HAN gintapik an sugbong ni Kingsley, gintikangan niya an pagbasa ha Biblia—an iya siyahan nga bahin ha Teokratiko nga Eskwelahan ha Ministeryo. Ginluluwas niya hin maopay an tagsa nga pulong ngan waray ginlalaktawan. Pero kay ano nga diri hiya nagkikita ha iya Biblia?

Hi Kingsley taga-Sri Lanka. Buta hiya. Bungol-bungol liwat hiya ngan kinahanglan niya mag-wheelchair. Paonan-o hiya nahibaro mahitungod kan Jehova ngan nagin kwalipikado ha Teokratiko nga Eskwelahan ha Ministeryo? Isusumat ko ha iyo.

Han nakilala ko hi Kingsley, nakita ko nga uhaw gud hiya ha kamatuoran. Damu na nga Saksi an nagdumara ha iya hin pag-aram, ngan daan na an iya kopya han libro nga Kahibaro nga Nagtutugway Ngadto ha Kinabuhi nga Waray Kataposan ha Braille. * Umuyon hiya nga ipadayon namon an iya pag-aram, pero may duha nga butang nga kinahanglan namon atubangon.

Siyahan, hi Kingsley naukoy ha usa nga pasilidad para ha mga lagas ngan mga baldado. Tungod kay maaringasa an palibot ngan bungol-bungol hi Kingsley, kinahanglan ko dakuon an akon tingog. Ngani, nababatian han ngatanan ha pasilidad an amon pag-aram kada semana!

 Ikaduha, gutiay la nga impormasyon an nababasa ngan nasasabtan ni Kingsley durante han tagsa nga pag-aram. Basi magin mapulsanon an amon pag-aram, maduruto nga nag-aandam hi Kingsley. Abanse ngan pauroutro nga ginbabasa niya an amon pag-aadman, ginbabasa an mga teksto ha iya Braille nga Biblia, ngan gin-aandam an mga baton ha iya kalugaringon nga pulong. Epektibo gud ini nga paagi. Durante han amon pag-aram, nalingkod hiya ha alpombra ngan malipayon nga ginpupuropukpok an salog samtang iginsasaysay an iya hinbaroan ha daku gud nga tingog. Waray pag-iha, duha ka beses na kami nga nag-aaram kada semana, ngan an tagsa hito naabot hin duha ka oras.

Karuyag gud ni Kingsley nga tumambong ha mga katirok ha Kingdom Hall, pero diri ito masayon. Kinahanglan niya hin bulig ha pagsakay ngan paghaw-as ha wheelchair pati ha awto, ngan ha pagsulod ngan paggawas ha Kingdom Hall. Kondi damu nga kabugtoan an nagsurosaliwan ha pagbulig ha iya, ginhunahuna nira ito nga pribilehiyo. Durante han katirok, nalingkod hiya hirani ha speaker han sound system, namamati hin maopay, ngan nagkukomento pa ngani!

Katapos hin pipira ka panahon, nagdesisyon hi Kingsley nga magpaenrol ha Teokratiko nga Eskwelahan ha Ministeryo. Duha ka semana antes han iya siyahan nga bahin ha pagbasa ha Biblia, ginpakianhan ko hiya kon nagpapraktis ba hiya. Nagsiring hiya, “Oo, Brother, mga 30 ka beses na ako nga nagpraktis.” Ginkumendasyonan ko hiya ha iya pangalimbasog ngan ginhangyo nga basahon an iya bahin basi mapamatian ko. Gin-abrihan niya an Biblia, ginhiram an mga teksto ha Braille, ngan nagtikang pagbasa. Pero, naobserbaran ko nga diri nagkikiwa an iya mga tudlo sugad han kasagaran niya nga ginbubuhat. Ginmemorya ngay-an niya an iya bahin!

Diri gud ako makatoo ha akon nakita, nga tungod hito nakatangis ako. Ginpakianhan ko hi Kingsley kon paonan-o niya namemorya an iya bahin katapos la hin 30 ka beses nga pagpraktis. Hiya binaton: “Diri, nagpapraktis ako hin mga 30 ka beses kada adlaw.” Ha sulod hin sobra usa ka bulan, nalingkod hi Kingsley ha iya alpombra ngan pauroutro nga ginbasa an mga teksto tubtob nga namemorya niya ito.

Inabot an adlaw han iya bahin ha Kingdom Hall. Han natapos ni Kingsley an iya bahin, an kabugtoan makusog nga nagpakpak, ngan damu an nakatangis han nakita nira an iya determinasyon. Usa nga magwarali nga maiha na nga umundang ha paghatag hin bahin tungod han kulba an naghangyo nga makaenrol utro. Kay ano? Hiya nagsiring, “Kon nahimo ito ni Kingsley, mahihimo ko liwat ito!”

Han Septyembre 6, 2008, katapos hin tulo ka tuig nga pag-aram ha Biblia, ginsimbolohan ni Kingsley an iya dedikasyon kan Jehova pinaagi ha pagpabawtismo. Matinumanon hiya tubtob han iya kamatay han Mayo 13, 2014. Natoo hiya nga ha Paraiso nga tuna, maipapadayon niya an iya matinumanon nga pag-alagad nga may perpekto nga kahimsog. (Isa. 35:5, 6)—Iginsumat ni Paul McManus.