HAN nabawtismohan hi Anita * sugad nga Saksi ni Jehova, nasina gud an iya bana. Hi Anita nagsiring: “Gindid-an niya ako pagtambong ha mga katirok ngan bisan ngani ha pag-unabi han ngaran han Dios. Mabatian la niya ako nga nagyayakan han ngaran ni Jehova, nasukob na gud an iya dugo.”

Diri liwat karuyag han bana ni Anita nga tutdoan niya an ira mga anak mahitungod kan Jehova o iupod hira ha mga katirok. Makuri gud ini tungod kay kinahanglan niya hira patago nga tutdoan.

An eksperyensya ni Anita nagpapakita nga an pagkontra han mga kapamilya mahimo magin daku nga pagsari ha integridad han usa nga Kristiano. Daku liwat nga pagsari an pagkaada grabe nga sakit, kamatyi hin anak o padis, o an pagbaya kan Jehova han usa nga kapamilya. Salit ano an makakabulig ha usa nga Kristiano nga magpabilin nga matinumanon kan Jehova?

Hito nga mga kahimtang, ano an imo bubuhaton? Hi apostol Pablo nagsiring: “Kinahanglan magpailob kamo.” (Heb. 10:36) Pero ano an makakabulig ha imo nga makailob?

Kon naatubang ka hin mga pagsari, hinumdumi nga kinahanglan mo sumarig kan Jehova basi makailob. Pag-ampo ha iya para hin bulig. Ito an ginbuhat ni Ana han tigda nga namatay an iya bana nga 30 ka tuig na niya nga kaupod. Hiya nagsiring: “Waray na gud hiya makauli tikang ha trabaho. Singkwenta y dos anyos pa la hiya.”

Paonan-o ito nalamposan ni Ana? Nagtrabaho hiya utro, ngan nakabulig ito ha iya nga diri paghinunahunaon an nahitabo. Kondi waray mawara an iya kasakit. Hiya nagsiring: “Iginsumat ko kan Jehova an sulod han akon kasingkasing ngan nakimalooy nga buligan ako nga mailob an duro nga kasubo tungod han kamatay han akon bana.” Ginbaton ba ni Jehova an iya mga pag-ampo? Kombinsido hiya nga ginbaton ito. Hiya nagsiring: “An kamurayawan nga an Dios la an makakaghatag nakabulig ha akon nga magin kalmado ngan magkaada murayaw nga hunahuna. Sigurado gud ako nga babanhawon ni Jehova an akon bana.”—Fil. 4:6, 7.

An Parapamati han pag-ampo nagsaad nga iya itatagana an ginkikinahanglan han iya mga surugoon basi makapabilin hira nga matinumanon ha iya. (Sal. 65:2) Makaparig-on gud ini nga pasarig! Bubuligan kita ni Jehova nga magin matinumanon ha iya bisan ha magkuri nga kahimtang.

Ginbubuligan ni Jehova an iya katawohan pinaagi han Kristiano nga kongregasyon. Pananglitan, han inatubang hin duro nga pagkontra an kongregasyon ha Tesalonica, ginsagda ni apostol Pablo an mga Kristiano nga ‘padayon nga magdinasigay ngan magparig-onay sugad han ginbubuhat na nira.’ (1 Tes. 2:14; 5:11) Ginbuligan nira an kabugtoan nga magpabilin nga matinumanon kan Jehova pinaagi ha pakig-upod ha ira ha mga katirok ngan pagin duok nga magsarangkay. An ira pagin mapailubon maopay gud nga susbaranan para ha aton yana, ngan iginpapakita hini an usa nga makakabulig ha aton basi makailob.

An duok nga relasyon ha kabugtoan mabulig ha aton ha pagparig-on ha kada tagsa, labi na ha magkuri nga kahimtang. (Roma 14:19) Hi apostol Pablo mismo nakaeksperyensya hin damu nga kakurian, pero gintagan hiya ni Jehova hin kusog basi makailob. May mga panahon nga ginparig-on hiya ni Jehova pinaagi han kabugtoan. Pananglitan, han nagsurat hiya hin pangumusta ha kabugtoan ha Colosas, hiya nagsiring mahitungod ha ira: “Naghahatag gud hira hin daku nga pagliaw ha akon.” (Col. 4:10, 11) Oo, an ira gugma kan Pablo nagpagios ha ira nga liawon ngan parig-unon hiya ha panahon nga ginkikinahanglan niya ito. Posible gud nga nakakarawat ka na gihapon hin sugad nga pagparig-on ngan bulig tikang ha kabugtoan.

Usa pa nga bulig nga igintatagana ni Jehova ha kongregasyon amo an mga tigurang. Inin hamtong ha espirituwal nga kabugtoan sugad hin “lugar nga luluk-an tikang ha hangin, ngan usa nga sirongan tikang ha bagyo, sugad han nan-gagawas nga tubig dida ha lugar nga mamara, sugad han lambong han daku nga bato dida ha tuna nga guol.” (Isa. 32:2) Nakakaliaw gud ini nga pasarig! Ginpapahimulosan mo ba inin mahigugmaon nga tagana? Makakabulig ha imo an mga tigurang nga makailob.

Syempre, diri masusulbad han mga tigurang an ngatanan mo nga problema. Diri hira hingpit; may mga kaluyahan liwat hira pariho ha aton. (Buh. 14:15) Pero daku an maibubulig han ira mga pag-ampo para ha aton. (San. 5:14, 15) Usa nga bugto ha Italya nga damu ka tuig na nga nag-aantos hin grabe nga problema ha kahimsog, an nagsiring: “An gugma ngan pagpaid han mga tigurang upod na an ira agsob nga pagbisita nakabulig ha akon nga makailob.” Kon naatubang ka hin mga pagsari, karuyag ni Jehova nga mangaro ka hin bulig ha mga tigurang.

May iba pa nga butang nga mabulig ha aton nga makailob. Usa hito an pagtipig hin regular nga rutina ha espirituwal. Tagda an ehemplo han 39 anyos nga hi John, nga may talagsahon nga klase hin kanser. Hiya nagsiring: “Inabat ko nga diri gud ito makatadunganon kay bata pa ako.” Hito nga panahon, tres anyos pa la an iya anak. Hiya nagsiring: “Kinahanglan atamanon han akon asawa diri la an amon gutiay pa nga anak kondi pati ako, ngan kinahanglan liwat niya ako buligan ha akon pagpatambal.” Tungod han chemotherapy, nanluluya gud hi John ngan naghihingasuka. Ngan diri la ito. An iya tatay nagkaada grabe gud nga sakit ngan kinahanglan liwat atamanon.

Ano an nakabulig kan John ngan ha iya pamilya durante hiton makuri nga sitwasyon? Bisan kon maluya gud hi John, ginsiguro niya nga an iya pamilya nakapokus ha pag-alagad kan Jehova. Hiya nagsiring: “Natambong kami ha mga katirok, nakikigbahin ha ministeryo kada semana, ngan regular nga nagdudumara hin pagsingba han pamilya bisan kon makuri ito.” Hinbaroan ni John nga importante an pagtipig hin marig-on nga espirituwalidad basi makailob ha mga pagsari. Bisan kon natigdaan ngan nabaraka hiya ha tinikangan, waray pag-iha nagin kalmado na hiya. Maaram hiya nga hinigugma hiya ni Jehova ngan gintagan hiya hin kusog nga iya ginkikinahanglan. Ha pariho nga paagi, mabubuligan ka ni Jehova kon nababaraka o nahadlok ka. Hi John nagsiring: “Paparig-unon ka ni Jehova, sugad la nga ginparig-on niya ako.”

Waray ruhaduha nga ha bulig han Dios, maiilob naton an magkuri nga pagsari o kahimtang nga mahimo naton atubangon—yana ngan ha tidaraon. Salit sadang kita sumarig kan Jehova pinaagi ha pag-ampo, magkaada duok nga pakigsangkay ha kabugtoan, mangaro hin bulig ha mga tigurang, ngan magkaada regular nga rutina ha espirituwal. Ha pagbuhat hito, nagios kita uyon ha ginsiring ni Pablo: “Kinahanglan magpailob kamo.”