1-3. Kay ano nga kombinsido an usa nga bugto nga maaram hi Jehova han aton panginahanglan?

DIRI gud hingangalimtan ni Lana an nahitabo ha iya ha Alemanya han katpaso han 2012. Inabat niya nga ginbaton an duha han iya espisipiko nga mga pag-ampo. An siyahan, igin-ampo niya samtang nagbibiyahe hiya ha tren tikadto ha airport. Ginhangyo niya hi Jehova nga tagan hiya hin higayon nga makasangyaw. An ikaduha, igin-ampo niya pag-abot niya ha airport han hinbaroan niya nga nadelatar an iya biyahe ngan kinabuwasan pa hiya makakauli. Nag-ampo hi Lana para hin bulig tungod kay gutiay na la an iya kwarta ngan waray hiya mahuhuronan.

² Katapos gud la mag-ampo ni Lana, may nabatian hiya nga nagsiring, “Hello, Lana, nag-aano ka dinhi?” An batan-on nga lalaki nga nagyakan kaeskwela niya hadto. Tikadto hiya ha Sur Aprika, ngan kaupod niya an iya nanay nga hi Elke ngan an iya lola nga nagdul-ong ha iya ha airport. Han hinbaroan ni Elke an sitwasyon ni Lana, gin-imbitar niya hi Lana nga ha ira balay na la humuron. Maabiabihon hi Elke ngan an iya nanay ngan nagpinakiana hira kan Lana mahitungod  han iya mga gintotoohan ngan han iya buruhaton sugad nga bug-os-panahon nga ebanghelisador.

³ Kinabuwasan katapos han pamahaw, ginbaton ni Lana an ira iba pa nga mga pakiana mahitungod ha Biblia, ngan gin-aro niya an ira adres ngan numero han telepono basi makultibar an ira interes. Talwas nga nakauli hi Lana ngan nagpadayon ha iya buruhaton sugad nga regular payunir. Natoo hiya nga ginpamatian ni Jehova an iya mga pag-ampo ngan ginbuligan hiya.—Sal. 65:2.

4. Ano nga mga panginahanglan an aton hihisgotan?

⁴ Kon tigda nga naatubang kita hin problema, masayon la para ha aton nga mag-ampo kan Jehova para hin bulig, ngan nalilipay hiya pagpamati ha pag-ampo han iya maunungon nga mga surugoon. (Sal. 34:15; Prob. 15:8) Pero kon papamalandungon naton an modelo nga pag-ampo, bangin makita naton nga may-ada mas importante nga mga panginahanglan nga sadang naton ig-ampo. Hini nga artikulo, hihisgotan naton kon paonan-o an upat nga ultimo nga hangyo ha modelo nga pag-ampo mabulig ha aton nga magin maunungon kan Jehova.—Basaha an Mateo 6:11-13.

5, 6. Kay ano nga importante nga mag-ampo kita para han aton pagkaon yana nga adlaw bisan kon damu an aton pagkaon?

⁵ Gintutdoan kita ni Jesus nga mag-ampo nga “tagi kami hin pagkaon,” diri la “tagi ako hin pagkaon.” Hi Victor nga paramangno han sirkito ha Aprika, nagsiring: “Kinasingkasing nga nagpapasalamat ako kan Jehova nga ako ngan an akon asawa diri kinahanglan mabaraka kon diin magtitikang an amon kakaunon, o kon hin-o an magbabayad han plete han balay. Mahigugmaon nga igintatagana han kabugtoan an amon panginahanglan kada adlaw. Pero igin-aampo ko nga malamposan han mga nabulig ha amon an ira mga problema ha pinansyal.”

⁶ Kon abunda an aton pagkaon, puydi naton hunahunaon an aton pobre nga kabugtoan o adton mga naapektohan hin kalamidad. Diri la kita sadang mag-ampo para ha ira kondi gumios liwat uyon han aton mga pag-ampo. Pananglitan, puydi naton hatagan an nanginginahanglan nga kabugtoan kon ano an may-ada kita. Mahimo liwat kita regular nga magdonar para ha bug-os-kalibotan nga buruhaton kay maaram kita nga ginagamit ito nga mga pundo ha maaramon nga paagi.—1 Juan 3:17.

7. Paonan-o igintutdo ni Jesus nga diri gud kita sadang ‘mabaraka mahitungod han sunod nga adlaw’?

⁷ Han gin-unabi ni Jesus an mahitungod han aton pagkaon yana nga adlaw, posible nga iginpapasabot niya an aton nangunguna nga mga panginahanglan. Katapos, ginhisgotan niya kon paonan-o gin-aataman han Dios an mga tanom ha kapatagan, ngan hiya nagsiring: “Diri ba mas pagbabadoan gud kamo, kamo nga gutiay an pagtoo? Salit ayaw gud kamo kabaraka nga masiring, . . . ‘Ano an amon igsusul-ot?’” Katapos, gin-utro niya inin importante nga sagdon: “Ayaw gud kamo kabaraka mahitungod han sunod nga adlaw.” (Mat. 6:30-34) Iginpapakita hini nga imbes nga magin materyalistiko, sadang kita magin kontento ha pagkaada han aton nangunguna nga mga panginahanglan ha kada adlaw. An sugad nga mga panginahanglan mahimo mag-upod han aton urukyan, trabaho nga nakakasuporta han aton pamilya, ngan kinaadman ha pag-atubang han mga problema ha kahimsog. Pero kon ito la an aton ig-aampo, magigin diri kita timbang tungod kay may-ada kita espirituwal nga mga panginahanglan nga mas importante gud.

8. Ano an iginpapahinumdom ha aton han pag-unabi ni Jesus mahitungod han aton pagkaon yana nga adlaw? (Kitaa an retrato ha tinikangan hini nga artikulo.)

⁸ An pag-unabi ni Jesus mahitungod han aton pagkaon yana nga adlaw nagpapahinumdom han aton panginahanglan para hin espirituwal nga pagkaon. An aton Agaron nagsiring: “Diri la ha tinapay nabubuhi an tawo, kondi ha tagsa nga pulong nga nagawas ha baba ni Jehova.” (Mat.  4:4) Salit sadang naton ig-ampo pirme nga padayon nga magtagana hi Jehova hin napapanahon nga espirituwal nga pagkaon.

9. Kay ano nga an aton mga sala pariho hin utang?

⁹ Ha Mateo 6:12, an Griego nga pulong nga iginhubad nga “sala” literal nga nangangahulogan hin “utang.” Kay ano nga angayan ini? Sobra 60 ka tuig na an naglabay, ini nga magasin nagsaysay: “Kon nakakasala kita tungod ha pagtalapas ha balaud han Dios, nagkakaada kita utang ha iya. . . . Tungod han aton sala, mahimo aroon ngan kuhaon han Dios an aton kinabuhi. . . . Mahimo niya utdon an iya pakigsangkay ha aton. . . . Kinahanglan naton hiya higugmaon kay utang naton ito ha iya, ngan ipakita ito pinaagi ha pagin masinugtanon; ngan kon nakakasala kita, napapakyas kita ha pagbayad han aton utang ha iya, tungod kay an sala diri nagpapakita hin gugma ha Dios.”—1 Juan 5:3.

10. Ano an legal nga basihan ni Jehova ha pagpasaylo ha aton, ngan ano an sadang naton abaton mahitungod hito?

¹⁰ An aton panginahanglan hin kapasayloan kada adlaw nagpapabug-at han amo la nga legal nga basihan basi mapasaylo han Dios an aton mga sala—an halad-lukat ni Jesus. Bisan kon ini nga lukat iginbayad haros 2,000 ka tuig na an naglabay, sadang naton ito pabilhan nga baga hin iginhatag ito nga regalo yana la. “An pagtubos” han aton kinabuhi “mahal hinduro,” salit waray bisan hin-o nga diri hingpit nga tawo an makakabayad hito. (Basaha an Salmo 49:7-9; 1 Pedro 1:18, 19.) Oo, sadang gud naton pasalamatan pirme hi Jehova para hinin presyoso nga regalo. Dugang pa, an mga pulong nga “amon mga sala,” diri “akon mga sala,” sadang magpahinumdom ha aton nga kita ngatanan nga magsiringba ni Jehova nagkikinahanglan hinin maloloy-on nga tagana. Matin-aw, karuyag ni Jehova nga hunahunaon naton diri la an aton espirituwal nga kaopayan kondi pati liwat an kaopayan han aton kabugtoan, upod na adton bangin nakasala ha aton. An ira mga sala kasagaran nga gudtiay la ngan naghahatag ha aton hin higayon nga ipakita nga hinigugma gud naton hira ngan andam kita ha pagpasaylo, sugad la nga maloloy-on nga ginpapasaylo kita han Dios.—Col. 3:13.

11. Kay ano nga sadang kita magin mapinasayloon?

¹¹ Makasurubo, tungod han aton pagin diri hingpit, usahay bangin makurian kita ha pagpasaylo ha nakasala ha aton. (Leb. 19:18) Kon ig-istorya naton ha iba an iya nabuhat, bangin  umugop hira ha aton, nga magigin hinungdan han pagkabahin-bahin han kongregasyon. Kon tutugotan naton nga magpadayon ito, magpapakita ito hin kawaray-apresasyon ha kalooy han Dios ngan ha lukat. Kon diri naton papasayloon an iba, diri kita papasayloon han Dios. (Mat. 18:35) Ginhisgotan ini ni Jesus katapos gud la niya igtutdo an modelo nga pag-ampo. (Basaha an Mateo 6:14, 15.) Ngan basi mapasaylo kita han Dios, kinahanglan likyan gud naton an pagbuhat hin seryoso nga mga sala.—1 Juan 3:4, 6.

12, 13. (a) Ano an nahitabo kan Jesus katapos gud la niya mabawtismohi? (b) Kay ano nga diri naton mababasol an iba kon masulay kita? (c) Ano an napamatud-an ni Jesus pinaagi ha pagpabilin nga matinumanon tubtob ha kamatayon?

¹² An hangyo nga “Buligi kami nga diri madaog han pagsulay” nagpapahinumdom ha aton han nahitabo kan Jesus katapos gud la niya mabawtismohi. Gin-giyahan hiya han espiritu han Dios ngadto ha kamingawan. Kay ano? Basi hiya ‘sulayon han Yawa.’ (Mat. 4:1; 6:13) Sadang ba kita mahipausa hini? Diri, kon nasasabtan naton an siyahan nga hinungdan kon kay ano nga ginpakanhi han Dios an iya Anak ha tuna—an pagbaton han isyu nga iginbangon ha Eden han ginsalikway nira Adan ngan Eva an soberanya han Dios. Tungod hini nga isyu, may mga pakiana nga binangon. Pananglitan, may sayop ba ha pagkalarang han Dios ha tawo? Makakagpabilin ba nga maunungon kan Jehova an hingpit nga tawo bisan pa han mga pagsulay han “usa nga maraot”? Ngan mas magigin maopay ba an kahimtang han tawo kon diri hira magpapasakop ha pagmando han Dios? (Gen. 3:4, 5) Kinahanglan an panahon basi mabaton ini nga mga pakiana, kondi ipapakita hito ha ngatanan nga intelihente nga linarang nga an pagmando ni Jehova an pinakamaopay.

¹³ Baraan hi Jehova salit diri niya ginsusulay an bisan hin-o. Lugod, an Yawa amo an “Paragsulay.” (Mat. 4:3) Nangangalimbasog hi Satanas ha pagsulay ha aton ha damu nga paagi. Pero depende ha indibiduwal kon mapasulay hiya o diri. (Basaha an Santiago 1:13-15.) Han ginsulay ni Satanas hi Jesus, ginsalikway dayon hiya ni Jesus pinaagi ha pagkotar ha Pulong han Dios. Hito nga paagi, ginsuportaran niya an soberanya han Dios. Kondi waray umundang hi Satanas. Naghulat hiya tubtob nga “magkaada [hiya] iba nga higayon.” (Luc. 4:13) Pero gin-atohan ni Jesus an ngatanan nga pangalimbasog ni Satanas ha pagbungkag han iya integridad. Ginsuportaran han Kristo an matadong nga pagmando ni Jehova ngan ginpamatud-an niya nga mahimo magin matinumanon an hingpit nga tawo bisan pa han pinakamakuri nga pagsari. Pero nangangalimbasog liwat hi Satanas ha pagsulay ha mga sumurunod ni Jesus, upod ka na.

14. Ano an kinahanglan naton buhaton basi diri kita masulay?

¹⁴ Tungod han nagpapadayon nga isyu may kalabotan han soberanya ni Jehova, gintutugotan niya an Paragsulay nga gamiton ini nga kalibotan ha pagsulay ha aton. Diri kita ginsusulay han Dios. Ha kabaliktaran, natapod hiya nga magigin maunungon kita ha iya ngan karuyag niya kita buligan. Kondi tungod kay ginrirespeto niya an aton kagawasan ha pagbuot, gintutugotan niya kita nga magdesisyon kon magigin maunungon kita o diri. Basi diri kita masulay, kinahanglan kita magpabilin nga nagmamata ha espirituwal ngan magpadayon ha pag-ampo. Paonan-o ginbabaton ni Jehova an aton mga pag-ampo?

15, 16. (a) Ano an pipira han mga pagsulay nga kinahanglan naton atohan? (b) Hin-o an sadang basulon kon an usa madaog han pagsulay?

¹⁵ Gintatagan kita ni Jehova han iya gamhanan nga baraan nga espiritu, nga magpaparig-on ngan mabulig ha aton basi maatohan an pagsulay. Ginpapahamangnoan liwat kita niya pinaagi han iya Pulong ngan han kongregasyon mahitungod han mga sitwasyon nga kinahanglan naton  likyan, sugad han paggamit hin daku nga panahon, kwarta, ngan kusog ha diri importante nga mga butang. Hira Espen ngan Janne naukoy ha usa nga riko nga nasud ha Europa. Ha damu ka tuig, regular payunir hira ha usa nga lugar ha ira nasud nga daku an panginahanglan. Han natawo an ira suhag, kinahanglan hira umundang pagpayunir. Katapos nagkaada hira usa pa nga anak. Hi Espen nagsiring: “Agsob kami mag-ampo kan Jehova nga buligan kami nga diri madaog han pagsulay yana nga diri na sugad kadaku nga panahon an amon nagagamit ha teokratiko nga mga buruhaton. Ginhahangyo namon hi Jehova nga buligan kami nga matipigan an amon espirituwalidad ngan kadasig ha ministeryo.”

¹⁶ Usa pa nga pagsulay nga komon yana amo an pagkinita hin pornograpiya. Kon madaog kita hini nga pagsulay, diri naton mababasol hi Satanas. Kay ano? Tungod kay diri kita mapipirit ni Satanas ngan han iya kalibotan nga buhaton an bisan ano nga diri naton karuyag. An iba nadara hini nga pagsulay tungod kay naghinunahuna hira hin malaw-ay nga mga butang. Pero maaatohan naton ito, sugad la nga naatohan ito han yinukot nga kabugtoan.—1 Cor. 10:12, 13.

17. (a) Paonan-o kita magkikinabuhi uyon ha hangyo nga “talwasa kami tikang ha usa nga maraot”? (b) Ano an maghahatag ha aton hin daku nga kalipay ha hirani nga tidaraon?

¹⁷ Basi makagkinabuhi uyon han hangyo nga “talwasa kami tikang ha usa nga maraot,” kinahanglan mangalimbasog kita nga diri magin “kanan kalibotan” ni Satanas. Kinahanglan diri naton ‘higugmaon an kalibotan [ni Satanas] o an mga butang ha kalibotan.’ (Juan 15:19; 1 Juan 2:15-17) Kinahanglan padayon nga buhaton naton ito. Daku gud an aton kalipay kon batunon na ni Jehova ini nga hangyo pinaagi ha pagbungkag kan Satanas ngan hinin maraot nga kalibotan! Pero sadang naton hinumdoman nga han ginlabog hi Satanas dinhi ha tuna, maaram hiya nga halipot na la an iya panahon. Nasisina gud hiya, ngan ginbubuhat niya an ngatanan basi umundang kita ha pag-alagad kan Jehova. Salit kinahanglan padayon kita nga mag-ampo nga matalwas kita tikang ha iya.—Pah. 12:12, 17.

18. Basi matalwas kon bungkagon na an kalibotan ni Satanas, ano an kinahanglan padayon naton nga buhaton?

¹⁸ Karuyag mo ba magkinabuhi ha kalibotan nga waray hi Satanas? Kon oo, padayon nga ig-ampo nga umabot na an Ginhadian han Dios, pagbaraanon an ngaran ni Jehova, ngan matuman an iya kaburut-on dinhi ha tuna. Sarig nga itatagana ni Jehova an imo mga panginahanglan ha espirituwal ngan ha pisikal. Oo, magin determinado nga magkinabuhi uyon ha modelo nga pag-ampo.