1. Ano nga abilidad an mabulig ha aton ha pagsubad han mga kalidad han Dios?

GINTAGAN kita ni Jehova hin abilidad nga ibutang an aton kalugaringon ha sitwasyon han iba. Tungod hito, mahimo naton masabtan an inaabat han iba bisan kon waray pa naton maeksperyensyahi an ira sitwasyon. (Basaha an Efeso 5:1, 2.) Paonan-o naton magagamit hin maaramon ini nga abilidad? Ano an sadang naton buhaton basi diri ini makadaot ha aton?

2. Ano an ginbubuhat ni Jehova kon nag-aantos kita?

² Nalilipay gud kita nga nagsaad hi Jehova hin imortalidad ha langit para ha magtinumanon nga dinihogan ngan hin kinabuhi nga waray kataposan ha tuna para ha maunungon nga “iba nga mga karnero” ni Jesus. (Juan 10:16; 17:3; 1 Cor. 15:53) Hito nga panahon, waray na pag-antos pariho han aton naieksperyensyahan yana. Maaram hi Jehova han aton mga pag-antos, sugad la nga maaram hiya han kasakit han mga Israelita han nagin uripon hira ha Ehipto. Ngani, “ha ngatanan nira nga kasakit hiya ginsakit.” (Isa. 63:9) Paglabay hin  mga siglo, nahadlok an mga Judio tungod han mga kaaway nga nakontra han pagtukod utro han templo, pero an Dios nagsiring: “Hiya nga nakawkaw ha iyo nakawkaw han tawotawo han [akon] mata.” (Sak. 2:8) Sugad la nga hinigugma han usa nga nanay an iya minasus-an, hinigugma ni Jehova an iya katawohan ngan ginbubuligan niya hira. (Isa. 49:15) Ginsusubad naton an gugma ni Jehova kon nangangalimbasog kita nga hisabtan an inaabat han iba pinaagi ha pagbutang han aton kalugaringon ha ira sitwasyon.—Sal. 103:13, 14.

3. Ano an nagpapakita nga mapinairon hi Jesus?

³ Nasabtan ni Jesus an kasakit han iba, bisan kon waray pa gud niya maeksperyensyahi an ira kahimtang. Pananglitan, an ordinaryo nga mga tawo nahadlok ha mga lider han relihiyon, nga nanlimbong ha ira ngan naghatag hin damu nga surundon nga nagpabug-at ha ira. (Mat. 23:4; Mar. 7:1-5; Juan 7:13) Hi Jesus waray mahadlok o malimbongi han mga lider han relihiyon, pero nasasabtan niya an inaabat han mga tawo. Salit “pakakita niya han damu nga tawo, nalooy hiya ha ira kay sugad hira hin gin-anitan ngan ginpabay-an nga mga karnero nga waray paraataman.” (Mat. 9:36) Pariho ha iya Amay, hi Jesus mahigugmaon ngan mapinairon.—Sal. 103:8.

4. Ano an ginbuhat ni Jesus han nakita niya an pag-antos han iba?

⁴ Han nakita ni Jesus an mga tawo nga nag-aantos, napagios hiya nga magpakita hin gugma. Hito nga paagi, hingpit nga iginpakita niya an gugma han iya Amay. Katapos magsangyaw ha damu nga lugar, hi Jesus ngan an iya mga apostol makadto na unta ha usa nga mamingaw nga lugar basi magpahuway. Pero tungod ha kalooy ha mga tawo nga naghuhulat ha iya, gintutdoan niya hira hin damu nga butang.—Mar. 6:30, 31, 34.

5, 6. Basi masubad an gugma han Dios, paonan-o naton sadang trataron an aton igkasi-tawo? Iilustrar. (Kitaa an retrato ha tinikangan hini nga artikulo.)

⁵ Masusubad naton an gugma ni Jehova ha paagi han aton pagtratar ha aton igkasi-tawo. Pananglitan, usa nga batan-on nga Kristiano nga tatawagon naton nga Alan an naghunahuna mahitungod hin lagas nga bugto nga nakukurian pagbasa tungod kay harap na. Nakukurian liwat hiya ha paglakat durante han pagbalay-balay. Nahinumdoman ni Alan an ginsiring ni Jesus: “An karuyag niyo buhaton ha iyo han mga tawo, buhata liwat ha ira.” (Luc. 6:31) Salit ginpakianhan ni Alan an iya kalugaringon, ‘Ano an karuyag ko nga buhaton han mga tawo ha akon?’ An iya baton, ‘Karuyag ko makig-uyag hira ha akon hin basketbol!’ Pero diri na makakagbasketbol an lagas nga bugto. Salit ini an kinahanglan ipakiana ni Alan: ‘Kon ako ito nga bugto, ano an karuyag ko nga buhaton han iba ha akon?’

⁶ Bisan kon batan-on pa hi Alan, ginhunahuna niya kon ano an iya aabaton kon hiya an aada ha sitwasyon han lagas nga bugto. Iya gin-obserbaran an bugto ngan mapinairon nga namati ha iya. Hinay-hinay nga nasabtan ni Alan an kahimtang han lagas nga bugto nga nakukurian ha pagbasa han Biblia o ha paglakat durante han pagbalay-balay. Salit, nakita niya kon paonan-o hiya makakabulig ngan karuyag niya buhaton an iya mahihimo para hito nga bugto. Puydi liwat naton ito buhaton. Basi masubad an gugma han Dios, kinahanglan ibutang naton an aton kalugaringon ha sitwasyon han iba.—1 Cor. 12:26.

7. Paonan-o naton masasabtan an inaabat han usa nga nag-aantos?

⁷ Diri pirme masayon masabtan an inaabat han usa nga nag-aantos, labi na kon waray pa gud naton maeksperyensyahi an iya sitwasyon.  An iba nag-aantos hin kaul-ol tungod hin aksidente, sakit, o kalagas. An iba liwat nag-aantos tungod han depresyon, sobra nga kabaraka, o epekto han pag-abuso ha ira ha naglabay. Samtang an iba solo la nga kag-anak o may mga kapamilya nga diri Saksi. Oo, an ngatanan may problema, ngan kasagaran nga an problema han iba waray pa naton maeksperyensyahi. Ha sugad nga kahimtang, paonan-o naton masusubad an gugma han Dios? Pinaagi ha pagpamati hin maopay tubtob nga hisabtan naton an inaabat han usa nga nag-aantos. Magpapagios ini ha aton nga subaron an gugma ni Jehova pinaagi ha paghatag han ginkikinahanglan nga bulig hito nga indibiduwal. Iba-iba an panginahanglan han kada tagsa, pero makakaghatag kita hin pagparig-on ha espirituwal ngan iba pa nga praktikal nga bulig.—Basaha an Roma 12:15; 1 Pedro 3:8.

8. Ano an nakabulig kan Jesus nga magin buotan?

⁸ An Anak han Dios nagsiring: ‘An Gihitaasi buotan bisan ha mga diri-mapasalamaton ngan magraot.’ (Luc. 6:35) Ngani, ginsubad ni Jesus an pagkabuotan han Dios. Ano an nakabulig ha iya nga magin buotan? Ginhunahuna niya kon ano an magigin epekto ha iba han iya mga pulong ngan buhat. Pananglitan, usa nga babaye nga kilala nga makasasala an dinaop ha iya nga nagtatangis salit nahulos an iya mga tiil hin mga luha. Nakita ni Jesus nga nagbabasol gud an babaye, ngan maaram hiya nga masasakitan gud an babaye kon waray pagtagad nga paiiwason niya hiya. Salit, ginkumendasyonan niya an babaye ngan ginpasaylo. Ngan han waray umuyon hito an usa nga Pariseo, nagpakita gihap hi Jesus hin pagkabuotan ha iya.—Luc. 7:36-48.

9. Ano an mabulig ha aton ha pagsubad han pagkabuotan han Dios? Paghatag hin ehemplo.

⁹ Paonan-o naton masusubad an pagkabuotan han Dios? Hi apostol Pablo nagsurat: “An uripon han Ginoo diri kinahanglan makig-away, lugod kinahanglan magin buotan ha ngatanan.” (2 Tim. 2:24) An buotan nga tawo naghuhunahuna kon paonan-o aatubangon an komplikado nga mga sitwasyon basi diri hiya makasakit ha iba. Hunahunaa kon paonan-o mo maipapakita an pagkabuotan ha masunod nga mga sitwasyon: Ha trabaho, diri ginbubuhat hin maopay han imo superbisor an iya trabaho. Ano an imo bubuhaton? Usa nga bugto an tinambong ha siyahan nga higayon paglabay hin damu ka bulan. Ano an imo isisiring ha iya? Ha ministeryo, an tagbalay nagsiring, “Sagipo ako hinduro, waray ko panahon pakiistorya.” Magigin makonsiderasyon ka ba? Ha balay, an imo padis nagpakiana, “Kay ano nga waray mo ako sumati han imo plano ha Sabado?” Mabaton ka ba ha buotan nga paagi? Kon ibubutang naton an aton kalugaringon ha sitwasyon han iba ngan huhunahunaon an posible magin epekto ha ira han aton mga pulong, hibabaroan naton kon ano an aton iyayakan ngan bubuhaton basi masubad an pagkabuotan ni Jehova.—Basaha an Proberbios 15:28.

10, 11. Ano an makakabulig ha aton ha pagsubad han kinaadman han Dios? Paghatag hin ehemplo.

¹⁰ An aton abilidad ha paghanduraw han mga panhitabo nga waray pa naton maeksperyensyahi makakabulig liwat ha aton nga masubad an kinaadman ni Jehova ngan makita an posible nga resulta han aton mga buhat. An kinaadman usa han nangunguna nga kalidad ni Jehova, ngan kon karuyag niya, puydi niya makita hin detalyado an magigin resulta han usa nga buhat. Waray kita sugad nga abilidad, pero makakabulig ha aton an paghunahuna han mahimo magin resulta han aton bubuhaton. Waray hunahunaa han mga Israelita an posible magin resulta han ira pagtalapas ha Dios. Maaram hi Moises nga bisan pa han mga ginbuhat han Dios para ha ira,  bubuhaton nira an maraot. Salit ha atubangan han bug-os nga Israel, hiya nagsiring: “Kay hira amo an usa nga nasud nga nawad-an han mga pagsagdon, ngan waray ha ira an pagsabot. O nga hira unta nagmakinaadmanon, nga nahibaroan nira ini, nga ginpainoino hira an ira kaurhian!”—Deut. 31:29, 30; 32:28, 29.

¹¹ Basi masubad an kinaadman han Dios, maopay nga hunahunaon o handurawon pa ngani naton an posible magin resulta han aton mga buhat. Pananglitan, kon may uyab ka, hinumdumi nga makuri makontrol an pagbati ngan seksuwal nga mga hingyap kon naruruyag ka ha usa. Salit ayaw gud paghimo hin bisan ano nga makakadaot han imo presyoso nga relasyon kan Jehova! Lugod, magin maaramon ngan likyi an peligro. Pamati ha maaramon nga sagdon ni Jehova: “An tawo nga mainalam-agamon nakita han karaotan, ngan naluok; kondi an tapang nagpapadayon ha unhan ngan nag-aantos tungod hini.”—Prob. 22:3.

12. Paonan-o mahimo makadaot ha aton an aton imahinasyon?

¹² Maaram an maaramon nga tawo nga an imahinasyon pariho ha kalayo. Kon kontrolado, an kalayo mahimo magin mapulsanon, sugad han pagluto hin pagkaon. Pero kon diri makontrol, makakasunog ito hin balay ngan han mga naukoy dida hito. Ha pariho nga paagi, an imahinasyon mapulsanon kon nabulig ito ha aton nga subaron hi Jehova. Pero kon naghihinunahuna kita hin imoral nga mga butang ngan magraot nga buhat, maaaghat kita nga buhaton an aton ginhihinunahuna. Makakadaot ito han aton relasyon kan Jehova!—Basaha an Santiago 1:14, 15.

13. Ano nga klase hin kinabuhi an posible nga ginhunahuna ni Eva?

¹³ Tagda kon paonan-o napatubo han siyahan nga babaye, hi Eva, an hingyap nga kaunon an igindidiri nga bunga han “kahoy han kinaadman han kaopayan ngan han karaotan.” (Gen. 2:16, 17) An halas nagsiring ha iya: “Kamo diri gud mapatay: Kay an Dios maaram nga ha adlaw nga kamo kumaon hito, an iyo mga mata mapupukrat, ngan kamo mahinunugad ha Dios, nga mag-inaramon na han kaopayan ngan han karaotan.” Nakita ni Eva “nga an kahoy maopay nga karan-on, ngan makalilipay ha mga mata.” Ano an resulta? “Binuro hiya han bunga dida hito, ngan kaunon; ngan iya hinatagan liwat an iya asawa, ngan hiya kinaon.” (Gen. 3:1-6) Ginhunahuna ni Eva nga magigin maopay gud an iya kinabuhi kon hiya an magdidesisyon para ha iya kalugaringon kon ano an maopay ngan maraot. Maraot gud an resulta han sugad nga imahinasyon! Pinaagi han iya makasasala nga bana, hi Adan, “an sala sinulod ha kalibotan ngan an kamatayon pinaagi han sala.”—Roma 5:12.

14. Ano nga mga pahamangno an iginhahatag han Biblia may kalabotan ha seksuwal nga imoralidad?

 ¹⁴ An sala ni Eva ha hardin han Eden diri nag-uupod hin seksuwal nga imoralidad. Pero nagpahamangno hi Jesus kontra han paghinunahuna hin imoral nga mga butang. Hiya nagsiring: “An bisan hin-o nga padayon nga nagkikinita ha usa nga babaye ngan may malaw-ay nga hingyap ha iya, nag-aadulteryo na ha iya kasingkasing.” (Mat. 5:28) Dugang pa, hi Pablo nagpahamangno: “Ayaw pagplinano para ha mga hingyap han unod.”—Roma 13:14.

15. Ano nga klase hin bahandi an sadang naton tirukon, ngan kay ano?

¹⁵ An Biblia nagpapahamangno liwat kontra ha paghinunahuna nga magin riko, nga tungod hito diri na kita makakapokus ha pag-alagad kan Jehova. Ha pagkatinuod, an bahandi han riko nga tawo “sugad hin hitaas nga kuta, ha iya kalugaringon nga painoino.” (Prob. 18:11) Naghatag hi Jesus hin ilustrasyon basi ipakita an makasurubo nga kahimtang han tawo nga “nagtitirok hin bahandi para ha iya kalugaringon kondi diri riko ha Dios.” (Luc. 12:16-21) Nalilipay hi Jehova kon nagbubuhat kita han iya kaburut-on. (Prob. 27:11) Daku gud an aton kalipay kon nakakarawat naton an iya pag-uyon tungod ha pagtirok hin “bahandi ha langit”! (Mat. 6:20) Ngan an maopay nga relasyon kan Jehova mas birilhon gud kay ha bisan ano nga butang.

16. Ano an makakabulig ha aton kon nababaraka kita?

¹⁶ Hunahunaa la an aton duro nga kabaraka kon nagpipinangalimbasog kita nga magtirok hin “bahandi ha tuna.” (Mat. 6:19) Ginamit hi Jesus hin ilustrasyon basi ipakita nga “an kabaraka ha kinabuhi hini nga sistema ngan an nakakalimbong nga gahum han karikohan” mahimo makatabon han pulong han Ginhadian. (Mat. 13:18, 19, 22) An iba nga tawo pirme nababaraka mahitungod han magraot nga butang nga mahimo mahitabo ha ira. Pero an sobra nga kabaraka makakadaot ha aton ha pisikal ngan ha espirituwal. Sarig kita kan Jehova ngan hinumdumi nga “an kabug-at ha kasingkasing [o kabaraka] han tawo nakakapaguko hini; kondi an maopay nga pulong nakakalipay hini.” (Prob. 12:25) An makaparig-on nga mga pulong han usa nga nakakasabot han aton sitwasyon makakapalipay ha aton. An usa nga kag-anak, bana o asawa, o maopay nga sangkay makakaaghat ha aton nga sumarig kan Jehova ngan makakabulig ha aton nga maibanan an aton kabaraka.

17. Paonan-o kita ginbubuligan ni Jehova kon nababaraka kita?

¹⁷ Hi Jehova gud la an bug-os nga nakakasabot han aton inaabat. Hi Pablo nagsurat: “Ayaw kamo kabaraka ha bisan ano, kondi ha ngatanan nga butang pinaagi han pag-ampo ngan pangamuyo nga may pagpasalamat, ipahibaro niyo ha Dios an iyo mga hangyo; ngan an kamurayawan han Dios nga labaw ha ngatanan nga pagsabot magbabantay han iyo kasingkasing ngan han iyo panhunahuna pinaagi kan Kristo Jesus.” (Fil. 4:6, 7) Salit kon nababaraka kita, hunahunaa an bulig nga iginhahatag ni Jehova basi mapanalipdan an aton espirituwalidad, sugad han bulig han mga igkasi-tumuroo, mga tigurang, matinumanon nga uripon, mga anghel, ngan ni Jesus.

18. Paonan-o makakabulig ha aton an aton imahinasyon?

¹⁸ Uyon ha aton ginhisgotan, an aton imahinasyon mahimo makabulig ha aton ha pagsubad han mga kalidad han Dios, sugad han gugma. (1 Tim. 1:11; 1 Juan 4:8) Malilipay kita kon magpapakita kita hin tinuod nga gugma, huhunahunaon an resulta han aton mga buhat, ngan lilikyan an pagkinabaraka. Salit, hinaot gamiton naton hin maopay an aton hatag-han-Dios nga abilidad basi handurawon an aton paglaom ngan subaron an gugma, pagkabuotan, kinaadman, ngan kalipay ni Jehova.—Roma 12:12.