikinahanglan nga bulig? (b) Paonan-o mo mapaparig-on an imo relasyon kan Jehova?

⁴ Nagkaada ka na ba makuri nga problema ngan inabat mo nga nag-usahan ka la ha pag-atubang hito? Bangin nawad-an ka hin trabaho, inatubang hin pagsulay ha eskwelahan, nagkaada grabe nga sakit, o iba pa nga makuri nga problema. Bangin nangaro ka hin bulig ha iba kondi nasubo ka tungod kay waray nira maihatag an imo ginkikinahanglan nga bulig. Syempre may mga problema nga diri masusulbad han tawo. Hito nga mga kahimtang, ano an imo bubuhaton? An Biblia nag-aaghat ha aton nga ‘sumarig kan Jehova.’ (Prob. 3:5, 6) Pero makakasiguro ka ba nga bubuligan ka niya? Oo! Nabulig gud hi Jehova, sugad han iginpapakita han damu nga asoy ha Biblia.

⁵ Salit imbes nga masubo kon baga hin diri naihahatag han mga tawo an bulig nga imo ginkikinahanglan, tagda ito nga mga sitwasyon sugad han pagtagad ni apostol Pablo—mga higayon nga sumarig hin bug-os kan Jehova ngan maeksperyensyahan mismo an iya mahigugmaon nga pagmangno. Magpaparig-on ini han imo pagsarig ngan relasyon ha iya.

6. Kay ano nga bangin diri masayon an pagsarig kan Jehova labi na kon nakakaeksperyensya kita hin makuri nga problema?

⁶ Bangin may-ada ka makuri nga problema. Ginbuhat mo na an ngatanan ngan nag-ampo ka na kan Jehova para hin bulig. Magigin murayaw na ba an imo hunahuna tungod kay nasarig ka nga bubuligan ka niya? Oo. (Basaha an Salmo 62:8; 1 Pedro 5:7.) Kinahanglan mahibaro kita pagsarig kan Jehova basi magkaada kita maopay nga relasyon ha iya. Kondi diri pirme masayon an pagbuhat hito. Kay ano? Usa nga hinungdan, tungod kay usahay diri dayon ginbabaton ni Jehova an aton mga pag-ampo.—Sal. 13:1, 2; 74:10; 89:46; 90:13; Hab. 1:2.

7. Kay ano nga usahay diri ginbabaton dayon ni Jehova an aton mga pag-ampo?

⁷ Kay ano nga diri dayon ginbabaton ni Jehova an tagsa naton nga hangyo? Hinumdumi nga an aton relasyon ha iya iginpariho niya ha relasyon han mag-amay. (Sal. 103:13) An anak diri makakalaom nga ihahatag han iya kag-anak an tagsa niya nga hangyo o ihahatag ito dayon. An iba nga hangyo han anak bangin lumalabay la. An iba hito bangin kinahanglan ihatag ha husto nga panahon. Ngan an iba bangin diri makakaopay ha anak ngan ha mga nahidadabi. Dugang pa, kon ihahatag dayon han kag-anak an tagsa nga hangyo han anak, an ira relasyon magigin pariho han kanan agaron ngan uripon, diin an anak an agaron. Ha pariho nga paagi, para ha aton kaopayan, bangin palabyon anay ni Jehova an pipira ka panahon antes niya ihatag an aton mga hangyo. Iya ito katungod sugad nga aton maaramon nga Maglalarang, mahigugmaon nga Agaron, ngan langitnon nga Amay. Kon ihahatag dayon niya an ngatanan naton nga hangyo, diri na magigin husto an  aton relasyon ha iya—kita na an iya magigin agaron.—Itanding an Isaias 29:16; 45:9.

8. Ano an pasarig ni Jehova may kalabotan ha aton personal nga mga limitasyon?

⁸ Hinumdumi liwat nga maaram gud hi Jehova han aton mga limitasyon. (Sal. 103:14) Salit, diri niya ginlalaoman nga maiilob naton an mga kakurian ha aton la kalugaringon nga kusog, lugod ginbubuligan kita niya. Oo, usahay inaabat naton nga diri na kita makakailob. Kondi ginpapasarig kita ni Jehova nga diri niya tutugotan nga mag-antos kita labaw han aton maiilob. Oo, ‘maghihimo hiya hin paagi nga makagawas kita.’ (Basaha an 1 Corinto 10:13.) Salit, may maopay kita nga hinungdan nga sumarig nga maaram gud hi Jehova kon tubtob diin an aton maiilob.

9. Ano an sadang naton buhaton kon diri dayon ginbabaton ni Jehova an aton pag-ampo para hin bulig?

⁹ Kon diri dayon ginbabaton ni Jehova an aton pag-ampo para hin bulig, kinahanglan kita magin mapailubon. Hinumdumi nga karuyag gud ni Jehova nga buligan kita, pero mapailubon nga naghuhulat hiya han husto nga panahon ha pagbulig ha aton. “Hi Jehova mahulat, nga hiya magmaloloy-on ha iyo; ngan tungod hito hiya pagpapahitas-on, nga hiya may maada kalooy ha iyo: kay hi Jehova amo an Dios ha kasubayan; bulahan hira ngatanan nga naghuhulat ha iya.”—Isa. 30:18.

10-12. (a) Kay ano nga bangin makuri an pag-ataman ha kapamilya nga may grabe nga sakit? (b) Paonan-o an pagsarig kan Jehova durante han magkuri nga panahon mahimo makaapekto ha aton relasyon ha iya? Iilustrar.

¹⁰ Kon nakakaeksperyensya hin duro nga kakurian, bangin abaton mo an gin-abat ni Pablo—nga aada ka o hirani ha “baba han leon.” Hini nga mga panahon, makuri gud an pagsarig kan Jehova, pero importante gud nga sumarig kita ha iya. Pananglitan, bangin nag-aataman ka hin kapamilya nga may grabe nga sakit. Posible nga nag-inampo ka para hin kinaadman ngan kusog. * Tungod kay ginbuhat mo na an ngatanan, diri ka ba magkakaada hin murayaw nga hunahuna ha paghibaro nga nakikita ni Jehova an imo kahimtang ngan itatagana niya an imo ginkikinahanglan nga bulig basi makailob?—Sal. 32:8.

¹¹ Pero bangin abaton mo nga diri ka ginbubuligan ni Jehova. Bangin iba-iba an opinyon han mga doktor. O bangin an imo mga kapamilya o paryente nga ginlalaoman mo nga mabulig ha imo, baga hin nakakadugang lugod han problema. Sarig pirme nga tatagan ka ni Jehova hin kusog. Padayon nga magin duok ha iya. (Basaha an 1 Samuel 30:3, 6.) Ha urhi, kon masantop mo kon paonan-o ka ginbuligan ni Jehova, magigin mas marig-on an imo relasyon ha iya.

¹² Ito an inabat ni Linda, * nga pipira ka tuig nga nag-ataman ha iya may sakit nga mga kag-anak antes hira namatay. “Hito nga panahon, ako, an akon bana, ngan an akon bugto, agsob nga diri maaram kon ano an amon bubuhaton. Usahay, pag-abat namon waray na kami mahihimo. Kondi kon ginhihinumdom namon an naglabay, nakikita gud namon kon paonan-o kami ginbuligan ni Jehova. Ginparig-on niya kami ngan gintagana niya an amon mga panginahanglan, bisan ha mga panahon nga baga hin waray na kami nahuhunahuna nga solusyon.”

13. Paonan-o an pagsarig kan Jehova nakabulig kan Rhonda nga mailob an sunod-sunod nga trahedya?

¹³ An bug-os nga pagsarig kan Jehova makakabulig liwat ha aton kon naatubang kita hin mga trahedya. Ito an naeksperyensyahan ni Rhonda. Han panahon nga nakikigdiborsyo ha  iya an iya diri Saksi nga bana, hinbaroan nga an iya bugto nga lalaki may-ada lupus, usa nga makamaratay nga sakit. Paglabay hin pipira ka bulan, namatay an iya hipag. Han medyo nakarekober na hiya tikang hini nga mga trahedya, nagregular payunir hiya. Waray pag-iha, namatay an iya nanay. Ano an nakabulig kan Rhonda nga makailob? Hiya nagsiring: “Nakiistorya ako kan Jehova kada adlaw, bisan may kalabotan ha gudtiay nga desisyon. Ha pagbuhat hito, nagin tinuod ha akon hi Jehova. Nahibaro ako nga sumarig ha iya imbes ha akon kalugaringon o ha iba nga tawo. Ngan ginbuligan gud niya ako—gintagana niya an ngatanan ko nga panginahanglan. Sugad nga resulta, nagin duok gud ako kan Jehova.”

14. Ha ano makakasarig an matinumanon nga Kristiano nga may kapamilya nga ginpaiwas ha kongregasyon?

¹⁴ Tagda an usa pa nga kahimtang—kon an usa nga kapamilya ginpaiwas ha kongregasyon. Ha imo pag-aram ha Biblia, hinbaroan mo kon paonan-o sadang trataron an mga ginpaiwas ha kongregasyon. (1 Cor. 5:11; 2 Juan 10) Pero usahay bangin makuri gud o imposible pa ngani an pagsunod ha sugo han Biblia. * Masarig ka ba nga tatagan ka han imo langitnon nga Amay hin kusog basi masunod ito nga sugo? Ginhuhunahuna mo ba ini nga kahimtang sugad nga higayon basi magin mas duok kan Jehova?

15. Kay ano nga gintalapas ni Adan an sugo ni Jehova?

¹⁵ May kalabotan hini, hunahunaa an nahitabo ha siyahan nga tawo nga hi Adan. Naghunahuna gud ba hiya nga puydi niya talapason an sugo ni Jehova ngan padayon la gihap hiya nga mabubuhi? Waray. An Kasuratan nasiring nga hi Adan “waray malimbongi.” (1 Tim. 2:14) Kon  sugad, kay ano nga gintalapas niya an sugo ni Jehova? Ginkaon niya an prutas nga ginhatag ha iya ni Eva tungod kay mas hinigugma niya an iya asawa kay kan Jehova. Namati hiya ha iya asawa imbes kan Jehova.—Gen. 3:6, 17.

16. Hin-o an sadang naton higugmaon hin labaw gud, ngan kay ano?

¹⁶ Iginpapasabot ba hini nga diri kita sadang magkaada daku nga gugma ha aton mga kapamilya? Syempre diri! Pero sadang magin labaw gud an aton gugma kan Jehova kay ha aton gugma ha bisan kan kanay. (Basaha an Mateo 22:37, 38.) Ha pagkamatuod, para gud ini ha kaopayan han aton mga kapamilya, nag-aalagad man hira kan Jehova o diri. Salit padayon nga parig-una an imo gugma ngan pagsarig kan Jehova. Ngan kon nasusubo ka tungod hin kapamilya nga ginpaiwas, isumat kan Jehova an imo inaabat. * (Roma 12:12; Fil. 4:6, 7) Gamita inin makasurubo nga sitwasyon basi mas maparig-on an imo relasyon ha iya. Mabulig ito ha imo nga sumarig ha iya, ngan makikita mo nga an pagsugot ha iya may maopay gud nga resulta.

17. Ano an aton malalaoman nga bubuhaton ni Jehova kon sagipo kita ha pagsangyaw mahitungod han Ginhadian?

¹⁷ Kay ano nga “gintalwas [hi Pablo] tikang ha baba han leon”? Hiya nagsiring: “Basi pinaagi ha akon bug-os nga matuman an pagsangyaw ngan makabati hito an ngatanan nga nasud.” (2 Tim. 4:17) Samtang sagipo kita ha ministeryo pariho kan Pablo, nasarig kita nga sisiguruhon ni Jehova nga “idudugang” ha aton an ngatanan nga aton ginkikinahanglan. (Mat. 6:33) Sugad nga mga magwarali han Ginhadian, ‘gintaporan [kita] han maopay nga sumat,’ ngan gintatagad kita ni Jehova nga iya “mga igkasi-magburuhat.” (1 Tes. 2:4; 1 Cor. 3:9) Pinaagi ha pagin aktibo ha buruhaton han Dios tubtob nga posible, magigin mas masayon ha aton an paghulat han bulig ni Jehova.

18. Paonan-o mo mapaparig-on an imo pagsarig ngan relasyon kan Jehova?

¹⁸ Salit gamita an tagsa nga adlaw basi mas maparig-on an imo relasyon kan Jehova. Kon umatubang ka hin makuri nga sitwasyon, gamita ito nga higayon basi magin mas duok ka ha iya. Oo, pinaagi ha pagbasa ngan pagpamalandong han Pulong han Dios, padayon nga pag-ampo, ngan pagpabilin nga nakapokus ha pag-alagad, makakasarig ka nga bubuligan ka ni Jehova nga mailob an mga pagsari nga imo naieksperyensyahan ngan maieksperyensyahan pa.