Iginbasar ini ha ginsisiring han libro han Pahayag nga hi Satanas nga Yawa an lider han bug-os-kalibotan nga pag-atake ha katawohan han Dios. (Pah. 12:1-17) Salit ginhunahuna naton nga an Gog iba nga ngaran ni Satanas.

Pero, ito nga pagsaysay nagbangon hin importante nga mga pakiana. Kay ano? Tagda ini: May kalabotan han panahon nga mabubungkag an Gog, hi Jehova nagsiring: “Itutubong ko ikaw ngadto ha magkadirodilain nga katamsihan nga hamas, ngan ngadto ha kamanampan ha kapunawangan.” (Esek. 39:4) Hi Jehova nagdugang: “Ngan mahinanabo hadto nga adlaw, nga akon tatagan hi Gog hin lugar nga paglulubngan dida ha Israel, . . . didto ira iglulubong hi Gog ngan an ngatanan niya nga kadam-an.” (Esek. 39:11) Kondi paonan-o an espiritu nga linarang makakaon han ‘katamsihan nga hamas, ngan kamanampan ha kapunawangan’? Paonan-o hi Satanas ‘mailulubong’ ha tuna? An Biblia matin-aw nga nasiring nga hi Satanas iglalabog ha kahiladman ha sulod hin 1,000 ka tuig, diri kakaunon o ilulubong.—Pah. 20:1, 2.

An Biblia nasiring nga katapos han 1,000 ka tuig, bubuhian hi Satanas tikang ha kahiladman, ngan “magawas hiya basi limbongan an mga nasud ha upat nga eskina han tuna, an Gog ngan Magog, basi tirukon hira para ha girra.” (Pah. 20:8) Pero paonan-o malilimbongan ni Satanas an Gog kon hiya mismo an Gog? Salit an “Gog” nga gin-unabi ha libro han Esekiel ngan han Pahayag diri nagtutudlok kan Satanas.

Kon sugad, hin-o an Gog han Magog? Basi mabaton ito, kinahanglan naton usisahon an Kasuratan para hibaroan kon hin-o an maatake ha katawohan han Dios. An Biblia diri la nag-uunabi han pag-atake han ‘Gog han Magog’ kondi pati liwat han pag-atake han “hadi ha amihanan” ngan han pag-atake han “mga hadi ha tuna.” (Esek. 38:2, 10-13; Dan. 11:40, 44, 45; Pah. 17:14; 19:19) Iba-iba ba ini nga pag-atake? Posible nga diri. An Biblia ginamit hin iba-iba nga ngaran ha paghulagway ha usa nga pag-atake. Kay ano nga nakasiring kita hito? Tungod kay an Kasuratan nasiring nga an ngatanan nga nasud makikigbahin hinin ultimo nga pag-atake nga magriresulta ha pagtikang han girra han Armagedon—Pah. 16:14, 16.

 Kon aton itatanding ini nga mga teksto ha Biblia mahitungod han ultimo nga pag-atake ha katawohan han Dios, matin-aw nga an ngaran nga Gog han Magog diri nagtutudlok kan Satanas, kondi ha grupo hin mga nasud. An “hadi ha amihanan” ba an mangunguna hini nga grupo? Diri kita makakasiguro. Kondi ini nga ideya baga hin uyon ha ginsiring ni Jehova mahitungod han Gog: “Ikaw makanhi tikang ha imo lugar tikang ha gihihirayoi nga mga bahin ha amihanan, ikaw, ngan an damu nga mga katawohan nga upod mo, hira ngatanan mananakay ha kakabayohan, usa ka daku nga panon ngan makusog nga kasundalohan.”—Esek. 38:6, 15.

Ha pariho nga paagi, hi propeta Daniel, nga kadungandungan ni Esekiel, nagsiring mahitungod han hadi ha amihanan: “An mga sumat tikang ha sinirangan ngan tikang ha amihanan magsasamok ha iya; ngan hiya magawas ha daku nga kapintas ha paggunaw ngan ha pagsilhig ha tinotoo hin damu. Ngan hiya mag-uusok han mga salapdag han iya palasyo ha katutung-an han dagat ngan han mahimayaon ngan baraan nga bukid; ngani hiya maabot ha iya kataposan, ngan waray bisan hin-o nga mabulig ha iya.” (Dan. 11:44, 45) Pariho gud ini ha ginsiring ha libro han Esekiel nga bubuhaton han Gog.—Esek. 38:8-12, 16.

Ano an mahitatabo katapos han ultimo nga pag-atake? Hi Daniel nagsiring: ‘Ngan hadto nga panahon hi Mikael [Jesu-Kristo] matindog [ha Armagedon], an daku nga prinsipe nga natindog [tikang han 1914] para han imo katawohan; ngan mamamay-ada panahon ha kasamok [an daku nga kasakitan], sugad hadton waray pa mahinabo tikang han kamay-ada nasud bisan ngada hadto ngahaw nga panahon: ngan hadto nga panahon an imo katawohan luluwason, an tagsa-tagsa nga hiaagian nga nahisurat dida ha basahon.’ (Dan. 12:1) Ini nga bubuhaton ni Jesus, an representante han Dios, ginhuhulagway liwat ha Pahayag 19:11-21.

Kondi hin-o an gin-uunabi nga “Gog ngan Magog” ha Pahayag 20:8? Durante han ultimo nga pagsari katapos han 1,000 ka tuig, adton magrirebelde kan Jehova magpapakita han maraot nga disposisyon nga pariho han kan ‘Gog han Magog’—an mga nasud nga maatake ha katawohan han Dios ha kataposan nga bahin han daku nga kasakitan. Ngan pariho gud an dadangatan hinin duha nga grupo—mabubungkag hira! (Pah. 19:20, 21; 20:9) Salit baga hin angayan la nga tawagon nga “Gog ngan Magog” an ngatanan nga magrirebelde katapos han 1,000 ka tuig.

Sugad nga sinsero nga mga estudyante han Pulong han Dios, ginpapamulat gud naton nga hibaroan kon hin-o an magigin “hadi ha amihanan.” Pero hin-o man an manguna hini nga grupo han mga nasud, sigurado kita ha duha nga butang: (1) An Gog han Magog ngan an kasundalohan hito mapipirde ngan mabubungkag; ngan (2) an nagmamando nga Hadi, hi Jesu-Kristo, magtatalwas han katawohan han Dios ngan magdadara ha ira ha bag-o nga kalibotan diin may hura nga kamurayawan ngan kasigurohan.—Pah. 7:14-17.