1. Ano an panhunahuna han kalibotan ha pagin limpyo ha moral?

NAGKIKINABUHI kita ha kalibotan nga diri gud nagpapabili ha pagin limpyo ha moral. Ha damu nga nasud, normal na la an homoseksuwalidad ngan pakighilawas ha diri asawa. Igin-aaghat pa ngani ini han mga adbertisment, pelikula, libro, ngan mga kanta. (Sal. 12:8) Komon na gud an imoralidad salit bangin makagpakiana ka, ‘Posible gud ba kita magkaada limpyo nga pagkinabuhi?’ Oo, posible gud ito! Ha bulig ni Jehova, an tinuod nga mga Kristiano makakagpabilin nga limpyo ha moral.—Basaha an 1 Tesalonica 4:3-5.

2, 3. (a) Kay ano nga importante nga isalikway naton an mahugaw nga mga hingyap? (b) Ano an aton hihisgotan hini nga artikulo?

² Basi magkaada limpyo nga pagkinabuhi, kinahanglan isalikway naton an imoral nga mga hingyap. Sugad la nga an kawil nga may paon mahimo makadakop hin isda, an imoral nga panhunahuna ngan maglaw-ay nga hingyap—kon diri dayon wawad-on ha hunahuna—mahimo magtubo ngan mag-aghat ha usa nga Kristiano nga magbuhat hin imoralidad kon magkaada hin higayon. An Biblia  nasiring: “An hingyap, kon igburod na, nanganganak hin sala.”—Basaha an Santiago 1:14, 15.

³ Sadang naton hinumdoman nga an sayop nga hingyap mahimo magtubo ngan magtugway ha aton ha pakabuhat hin seryoso nga sala. Pero makaparig-on hibaroan nga kon diri naton tutugotan nga makagamot ha aton kasingkasing an mahugaw nga mga hingyap, diri kita makakabuhat hin imoralidad ngan mag-aantos han resulta hito! (Gal. 5:16) Hini nga artikulo, hihisgotan naton an tulo nga butang nga makakabulig ha aton nga isalikway an mahugaw nga mga hingyap: an aton relasyon kan Jehova, an sagdon han iya Pulong, ngan an bulig han hamtong nga mga Kristiano.

4. Kay ano nga importante nga magin duok kita kan Jehova?

⁴ An Biblia nagsasagdon hadton naruruyag ‘magin duok ha Dios’: “Limpyohi an iyo mga kamot, . . . ngan putlia an iyo mga kasingkasing.” (San. 4:8) Kon ginpapabilhan naton an aton pakigsangkay kan Jehova, mangangalimbasog kita nga lipayon hiya ha ngatanan nga bahin han aton kinabuhi, upod na an aton mga ginhuhunahuna. Karuyag naton magkaada “putli nga kasingkasing” pinaagi ha pagpokus han aton hunahuna ha mga butang nga putli, maopay, ngan darayawon. (Sal. 24:3, 4; 51:6; Fil. 4:8) Oo, nasasabtan ni Jehova nga diri kita hingpit. Maaram hiya nga may tendensya kita nga magkaada sayop nga mga hingyap. Pero maaram kita nga nasusubo hiya kon padayon naton nga ginhuhunahuna an imoral nga mga butang imbes nga mangalimbasog nga isalikway ito. (Gen. 6:5, 6) An pagpamalandong hini mabulig ha aton nga magin determinado nga tipigan nga limpyo an aton hunahuna.

5, 6. Paonan-o an pag-ampo nabulig ha aton nga maatohan an imoral nga mga hingyap?

⁵ Usa nga importante nga paagi nga maipapakita naton an bug-os nga pagsarig kan Jehova amo an pag-ampo para hin bulig nga maatohan an imoral nga panhunahuna. Kon nangangalimbasog kita nga magin duok kan Jehova pinaagi ha pag-ampo, nagigin duok hiya ha aton. Gintatagan niya kita han iya baraan nga espiritu basi maparig-on an aton determinasyon nga isalikway an imoral nga panhunahuna ngan magpabilin nga limpyo ha moral. Salit ipahibaro naton ha Dios an aton kinasingkasing nga hingyap nga lipayon hiya. (Sal. 19:14) Mapainubsanon ba nga ginhahangyo naton hiya nga usisahon kita basi hibaroan kon may-ada kita “maraot nga agian”—sayop nga hingyap o inklinasyon—nga mahimo mag-aghat ha aton nga makasala? (Sal. 139:23, 24) Pirme ba naton hiya ginhahangyo nga buligan kita nga matipigan an aton integridad kon naatubang kita hin pagsulay?—Mat. 6:13.

⁶ Antes mahibaro mahitungod kan Jehova, bangin may mga hilig kita nga diri niya gin-uuyonan, ngan bangin gin-aatohan pa gihapon naton ito tubtob yana. Pero, mabubuligan kita niya nga magbag-o basi padayon kita nga makag-alagad ha iya ha paagi nga iya inuuyonan. Maaram hini hi Hadi David. Katapos niya makasala hin pag-adulteryo kaupod ni Batseba, nangamuyo hiya kan Jehova: “Himoa ha akon, . . . an usa nga kasingkasing nga matalinis; ngan pagbag-ohi ako hin matadong nga espiritu ha sakob nakon.” (Sal. 51:10, 12) Salit kon may-ada kita makusog nga imoral nga mga hingyap ha naglabay ngan gin-aatohan pa gihapon naton ito, mabubuligan kita ni Jehova nga sundon an iya mga sugo ngan buhaton an husto. Mabubuligan kita niya nga diri madaog han sayop nga mga hingyap.—Sal. 119:133.

7. Paonan-o an Pulong han Dios mabulig ha aton nga isalikway an mahugaw nga mga hingyap?

⁷ Mahimo batunon ni Jehova an aton mga pag-ampo para hin bulig pinaagi han iya Pulong,  an Biblia. An kinaadman nga aada ha Pulong han Dios “una ha ngatanan putli.” (San. 3:17) An pagbasa han Biblia kada adlaw ngan an pagpamalandong hito makakabulig ha aton nga malikyan an imoral nga panhunahuna. (Sal. 19:7, 11; 119:9, 11) Dugang pa, an Biblia may mga ehemplo ngan espisipiko nga mga sagdon nga mabulig ha aton nga isalikway an mahugaw nga mga hingyap.

8, 9. (a) Kay ano nga nakabuhat hin seksuwal nga imoralidad an usa nga batan-on nga lalaki ha imoral nga babaye? (b) An ehemplo ha Proberbios kapitulo 7 makakabulig ha aton nga malikyan an ano nga mga sitwasyon?

⁸ An Proberbios 5:8 nasiring: “Balhina an imo dalan ha hirayo tikang ha [imoral nga babaye], ngan ayaw kada ha hirani han ganghaan han iya balay.” Iginpapakita han Proberbios kapitulo 7 an peligro han pagbalewaray hini nga sagdon, diin mababasa naton an mahitungod hin batan-on nga lalaki nga namasyada hirani ha balay hin imoral nga babaye han tikagab-i na. Ha eskina, gindaop hiya han babaye nga nakasul-ot hin nakakadani nga bado. Ginbutong hiya, ginharokan, ngan ginsidngan hin nakakadani nga mga pulong nga nakapukaw hin sayop nga hingyap ha iya. Nagbuhat hira hin seksuwal nga imoralidad. Bisan kon waray plano an batan-on nga lalaki nga magbuhat hin imoralidad, nabuhat niya ito. Ngan kinahanglan niya atubangon an maraot nga resulta han iya sala. Kon nasabtan la  niya an peligro, nagpahirayo unta hiya ha imoral nga babaye!—Prob. 7:6-27.

⁹ Pariho hiton batan-on nga lalaki, bangin makahimo kita hin diri maopay nga desisyon tungod kay diri naton nasasabtan an peligro. Pananglitan, may mga channel ha TV nga nagpapakita hin imoral nga mga programa ha gab-i, salit peligroso an pagburobalhin hin channel basi la makita kon ano an mga salida. O bangin basta na la naton ginki-click an mga link ha Internet o gin-aabrihan an mga chat room ngan site nga may imoral nga mga adbertisment ngan may link ha pornograpiya. Ha sugad nga mga kahimtang, posible ba nga makakita kita hin mga butang nga mag-aaghat ha aton nga magkaada sayop nga hingyap ngan magpapaluya han aton determinasyon nga magpabilin nga limpyo ha moral?

10. Kay ano nga peligroso an pagpikat? (Kitaa an retrato ha tinikangan hini nga artikulo.)

¹⁰ Ginsasagdonan liwat kita han Biblia kon paonan-o sadang trataron an diri naton kapariho an sekso. (Basaha an 1 Timoteo 5:2.) Iginpapakita hini nga diri gud angayan an pagpikat. Ginhuhunahuna han iba nga diri maraot an pagpakita hin romantiko nga interes ha usa pinaagi ha ira paggios, ekspresyon han nawong, o pagsiplat tungod kay diri man ito nag-uupod hin pagkapot hin parti han lawas. Kondi kon an duha ka tawo nagpipikat ha kada tagsa, mahimo hira magkaada hin imoral nga panhunahuna nga mahimo magresulta ha seksuwal nga imoralidad. Nahitabo na ito hadto, ngan puydi liwat ito mahitabo yana.

11. Ano an maopay nga ehemplo nga iginpakita ni Jose?

¹¹ Hi Jose maopay nga ehemplo para ha aton. Waray hiya magpadara ha pagsulay han asawa han iya agaron nga hi Potipar. Pero waray umundang an babaye ha pagdani ha iya. Kada adlaw ginsisidngan niya hi Jose nga umupod ha iya. (Gen. 39:7, 8, 10) Usa nga eskolar ha Biblia an nagsiring nga naglaom an asawa ni Potipar nga kon magduhaan la hira ni Jose, madadani na niya hi Jose. Pero determinado gud hi Jose nga diri magpadara ha pagpikat han asawa ni Potipar, o ipakita nga naayon hiya hito. Waray liwat hiya magpikat. Hito nga paagi, waray niya tuguti nga tumubo ha iya kasingkasing an sayop nga hingyap. Han ginpirit hiya han babaye nga makighilawas, pumalagiw dayon hiya. “Iya binayaan an iya panapton ha iya kamot, ngan pinalagiw ngan hiya nakagawas.”—Gen. 39:12.

12. Paonan-o kita nahibaro nga an aton ginkikita mahimo makaapekto ha aton kasingkasing?

¹² An Biblia nagpapahamangno liwat nga an aton ginkikita mahimo makaapekto han aton kasingkasing ngan magpukaw hin sayop nga mga hingyap ha sekso. Hi Jesus nagpahamangno nga “an bisan hin-o nga padayon nga nagkikinita ha usa nga babaye ngan may malaw-ay nga hingyap ha iya, nag-aadulteryo na ha iya kasingkasing.” (Mat. 5:28) Hinumdumi an nahitabo kan Hadi David. “Tikang ha atop nakakita hiya hin usa nga babaye nga nagkikinarigos.” (2 Sam. 11:2) Waray hiya lumingiw, lugod nagpadayon hiya ha paghinunahuna hito nga babaye. Tungod hini, ginhingyap niya an usa nga babaye nga inasaw-an na ngan nakighilawas ha iya.

13. Kay ano nga kinahanglan kita ‘maghimo hin kauyonan ha aton mga mata,’ ngan paonan-o naton ito bubuhaton?

¹³ Basi maatohan an imoral nga mga pantasya, kinahanglan kita ‘maghimo hin kauyonan ha aton mga mata,’ sugad han ginbuhat han matinumanon nga hi Job. (Job 31:1, 7, 9) Kinahanglan magin determinado kita nga kontrolon an aton mga mata ngan diri ito tugotan nga magkinita nga may imoral nga hingyap ha usa. Nagpapasabot ito nga kinahanglan lumingiw dayon kita kon makakita kita hin maglaw-ay nga retrato ha kompyuter, billboard, magasin, o ha bisan diin.

14. Ano an kinahanglan naton buhaton basi makapabilin nga limpyo ha moral?

 ¹⁴ Kon may-ada ka nakita ha aton ginhisgotan nga kinahanglan mo buhaton basi magin mas epektibo an imo pag-ato ha sayop nga mga hingyap, buhata dayon ito. Sunda an ginsisiring han Pulong han Dios, nga mabulig ha imo nga malikyan an pakasayop basi makapabilin nga limpyo ha moral.—Basaha an Santiago 1:21-25.

15. Kon nakukurian kita ha pag-ato ha sayop nga seksuwal nga mga hingyap, kay ano nga importante nga mangaro kita hin bulig?

¹⁵ Kon nakukurian ka ha pag-ato ha sayop nga mga hingyap ha sekso, makakabulig liwat ha imo an kabugtoan. Syempre, diri masayon an pagsumat ha iba han sugad nga klase han personal nga problema. Pero an pakiistorya ha hamtong nga Kristiano mabulig ha imo nga diri pakamatadungon an sayop nga mga hingyap. (Prob. 18:1; Heb. 3:12, 13) Mabubuligan ka han hamtong nga kabugtoan nga masantop kon ano nga mga pagbag-o an kinahanglan mo buhaton. Katapos, buhata ito nga mga pagbag-o basi magpabilin ka ha gugma ni Jehova.

16, 17. (a) Paonan-o mabubuligan han mga tigurang adton nakukurian pag-ato ha sayop nga mga hingyap? Iilustrar. (b) Kay ano nga kinahanglan mangaro dayon hin bulig an mga nagkikita hin pornograpiya?

¹⁶ An mga tigurang kwalipikado gud ha pagbulig ha aton. (Basaha an Santiago 5:13-15.) Usa nga batan-on nga lalaki ha Brazil an nakurian pag-ato ha sayop nga mga hingyap ha damu ka tuig. Hiya nagsiring: “Maaram ako nga nakakapasubo kan Jehova an akon mga ginhuhunahuna, pero naawod ako pagsumat ha iba han akon inaabat.” Maopay na la kay may usa nga tigurang ha ira kongregasyon nga nag-aghat ha iya nga mangaro hin bulig. Hiya nagsiring: “Diri ko ginlalaoman nga magigin sugad gud kabuotan ngan kamasinabuton an mga tigurang ha akon. Namati hira hin maopay ha akon mga problema. Gin-gamit nira an Biblia basi pasarigon ako nga hinigugma ako ni Jehova, ngan nag-ampo hira kaupod ko. Tungod hito, nagin mas masayon ha akon nga karawaton an ira sagdon tikang ha Biblia.” Katapos maparig-on an iya relasyon kan Jehova, hiya nagsiring: “Yana, maaram na ako nga importante gud an pangaro hin bulig imbes nga solohon an aton nga mga problema.”

¹⁷ Importante gud an pangaro hin bulig kon an hilig ha pagkinita hin pornograpiya an hinungdan han aton imoral nga mga hingyap. Samtang mas ginlalangan naton an pag-aro hin bulig, mas daku an posibilidad nga an aton mahugaw nga mga hingyap ‘magburod ngan manganak hin sala’ nga makakasakit ha iba ngan magpapasipara han ngaran ni Jehova. An hingyap nga mapalipay hi Jehova ngan magpabilin ha Kristiano nga kongregasyon nagpagios ha damu han iya mga surugoon nga karawaton an bulig han mga tigurang.—San. 1:15; Sal. 141:5; Heb. 12:5, 6.

18. Ano an imo determinado nga buhaton?

¹⁸ Samtang nagtitikahamubo an moral han kalibotan ni Satanas, nalilipay gud hi Jehova nga nangangalimbasog an iya mga surugoon nga tipigan nga limpyo an ira hunahuna ngan sundon an iya hitaas nga suruklan ha moral! Salit hinaot magin determinado an tagsa ha aton nga magpabilin nga duok kan Jehova ngan karawaton an giya nga iya igintatagana pinaagi han iya Pulong ngan han Kristiano nga kongregasyon. An pagpabilin nga limpyo ha moral maghahatag ha aton hin kalipay ngan kamurayawan ha hunahuna. (Sal. 119:5, 6) Ha tidaraon, kon wad-on na hi Satanas, makakapribilehiyo kita nga mabuhi ha waray kataposan ha limpyo nga bag-o nga kalibotan han Dios.