1, 2. Paonan-o ginpamatud-an ni Jesus an iya daku nga gugma ha mga tawo?

AN SUHAG nga Anak ni Jehova an pinakamaopay nga kapahayagan han Iya diri matupngan nga kinaadman. Ngan ini nga Anak amo an “labaw nga magburuhat” han iya Amay. Handurawa la an kalipay ngan katagbaw ni Jesus han gin-andam han iya Amay an mga langit ngan gin-establisar an mga pundasyon han tuna. Pero, bisan kon gin-aapresyar niya ito nga mga linarang han iya Amay, labi nga nalipay hiya ha “mga anak han mga tawo.” (Prob. 8:22-31) Oo, hinigugma na gud ni Jesus an katawohan antes pa hiya magin tawo.

² Ha urhi, ginpamatud-an ni Jesus an iya pagkamaunungon ngan gugma ha iya Amay, pati an iya daku nga gugma ha “mga anak han mga tawo” han kinaburut-on nga “ginbayaan niya an ngatanan nga iya gintatag-iya” ngan kinanhi ha tuna. Ginbuhat niya ito basi ihalad an iya kinabuhi “sugad nga lukat para ha damu nga tawo.” (Fil. 2:5-8; Mat. 20:28) Hinigugma gud niya an katawohan! Han nakanhi hi Jesus ha tuna, gintagan hiya han Dios hin gahum ha paghimo hin mga milagro. Iginpapakita hini nga mga  milagro an mag-opay hinduro nga mga butang nga hirani na niya buhaton para ha katawohan.

3. Ano an aton hihisgotan hini nga artikulo?

³ Han nakanhi hi Jesus ha tuna, iya liwat iginpasamwak “an maopay nga sumat han Ginhadian han Dios.” (Luc. 4:43) Maaram hiya nga ini nga Ginhadian magbabaraan han ngaran han iya Amay ngan permanente nga magsusulbad han mga problema han katawohan. Durante han iya pagsangyaw, naghimo hiya hin mga milagro. Iginpapakita hini nga mga milagro nga napaid gud hiya ha ngatanan nga tawo. Ano an kapulsanan hito para ha aton? An mga ginbuhat ni Jesus maghahatag ha aton hin paglaom ngan pagsarig mahitungod ha tidaraon. Aton hisgotan an upat han mga milagro ni Jesus.

4. Ano an nahitabo han nakita ni Jesus an usa nga lalaki nga may liprosi?

⁴ Durante han ministeryo ni Jesus, kinadto hiya ha Galilea. Ha usa nga syudad didto, may nakita hiya nga lalaki nga may-ada makangingirhat nga sakit nga liprosi. (Mar. 1:39, 40) Ginhulagway han doktor nga hi Lucas nga “grabe an liprosi” hini nga lalaki. (Luc. 5:12) “Pakakita [han lalaki] kan Jesus, hinapa hiya ngan nakimalooy: ‘Ginoo, kon karuyag mo, matatambal mo ako.’” Sigurado gud hiya nga may gahum hi Jesus ha pagtambal ha iya, pero kinahanglan niya hibaroan kon karuyag ba ni Jesus nga tambalon hiya. Paonan-o magios hi Jesus ha kinasingkasing nga hangyo han lalaki? Ano daw la an ginhunahuna ni Jesus han nakita niya ini nga lalaki nga posible nga nadaot na an hitsura? Tatrataron ba hiya ni Jesus pariho han pagtratar han mga Pariseo nga diri nalolooy ha mga tawo nga may liprosi? Ano daw la an imo bubuhaton hito nga kahimtang?

5. Ano an nagpagios kan Jesus nga tambalon an lalaki nga may liprosi?

⁵ Posible gud nga ini nga lalaki nga may liprosi waray magsinggit hin “mahugaw, mahugaw,” sugad han iginsusugo han Mosaiko nga Balaud. Pero, hi Jesus waray masina ha iya. Lugod, nagpokus hiya ha lalaki ngan ha iya panginahanglan. (Leb. 13:43-46) Diri kita maaram kon ano gud an ginhunahuna ni Jesus, pero maaram kita han iya inabat. Tungod han pagpaid, napagios hiya nga maghimo hin milagro. Iya ginkaptan an lalaki ngan nagsiring ha marig-on kondi malumo nga tingog: “Karuyag ko nga matambal ka.” Ngan “nawara dayon an iya liprosi.” (Luc. 5:13) Matin-aw, gintagan ni Jehova hi Jesus hin gahum—diri la basi himoon ito nga milagro kondi basi ipakita liwat ni Jesus nga hinigugma gud niya an mga tawo.—Luc. 5:17.

6. Ano an makapainteres mahitungod han mga milagro ni Jesus, ngan ano an iginpapakita hito?

⁶ Tungod han gahum han Dios, nakahimo hi Jesus hin damu nga milagro. Gintambal niya diri la adton may liprosi kondi pati adton may-ada liwat iba nga klase hin sakit. An Biblia nasiring: “Nahipausa an mga tawo han nakita nira nga an ngula nakakayakan na, an piay nakakalakat na, an buta nakakakita na.” (Mat. 15:31) Han gintambal niya an mga may sakit, waray hiya magkinahanglan hin mahimsog nga tawo nga magdudonar hin mga organo. Gintambal niya mismo an organo o parti han lawas nga may sakit! Ngan natatambal dayon niya an mga tawo, bisan adton hirayo ha iya. (Juan 4:46-54) Ano an iginpapakita hinin urusahon nga mga buhat? Iginpapakita hini nga an nagmamando na nga Hadi nga hi Jesus, may-ada gahum ngan hingyap ha pagwara han ngatanan nga klase han sakit ha kadayonan. An paghibaro mahitungod han pagtratar ni Jesus ha mga tawo nagpapasarig ha aton nga ha bag-o nga kalibotan “malolooy hiya  ha mga kablasanon ngan makinurion.” (Sal. 72:13) Oo, hito nga panahon, tatambalon ni Jesus an ngatanan nga may sakit tungod kay karuyag gud niya ito buhaton.

7, 8. Isaysay kon paonan-o nagkita hi Jesus ngan an paralisado nga lalaki ha karigoan han Betsata.

⁷ Paglabay hin pipira ka bulan katapos tambalon ni Jesus an lalaki nga may liprosi ha Galilea, kinadto hiya ha Judea basi magsangyaw han maopay nga sumat han Ginhadian han Dios. Posible gud nga yinukot nga tawo an namati han iya mensahe ngan nabantad han iya gugma ha ira. Karuyag gud niya ‘ipasamwak an maopay nga sumat ha mga pobre, ipasamwak an kagawasan han mga bihag,’ ngan ‘bugkuson an mga samad an kasingkasing.’—Isa. 61:1, 2; Luc. 4:18-21.

⁸ Ha bulan han Nisan, nagbiyahe hi Jesus ngadto ha Jerusalem basi isaurog an Paskua, sugad nga pagsunod ha sugo han iya Amay. Sagipo an mga tawo ha syudad tungod han damu nga nagkakaabot para hinin espesyal nga piyesta. Ha norte nga bahin han templo, may karigoan nga gintatawag nga Betsata, ngan didto, nakita ni Jesus an usa nga paralisado nga lalaki.

9, 10. (a) Kay ano nga napakadto an mga tawo ha karigoan han Betsata? (b) Ano an ginbuhat ni Jesus didto ha karigoan, ngan ano an igintututdo hito ha aton? (Kitaa an retrato ha tinikangan hini nga artikulo.)

⁹ Damu nga may sakit ngan paralisado an napakadto ha Betsata. Kay ano? Tungod kay natoo hira nga milagroso nga matatambal hira kon lumugsong hira ha tubig kon nagkikiwa ito. Handurawa la an inaabat han mga tawo didto! Desperado hira, nababaraka, ngan nawawad-an hin paglaom. Pero kay ano nga nakadto hi Jesus, nga perpekto man hiya ngan waray sakit? An iya gugma ha mga tawo nagpagios ha iya nga kumadto. Didto, nakilala niya an usa nga lalaki nga maiha na nga may sakit, mas maiha pa kay han panahon nga nabuhi hi Jesus ha tuna.—Basaha an Juan 5:5-9.

¹⁰ Handurawa la an kasubo han lalaki nga may sakit han ginpakianhan hiya ni Jesus kon karuyag ba niya matambal. Binaton dayon an lalaki. Karuyag niya matambal, pero waray nabulig ha iya nga makalugsong ha karigoan. Katapos ginsugo hiya ni Jesus nga himoon an usa nga butang nga imposible—dad-on an iya tiheras ngan lumakat. Salit iya gindara an iya tiheras ngan linakat! Ini nga milagro usa nga marig-on nga pamatuod han mga bubuhaton ni Jesus ha bag-o nga kalibotan! Iginpapakita liwat hini nga hinigugma gud niya an mga tawo. Ginbiling niya adton nanginginahanglan hin bulig. An iya susbaranan sadang magpagios ha aton nga pamilngon ha aton teritoryo an mga tawo nga nasusubo tungod han magraot nga panhitabo ha kalibotan.

11. Paonan-o ginpapabug-atan han Marcos 5:25-34 an pagpaid ni Jesus ha mga may sakit?

¹¹ Basaha an Marcos 5:25-34. Ha sulod hin 12 ka tuig, an babaye nag-inantos hin makaarawod nga sakit. Nakaapekto gud ito ha ngatanan nga bahin han iya kinabuhi, pati na ha iya pag-alagad ha Dios. Nagpakonsulta na hiya ha “damu nga paratambal ngan naubos na an ngatanan nga iya katigayonan,” pero nagtikagrabe la lugod hiya. Usa ka adlaw, nagkaada hiya iba nga plano basi matambal. Nangalimbasog hiya nga makadaop kan Jesus. Sinuksok hiya ha damu nga tawo ngan ginkaptan an pantungbaw nga panapton ni Jesus. (Leb. 15:19, 25) Inabat ni Jesus nga may gahum nga ginawas ha iya salit nagpakiana hiya kon hin-o an kumapot ha iya. An babaye ‘nahadlok  ngan nangurog,’ ngan “hinapa ha iya atubangan ngan iginsumat ha iya an ngatanan.” Maaram hi Jesus nga an iya Amay nga hi Jehova an nagtambal ha babaye, salit may pagkabuotan nga ginsidngan niya an babaye: “Anak, tungod han imo pagtoo nag-opay ka. Lakat nga mamurayawon, ngan mag-opay ka ha imo grabe nga sakit.”

12. (a) Tikang ha aton mga ginhisgotan, ano an imo masisiring mahitungod kan Jesus? (b) Ano nga susbaranan an iginpakita ni Jesus ha aton?

¹² Buotan gud hi Jesus! Hinbaroan naton nga napaid gud hiya ha mga tawo, labi na hadton may sakit. Karuyag ni Satanas nga tumoo kita nga waray nahigugma ha aton ngan waray kita pulos. Pero pinaagi han mga milagro ni Jesus, ginpamatud-an niya nga napaid hiya ha aton ngan ha aton mga problema. Mapasalamaton gud kita nga may-ada kita mapinairon nga Hadi ngan Hitaas nga Saserdote! (Heb. 4:15) Bangin diri masayon para ha aton nga masabtan an inaabat hadton may grabe nga sakit, labi na kon waray pa naton ito maeksperyensyahi. Sadang naton hinumdoman nga pinaid hi Jesus ha mga may sakit bisan kon waray gud hiya magkasakit. Hinaot buhaton naton an aton bug-os nga mahihimo basi masubad an maopay nga ehemplo ni Jesus.—1 Ped. 3:8.

13. Ano an igintututdo ha aton mahitungod kan Jesus han pagkabanhaw ni Lasaro?

¹³ Inaabat gud ni Jesus an kasakit han iba. Pananglitan, han namatay an iya sangkay nga hi Lasaro, “nabantad gud” ngan “nasubo gud” hiya han nakita niya an kabido han pamilya ngan kasangkayan ni Lasaro. Ito an iya inabat bisan kon maaram hiya nga babanhawon niya hi Lasaro. (Basaha an Juan 11:33-36.) Waray maawod hi Jesus nga ipakita an iya inaabat. Klaro gud ha mga nakakakita nga hinigugma  niya hi Lasaro ngan an pamilya ni Lasaro. Tungod han pagpaid, gin-gamit niya an gahum nga iginhatag ha iya han Dios basi banhawon an iya sangkay.—Juan 11:43, 44.

14, 15. (a) Ano an nagpapakita nga hingyap gud ni Jehova nga wad-on an pag-antos han katawohan? (b) Ano an aton hibabaroan ha mga pulong nga “handumanan nga mga lubnganan”?

¹⁴ An Biblia nasiring nga hi Jesus ‘kapariho gud han dagway’ han iya Amay nga hi Jehova. (Heb. 1:3) Salit an iya mga milagro nagpapamatuod nga hingyap gud niya ngan han iya Amay nga wad-on an pag-antos, sakit, ngan kamatayon. Diri mag-iiha, babanhawon ni Jehova ngan ni Jesus an mas damu pa nga tawo. Hi Jesus nagsiring: “Maabot an oras nga an ngatanan nga aadto ha handumanan nga mga lubnganan . . . mababanhaw.”—Juan 5:28, 29.

¹⁵ Angayan gud an paggamit ni Jesus han mga pulong nga “handumanan nga mga lubnganan” tungod kay nahiuupod hito an memorya han Dios. An Dios nga Makagarahum-ha-ngatanan, an Maglalarang han bug-os nga uniberso, may kapas ha paghinumdom han ngatanan nga detalye mahitungod han aton mga hinigugma nga namatay, pati han ira personalidad. (Isa. 40:26) Ngan labot la nga may kapas hiya ha paghinumdom ha ira, karuyag liwat niya ngan han iya Anak nga hinumdumon hira. An pagkabanhaw ni Lasaro ngan han iba pa nga nakarekord ha Biblia makaruruyag nga mga sampol han mga mahitatabo ha bag-o nga kalibotan.

16. Magkakaada ano nga higayon adton magtinumanon nga surugoon han Dios?

¹⁶ Kon magpapabilin kita nga matinumanon, mahimo kita magkaada higayon nga makita an usa han pinakadaku nga milagro—an pakatalwas ha daku nga kasakitan. Katapos gud han Armagedon, damu pa nga mga milagro an aton makikita. Hito nga panahon, magkakaada na hingpit nga kahimsog an mga tawo. (Isa. 33:24; 35:5, 6; Pah. 21:4) Handurawa la nga ira iginlalabog an ira mga antiyuhos, tungkod, wheelchair, ngan hearing aid. Maaram hi Jehova nga an mga matatalwas ha Armagedon kinahanglan magin makusog ngan mahimsog tungod kay damu an ira pagbubuhaton. Hihimoon nira nga makaruruyag nga paraiso an bug-os nga tuna.—Sal. 115:16.

17, 18. (a) Kay ano nga naghimo hi Jesus hin mga milagro? (b) Kay ano nga sadang ka mangalimbasog nga makasulod ha bag-o nga kalibotan han Dios?

¹⁷ An pagpanambal ni Jesus hadto nagpaparig-on ha “daku nga grupo” yana. Nagpapasarig ito ha ira nga tatambalon an ngatanan nga may sakit. (Pah. 7:9) Nagpapakita liwat ito nga hinigugma gud han suhag nga Anak han Dios an mga tawo. (Juan 10:11; 15:12, 13) An daku nga pagpaid ni Jesus nagpapakita han hilarom nga gugma ni Jehova ha tagsa niya nga surugoon.—Juan 5:19.

¹⁸ An mga tawo yana naghaharoy, nag-aantos, ngan namamatay. (Roma 8:22) Salit kinahanglan naton an bag-o nga kalibotan, diin an ngatanan magkakaada hingpit nga kahimsog sugad han iginsaad han Dios. An Malakias 4:2 naghahatag ha aton hin paglaom nga kita “magluluksolukso sugad hin nati nga baka,” malipayon gud tungod kay natambal ngan nakatalwas na ha pagkadiri-hingpit. Hinaot an aton apresasyon ngan pagtoo ha mga saad ni Jehova magpagios ha aton nga buhaton an ngatanan basi makasulod kita ha bag-o nga kalibotan. Makaparig-on gud hibaroan nga an mga milagro nga ginhimo ni Jesus ha tuna mga sampol la han mga bendisyon nga hirani na mapahimulsan han katawohan ilarom han iya Mesianiko nga pagmando!