HIRA Besalel ngan Oholiab may eksperyensya na ha konstruksyon. Sugad nga mga uripon ha Ehipto, posible nga nakahimo na hira hin damu gud nga briks. Pero diri na nira ito karuyag mahinumdoman. Yana magigin eksperto hira nga mga trabahador nga gintokahan nga manguna ha pagtukod han tabernakulo. (Eks. 31:1-11) Kondi gutiay gud la an nakakita han pipira han ira mag-opay hinduro nga ginhimo. Nasubo ba hira tungod hito? Importante gud ba kon hin-o an nakakita han ira mga ginhimo? Importante ba liwat kon hin-o an nakakakita han imo ginhimo?

An pipira nga gamit ha tabernakulo mag-opay gud nga obra maestra. Pananglitan, tagda an bulawan nga mga kerubin ha bawbaw han arka han kasabotan. Iginhulagway ito ni apostol Pablo sugad nga “mahimayaon.” (Heb. 9:5) Handurawa la iton makaruruyag hinduro nga mga butang nga hinimo ha bulawan!—Eks. 37:7-9.

Kon makikita yana an mga ginhimo nira Besalel ngan Oholiab, takos gud ito idispley ha pinakamaopay nga mga museo diin maaapresyar ito han mga tawo. Pero han panahon nga ginhimo ito, pira la an nakakita han pagkamaopay hito? An mga kerubin nahimumutang ha Pinakabaraan nga kwarto, salit makikita la ito han hitaas nga saserdote kon nasulod hiya didto usa beses kada tuig, ha Adlaw han Pagbayad han Sala. (Heb. 9:6, 7) Oo, gutiay gud la an nakakita hito.

Kon ikaw hi Besalel o hi Oholiab nga maduruto nga nagtrinabaho basi mahimo adto nga mga obra maestra, ano daw la an imo aabaton kon maaram ka nga gutiay la an nakakita hito? Yana, inaabat han mga tawo nga maopay gud an ira nahimo kon nakakakarawat hira hin pagdayaw ngan pagpabili tikang ha iba. Ito an ira suruklan han kalamposan. Pero iba gud an mga surugoon ni Jehova. Pariho kanda Besalel ngan Oholiab, nalilipay kita ha pagbuhat han kaburut-on ni Jehova ngan pagkaada han iya pag-uyon.

Ha panahon ni Jesus, komon na ha mga lider han relihiyon an pag-ampo basi magpabilib. Pero iba gud  an igintutdo ni Jesus. Nagsiring hiya nga sadang kita mag-ampo hin sinsero, nga diri naghihingyap nga dayawon han iba. Ano an resulta hito? “An imo Amay nga sekreto nga nagkikita magbibendisyon ha imo.” (Mat. 6:5, 6) Matin-aw, an importante amo an ginhuhunahuna ni Jehova may kalabotan han aton mga pag-ampo, diri an ginhuhunahuna han iba. An iya ginhuhunahuna amo an basihan kon birilhon gud ba an aton mga pag-ampo. Aplikado liwat ito ha bisan ano nga aton nahihimo ha pag-alagad ha iya. Ginhuhunahuna naton nga importante an aton ginhimo diri tungod kay gindadayaw kita han iba, kondi tungod kay nakakapalipay ito kan Jehova, “nga sekreto nga nagkikita.”

Han natapos an tabernakulo, “an dampog nagtabon han tabernakulo han katiringban, ngan an himaya ni Jehova nagpuno han tabernakulo.” (Eks. 40:34) Matin-aw gud ito nga ebidensya han pag-uyon ni Jehova! Ano daw la an gin-abat nira Besalel ngan Oholiab hito nga higayon? Bisan kon waray isurat an ira mga ngaran ha ira mga ginhimo, sigurado nga inabat hira hin katagbaw kay maaram hira nga ginbendisyonan ni Jehova an ira mga pangalimbasog. (Prob. 10:22) Paglabay hin mga tuig, nalipay gud hira nga makita nga padayon nga gin-gamit an ira mga ginhimo ha pag-alagad kan Jehova. Kon mabanhaw na hira ha bag-o nga kalibotan, sigurado nga malilipay hira ha paghibaro nga an tabernakulo gin-gamit ha tinuod nga pagsingba ha sulod hin 500 ka tuig!

Ha organisasyon ni Jehova yana, an ngaran han mga animator, artist, musikero, pararetrato, parahubad, ngan parasurat diri iginbubutang ha ira mga ginhimo. Hito nga paagi, sugad hin waray “nakakakita” han ira mga ginhimo. Sugad liwat hito an kahimtang ha kadam-an nga buruhaton ha sobra 110,000 nga kongregasyon ha bug-os nga kalibotan. Hin-o an nakakakita ha bugto nga nanginginano han accounts samtang ginhihimo niya an ginkikinahanglan nga rekord kada kataposan han bulan? O ha sekretaryo samtang gin-aandam niya an report han kongregasyon? O ha kabugtoan nga nag-aayad han Kingdom Hall?

Hira Besalel ngan Oholiab waray makakarawat hin tropiyo, medalya, o plake tungod han ira mag-opay nga disenyo ngan de-kalidad nga mga ginhimo. Pero nakakarawat hira hin mas birilhon hito—an pag-uyon ni Jehova. Sigurado nga nakita gud ni Jehova an ira ginhimo. Hinaot subaron naton an ira mapainubsanon ngan kinaburut-on nga pag-alagad.