1. Nagkikinabuhi kita ha ano nga peryodo han panahon?

NAGKIKINABUHI kita ha makuri hinduro nga panahon. Gintatawag han Biblia an panahon nga nagtikang han 1914 nga “kataposan nga mga adlaw.” Durante hinin “peligroso gud nga mga panahon nga makuri pakiangayan,” an kahimtang han kalibotan nagin mas maraot na gud. (2 Tim. 3:1-5) Ngan magtitikaraot pa ito tungod kay igintagna han Biblia nga “an magraot nga tawo ngan mga impostor mas magtitikaraot pa gud.”—2 Tim. 3:13.

2. Ano nga klase han kaliawan an naruruyagan han damu? (Kitaa an retrato hini nga pahina.)

² Para ha kaliawan, damu an nagkikita ngan nagbubuhat hin mga butang nga gintatagad han Biblia nga madarahog, imoral, may kalabotan ha espiritismo, o diri gin-uuyonan han Dios. Pananglitan, agsob ipakita ha mga programa ha TV, pelikula, nobela, magasin, ngan ha Internet nga diri maraot an kamadarahog ngan imoralidad. An panggawi nga diri ginkakarawat hadto legal na ngani nga ginkakarawat  yana ha pipira nga lugar. Pero diri ito nagpapasabot nga ginkakarawat na han Dios an sugad nga panggawi.—Basaha an Roma 1:28-32.

3. Paonan-o gintatagad han kadam-an adton nagkikinabuhi uyon ha mga suruklan han Dios?

³ Ginlikyan gud han siyahan-siglo nga mga sumurunod ni Jesus an madarahog ngan imoral nga mga kaliawan. Tungod hito ngan han ira maopay nga panggawi, ginpakaraot ngan ginkontra hira han mga tawo. Hi apostol Pedro nagsurat: “Diri nira masabtan kon kay ano nga diri na kamo [nga mga Kristiano] naupod ha ira ha pagpatakas ha maraot nga pagkinabuhi, salit nagyayakan hira hin maraot mahitungod ha iyo.” (1 Ped. 4:4) Yana, gintatagad liwat han kalibotan nga naiiba adton nagkikinabuhi uyon ha mga suruklan han Dios. Dugang pa, “pagtitimarauton liwat an ngatanan nga naruruyag magkinabuhi nga may debosyon ha Dios sugad nga mga disipulo ni Kristo Jesus.”—2 Tim. 3:12.

4. Kay ano nga ginsasagdonan kita han Biblia nga diri higugmaon an kalibotan?

⁴ Ginsasagdonan han Kasuratan adton karuyag magbuhat han kaburut-on han Dios nga diri higugmaon an kalibotan ngan an mga binuhatan hito. (Basaha an 1 Juan 2:15, 16.) An relihiyon, politika, ngan komersyo hini nga kalibotan—pati na an media nga ginagamit hito ha pagpasarang hin impormasyon—kontrolado han “dios hini nga sistema,” hi Satanas nga Yawa. (2 Cor. 4:4; 1 Juan 5:19) Salit sugad nga mga Kristiano, kinahanglan magin maaramon kita ha pagpili han aton mga kaupod. An Pulong han Dios nagpapahamangno ha aton: “Ayaw kamo palimbong. An maraot nga mga kaupod nakakadaot han maopay nga pamatasan.”—1 Cor. 15:33.

5, 6. Kan kanay kita diri sadang makig-upod, ngan kay ano?

⁵ Basi diri madaot an aton mag-opay nga pamatasan, kinahanglan diri kita makig-upod hadton nagbubuhat hin maraot. Diri la ini naaplikar ha pakig-upod ha mga diri-tumuroo nga nagbubuhat hin maraot kondi pati ha mga nag-aangkon nga nagsisingba kan Jehova pero tinuyo nga nagtatalapas han iya mga balaud. Kon ini nga mga Kristiano makasala hin seryoso ngan diri magbasol, diri na kita makikig-upod ha ira.—Roma 16:17, 18.

⁶ Kon makikig-upod kita hadton diri nagsusunod ha mga balaud han Dios, bangin maaghat kita nga buhaton an ira ginbubuhat basi karawaton kita nira. Pananglitan, kon duok kita nga makikig-upod ha imoral nga mga tawo, bangin masulay kita nga magbuhat hin imoralidad. Nahitabo ito ha pipira nga dedikado nga Kristiano, ngan an iba ha ira ginpaiwas ha kongregasyon tungod kay diri hira mabinasulon. (1 Cor. 5:11-13) Kon padayon hira nga diri magbabasol, an ira kahimtang maipapariho ha kahimtang nga ginsiring ni Pedro.—Basaha an 2 Pedro 2:20-22.

7. Hin-o an sadang naton pilion nga duok nga sangkay?

⁷ Karuyag naton magin buotan bisan hadton diri nasunod ha mga balaud han Dios, pero diri kita sadang magin duok nira nga kaupod o sangkay. Salit, sayop gud para ha solo nga Saksi ni Jehova nga makig-date ha usa nga indibiduwal nga diri dedikado ngan diri matinumanon ha Dios ngan diri natahod ha Iya hitaas nga mga suruklan. Mas importante gud an pagkaada han pag-uyon ni Jehova kay han pag-uyon han mga tawo nga diri nahigugma ha iya. Kinahanglan magin duok la kita hadton nagbubuhat han kaburut-on ni Jehova. Hi Jesus nagsiring: “An bisan hin-o nga nagbubuhat han kaburut-on han Dios hiya an akon bugto nga lalaki ngan bugto nga babaye ngan akon nanay.”—Mar. 3:35.

8. Paonan-o nakaapekto ha mga Israelita an magraot nga kaupod?

⁸ Naeksperyensyahan han mga Israelita an maraot nga resulta han pagin duok ha magraot nga kaupod. Han gintalwas hira tikang ha pagkauripon ha Ehipto ngan gin-giyahan ngadto  ha Tuna nga Iginsaad, hi Jehova nagpahamangno ha ira may kalabotan ha pakig-upod ha mga umurukoy hito: “Diri ka yumukbo ha ira mga diosdios, bisan pag-alagad ha ira, bisan pagsubad han ira mga buruhaton; kondi paggub-on mo gud hira, ngan pagtipiktipika an ira mga harigi. Ngan mag-alagad ka kan Jehova nga imo Dios.” (Eks. 23:24, 25) Pero waray ito sunda han kadam-an nga Israelita. (Sal. 106:35-39) Tungod kay waray hira magin matinumanon ha Dios, ginsidngan hira ni Jesus ha urhi: “Kitaa! Babayaan han Dios an iyo balay.” (Mat. 23:38) Ginsalikway ni Jehova an Israel, ngan ginpili an Kristiano nga kongregasyon sugad nga iya katawohan.—Buh. 2:1-4.

9. Kay ano nga nakakadaot an kadam-an nga ginhihimo han media?

⁹ Kadam-an han ginhihimo han media sugad han mga programa ha TV, website, ngan libro nakakadaot han espirituwalidad han mga Kristiano. Diri katuyoan han sugad nga mga materyal nga parig-unon an aton pagtoo kan Jehova ngan ha iya mga saad. Lugod, nag-aaghat ito ha mga tawo nga sumarig ha maraot nga kalibotan ni Satanas. Salit, kinahanglan mag-ikmat gud kita basi diri kita makapili hin materyal nga magpupukaw hin “kalibotanon nga mga hingyap.”—Tito 2:12.

10. Ano an mahitatabo ha nakakadaot nga mga barasahon ngan kiritaon hini nga kalibotan?

¹⁰ Diri mag-iiha, bubungkagon na an kalibotan ni Satanas, ngan mawawara na an nakakadaot nga mga barasahon ngan kiritaon. An Pulong han Dios nasiring: “An kalibotan mawawara pati an mga hingyap hito, pero hiya nga nagbubuhat han kaburut-on han Dios magpapadayon ha waray kataposan.” (1 Juan 2:17) Sugad man, an salmista nagkanta: “Kay paglalaglagon an mga magburuhat hin maraot; Kondi an mga nahulat kan Jehova, makakapanunod hira han tuna. Kondi an maaghop makakapanunod han tuna, ngan maglilipay hira tungod han kahuraan han kamurayaw.” Mationan-o ito kaiha? “An mga magtadong makakapanunod han tuna, ngan maukoy hira dida hin waray kataposan.”—Sal. 37:9, 11, 29.

11. Paonan-o an Dios nagtatagana hin makaparig-on nga espirituwal nga pagkaon ha iya katawohan?

¹¹ Diri pariho ha mga materyal nga ginhihimo hini nga kalibotan, an mga materyal nga ginhihimo han organisasyon ni Jehova durante hinin kataposan nga mga adlaw nag-aaghat hin panggawi nga nagtutugway ha kinabuhi nga waray kataposan. Hi Jesus nag-ampo kan Jehova: “Nangangahulogan ini hin kinabuhi nga waray kataposan, an ira pagkilala ha imo, an amo la nga totoo nga Dios, ngan ha imo ginsugo, hi Jesu-Kristo.” (Juan 17:3) Pinaagi han iya organisasyon, an aton Amay ha langit nagtatagana hin hura nga espirituwal nga pagkaon. Bendisyon gud an mga magasin, brosyur, libro, video, ngan mga materyal ha Internet nga nabulig ha aton nga padayon nga mag-alagad kan Jehova! An iya organisasyon nagtatagana liwat hin regular nga mga katirok ha sobra 110,000 nga kongregasyon ha bug-os nga kalibotan. Hito nga mga katirok pati na ha mga asembleya ngan kombensyon, ginhihisgotan an basado-ha-Biblia nga mga materyal nga nagpaparig-on han aton pagtoo ha Dios ngan ha iya mga saad.—Heb. 10:24, 25.

12. Isaysay an sagdon han Biblia nga mag-asawa hin “sumurunod la han Ginoo.”

¹² Labi nga importante para ha solo nga mga Kristiano nga karuyag mag-asawa nga mag-ikmat ha pagpili hin kaupod. An Pulong han Dios nagpapahamangno: “Diri kamo magpas-an hin yugo upod han mga diri-tumuroo. Kay paonan-o pagtatampuhon an katadongan ngan an pagtalapas? O paonan-o pagtatampuhon an kalamrag ngan an kasisidman?” (2 Cor. 6:14) Ginsasagdonan  han Biblia an mga surugoon han Dios nga namimiling hin maarasawa nga mag-asawa hin “sumurunod la han Ginoo”—dedikado ngan bawtismado nga magsiringba ni Jehova nga nagkikinabuhi uyon ha iya mga suruklan. (1 Cor. 7:39) Kon mag-aasawa an usa nga Kristiano hin igkasi-tumuroo, magkakaada hiya kaupod nga dedikado kan Jehova nga mabulig ha iya nga magpabilin nga matinumanon.

13. Ano nga sugo may kalabotan ha pag-asawa an iginhatag han Dios ha mga Israelita?

¹³ Maaram hi Jehova kon ano an makakaopay ha aton, ngan hadto pa man, ginsugo na niya an iya mga surugoon nga mag-asawa hin “sumurunod la han Ginoo.” Tagda an iya sugo ha mga Israelita may kalabotan ha mga tawo nga diri nag-aalagad ha iya. Pinaagi kan Moises, hiya nagsiring: “Bisan ha pakig-aragsawa ha ira; diri mo ihatag an imo anak nga babaye ngadto ha iya anak nga lalaki, bisan ha pagkuha han iya anak nga babaye ngadto ha imo anak nga lalaki. Kay hiya magpapaharayo han imo anak nga lalaki tikang ha pagsunod ha akon, nga hira mag-alagad hin lain nga mga dios-dios: busa nga an kasina ni Jehova maglalaga patok ha iyo, ngan hiya maggunaw ha imo ha kadagmitan.”—Deut. 7:3, 4.

14, 15. Ano an nahitabo kan Solomon tungod han iya pagbalewaray han sugo ni Jehova?

¹⁴ Ha tinikangan han paghadi ni Solomon, nag-ampo hiya ha Dios nga tagan hiya hin kinaadman, ngan ginhatag ito ha iya han Dios. Salit hi Hadi Solomon nakilala sugad nga maaramon nga hadi ha usa nga riko nga nasud. Ngani, han ginbisita hiya han rayna han Sheba, an rayna nagsiring: “Waray ako tumuod han mga pulong, ngada han akon pagkanhi, ngan an akon mga mata nakakita hini: ngan, kitaa an katunga waray igsumat ha akon: an imo kinaadman ngan an imo kauswagan labaw han bantog nga akon nabati.” (1 Hadi 10:7) Pero iginpapakita han nahitabo kan Solomon kon ano an mahimo magin resulta kon igbabalewaray han usa an sugo han Dios nga mag-asawa hin sumurunod la han Ginoo.—Ekles. 4:13.

¹⁵ Bisan pa han ngatanan nga bendisyon ni Jehova kan Solomon, ginbalewaray niya an sugo ni Jehova nga diri mag-asawa hin kababayin-an tikang ha nakapalibot nga mga nasud—mga indibiduwal nga diri nagsisingba kan Jehova. Hi Solomon “nahagugma hin damu nga kababayin-an nga dumuruong” ngan ha urhi, nagkaada hiya 700 nga asawa ngan 300 nga kerida. Ano an resulta? Han lagas na hiya, an iya pagano nga mga asawa “nagpasimang han iya kasingkasing ha pagsunod han lain nga mga dios; . . . ngan nagbuhat hi Salomon [Solomon] hadton maraot ha atubangan ni Jehova.” (1 Hadi 11:1-6) An magraot nga kaupod ni Solomon nakaimpluwensya ha iya nga bumaya ha tinuod nga pagsingba. Pahamangno gud ini ha mga Kristiano nga bangin naghuhunahuna ha pag-asawa hin diri nahigugma kan Jehova!

16. Ano an sagdon han Biblia ha mga surugoon han Dios nga may-ada diri tumuroo nga padis?

¹⁶ Anoman kon nagin magsiringba ni Jehova an usa nga may-ada diri tumuroo nga padis? An Biblia nasiring: “Kamo nga mga asawa, magpasakop kamo ha iyo bana, basi kon may bisan hin-o nga diri masinugtanon ha pulong, makabig hira bisan waray pulong pinaagi han iyo panggawi.” (1 Ped. 3:1) Ini nga mga pulong naaplikar ha Kristiano nga mga asawa, pero aplikado liwat ini ha mga bana nga may-ada diri tumuroo nga asawa. Matin-aw an sagdon han Biblia: Magin maopay nga padis, ngan iaplikar an hitaas nga mga suruklan han Dios ha pag-asawa. Damu nga diri tumuroo nga padis an kinarawat han kamatuoran tungod kay nakita nira nga nagbag-o an ira asawa o bana katapos mahibaro han kamatuoran.

17, 18. Kay ano nga nakatalwas hi Noe ha Baha, ngan ano an nakabulig ha siyahan-siglo nga mga Kristiano nga matalwas ha kabungkagan han Jerusalem?

¹⁷ An magraot nga kaupod nakakadaot han  mag-opay nga pamatasan, pero an mag-opay nga kaupod maopay nga impluwensya. Tagda hi Noe. Nabuhi hiya ha panahon nga “an karaotan han tawo daku ha tuna, ngan an ngatanan nga panhunahuna han pamurubuot han iya kasingkasing amo gud la maraot ha kadayonan.” (Gen. 6:5) Salit nagdesisyon an Dios nga poohon an magraot pinaagi hin baha. Pero, “hi Noe matadong nga tawo, ngan putli ha iya katulinan: hi Noe naglalakat upod han Dios.”—Gen. 6:7-9.

¹⁸ Waray makig-upod hi Noe ha diri diosnon nga mga tawo. Hiya ngan an iya pamilya nagin sagipo ha pagtuman han sugo ha ira han Dios, upod na an paghimo han arka. Dugang pa, hi Noe nagin “parasangyaw han katadongan.” (2 Ped. 2:5) An pagsangyaw, paghimo han arka, ngan pakig-upod ni Noe ha iya pamilya nakabulig ha iya nga magpokus ha pagbuhat han mga butang nga nalilipayan han Dios. Sugad nga resulta, natalwas hiya ngan an iya pamilya ha Baha. Kita ngatanan mga tulin nira, salit sadang kita magpasalamat ha ira tungod han ira pagin matinumanon kan Jehova. Ha pariho nga paagi, an maunungon ngan matinumanon nga mga Kristiano ha siyahan nga siglo waray makig-upod ha diri diosnon nga mga tawo, salit natalwas hira han nabungkag an Jerusalem han 70 C.E.—Luc. 21:20-22.

19. Basi makarawat an pag-uyon han Dios, ano an kinahanglan naton buhaton?

¹⁹ Sugad nga mga magsiringba ni Jehova, kinahanglan naton subaron hi Noe, an iya pamilya, ngan an masinugtanon nga mga Kristiano ha siyahan nga siglo. Kinahanglan magpabilin kita nga bulag hinin maraot nga sistema ngan mamiling hin makaparig-on nga mga kaupod dida ha aton minilyon nga magtinumanon nga kabugtoan. An pakig-upod hadton nagpapagiya ha kinaadman han Dios mabulig ha aton nga “magmarig-on ha pagtoo” durante hinin makuri hinduro nga panahon. (1 Cor. 16:13; Prob. 13:20) Ngan hunahunaa la an aton makaruruyag nga paglaom! Kon magigin maaramon kita ha pagpili han aton mga kaupod durante hinin kataposan nga mga adlaw, mahimo kita matalwas ha kataposan hinin maraot nga sistema ngan magkinabuhi ha bag-o nga kalibotan han Dios nga hirani na gud umabot!