1, 2. (a) Ano nga mga bendisyon an imo gud ginpapamulat ha Paraiso? (Kitaa an retrato hini nga pahina.) (b) Ano an maghahatag ha aton han pinakadaku nga kalipay ha bag-o nga kalibotan?

“AN TOTOO NGA KINABUHI.” Ini nga mga pulong nagpapahinumdom ha kadam-an ha aton han kinabuhi nga waray kataposan ha Paraiso nga tuna. Ngani, sumala kan apostol Pablo may koneksyon an “kinabuhi nga waray kataposan” ha “totoo nga kinabuhi.” (Basaha an 1 Timoteo 6:12, 19.) Ginpapamulat gud naton an kinabuhi nga waray kataposan nga maghahatag ha aton hin nagpapadayon nga katagbaw ngan kalipay. Diri naton bug-os nga mahahanduraw kon mationan-o kaopay an aton aabaton pagmata naton kada aga nga hingpit an aton kahimsog ha pisikal, mental, ngan emosyonal. (Isa. 35:5, 6) Hunahunaa la kon mationan-o kamakalilipay an pakig-upod ha aton mga hinigugma ngan kasangkayan, upod na an mga binanhaw! (Juan 5:28, 29; Buh. 24:15) Magkakaada liwat kita higayon nga pauswagon an aton kahibaro ha syensya, musika, arkitektura, ngan iba pa nga butang.

² Bisan kon ginpapamulat gud naton ito nga mag-opay nga mga butang, an pagsingba kan Jehova an maghahatag ha aton han pinakadaku nga kalipay ha bag-o nga kalibotan. Makalilipay gud nga hito nga panahon an mga tawo nagbabaraan na han ngaran ni Jehova ngan  nagpapasakop na ha iya pagmando! (Mat. 6:9, 10) Malilipay kita nga makita an katumanan han katuyoan ni Jehova para ha katawohan ngan ha tuna. Ngan hunahunaa la kon magigin ano kasayon nga magin mas duok kan Jehova samtang hinay-hinay nga nagigin hingpit kita!—Sal. 73:28; San. 4:8.

3. Ano an sadang naton pag-andaman yana?

³ Makakarawat gud naton ito nga mga bendisyon, kay nagpasarig hi Jesus nga “ha Dios an ngatanan posible.” (Mat. 19:25, 26) Pero kon karuyag naton mabuhi ha kadayonan ha bag-o nga kalibotan, kinahanglan gumios na kita yana basi ‘makaptan naton hin marig-on’ an kinabuhi nga waray kataposan. Sadang kita magkinabuhi ha paagi nga nagpapakita nga naghuhulat kita han kataposan hinin maraot nga kalibotan, ngan maghimo hin maaramon nga mga pitad basi magin andam ha pagkinabuhi ha bag-o nga kalibotan. Paonan-o naton ini mahihimo samtang aanhi pa kita hinin maraot nga sistema?

4. Iilustrar kon paonan-o kita mahimo mangandam para ha pagkinabuhi ha bag-o nga kalibotan.

⁴ Paonan-o kita mahimo mangandam para ha pagkinabuhi ha bag-o nga kalibotan? Handurawa nga nagpaplano kita pagbalhin ha iba nga nasud. Paonan-o kita mangangandam para hini? Bangin magtikang kita pag-aram han yinaknan ngan mga kustomre han mga tawo didto. Bangin tilawan naton an pipira han ira mga pagkaon. Ha pipira nga paagi, bangin magkinabuhi kita nga sugad hin naukoy na kita hito nga nasud. Tutal, ito an aton ginlalaoman nga magigin pagkinabuhi naton didto. Sugad man, makakag-andam kita para ha pag-ukoy ha bag-o nga kalibotan pinaagi ha pangalimbasog nga magkinabuhi ha paagi nga sugad hin aadto na kita. Aton kitaon an pipira nga ehemplo.

5, 6. Paonan-o an pagsunod ha mga instruksyon han organisasyon ni Jehova mabulig ha aton nga mangandam para ha pagkinabuhi ha bag-o nga kalibotan?

⁵ Ha bag-o nga kalibotan, an ngatanan nga tawo magpapasakop na ha pagkasoberano ni Jehova. Kabaliktaran gud ito ha kalibotan ni Satanas diin an mga tawo diri mapinasakupon! Para ha ira, importante gud an pagin independente, ngan ira gin-iinsister an ira personal nga mga karuyag. Kondi ano an resulta? An pagbalewaray ha mga giya han Dios nagresulta ha pag-antos, duro nga kasubo, ngan trahedya pa ngani. (Jer. 10:23) Ginpapamulat gud naton an panahon diin an ngatanan nga tawo magpapasakop na ha mahigugmaon nga pagmando ni Jehova!

⁶ Makalilipay gud nga magpasakop ha mga kahikayan ni Jehova ha bag-o nga kalibotan samtang nagbuburublig kita ha pagpaopay han tuna, pagtutdo ha mga binanhaw, ngan pagbuhat han iya kaburut-on para ha katawohan. Pero anoman kon tagan kita hin toka nga diri naton karuyag? Magigin masinugtanon ba kita? Hihimoon ba naton an aton gimaopayi ngan malipayon nga tutumanon an aton toka? Kadam-an ha aton an mabaton hin oo! Kon sugad, nasunod ba kita yana ha mga instruksyon han organisasyon ni Jehova? Kon ginhihimo na naton ito, nangangandam kita para ha kinabuhi nga waray kataposan ilarom han pagmando ni Jehova.

7, 8. (a) Kay ano nga sadang kita makigkooperar ha mga nangunguna? (b) Ano nga mga pagbag-o an naeksperyensyahan han pipira nga Kristiano? (c) Ha ano kita makakasiguro mahitungod ha pagkinabuhi ha bag-o nga kalibotan?

⁷ Makakapangandam kita para ha pagkinabuhi ha bag-o nga kalibotan diri la pinaagi ha pagin mapinasakupon ha kahikayan ni Jehova, kondi pinaagi liwat ha pagkultibar han pagkakontento ngan pagkooperar. Kon makooperar kita ha mga nangunguna yana, bangin pinaagi ha pagin kontento ngan malipayon ha aton bag-o nga toka, posible nga magin sugad hito an aton disposisyon ha bag-o nga kalibotan. (Basaha an Hebreo 13:17.) Han sinulod an mga Israelita ha Tuna nga Iginsaad, diri hira an nagpili han ira uukyan, lugod gintoka hira kon diin hira maukoy. (Num. 26:52-56; Jos. 14:1, 2) Yana, diri pa kita maaram kon  diin kita papaukyon ha bag-o nga kalibotan. Kondi kon makikigkooperar kita, magigin kontento ngan malipayon kita ha pagbuhat han kaburut-on ni Jehova diin man kita paukyon pag-abot hito nga panahon.

⁸ Daku gud nga pribilehiyo an pagkinabuhi ha bag-o nga kalibotan ilarom han pagmando han Ginhadian, salit bawi gud an aton pangalimbasog ha pagkooperar ha organisasyon ni Jehova ngan ha pagtuman han mga igintoka ha aton. Syempre, mahimo magbag-o an aton sitwasyon ha paglabay han panahon. Pananglitan, may mga Bethelite ha Estados Unidos nga gintoka ha iba nga klase hin bug-os-panahon nga pag-alagad, ngan nagpapahimulos hira yana hin hura nga bendisyon. Tungod han kalagas o iba pa nga hinungdan, an pipira han nagbibiyahe nga paramangno igintoka na yana sugad nga mga espesyal payunir. Kon ginkukultibar naton an pagkakontento, nag-aampo para ha bulig han Dios, ngan ginbubuhat an gimaopayi ha pag-alagad ha iya, magigin malipayon kita ngan makakakarawat kita hin hura nga bendisyon bisan hinin peligroso nga kataposan nga mga adlaw. (Basaha an Proberbios 10:22.) Kumusta man an aton mga ginlalaoman ha tidaraon? Bangin may nahuhunahuna na kita nga karuyag naton ukyan ha bag-o nga kalibotan, pero anoman kon paukyon kita ha iba nga lugar? Diin man kita paukyon o anoman an itoka ha aton, sigurado nga magigin mapasalamaton gud kita, kontento, ngan malipayon.—Neh. 8:10.

9, 10. (a) Kay ano nga bangin kinahanglan kita magin mapailubon ha bag-o nga kalibotan? (b) Paonan-o naton maipapakita nga mapailubon kita yana?

⁹ Ha bag-o nga kalibotan, bangin may mga panahon nga kinahanglan naton magin mapailubon. Pananglitan, bangin hinbaroan naton nga nalilipay an iba tungod kay ginbanhaw na an ira mga kapamilya ngan kasangkayan. Kondi kita, bangin kinahanglan pa maghulat ha pagkabanhaw han aton mga hinigugma. Kon ito an mahitabo, malilipay ba kita para ha iba ngan magigin mapailubon? (Roma 12:15) An mapailubon nga paghulat ha katumanan han mga saad ni Jehova yana mabulig ha aton nga magin mapailubon ha bag-o nga kalibotan.—Ekles. 7:8.

¹⁰ Makakapangandam liwat kita para ha pagkinabuhi ha bag-o nga kalibotan pinaagi ha pagin mapailubon kon may mga pagbag-o ha aton pagsabot ha kamatuoran. Maduruto ba naton nga gin-aadman ito nga mga pagbag-o, ngan mapailubon ba kita kon diri naton ito bug-os nga nasasabtan? Kon ginbubuhat naton ini, magigin masayon para ha aton nga magin mapailubon ha bag-o nga kalibotan kon may bag-o nga mga instruksyon hi Jehova ha aton.—Prob. 4:18; Juan 16:12.

11. Kay ano nga sadang kita magin mapinasayloon yana, ngan paonan-o ini makakabulig ha aton ha bag-o nga kalibotan?

¹¹ Usa pa nga mapulsanon nga kalidad para ha pagkinabuhi ha bag-o nga kalibotan an pagin mapinasayloon. Durante han Usa ka Yukot ka Tuig nga Pagmando han Kristo, bangin kinahanglan anay lumabay an panahon antes mawara an pagkadiri-hingpit han mga tawo. (Buh. 24:15) Magigin mahigugmaon ngan mapinasayloon ba kita hito nga panahon? Kon magigin mapinasayloon kita yana ngan titipigan naton an maopay nga relasyon ha iba, magigin masayon para ha aton an pagbuhat hito ha bag-o nga kalibotan.—Basaha an Colosas 3:12-14.

12. Kay ano nga sadang kita mangandam yana para ha pagkinabuhi ha bag-o nga kalibotan?

¹² Ha bag-o nga kalibotan, bangin diri pirme matuman an aton mga karuyag, o bangin kinahanglan pa naton maghulat antes ito makarawat. Kinahanglan kita magin maapresyaron ngan kontento ha bisan ano nga kahimtang samtang nagpapahimulos kita han mahigugmaon nga pagmando ni Jehova. Nagpapasabot ito nga kinahanglan naton ipakita an mga kalidad nga igintututdo ni Jehova nga kultibaron naton yana. Kon magkikinabuhi kita yana sugad han aton ginlalaoman nga pagkinabuhi ha bag-o nga kalibotan, makukultibar naton an mga kalidad nga magagamit naton ha kadayonan. Ginpaparig-on naton an  aton pagtoo nga tinuod gud an “tiarabot nga kalibotan.” (Heb. 2:5; 11:1) Dugang pa, iginpapakita naton nga hingyap gud naton nga magkinabuhi ha bag-o nga kalibotan diin an ngatanan masinugtanon na kan Jehova.

13. Ano an magigin prayoridad naton ha bag-o nga kalibotan?

¹³ Tagda an usa pa nga paagi nga makakapangandam kita para ha totoo nga kinabuhi. Bisan kon nagsaad hi Jehova nga magigin hura an pagkaon ngan iba pa naton nga panginahanglan ha bag-o nga kalibotan, an maghahatag ha aton hin duro gud nga kalipay amo an aton duok nga relasyon ha iya. (Mat. 5:3) Espirituwal nga mga buruhaton an magigin prayoridad naton, ngan malilipay kita ha pag-alagad kan Jehova. (Sal. 37:4) Salit kon gin-uuna naton an espirituwal nga mga butang yana, nangangandam kita para ha totoo nga kinabuhi.—Basaha an Mateo 6:19-21.

14. Ano nga espirituwal nga mga tumong an mabulig ha mga batan-on nga makapangandam para ha pagkinabuhi ha bag-o nga kalibotan?

¹⁴ Paonan-o madudugangan an aton kalipay ha pag-alagad kan Jehova? Usa nga paagi amo an paghimo hin espirituwal nga mga tumong. Kon usa ka nga batan-on, seryoso nga hunahunaa kon paonan-o mo magagamit an imo kinabuhi ha pag-alagad kan Jehova. Kay ano nga diri repasuhon an mga publikasyon nga naghihisgot han iba-iba nga klase han bug-os-panahon nga pag-alagad ngan himoon nga tumong an usa hito? * Puydi ka makiistorya ha usa nga maiha na ha bug-os-panahon nga pag-alagad. Pinaagi ha pagpokus ha pag-alagad yana, nangangandam ka para ha waray kataposan nga pag-alagad ha Dios ha bag-o nga kalibotan, diin magigin mapulsanon gud an imo eksperyensya ngan an pagbansay nga imo nakarawat.

15. Ano nga espirituwal nga mga tumong an mahimo naton kab-uton?

¹⁵ Sugad nga mga parasamwak han Ginhadian, ano nga espirituwal nga mga tumong an mahimo naton kab-uton? Puydi naton himoon nga tumong an pagpauswag han aton pamaagi ha pipira nga bahin han ministeryo. O mangalimbasog nga mas masabtan an mga prinsipyo ha Biblia ngan kon paonan-o naton ito iaaplikar. Mahimo liwat naton pauswagon an aton pagbasa ha publiko o pagdumara hin bahin o pagkomento ha mga katirok. Sigurado nga may mahuhunahuna ka pa nga iba nga tumong. An punto amo ini: An pagkaada espirituwal nga mga tumong magdudugang han imo kadasig ha pag-alagad, ngan mabulig ito ha imo nga makapangandam para ha pagkinabuhi ha bag-o nga kalibotan.

16. Kay ano nga an pag-alagad kan Jehova amo an pinakamaopay nga paagi han pagkinabuhi?

¹⁶ An pagpangandam ba para ha bag-o nga kalibotan nagpapasabot nga diri na magigin makapatagbaw an aton pagkinabuhi yana? Diri! An pag-alagad kan Jehova amo an pinakamakapatagbaw nga paagi han pagkinabuhi. Diri kita nag-aalagad ha iya tungod la kay ginpirit kita o basi la makatalwas ha daku nga kasakitan. Ginlarang kita ni Jehova basi mag-alagad ha iya, salit ito an maghahatag ha aton han pinakadaku nga kalipay. An pagsunod han giya ni Jehova ngan pakaeksperyensya han iya gugma mas maopay gud kay ha pagkinabuhi nga bulag ha iya. (Basaha an Salmo 63:1-3.) Ngan diri na naton kinahanglan hulaton pa an bag-o nga kalibotan basi la mapahimulsan an espirituwal nga mga bendisyon tungod han aton bug-os-kasingkasing nga pag-alagad kan Jehova—napapahimulosan na naton ito yana! Ngani, an pipira nga maiha na nga nag-aalagad ha iya makakasiring gud nga ini an pinakamaopay nga paagi han pagkinabuhi.—Sal. 1:1-3; Isa. 58:13, 14.

17. Mationan-o kaimportante an kaliawan ngan pagpahalibway ha Paraiso?

¹⁷ Ha bag-o nga kalibotan, magkakaada kita panahon para ha aton personal nga mga hilig ngan ha pagpahalibway. Aw, kay ano nga ginlarang kita ni Jehova nga may hingyap nga malipay ha aton mga nahihimo ngan ha angayan nga pagpahalibway kon diri man niya ito bug-os nga tatagbawon? (Ekles. 2:24) Hi Jehova nagsaad nga iya ‘bubusugon an tinguha han tagsa nga buhi.’ (Sal. 145:16) Makalilipay an pagkaada kaliawan ngan pagpahalibway, pero magigin mas makalilipay pa gud ito kon uunahon naton an aton relasyon kan Jehova. Sugad liwat hito an magigin kahimtang ha Paraiso. Salit maaramon gud nga magin timbang ha kaliawan ngan pagpahalibway samtang gin-uuna naton an pagpamiling han Ginhadian ngan magpokus ha espirituwal nga mga bendisyon nga napapahimulsan naton yana.—Mat. 6:33.

18. Paonan-o naton maipapakita nga nangangandam kita para ha kinabuhi nga waray kataposan ha Paraiso?

¹⁸ Ha tiarabot nga Paraiso, aabaton naton an kalipay nga waray pa gud naton maeksperyensyahi. Hinaot ipakita naton nga karuyag gud naton magkinabuhi didto pinaagi ha pagpangandam para hito yana. Kultibaron naton an mga kalidad nga igintututdo ha aton ni Jehova ngan madasigon nga isangyaw an maopay nga sumat. Hinaot magin malipayon kita ha pag-una han aton pagsingba kan Jehova. Ngan tungod kay bug-os kita nga nasarig nga tutumanon ni Jehova an iya mga saad, magkinabuhi kita yana nga naghuhulat han bag-o nga kalibotan!