1, 2. Ano an tumong han tagsa nga Kristiano? Iilustrar.

KON napalit hin prutas an usa nga nanay, diri niya pirme ginpipili an pinakadaku o an pinakabarato. Lugod, namimiling hiya hin prutas nga marasa, mahamot, ngan masustansya. Oo, ginpipili niya an prutas nga hinog na.

² Katapos magdedikar ngan mabawtismohan an usa nga Kristiano, padayon hiya nga nag-uuswag. Tumong niya nga magin hamtong nga surugoon han Dios—hinog na, siring pa. Ini nga pagin hamtong diri nagtutudlok ha pagin edaran, kondi ha pagin hamtong ha espirituwal. Hi apostol Pablo nagsurat ha mga Kristiano ha Efeso nga kinahanglan hira mag-uswag ha espirituwal. Gin-aghat niya hira nga mangalimbasog nga “makab-ot . . . an pagkaurosa ha pagtoo ngan an husto nga kahibaro mahitungod han Anak han Dios, ngan magin hamtong gud pariho han bug-os nga kahamtong han Kristo.”—Efe. 4:13.

3. Ano nga sitwasyon ha kongregasyon ha Efeso an nahitatabo gihap ha katawohan ni Jehova yana?

³ Han nagsurat hi Pablo ha Efeso, pipira ka tuig na nga naeksister  an kongregasyon didto. Damu nga disipulo didto an nag-uswag na gud ha espirituwal. Pero may pipira nga kinahanglan pa mangalimbasog nga magin hamtong. Ito liwat an sitwasyon han mga Saksi ni Jehova yana. Damu nga kabugtoan an maiha na nga nag-aalagad ha Dios ngan hamtong na ha espirituwal. Pero diri sugad hito an ngatanan. Pananglitan, yinukot an nababawtismohan kada tuig, salit kinahanglan pa han iba nga mangalimbasog nga magin hamtong. Kumusta ka man?—Col. 2:6, 7.

4, 5. Ha ano nga mga paagi magkaiba-iba an hamtong nga mga Kristiano, kondi ano an ira kaparihoan? (Kitaa an retrato ha tinikangan hini nga artikulo.)

⁴ Kon uusisahon mo an hinog nga mga prutas ha merkado, makikita mo nga diri ito parapriho. Pero ito ngatanan may mga pangirilal-an nga nagpapakita nga hinog na ito. Sugad man, an hamtong nga mga Kristiano bangin iba-iba an nasyonalidad, gindak-an, kahimsog, edad, ngan eksperyensya. Iba-iba pa ngani an ira personalidad ngan kultura. Kondi, hira ngatanan may mga kalidad nga nagpapakita nga hamtong hira. Ha ano nga paagi?

⁵ An hamtong nga surugoon ni Jehova nagkikinabuhi uyon ha ehemplo ni Jesus, nga nagbilin ha aton hin susbaranan basi ‘sundon naton hin maopay an iya mga pitad.’ (1 Ped. 2:21) Hi Jesus nagsiring nga importante hinduro para ha usa ka tawo nga higugmaon hi Jehova ha iya bug-os nga kasingkasing, kalag, ngan hunahuna, ngan higugmaon an iya igkasi-tawo sugad han iya paghigugma ha iya kalugaringon. (Mat. 22:37-39) An hamtong nga Kristiano nangangalimbasog pagsunod hito nga sugo. Iginpapakita han iya pagkinabuhi nga prayoridad niya an iya relasyon kan Jehova ngan may-ada hiya hilarom nga gugma ha iba.

6, 7. (a) Ano an pipira nga kalidad nga pangirilal-an han usa nga hamtong nga Kristiano? (b) Ano an sadang naton ipakiana ha aton kalugaringon?

⁶ Kondi maaram kita nga an gugma usa la nga bahin han bunga han espiritu nga kinahanglan ipakita han hamtong nga Kristiano. (Gal. 5:22, 23) Importante liwat an iba nga bahin hito, sugad han pagkamalumo, pagpugong ha kalugaringon, ngan hilawig nga pagpailob. Makakabulig ha iya ito nga mga kalidad ha pag-atubang hin magkuri nga sitwasyon nga diri naaaringit ngan mailob an makasurubo nga panhitabo nga diri nawawad-an hin paglaom. Ha iya personal nga pag-aram, padayon hiya nga nagsasaliksik hin mga prinsipyo nga makakabulig ha iya nga hibaroan kon ano an husto ngan sayop. Ngan makikita ha iya mga desisyon an iya pagin hamtong ha espirituwal. Pananglitan, nagpapagiya hiya ha iya konsensya nga nabansay ha Biblia. An hamtong nga Kristiano mapainubsanon, iya ginkikilala nga an mga paagi ngan suruklan ni Jehova mas maopay gud kay han iya mga paagi ngan suruklan. * Madasigon hiya nga nagsasangyaw han maopay nga sumat ngan ginbubuhat an ngatanan basi makabulig ha pagtipig han pagkaurosa han kongregasyon.

⁷ Bisan kon maiha na kita nga nag-aalagad kan Jehova, an tagsa ha aton mahimo magpakiana, ‘May mga kinahanglan ba ako bag-uhon ha akon kinabuhi basi mas masubad ko hi Jesus ngan padayon nga mag-uswag ha espirituwal?’

8. Ano an aton masisiring mahitungod han kahibaro ngan pagsabot ni Jesus ha Kasuratan?

⁸ Hi Jesus may hilarom gud nga pagsabot ha Pulong han Dios. Bisan han 12 anyos pa la  hiya, gin-gamit niya an Kasuratan ha pakiistorya ha mga magturutdo ha templo. “An ngatanan nga namamati ha iya nahipausa gud ha kahilarom han iya pagsabot ngan ha iya mga baton.” (Luc. 2:46, 47) Ha urhi, durante han iya ministeryo, may kaabtik nga gin-gamit ni Jesus an Pulong han Dios basi mapahilom an mga nakontra ha iya.—Mat. 22:41-46.

9. (a) Ano nga eskedyol ha pag-aram an ginhihimo han hamtong nga Kristiano? (b) Ano an katuyoan han aton pag-aram ha Biblia?

⁹ Uyon ha susbaranan ni Jesus, an usa nga Kristiano nga karuyag magin hamtong ha espirituwal diri makukontento ha pagkaada hamabaw la nga kahibaro ha Biblia. Regular hiya nga magsasaliksik ha higlarom nga kamatuoran hito kay maaram hiya nga “an matig-a nga pagkaon kanan hamtong nga mga tawo.” (Heb. 5:14) Matin-aw nga karuyag han hamtong nga Kristiano nga magkaada “husto nga kahibaro mahitungod han Anak han Dios.” (Efe. 4:13) Salit pakianhi an imo kalugaringon: ‘Ginbabasa ko ba an Biblia kada adlaw? May eskedyol ba ako para ha personal nga pag-aram ngan pagsingba han pamilya kada semana?’ Kon gin-aadman mo an Pulong han Dios, pamiling hin mga prinsipyo nga mabulig ha imo nga mas masabtan an inaabat ngan panhunahuna ni Jehova. Katapos gamita ito nga mga prinsipyo kon naghihimo ka hin mga desisyon. Mabulig ini ha imo nga magin mas duok kan Jehova.

10. Paonan-o an kahibaro han hamtong nga Kristiano nakakaapekto ha iya adlaw-adlaw nga pagkinabuhi?

¹⁰ Maaram an hamtong nga Kristiano nga diri igo an pagkaada la hin kahibaro; kinahanglan niya higugmaon an mga sagdon ngan prinsipyo ha Pulong han Dios. Iginpapakita niya ito nga gugma pinaagi ha paghatag hin prayoridad ha pagbuhat han kaburut-on ni Jehova  imbes nga han iya mga karuyag. Ginbabag-o pa ngani niya an iya paagi han pagkinabuhi, panhunahuna, ngan panggawi. Samtang iya ito ginhihimo, iginsusul-ot niya an bag-o nga personalidad nga pariho han personalidad han Kristo, nga “iginbasar ha totoo nga pagkamatadong ngan pagkamaunungon.” (Basaha an Efeso 4:22-24.) An Biblia iginsurat pinaagi ha paggiya han baraan nga espiritu. Salit kon gin-aadman han usa nga Kristiano an Biblia, an baraan nga espiritu nabulig ha iya nga magkaada hilarom nga kahibaro, daku nga gugma ha mga suruklan hito, ngan duok nga relasyon kan Jehova.

11. Ano an naeksperyensyahan ni Jesus ha iya pakig-upod ha iya pamilya ngan mga disipulo?

¹¹ Han nakanhi hi Jesus ha tuna sugad nga hingpit nga tawo, nakaupod niya an diri hingpit nga mga tawo. An iya mga kag-anak ngan kabugtoan diri mga hingpit. Bisan an iya duok nga mga sumurunod naimpluwensyahan han pagin mapahitas-on ngan pagin makikalugaringon han mga tawo ha ira palibot. Pananglitan, han gab-i antes patayon hi Jesus, ‘nagdiskusyon [an mga apostol] kon hin-o ha ira an may gidadakui nga awtoridad.’ (Luc. 22:24) Pero maaram hi Jesus nga an iya diri hingpit nga mga sumurunod mag-uuswag ha espirituwal ngan mag-iestablisar hin kongregasyon nga may pagkaurosa. Hito gihap nga gab-i, nag-ampo hi Jesus ha iya Amay nga magkaurosa an iya mga apostol: “Hira ngatanan magin usa, sugad nga ikaw, Amay, kahiusa ko ngan ako kahiusa mo, basi hira magin kahiusa liwat naton, . . . basi magin usa hira sugad nga kita uusa.”—Juan 17:21, 22.

12, 13. (a) Paonan-o ginpabug-atan han Efeso 4:15, 16 an importansya han pagtipig han pagkaurosa han kongregasyon? (b) Paonan-o an usa nga bugto nahibaro ha pagtipig han pagkaurosa?

¹² An hamtong nga surugoon ni Jehova nabulig ha pagtipig han pagkaurosa han kongregasyon. (Basaha an Efeso 4:1-6, 15, 16.) Sugad nga katawohan han Dios, tumong naton nga ‘urosa nga magkauruyon’ ngan makigkooperar ha kada tagsa. Sumala ha Pulong ni Jehova, kinahanglan kita magin mapainubsanon basi magkaada hini nga pagkaurosa. Salit bisan kon naaapektohan han pagkadiri-hingpit han iba, an usa nga hamtong nga Kristiano nangangalimbasog gud nga matipigan an pagkaurosa han kongregasyon. Ano an imo reaksyon kon an usa nga bugto nakahimo hin sayop? O anoman kon may-ada bugto nga nakasakit ha imo? May-ada ka ba tendensya nga diri makiistorya ha iya, o nangangalimbasog ka nga ibalik an iyo maopay nga relasyon? Karuyag han hamtong nga Kristiano nga masulbad an problema imbes nga magin problema hiya han iba.

¹³ Tagda an ehemplo ni Uwe. Hadto, masayon la hiya masina kon nakikita niya an mga kaluyahan han kabugtoan. Katapos gin-gamit niya an Biblia ngan an Insight on the Scriptures basi pag-adman an kinabuhi ni David. Kay ano nga hi David? Hi Uwe nagsiring: “Nakita ni David an diri Kasuratanhon nga mga panggawi han pipira han iya mga igkasi-tumuroo. Pananglitan, gin-ikaparatay hiya ni Saul, ginplanohan hiya nga batuhon han pipira nga tawo, ngan gintamay pa ngani hiya han iya mismo asawa. (1 Sam. 19:9-11; 30:1-6; 2 Sam. 6:14-22) Pero waray gud tuguti ni David an panggawi han iba nga magpaluya han iya gugma kan Jehova. Dugang pa, hi David mapinasayloon, usa nga kalidad nga kinahanglan ko kultibaron. An akon hinbaroan ha akon pag-aram nakagbag-o han akon panhunahuna may kalabotan ha mga kaluyahan han akon mga igkasi-tumuroo. Diri ko na gintitipigan ha akon hunahuna an mga sayop han iba. Lugod, nangangalimbasog ako nga makabulig ha pagtipig  han pagkaurosa han kongregasyon.” Sugad ba liwat hito an imo tumong?

14. Ano nga klase hin mga tawo an ginpili ni Jesus sugad nga iya kasangkayan?

¹⁴ Makisangkayon hi Jesus ha mga tawo. Komportable ha iya an ngatanan—kalalakin-an, kababayin-an, batan-on, lagas, ngan bisan kabataan. Pero maaramon hiya ha pagpili hin duok nga kasangkayan. Hiya nagsiring ha iya matinumanon nga mga apostol: “Kasangkayan ko kamo kon ginbubuhat niyo an iginsusugo ko ha iyo.” (Juan 15:14) Ginpili niya hira tikang hadton maunungon nga nagsunod ha iya ngan bug-os-kasingkasing nga nag-alagad kan Jehova. Nagpipili ka ba liwat hin duok nga kasangkayan tikang hadton magtinumanon nga nag-aalagad kan Jehova? Kay ano nga importante ito?

15. Paonan-o magpapahimulos an mga batan-on ha pakigsangkay ha hamtong nga mga Kristiano?

¹⁵ Damu nga klase hin prutas an nahihinog hin maopay kon nasisirakan. An gugma han mga kabugtoan sugad hin sirak nga makakabulig ha imo nga magin hamtong nga Kristiano. Usa ka ba nga batan-on nga naghuhunahuna kon ano an imo bubuhaton ha imo kinabuhi? Kon oo, maaramon nga makig-sangkay ka ha imo mga igkasi-tumuroo nga matinumanon nga nag-aalagad kan Jehova hin damu na ka tuig ngan nabulig ha pagtipig han pagkaurosa han kongregasyon. Posible nga nakaeksperyensya hira hin mga problema ngan nag-ilob pa ngani hin mga pagsari ha pag-alagad kan Jehova. Mabubuligan ka nira nga pilion an pinakamaopay nga paagi han pagkinabuhi. An makaparig-on nga pakig-upod ha sugad nga kabugtoan makakabulig ha imo ha paghimo hin maaramon nga mga desisyon ngan ha pag-uswag ha pagin hamtong.—Basaha an Hebreo 5:14.

16. Paonan-o ginbuligan han edaran nga kabugtoan an usa nga batan-on?

¹⁶ Tagda hi Helga. Nahinunumdoman pa niya nga durante han iya ultimo nga tuig ha pag-eskwela, nag-iiristorya an iya mga kaklase mahitungod han ira mga plano ha tidaraon. Damu ha ira an karuyag magkolehiyo basi magkaada maopay nga propesyon. Gin-istorya ito ni Helga ha iya kasangkayan ha kongregasyon. Hiya nagsiring: “Damu ha ira an mas magurang ha akon, ngan ginbuligan gud nira ako. Gindasig nira ako nga sumulod ha bug-os-panahon nga pag-alagad. Katapos hito, nagpayunir ako hin lima ka tuig. Yana, paglabay hin damu ka tuig, nalilipay ako nga gin-gamit ko an kadak-an nga panahon han akon pagkabatan-on ha pag-alagad kan Jehova. Waray gud ako magbasol nga ginbuhat ko ito.”

17, 18. Paonan-o naton maihahatag kan Jehova an aton pinakamaopay?

¹⁷ Kon susubaron naton hi Jesus, magigin hamtong kita nga Kristiano. Magigin mas duok kita kan Jehova, ngan maghihilarom an aton hingyap nga mag-alagad ha iya. Maihahatag han usa nga surugoon ni Jehova an iya pinakamaopay kon hamtong hiya ha espirituwal. Gin-aghat ni Jesus an iya mga sumurunod: “Sugad man, ipasanag niyo an iyo sugâ ha mga tawo basi makita nira an iyo mag-opay nga buhat ngan paghimayaon an iyo Amay nga aadto ha langit.”—Mat. 5:16.

¹⁸ Sugad han aton hinbaroan, an hamtong nga Kristiano mahimo gud magin maopay nga impluwensya ha kongregasyon. Ngan an iya pagin hamtong ha espirituwal nakikita ha paagi han iya paggamit han iya konsensya. Paonan-o an aton konsensya makakabulig ha aton ha paghimo hin maaramon nga mga desisyon? Ngan paonan-o naton tatahuron an konsensya han aton mga igkasi-tumuroo? Hihisgotan naton ito ha sunod nga artikulo.