1, 2. Ano an disposisyon han mga magsiringba ni Jehova tikang pa hadto?

AN MGA magsiringba ni Jehova hadto mapailubon nga naghulat ha katumanan han mga tagna. Pananglitan, hi Jeremias nagtagna nga an Juda magigin binayaan, ngan natuman ito han ginbungkag han Babilonya an Jerusalem han 607 B.C.E. (Jer. 25:8-11) Hi Isaias nga gin-giyahan ha pagtagna nga ibabalik ni Jehova an mga Judio ha ira nasud, nagsiring: “Bulahan hira ngatanan nga naghuhulat ha iya.” (Isa. 30:18) Naglaom liwat hi Mika nga matutuman an iya mga igintagna mahitungod han katawohan han Dios hadto, hiya nagsiring: “Ako matan-aw ngadto kan Jehova.” (Mika 7:7) Ngan ha damu nga katuigan, an mga surugoon han Dios padayon nga naghulat ha katumanan han mga tagna may kalabotan ha Mesias, o Kristo.—Luc. 3:15; 1 Ped. 1:10-12. *

² An mga surugoon han Dios yana padayon liwat nga naghuhulat tungod kay may mga tagna mahitungod han Mesias nga waray pa matuman. Ha diri na maiha, gagamiton ni Jehova an Mesianiko nga Ginhadian basi wad-on an pag-antos han tawo pinaagi ha pagbungkag ha magraot ngan pagtalwas ha iya katawohan tikang hinin maraot nga kalibotan nga ginmamandoan ni Satanas. (1 Juan 5:19) Salit hinaot  magpabilin kita nga alerto ngan andam tungod kay hirani na gud an kataposan hini nga sistema.

3. Kon maiha na kita nga naghihinulat ha pag-abot han kataposan, ano an bangin igpakiana naton?

³ Sugad nga mga surugoon ni Jehova, hingyap naton nga makita nga ‘natutuman an kaburut-on [han Dios] dinhi ha tuna sugad han ha langit.’ (Mat. 6:10) Kondi, kon maiha na kita nga naghihinulat ha pag-abot han kataposan, bangin makagpakiana kita, ‘Kay ano nga kinahanglan padayon kita nga maghulat han kataposan?’ Aton kitaon.

4. Kay ano nga importante nga padayon kita nga magbantay?

⁴ Matin-aw nga iginsusumat han Biblia kon ano an sadang naton magin disposisyon may kalabotan ha tiarabot nga kabungkagan hini nga sistema. Ginsidngan ni Jesus an iya mga sumurunod nga “padayon nga magbantay” ngan “padayon nga magmata.” (Mat. 24:42; Luc. 21:34-36) Salit kinahanglan padayon kita nga maghulat han kataposan kay ginsugo kita ni Jesus nga buhaton ito. Maopay nga susbaranan an organisasyon ni Jehova hini nga bahin. An aton mga publikasyon padayon nga nagsasagda ha aton nga ‘maghulat ngan hunahunaon pirme an presensya han adlaw ni Jehova’ ngan magpokus ha Iya saad nga bag-o nga kalibotan.—Basaha an 2 Pedro 3:11-13.

5. Kay ano nga labi nga kinahanglan naton magin mabinantayon?

⁵ Importante para ha siyahan-siglo nga mga Kristiano nga padayon nga maghulat, pero labi nga importante ito ha aton yana. Kay ano? Tungod kay nagkikinabuhi kita durante han presensya han Kristo. Tikang han 1914, natutuman na an tigaman han iya presensya. Ngan ito nga tigaman, nga nag-uupod han bug-os-kalibotan nga pagsangyaw han Ginhadian ngan han pagtikaraot han kahimtang ha kalibotan, nagpapasabot nga nagkikinabuhi na kita ha “ikatarapos hini nga sistema.” (Mat. 24:3, 7-14) Tungod kay waray isumat ni Jesus an kahilawig hito nga peryodo han panahon, labi nga kinahanglan naton magpabilin nga nagmamata ngan mabinantayon.

6. Kay ano nga makakasiring kita nga magtitikaraot pa gud an kahimtang ha kalibotan samtang nagtitikahirani an kataposan?

⁶ Bangin magpakiana kita: Posible ba nga an “ikatarapos hini nga sistema” nagtutudlok ha panahon ha tidaraon diin mas maraot na gud an kahimtang ha kalibotan? Iginpapakita han Biblia nga magtitikaduro an karaotan ha “kataposan nga mga adlaw.” (2 Tim. 3:1, 13; Mat. 24:21; Pah. 12:12) Salit bisan kon maraot na an kahimtang han kalibotan yana, sigurado nga magtitikaraot pa ito.

7. Ano an iginpapakita han Mateo 24:37-39 may kalabotan han kahimtang ha kalibotan ha kataposan nga mga adlaw?

⁷ Pero magigin mationan-o karaot an kahimtang ha kalibotan antes umabot an “daku nga kasakitan”? (Pah. 7:14) May mga naghuhunahuna nga magkakaada girra ha tagsa nga nasud, magkakaada duro nga gutom, ngan damu gud an magkakasakit. Kon mahitabo ito, bisan an mga diri interesado ha Biblia mapipiritan ha pagkarawat nga natutuman na an tagna han Biblia. Pero nagsiring hi Jesus nga kadam-an han mga tawo diri ‘maghahatag hin atensyon’ ha iya presensya ngan magpapadayon ha ira normal nga mga buruhaton nga tungod hito makakalasan hira ha pag-abot han kataposan. (Basaha an Mateo 24:37-39.) Salit, iginpapakita han Biblia nga diri magigin sobra karaot an kahimtang ha kalibotan durante han kataposan nga mga adlaw nga mapipiritan an mga tawo nga tumoo nga hirani na an kataposan.—Luc. 17:20; 2 Ped. 3:3, 4.

8. Ha ano kombinsido adton nagsusunod han sugo ni Jesus nga “padayon nga magbantay”?

⁸ Ha luyo nga bahin, basi matuman an katuyoan han tigaman, magigin matin-aw gud an katumanan hito para magin alerto adton nagsusunod na han sugo ni Jesus nga “padayon nga  magbantay.” (Mat. 24:27, 42) Ngan ito gud an nahitabo tikang han 1914. Tikang hadto, an mga bahin han tigaman padayon nga natutuman. Matin-aw, nagkikinabuhi na kita yana ha “ikatarapos hini nga sistema”—limitado nga peryodo han panahon nga nagtutugway ngadto ha ngan nag-uupod han kabungkagan hini nga maraot nga sistema.

9. Kay ano nga kinahanglan padayon kita nga maghulat han kataposan hini nga sistema?

⁹ Salit kay ano nga kinahanglan padayon nga maghulat an mga Kristiano yana? Tungod kay ginsusunod naton an sugo ni Jesu-Kristo. Dugang pa, nakikita na naton an katumanan han tigaman han iya presensya. Naghuhulat kita diri tungod kay basta la kita natoo ha aton nababatian, kondi tungod han marig-on nga ebidensya ha Biblia nga nag-aaghat ha aton nga magpabilin nga nagmamata, alerto, mabinantayon, ngan padayon nga naghuhulat han kataposan hinin maraot nga sistema.

10, 11. (a) Ha ano nga posibilidad gin-andam ni Jesus an iya mga disipulo? (b) Ano an ginsiring ni Jesus nga sadang buhaton han iya mga sumurunod kon inaabat nira nga an ira paghinulat baga hin mas maiha kay han ira ginlalaoman? (Kitaa an retrato ha tinikangan hini nga artikulo.)

¹⁰ Damu ha aton an matinumanon nga nag-aalagad kan Jehova ngan naghuhulat han kataposan ha damu na nga katuigan. Kondi bisan kon maiha na kita nga naghihinulat, diri naton sadang tugotan nga magluya an aton determinasyon nga padayon nga maghulat. Kinahanglan magin andam kita ha pag-abot ni Jesus ha pagbungkag han kalibotan ni Satanas. Hinumdumi an ginsiring ni Jesus ha iya mga sumurunod: “Padayon nga magbantay, padayon nga magmata, kay diri kamo maaram kon san-o an itinanda nga panahon. Pariho ito hin tawo nga nagbiyahe ha iba nga nasud nga ginbayaan an iya balay ngan gintagan an iya mga uripon hin awtoridad ha panginano ha panimalay, nga an kada usa ha ira may buruhaton, ngan gintugon niya an gwardya ha purtahan nga padayon nga magbantay. Salit padayon nga magbantay, kay diri kamo maaram kon san-o maabot an Agaron han balay, kon temprano ba ha gab-i o ha katutnga o ha kaagahon o temprano ha aga, basi diri kamo maabtan nga nangangaturog kon tigda nga umabot hiya. Kondi an akon ginyayakan ha iyo, ginyayakan ko ha ngatanan: Padayon nga magbantay.”—Mar. 13:33-37.

¹¹ Han nasabtan han mga sumurunod han Kristo nga an iya presensya nagtikang han 1914, nasantop nira nga anoman nga oras mahimo na umabot an kataposan. Salit nangandam hira para hito pinaagi ha pagin mas maduruto ha pagsangyaw nga buruhaton. Nagsiring hi Jesus nga posible hiya umabot hin mas maiha kay han ginlalaoman—“ha kaagahon o temprano ha aga.” Kon mahitabo ito, ano an sadang himoon han iya mga sumurunod? Hiya nagsiring: “Padayon nga magbantay.” Salit bisan kon damu ka tuig na kita nga naghihinulat, diri ito nagpapasabot nga maiha pa an kataposan o diri na gud ito maabot.

12. Ano an iginpakiana ni Habakuk kan Jehova, ngan paonan-o ito ginbaton ni Jehova?

¹² Tagda hi propeta Habakuk, nga ginsugo ha pagpasamwak han kabungkagan han Jerusalem. Antes pa hiya magtikang ha pagpasamwak, damu ka tuig na nga ginpahamangnoan an syudad mahitungod han kabungkagan hito. Umabot an panahon nga nagduro na gud an karaotan ngan kawaray-hustisya. Salit diri urusahon nga nagpakiana hi Habakuk: “O Jehova, ngada san-o an akon pagsangpit?” Imbes nga direkta nga batunon ni Jehova an pakiana, ginpasarig niya an iya matinumanon nga propeta nga an kabungkagan han Jerusalem “diri maglalangan.” Ginsidngan niya hi Habakuk nga padayon nga ‘maghulat hini.’—Basaha an Habakuk 1:1-4; 2:3.

13. Ano an puydi unta mahunahuna ni Habakuk, pero kay ano nga diri ito maaramon?

¹³ Handurawa la kon nanluya hi Habakuk ngan  nakahunahuna: ‘Maiha na ako nga nakakabati mahitungod han kabungkagan han Jerusalem. Anoman kon maiha pa gud ito mahitabo? Baga hin diri praktikal nga padayon ako nga magpasamwak nga sugad hin mabubungkag na gud an syudad. Bahala na an iba nga magbuhat hito.’ Kon naghinunahuna hi Habakuk hin sugad hito, posible nga nawara niya an pag-uyon ni Jehova pati an iya kinabuhi han ginbungkag an Jerusalem han mga Babilonyahanon!

14. Kay ano nga makakasiguro kita nga diri makakawang an aton padayon nga paghinulat?

¹⁴ Ha bag-o nga kalibotan, mapapamatud-an naton nga natuman gud an tagna mahitungod han pag-ikatarapos hini nga sistema. An pagpamalandong kon paonan-o ito nahitabo mas magpaparig-on han aton pagsarig kan Jehova ngan ha iya mga saad nga matutuman pa la. (Basaha an Josue 23:14.) Magigin mapasalamaton gud kita nga an Dios, nga may awtoridad ha pagdesisyon may kalabotan ha mga “panahon o itinanda nga mga adlaw,” nagsagda ha aton nga magin mabinantayon kay “an kataposan han ngatanan nga butang hirani na.”—Buh. 1:7; 1 Ped. 4:7.

15, 16. Kay ano nga an pagin maduruto ha pagsangyaw amo an pinakamaaramon nga buhaton hinin panahon han kataposan?

¹⁵ An organisasyon ni Jehova padayon nga magpapahinumdom ha aton nga magpokus ha pag-alagad ha iya. Ito nga mga pahinumdom mabulig ha aton nga magin sagipo ha pag-alagad ha Dios ngan matipigan ha aton hunahuna nga natutuman na an tigaman han presensya han Kristo. Kon sugad, ano an maaramon nga buhaton naton? Kinahanglan padayon naton nga unahon an pagpamiling han Ginhadian ngan han katadongan han Dios pinaagi han maduruto nga pagsangyaw han maopay nga sumat.—Mat. 6:33; Mar. 13:10.

¹⁶ Usa nga bugto an nagsiring: ‘Pinaagi ha pagsangyaw han maopay nga sumat han Ginhadian han Dios, mabubuligan naton an mga tawo nga matalwas tikang ha kamatayon ha tiarabot nga kabungkagan han kalibotan.’ Maaram hiya han inaabat han usa nga natalwas tungod kay hiya ngan an iya bana natalwas tikang ha nalunod nga barko nga Wilhelm Gustloff han 1945. Bisan ha sugad nga peligroso nga kahimtang, an usa mahimo magkaada sayop nga panhunahuna kon ano gud an importante. Nahinumdom an bugto nga usa nga babaye an nagtinangis ngan nagginuliat: “An akon mga maleta! An akon mga maleta! An akon alahas! An akon mga alahas aadto ha kwarto. Nawara na an ngatanan ha akon!” Ha kabaliktaran, may mga pasahero nga binulig ha pagtalwas ha iba tikang ha nagyiyelo nga kadagatan bisan kon nameligro an ira kinabuhi. Pariho hadton diri makikalugaringon nga mga  pasahero, ginhihimo naton an ngatanan basi buligan an mga tawo. Pirme naton ginhuhunahuna an pagkaapurado han pagsangyaw nga buruhaton ngan ginbubuligan an iba basi matalwas ha tiarabot nga kabungkagan hini nga kalibotan samtang may panahon pa.

17. Kay ano nga natoo kita nga an kataposan mahimo umabot ha anoman nga oras?

¹⁷ An mga panhitabo ha kalibotan matin-aw nga nagpapakita nga natutuman na an mga tagna ha Biblia ngan hirani na gud an kataposan hinin maraot nga sistema. Salit diri naton sadang hunahunaon nga maiha pa antes atakehon han “napulo nga sungay” ngan “mapintas nga hayop” ha Pahayag 17:16 an Babilonya nga Gamhanan, an imperyo han buwa nga relihiyon ha kalibotan. Hinumdumi nga ‘ibubutang han Dios ha ira kasingkasing’ ito nga pag-atake ngan mahimo ito mahitabo hin tigda ngan ha anoman nga oras! (Pah. 17:17) Hirani na gud an kataposan hinin maraot nga kalibotan ni Satanas. Salit sadang naton sundon an pahamangno ni Jesus: “Tagi hin atensyon an iyo kalugaringon nga an iyo kasingkasing diri mabug-atan han sobra nga pagkinaon, pag-ininom, ngan han mga kabaraka ha kinabuhi, ngan ito nga adlaw tigda nga maabot ha iyo sugad hin lit-ag.” (Luc. 21:34, 35; Pah. 16:15) Hinaot magin determinado kita nga mag-alagad kan Jehova nga may pagkaapurado, nasarig nga hiya “nagbubuhat para ha [usa] nga naghuhulat ha iya.”—Isa. 64:4.

18. Ano nga pakiana an hihisgotan ha sunod nga artikulo?

¹⁸ Samtang naghuhulat kita han kataposan hinin maraot nga sistema, sadang naton sundon an giniyahan nga sagdon ni disipulo Judas: “Mga hinigugma, parig-ona an iyo kalugaringon ha iyo pinakabaraan nga pagtoo ngan pag-ampo kamo uyon ha baraan nga espiritu basi magpabilin kamo ha gugma han Dios, samtang nagpapamulat kamo han kalooy han aton Ginoo nga hi Jesu-Kristo, nga nagriresulta hin kinabuhi nga waray kataposan.” (Jud. 20, 21) Kondi, paonan-o naton maipapakita nga ginpapamulat gud naton an saad han Dios nga bag-o nga kalibotan? Hihisgotan ito han sunod nga artikulo.