1. Kon nagsasangyaw kita, paonan-o naton kasagaran nga ginagamit an pag-ampo nga nakarekord ha Mateo 6:9-13?

MEMORYADO han damu nga tawo an Pag-ampo han Ginoo. Ha aton pagbalay-balay, kasagaran nga gin-uunabi naton ini nga pag-ampo basi buligan an tagbalay nga masabtan nga an Ginhadian han Dios tinuod nga gobyerno nga magpapahinabo hin urusahon nga mga pagbag-o ha tuna. Bangin gin-uunabi liwat naton an siyahan nga hangyo dida hito nga pag-ampo basi ipakita nga an Dios may personal nga ngaran nga sadang ‘baraanon.’—Mat. 6:9.

2. Paonan-o kita nahibaro nga diri karuyag ni Jesus nga uroutruhon naton hin pulong por pulong an modelo nga pag-ampo ha kada naton pag-aampo?

² Karuyag ba ni Jesus nga uroutruhon naton an mga pulong nga iya gin-gamit ha kada naton pag-aampo, sugad han ginbubuhat han Kakristianohan? Diri. Antes niya itutdo ini nga pag-ampo sugad nga modelo, hiya nagsiring: “Kon nag-aampo kamo, ayaw pag-uroutroha an amo gihapon nga mga pulong.” (Mat. 6:7) Ha iba nga higayon, igintutdo niya ini nga pag-ampo pero ginamit hiya hin iba nga mga pulong. (Luc. 11:1-4) Hini nga paagi, ginbuligan kita ni  Jesus nga hibaroan kon ano nga mga butang an kinahanglan naton ig-ampo ngan an pagkasurunod hito uyon ha kon ano an mas importante. Salit, angayan la nga tawagon ini nga modelo nga pag-ampo.

3. Ano nga mga pakiana an mahimo naton pamalandungon samtang gin-aadman an modelo nga pag-ampo?

³ Hini ngan ha sunod nga artikulo, pag-aadman naton hin maopay an modelo nga pag-ampo. Samtang ginbubuhat naton ito, pakianhi an imo kalugaringon, ‘Paonan-o ini nga pag-ampo mabulig ha akon nga mapauswag an akon mga pag-ampo? Ngan labaw ha ngatanan, nagkikinabuhi ba ako uyon ha modelo nga pag-ampo?’

4. Ano an ginpapahinumdom ha aton han mga pulong nga “Amay namon,” ngan ha ano nga paagi hi Jehova “Amay” hadton may tunan-on nga paglaom?

⁴ An mga pulong nga “Amay namon,” diri “Amay ko,” nagpapahinumdom ha aton nga bahin kita han bug-os-kalibotan nga pagminagburugto nga nahigugma ha usa kag usa. (1 Ped. 2:17) Daku gud ito nga pribilehiyo! Adton ginpili ni Jehova nga magkinabuhi ha langit gin-ampon sugad nga iya mga anak, salit hiya an ira Amay ha espesyal nga paagi. (Roma 8:15-17) An mga Kristiano nga may paglaom nga mabuhi ha tuna ha kadayonan mahimo liwat tumawag kan Jehova nga “Amay.” Hiya an naghatag ha ira hin kinabuhi, ngan mahigugmaon nga nagtatagana han ira panginahanglan. Pero matatawag la hira nga “mga anak” ni Jehova kon magin hingpit na hira ngan magpabilin nga maunungon ha iya durante han ultimo nga pagsari.—Roma 8:21; Pah. 20:7, 8.

5, 6. Ano an pinakamaopay nga regalo nga maihahatag han mga kag-anak ha ira mga anak, ngan ano an sadang buhaton han mga anak hito nga regalo? (Kitaa an retrato ha tinikangan hini nga artikulo.)

⁵ Gintatagan han mga kag-anak an ira mga anak hin maopay nga regalo kon gintututdoan nira hira nga mag-ampo ngan ginbubuligan hira nga tagdon hi Jehova sugad nga mahigugmaon nga Amay ha langit. Usa nga paramangno han sirkito ha Sur Aprika an nagsiring: “Tikang han katawo han amon mga anak, nag-aampo ako kaupod nira kada gab-i labot la kon waray ako ha balay. An amon mga anak agsob sumiring nga diri na nira nahinunumdoman kon ano an amon mga ginsiring durante hito nga mga pag-ampo. Pero nahinunumdoman pa nira an pagin sagrado han pakigkomunikar ha aton Amay, hi Jehova, ngan an pag-abat hin pagin kalmado ngan pagkaada seguridad. Han kaya na nira mag-ampo, gin-aghat ko hira nga himoon ito ha daku nga tingog basi mabatian ko an ira pagpahayag kan Jehova han ira ginhuhunahuna ngan inaabat. Maopay ito nga higayon basi hibaroan ko kon ano an aada ha ira kasingkasing. Katapos, mahigugmaon nga natututdoan ko hira nga iupod an importante nga mga bahin han modelo nga pag-ampo basi magkaada maopay nga pundasyon an ira mga pag-ampo.”

⁶ Diri urusahon nga an iya mga anak nag-uswag ha espirituwal. Yana, may asawa na hira, ngan malipayon nga nag-aalagad hin bug-os-panahon kaupod han ira mga bana. An pinakamaopay nga regalo nga maihahatag han mga kag-anak ha ira mga anak amo an pagbulig ha ira nga magkaada duok nga relasyon kan Jehova. Syempre, kinahanglan tipigan han mga anak inin presyoso nga relasyon. Upod hito an paghibaro ha paghigugma ngan pagkaada hilarom nga respeto ha ngaran han Dios.—Sal. 5:11, 12; 91:14.

7. Ano nga pribilehiyo an may-ada kita, pero ano an kinahanglan naton buhaton?

⁷ Pribilehiyo gud naton nga mahibaroan an ngaran han Dios ngan magin ‘katawohan nga  nagdadara han iya ngaran.’ (Buh. 15:14; Isa. 43:10) Nag-aampo kita ha aton Amay ha langit: “Pagbaraanon an imo ngaran.” An imo pagbuhat hito mahimo magpagios ha imo nga hangyoon hi Jehova nga buligan ka nga diri makabuhat o makayakan hin bisan ano nga magpapasipara han iya baraan nga ngaran. Diri naton karuyag magin pariho ha pipira ha siyahan nga siglo nga diri nagbubuhat han ira iginsasangyaw. Hi apostol Pablo nagsurat ha ira: “An ngaran han Dios ginpapasiparahan han mga nasud tungod ha iyo.”—Roma 2:21-24.

8, 9. Paghatag hin ehemplo nga nagpapakita nga ginbibendisyonan ni Jehova adton karuyag baraanon an iya ngaran.

⁸ Karuyag naton baraanon an ngaran han Dios. Han namatay an bana han usa nga bugto, hiya na la an nag-ataman han ira dos anyos nga anak. Hiya nagsiring: “Makuri gud adto nga panahon para ha akon. Nag-ampo ako kada adlaw, haros kada oras, nga magpabilin ako nga timbang ha emosyon basi diri ko matagan hi Satanas hin rason nga tamayon hi Jehova tungod han akon diri maaramon nga desisyon o pagin diri matinumanon. Karuyag ko baraanon an ngaran ni Jehova ngan makita utro han akon anak an iya tatay ha Paraiso.”—Prob. 27:11.

⁹ Ginbaton ba ni Jehova an iya mga pag-ampo? Oo. Naparig-on hiya tungod han regular nga pakig-upod ha mahigugmaon nga kabugtoan. Paglabay hin lima ka tuig, nag-asawa hiya hin tigurang. An iya anak, nga 20 anyos na yana, bawtismado na. Hiya nagsiring: “Malipayon gud ako nga ginbuligan ako han akon bana ha pagpadaku ha iya.”

10. Ano an ginkikinahanglan basi bug-os nga mabaraan an ngaran han Dios?

¹⁰ Ano an ginkikinahanglan basi bug-os nga mabaraan an ngaran han Dios ngan diri na mapasiparahan? Kinahanglan wad-on ni Jehova an ngatanan nga tinuyo nga nagsasalikway han iya soberanya. (Basaha an Esekiel 38:22, 23.) Hito nga panahon, an katawohan magigin hingpit na, ngan an ngatanan nga intelihente nga linarang magpapasidungog han baraan nga ngaran ni Jehova. Katapos, an aton mahigugmaon nga Amay ha langit ‘an magmamando han ngatanan.’—1 Cor. 15:28.

11, 12. Han 1876, ano an hinbaroan han katawohan ni Jehova tungod han iya bulig?

¹¹ Antes sumaka hi Jesus ha langit, an iya mga apostol nagpakiana: “Ginoo, igpapahiuli mo ba an Ginhadian ha Israel hini nga panahon?” Iginpakita han baton ni Jesus nga diri pa ito an panahon nga hibaroan nira kon san-o magtitikang an pagmando han Ginhadian han Dios. Ginsidngan niya an iya mga disipulo nga magpokus ha importante nga buruhaton han pagsangyaw. (Basaha an Buhat 1:6-8.) Kondi iya liwat hira gintutdoan nga ig-ampo nga umabot an Ginhadian han Dios ngan pamulaton ito nga panahon. Salit tikang pa hadto, igin-aampo na han mga Kristiano nga umabot ito.

¹² Han hirani na hi Jesus magmando ha langit, ginbuligan ni Jehova an iya katawohan nga hibaroan kon ano nga tuig ito mahitatabo. Han 1876, usa nga artikulo nga iginsurat ni Charles Taze Russell an iginpublikar ha magasin nga Bible Examiner. Ito nga artikulo nga may ulohan nga “Gentile Times: When Do They End?,” nagsiring nga an 1914 importante nga tuig. Iginpakita han artikulo an koneksyon han “pito nga panahon” ha tagna ni Daniel ngan han “itinanda nga panahon han mga nasud” nga ginsiring ni Jesus. *—Dan. 4:16; Luc. 21:24.

13. Ano an nahitabo han 1914, ngan ano an ginpapamatud-an han mga panhitabo tikang hito nga tuig?

 ¹³ Han 1914, nagkaada girra ha Europa ngan waray pag-iha, nagsarang ito ha bug-os nga kalibotan. Han natapos ito han 1918, nagkaada duro nga gutom ngan hin makamaratay nga sakit diin mas damu an namatay kay hadton namatay ha girra. Salit nagtikang matuman an ginsiring ni Jesus nga “tigaman” han iya pagin Hadi ha langit. (Mat. 24:3-8; Luc. 21:10, 11) Damu nga ebidensya an nagpapamatuod nga hi Jesu-Kristo ‘gintagan hin korona’ han 1914. “Sinulong hiya basi pirdihon an mga kaaway ngan tapuson an iya pakig-away.” (Pah. 6:2) Iya ginlimpyohan an langit pinaagi ha pakiggirra kan Satanas ngan ha iya mga demonyo, ngan iya iginlabog hira nganhi ha tuna. Tikang hadto, naieksperyensyahan na han katawohan an katumanan hini nga tagna: “Kairo han tuna ngan han dagat, kay an Yawa linusad ha iyo nga may daku nga kasina, kay maaram hiya nga halipot na la an iya panahon.”—Pah. 12:7-12.

14. (a) Kay ano nga padayon naton nga igin-aampo nga umabot na an Ginhadian han Dios? (b) Ano nga importante nga buruhaton an kinahanglan naton buhaton yana?

¹⁴ An tagna ha Pahayag 12:7-12 nagsasaysay kon kay ano nga nagtikang magkaada magraot nga panhitabo ha tuna han nagin Hadi hi Jesus ha Ginhadian han Dios. Bisan kon hi Jesus nagmamando na ha langit, hi Satanas nagmamando pa ha tuna. Pero diri mag-iiha, tatapuson ni Jesus an iya pakig-away pinaagi ha pagwara han karaotan ha tuna. Samtang diri pa ito nahitatabo, padayon naton nga ig-aampo  nga umabot na an Ginhadian han Dios. Kinahanglan liwat kita magkinabuhi uyon hito nga pag-ampo pinaagi ha pakigbahin ha katumanan han importante gud nga bahin han “tigaman.” Hi Jesus nagtagna: “Inin maopay nga sumat han Ginhadian isasangyaw ha bug-os nga inuukyan nga tuna sugad nga pamatuod ha ngatanan nga nasud, ngan sunod hito an kataposan maabot.”—Mat. 24:14.

15, 16. Paonan-o kita magkikinabuhi uyon ha hangyo nga matuman an kaburut-on han Dios dinhi ha tuna?

¹⁵ Mga 6,000 ka tuig an naglabay, natutuman gud an kaburut-on han Dios dinhi ha tuna. Salit, hi Jehova nagsiring nga an ngatanan “duro hin kaopay.” (Gen. 1:31) Pero nagrebelde hi Satanas, ngan tikang hadto, gutiay na la nga tawo an nagbubuhat han kaburut-on han Dios ha tuna. Kondi yana, mga walo ka milyon na an nag-aalagad kan Jehova. Igin-aampo nira nga matuman an kaburut-on han Dios ha tuna, ngan nagkikinabuhi liwat hira uyon hito nga pag-ampo. Nagkikinabuhi hira ha paagi nga nakakapalipay ha Dios ngan madasigon nga nakikigbahin ha paghimo hin disipulo nga buruhaton.

¹⁶ Pananglitan, usa nga bugto nga nabawtismohan han 1948 ngan nagin misyonera ha Aprika, an nagsiring: “Uyon hini nga bahin han modelo nga pag-ampo, agsob ko ig-ampo nga mabilngan an ngatanan nga sugad-karnero nga mga tawo ngan mabuligan hira nga mahibaro mahitungod kan Jehova antes pa magin urhi an ngatanan. Antes liwat ako magsangyaw, nag-aampo ako para hin kinaadman basi maabot ko an kasingkasing han akon kaistorya. Ngan may kalabotan ha sugad-karnero nga mga tawo nga nabilngan na, igin-aampo ko kan Jehova nga bendisyonan niya an aton pangalimbasog ha pag-ataman ha ira.” Diri urusahon nga inin 80 anyos nga bugto malampuson gud ha iya ministeryo ngan nakabulig na ha damu nga magin Saksi ni Jehova. Sigurado nga may kilala ka nga mga lagas nga madasigon liwat nga nagbubuhat han kaburut-on ni Jehova.—Basaha an Filipos 2:17.

17. Ano an imo inaabat mahitungod ha mga bubuhaton ni Jehova ha tidaraon para ha mga tawo ngan ha tuna?

¹⁷ Samtang diri pa ginbubungkag ni Jehova an iya mga kaaway dinhi ha tuna, padayon naton nga ig-aampo nga matuman an kaburut-on han Dios. Katapos, ha tidaraon an tuna magigin paraiso, ngan binilyon nga tawo an babanhawon. Hi Jesus nagsiring: “Ayaw kamo kahipausa hini, kay maabot an oras nga an ngatanan nga aadto ha handumanan nga mga lubnganan makakabati han iya tingog ngan mababanhaw.” (Juan 5:28, 29) Makalilipay gud ito nga panahon ha pagtapo han aton ginbanhaw nga mga hinigugma! “Papahiron [han Dios] an mga luha ha [aton] mga mata.” (Pah. 21:4) Kadam-an han babanhawon mga “diri-matadong,” nga namatay nga waray mahibaro han kamatuoran mahitungod kan Jehova ngan ha iya Anak. Pribilehiyo gud naton nga tutdoan hira mahitungod han kaburut-on ngan katuyoan han Dios basi magin kwalipikado hira nga magkaada “kinabuhi nga waray kataposan.”—Buh. 24:15; Juan 17:3.

18. Ano an pinakaimportante nga panginahanglan han katawohan?

¹⁸ An pagkaada kamurayawan ngan pagkaurosa ha bug-os nga uniberso nakadepende ha pagbaraan han ngaran ni Jehova pinaagi han iya Ginhadian. Salit, an baton ha siyahan nga tulo nga hangyo ha modelo nga pag-ampo magtatagbaw han pinakaimportante nga panginahanglan han katawohan. Ha sunod nga artikulo, hihisgotan naton an iba pa nga importante nga panginahanglan nga igintutdo ni Jesus nga ig-ampo naton.