1, 2. (a) Kay ano nga kombinsido ka nga hinigugma ni Jehova an iya katawohan? (b) Ginlarang an tawo nga may-ada ano nga panginahanglan?

KAY ano nga kombinsido ka nga hinigugma ni Jehova an iya katawohan? Antes ka bumaton, tagda ini nga mga ehemplo: Ha sulod hin pipira ka tuig, mahigugmaon nga gin-aghat han kabugtoan hi Taylene nga magin timbang ngan magin makatadunganon ha iya ginlalaoman ha iya kalugaringon. Hiya nagsiring: “Kon diri ako hinigugma ni Jehova, waray unta niya ako padayon nga sagdoni.” Hi Brigitte, nga solo nga nagpadaku han iya duha nga anak han namatay an iya bana, nagsiring: “An pagpadaku hin mga anak hini nga sistema ni Satanas usa han pinakamakuri nga ayat, labi na para ha solo nga kag-anak. Pero kombinsido ako nga hinigugma ako ni Jehova kay ginbuligan niya ako ha ngatanan ko nga problema, ngan waray niya tuguti nga maeksperyensyahan ko an labaw han akon maiilob.” (1 Cor. 10:13) Hi Sandra may grabe nga sakit nga waray tambal. Ha usa nga kombensyon, usa nga bugto an nagpakita ha iya hin personal nga interes. An bana ni Sandra nagsiring: “Bisan kon diri namon hiya personal nga kilala, an iya hilarom nga pagpaid nakapalipay gud ha amon. Para ha akon, bisan an simple nga mga kapahayagan han gugma han kabugtoan nagpapakita nga hinigugma gud kami ni Jehova.”

 ² An mga tawo ginlarang nga may panginahanglan nga maghigugma ngan higugmaon. Masayon la kita masubo kon diri natatagbaw ini nga panginahanglan tungod han diri ginlalaoman nga mga panhitabo, pagluya han kahimsog, problema ha pinansyal, o han pagin diri mabungahon ha ministeryo. Kon inaabat naton nga diri na kita hinigugma ni Jehova, sadang naton hinumdoman nga presyoso kita ha iya ngan aada hiya, ‘nakapot han aton too nga kamot’ ngan nabulig ha aton. Diri gud kita niya hingangalimtan kon matinumanon kita ha iya.—Isa. 41:13; 49:15.

3. Ano an magpaparig-on han aton pagtoo nga diri napapas an gugma ni Jehova para ha aton?

³ Sigurado gud an mga indibiduwal nga gin-unabi kanina nga ginbuligan hira han Dios durante han magkuri nga panahon. Makakasiguro liwat kita nga bubuligan kita niya. (Sal. 118:6, 7) Hihisgotan hini nga artikulo inin upat nga regalo nga nagpapamatuod nga hinigugma kita ni Jehova: (1) iya mga linarang, (2) iya giniyahan nga Pulong, (3) pribilehiyo nga pag-ampo, ngan (4) lukat. An pagpamalandong han mag-opay nga butang nga ginhimo ni Jehova posible gud nga mas magpahilarom han aton apresasyon ha iya diri napapas nga gugma.—Basaha an Salmo 77:11, 12.

4. Ano an aton hibabaroan kon papamalandungon naton an mga linarang ni Jehova?

⁴ Makikita ba ha mga linarang ni Jehova an iya diri napapas nga gugma ha aton? Oo, tungod kay an paglarang mismo kapahayagan han gugma han Dios. (Roma 1:20) Gindisenyo niya an tuna ha paagi nga makakagkinabuhi kita dida hito nga malipayon ngan talwas. Gintagan kita niya han ngatanan naton nga panginahanglan. Pananglitan, tungod kay kinahanglan kita kumaon basi mabuhi, ginsiguro niya nga matubo ha tuna an damu gud ngan magkadurodilain nga tanom nga mahimo naton kaunon. Ginhimo pa ngani niya nga makalilipay ngan makapatagbaw nga eksperyensya an pagkaon! (Ekles. 9:7) Hi Catherine nalilipay gud pag-obserbar ha mga linarang, labi na durante han katsaringsing ha Canada. Hiya nagsiring: “Urusahon gud kon paonan-o nagigin makaruruyag an ngatanan—an namumukad nga mga tanom nga nakaprograma nga tumubo ha tuna ngan an mga tamsi nga nabalik tikang ha ira pagbalhin ha iba nga lugar, upod na an gutiay nga hummingbird nga nahapon ha tubongan hin tamsi ha gawas han akon bintana ha kusina. Sigurado nga hinigugma gud kita ni Jehova salit gintagan kita niya hin damu nga butang nga nakakapalipay ha aton.” An aton mahigugmaon nga Amay ha langit nalilipay ha iya mga linarang, ngan karuyag niya nga malipay liwat kita hito.—Buh. 14:16, 17.

5. Paonan-o nakikita an gugma ni Jehova ha pagkalarang ha tawo?

⁵ Ginlarang kita ni Jehova nga may abilidad ha pagbuhat hin mabungahon ngan mapulsanon nga trabaho nga nakakadugang han aton kalipay. (Ekles. 2:24) Katuyoan niya nga pun-on han tawo an tuna, kultibaron ito, ngan atamanon an kaisdaan, katamsihan, ngan iba pa nga linarang. (Gen. 1:26-28) Ngan ginlarang kita niya nga may mag-opay nga kalidad basi masubad naton hiya!—Efe. 5:1.

6. Kay ano nga sadang gud naton apresyaron an Pulong han Dios?

⁶ Tungod han daku nga gugma ni Jehova, ginhatag niya ha aton an Biblia. Iginsusumat hito an kinahanglan naton mahibaroan mahitungod ha iya ngan han iya inaabat ha mga tawo. Pananglitan, iginsusumat ha aton han Biblia kon paonan-o niya gintratar an mga Israelita, nga agsob magtalapas han iya mga sugo. An Salmo 78:38 nasiring: “Hiya . . . malolooyon, nagpasaylo han ira karat-an, ngan waray hira paglaglaga:  Oo, damu na nga takna nga iya la iliningiw an iya kasina, ngan waray niya pagpukawa an bug-os niya nga kasina.” An pagpamalandong hini nga teksto makakabulig ha imo nga masantop nga hinigugma ka gud ni Jehova ngan nagtatagad hiya ha imo. Sarig nga importante ka kan Jehova.—Basaha an 1 Pedro 5:6, 7.

7. Kay ano nga sadang gud naton pabilhan an Biblia?

⁷ Sadang gud naton pabilhan an Biblia kay ito an nangunguna nga paagi han Dios ha pakigkomunikar ha aton. Importante an abrido nga komunikasyon butnga han mga kag-anak ngan mga anak basi magin marig-on an ira gugma ngan pagtapod ha usa kag usa. Hi Jehova an aton mahigugmaon nga Amay. Bisan kon waray pa naton hiya makita o mabatii an iya tingog, nakikiistorya hiya ha aton pinaagi han iya giniyahan nga Pulong, ngan kinahanglan mamati kita. (Isa. 30:20, 21) Karuyag ni Jehova nga giyahan ngan panalipdan kita sugad nga iya dedikado nga katawohan. Karuyag liwat niya nga makilala naton hiya ngan sumarig kita ha iya.—Basaha an Salmo 19:7-11; Proberbios 1:33.

8, 9. Ano an karuyag ni Jehova nga mahibaroan naton? Paghatag hin ehemplo.

⁸ Karuyag ni Jehova nga hibaroan naton nga hinigugma kita niya ngan nagpupokus hiya ha aton mag-opay nga kalidad imbes nga ha aton pagkadiri-hingpit. (2 Kron. 16:9) Pananglitan, tagda an nahitabo kan Hadi Jehosapat han Juda. Diri maaramon nga ginbuligan niya hi Hadi Ahab han Israel ha pakig-away ha Sirya basi bawion an Ramot-galaad. Bisan kon 400 nga buwa nga propeta an nagpasarig ha  maraot nga hi Ahab nga magdadaog hira, an tinuod nga propeta ni Jehova nga hi Mikaya nagtagna nga mapipirde hira. Namatay hi Ahab ha away, ngan hapit liwat mamatay hi Jehosapat. Pagbalik niya ha Jerusalem, ginsaway hiya ni Jehova pinaagi kan Jehu tungod han iya pakig-alyansa kan Ahab. Bisan pa hito, ginsidngan ni Jehu hi Jehosapat: “May-ada mag-opay nga mga butang nga hin-agian dida ha imo.”—2 Kron. 18:4, 5, 18-22, 33, 34; 19:1-3.

⁹ Ha tinikangan han pagmando ni Jehosapat, ginsugo niya an mga prinsipe, Lebita, ngan saserdote nga kumadto ha ngatanan nga syudad han Juda basi tutdoan an iya mga sakop han Balaud ni Jehova. Nagin malampuson gud ito nga kampanya kay bisan an mga tawo ha iba nga nasud nahadlok kan Jehova. (2 Kron. 17:3-10) Oo, bisan kon hi Jehosapat nakabuhat hin sayop, waray kalimti ni Jehova an iya mag-opay nga ginhimo. Ini nga asoy han Biblia nagpapahinumdom ha aton nga bisan han aton pagkadiri-hingpit, padayon nga ipapakita ni Jehova an iya diri napapas nga gugma ha aton kon mangangalimbasog kita nga lipayon hiya.

10, 11. (a) Kay ano nga an pag-ampo usa nga presyoso nga regalo tikang kan Jehova? (b) Paonan-o mahimo batunon han Dios an aton mga pag-ampo? (Kitaa an retrato ha tinikangan hini nga artikulo.)

¹⁰ An mahigugmaon nga amay naggagahin hin panahon ha pagpamati ha iya mga anak kon karuyag nira makiistorya ha iya. Karuyag niya hibaroan an ira ginkakabarak-an tungod kay nagtatagad gud hiya ha ira. An aton Amay ha langit, hi Jehova, namamati ha aton kon nadaop kita ha iya pinaagi han presyoso nga pribilehiyo nga pag-ampo.

¹¹ Makakag-ampo kita kan Jehova ha bisan ano nga panahon. Hiya an aton Sangkay nga andam pirme mamati ha aton. Hi Taylene, nga gin-unabi kanina, nagsiring: “Maisusumat mo ha iya an ngatanan.” Kon iginsusumat naton ha Dios an aada ha aton kasingkasing ha pag-ampo, mahimo kita niya batunon pinaagi hin teksto ha Biblia, artikulo ha usa nga magasin, o makaparig-on nga mga pulong tikang ha kabugtoan. Namamati hi Jehova ha aton mga pag-ampo ngan nasasabtan kita niya bisan ha mga panahon nga diri kita nasasabtan han iba. An iya baton ha aton mga pag-ampo pamatuod han iya diri napapas nga gugma ha aton.

12. Kay ano nga sadang naton pag-adman an mga pag-ampo nga nakarekord ha Biblia? Paghatag hin ehemplo.

¹² Damu an aton hibabaroan ha mga pag-ampo nga nakarekord ha Biblia. Salit, mapulsanon kon pag-aadman naton an pipira hito durante han aton pagsingba han pamilya. An pagpamalandong kon paonan-o iginpahayag han mga surugoon ni Jehova hadto an sulod han ira kasingkasing makakabulig ha aton nga mapauswag an aton mga pag-ampo. Pananglitan, tagda an mapainubsanon nga pag-ampo ni Jonas han nakadto hiya ha tiyan han daku nga isda. (Jon. 1:17–2:10) Usisaha an kinasingkasing nga pag-ampo ni Solomon han inagurasyon han templo. (1 Hadi 8:22-53) Pamalandonga an modelo nga pag-ampo ni Jesus. (Mat. 6:9-13) Labaw ha ngatanan, pirme ‘ipahibaro ha Dios an iyo mga hangyo.’ Sugad nga resulta, “an kamurayawan han Dios nga labaw ha ngatanan nga pagsabot magbabantay han iyo kasingkasing ngan han iyo panhunahuna.” An aton apresasyon ha diri napapas nga gugma ni Jehova padayon nga maghihilarom.—Fil. 4:6, 7.

13. Ano an oportunidad nga may-ada an mga tawo tungod han mahigugmaon nga tagana nga lukat?

¹³ Iginhatag ni Jehova an regalo nga lukat basi “makarawat naton an kinabuhi.” (1 Juan 4:9) May kalabotan hinin pinakadaku nga kapahayagan han gugma han Dios, hi apostol Pablo nagsurat:  “An Kristo namatay ha itinanda nga panahon para ha diri-diosnon nga mga tawo. Kay talagsa gud la an maruruyag nga mamatay para ha matadong nga tawo, ha pagkamatuod, posible pa nga may maruyag mamatay para ha maopay nga tawo. Pero iginpakita ha aton han Dios an iya gugma hini nga paagi: An Kristo namatay para ha aton samtang makasasala pa kita.” (Roma 5:6-8) Inin pinakadaku nga kapahayagan han gugma ni Jehova naghahatag ha mga tawo hin oportunidad nga magkaada duok nga relasyon ha iya.

14, 15. Ano an kapulsanan han lukat para ha mga (a) dinihogan? (b) may paglaom nga mabuhi ha tuna?

¹⁴ Inaabat han gutiay nga grupo han mga Kristiano an diri napapas nga gugma ni Jehova ha espesyal gud nga paagi. (Juan 1:12, 13; 3:5-7) Tungod kay gindihogan hira pinaagi han baraan nga espiritu, nagin ‘mga anak hira han Dios.’ (Roma 8:15, 16) Iginhulagway ni Pablo an dinihogan nga mga Kristiano sugad nga ‘ginbuhi han Dios ngan ginpalingkod ha langitnon nga mga lugar kahiusa ni Kristo Jesus.’ (Efe. 2:6) Aada hira ha sugad nga kahimtang kay ‘ginselyohan hira han baraan nga espiritu nga iginsaad, nga amo an abanse nga garantiya han ira panurundon,’ an ‘paglaom nga igin-andam para ha ira ha langit.’—Efe. 1:13, 14; Col. 1:5.

¹⁵ Para ha kadam-an nga tawo nga may pagtoo ha lukat, may-ada hira higayon nga magin sangkay ni Jehova, ampunon sugad nga iya mga anak, ngan mabuhi ha waray kataposan ha Paraiso nga tuna. Salit pinaagi han lukat, iginpapakita ni Jehova nga hinigugma gud niya an mga tawo. (Juan 3:16) Kon karuyag naton mabuhi ha waray kataposan ngan padayon kita nga magin matinumanon kan Jehova, makakasiguro kita nga tatagan kita niya hin maopay gud nga kinabuhi ha bag-o nga kalibotan. Salit angayan gud la nga hunahunaon naton nga an lukat an pinakamarig-on nga ebidensya han diri napapas nga gugma han Dios para ha aton!

16. Kon papamalandungon naton an damu nga paagi nga iginpapakita ni Jehova an iya gugma ha aton, mapapagios kita nga buhaton an ano?

¹⁶ Diri gud naton maiihap an mga paagi ni Jehova ha pagpakita han iya diri napapas nga gugma para ha aton. An salmista nga hi David nagkanta: “Hin kamakaruruyag ha akon an imo mga pamalandong, O Dios! Hin pagkadaku han kabug-osan nira! Kon akon ito pag-ihapon, mamadamu pa han baras.” (Sal. 139:17, 18) Sadang naton pamalandungon an damu nga paagi nga iginpapakita ni Jehova an iya gugma ha aton basi mapagios kita nga higugmaon gud hiya ngan ihatag ha iya an aton pinakamaopay.

17, 18. Ano an pipira nga paagi nga maipapakita naton an aton gugma ha Dios?

¹⁷ Maipapakita naton an aton gugma kan Jehova ha damu nga paagi. Pananglitan, maipapakita naton an aton gugma ha iya ngan ha aton igkasi-tawo pinaagi han madasigon nga pagsangyaw han maopay nga sumat han Ginhadian. (Mat. 24:14; 28:19, 20) Maipapakita liwat naton an aton gugma kan Jehova pinaagi ha pagin maunungon ha iya bisan pa han mga pagsari. (Basaha an Salmo 84:11; Santiago 1:2-5.) Kon nakakaeksperyensya kita hin makuri gud nga pagsari, makakasiguro kita nga nakikita ito han Dios ngan bubuligan kita niya kay presyoso kita ha iya.—Sal. 56:8.

¹⁸ An aton gugma kan Jehova magpapagios ha aton nga pamalandungon an iya mga linarang ngan urusahon nga mga ginhimo. Iginpapakita naton nga hinigugma naton hiya ngan ginpapabilhan gud naton an iya Pulong pinaagi ha maduruto nga pag-aram han Biblia. An aton gugma kan Jehova mag-aaghat ha aton nga magin duok gud ha iya pinaagi ha pag-ampo. Ngan maghihilarom an aton gugma ha iya samtang ginpapamalandong naton an halad-lukat nga iya igintagana para ha aton. (1 Juan 2:1, 2) Pipira la ini han damu nga paagi nga iginpapakita naton nga ginpapabilhan naton an diri napapas nga gugma ni Jehova ha aton.