1, 2. Kay ano nga hinigugma ni Jesus hi Marta, kondi ano an nagpapakita nga diri hiya hingpit?

ANO an imo nahuhunahuna kon gin-uunabi an tawohan ha Biblia nga hi Marta? Iginpapakita han Biblia nga duok hiya nga sangkay ni Jesus, ngan hinigugma hiya ni Jesus. Syempre diri la hi Marta an babaye nga hinigugma niya. Hinigugma liwat niya an iba pa nga kababayin-an nga may kahadlok ha Dios, sugad kan Maria nga bugto ni Marta, ngan kan Maria nga iya nanay. (Juan 11:5; 19:25-27) Kay ano nga hinigugma ni Jesus hi Marta?

² Hinigugma ni Jesus hi Marta diri la tungod han iya pagin maabiabihon ngan pagin maduruto, kondi labi na tungod han iya marig-on nga pagtoo. Natoo gud hiya ha katutdoan ni Jesus, ngan sigurado hiya nga hi Jesus an iginsaad nga Mesias. (Juan 11:21-27) Pero pariho ha aton, diri liwat hiya hingpit. Ha usa nga higayon, samtang gin-aabiabi ni Marta hi Jesus ha iya balay, naaringit hiya ha iya bugto nga hi Maria, ngan ginsidngan niya hi Jesus nga sawayon hi Maria. Hiya nagsiring: “Ginoo, diri ako ginbubuligan han akon bugto ha mga buruhaton, diri mo ba hiya sisidngan? Alayon sidnga hiya  nga buligan ako.” (Basaha an Lucas 10:38-42.) Ano an aton hibabaroan tikang hini nga asoy?

3, 4. Ha ano nga paagi ginpili ni Maria an “maopay nga butang,” ngan ano nga leksyon an hinbaroan ni Marta? (Kitaa an retrato ha tinikangan hini nga artikulo.)

³ Mapasalamaton hi Jesus ha pagin maabiabihon nira Marta ngan Maria, salit karuyag niya nga tutdoan hira hin presyoso nga mga kamatuoran. Ginsalingabot ni Maria an higayon nga mahibaro tikang ha Bantogan nga Magturutdo ngan liningkod “ha may tiil han Ginoo ngan nagpinamati ha iya igintututdo.” Mahimo liwat unta ito buhaton ni Marta. Ginkumendasyonan unta hiya ni Jesus kon iginhatag niya an iya bug-os nga atensyon kan Jesus.

⁴ Kondi, nagin okupado hi Marta ha pag-andam hin espesyal nga mga putahe ngan ha iba pa nga buruhaton basi magin makalilipay an pagbisita ni Jesus. Pero nagin hinungdan ito han iya diri ginkikinahanglan nga kabaraka, ngan naaringit hiya kan Maria. Naobserbaran ni Jesus nga damu an ginbubuhat ni Marta, salit may pagkabuotan nga nagsiring hiya: “Marta, Marta, nababaraka ngan okupado ka ha damu nga butang.” Katapos nagsuhestyon hiya nga igo na bisan an usa la nga putahe. Kahuman, iya ginkumendasyonan hi Maria tungod han pagpamati ha iya: “Ginpili ni Maria an maopay nga butang, ngan diri ito kukuhaon ha iya.” Bangin nahingalimtan dayon ni Maria an iya ginkaon hiton espesyal nga okasyon, pero sigurado nga waray gud niya hingalimti an kumendasyon ngan espirituwal nga pagkaon nga iya nakarawat tikang kan Jesus. Paglabay hin sobra 60 ka tuig, hi apostol Juan nagsurat: “Hinigugma ni Jesus hira Marta, [ngan] Maria.” (Juan 11:5) Iginpapakita hini nga ginkarawat ni Marta an mahigugmaon nga pagsaway ni Jesus ngan nangalimbasog hiya nga matinumanon nga mag-alagad kan Jehova ha bug-os niya nga kinabuhi.

5. Kay ano nga labi nga makuri yana an pagpabilin nga nakapokus ha mas importante nga mga butang, ngan ano nga pakiana an nabangon?

⁵ Mas damu na gud yana an mga butang nga mahimo makaulang ha aton pag-alagad kan Jehova kay ha panahon han Biblia. “Yana pa gud la an mga tawo nagkaada hin maopay hinduro nga paagi han komunikasyon, malaksi nga mga imprintahan, maopay ngan de-kolor nga mga magasin, radyo, pelikula, ngan telebisyon. . . . Kada adlaw, ginpapauranan kita hin bag-o nga mga ulang . . . Diri pa la maiha, ginhuhunahuna nga an aton panahon amo an ‘Panahon han Kahayag.’ Pero yana, nagigin ‘Panahon han Ulang’ na ito.” Ini nga mga pulong iginsiring ha grupo hin mga estudyante ha Estados Unidos sobra 60 ka tuig na an naglabay. An Septyembre 15, 1958 nga The Watchtower nagsiring: “Posible nga magtikadamu an mga ulang samtang nagtitikahirani an kabungkagan hini nga kalibotan.” Tinuod gud ito! Nagbabangon ini hin importante nga pakiana: Ano an sadang naton buhaton basi malikyan an diri ginkikinahanglan nga mga ulang ngan magin pariho kan Maria nga nakapokus ha espirituwal nga mga butang?

6. Paonan-o ginagamit han katawohan han Dios an teknolohiya han kalibotan?

⁶ Ginagamit han katawohan han Dios an teknolohiya han kalibotan basi mapauswag an tinuod nga pagsingba. Tagda pananglitan an “Photo-Drama of Creation,” nga kombinasyon hin mga slide ngan pelikula nga may kolor ngan sound. Antes ngan durante han Girra ha Kalibotan I, minilyon ha bug-os nga kalibotan an naliaw hini nga presentasyon, nga natatapos pinaagi ha paghulagway han tiarabot nga mamurayawon nga Usa ka Yukot ka Tuig nga Pagmando ni Jesu-Kristo. Ha urhi, an mensahe han Ginhadian iginbrodkast ha radyo ngan nabatian han minilyon ha bug-os nga kalibotan. Yana,  ginagamit naton an kompyuter ngan Internet basi ipasarang an maopay nga sumat bisan ha higrayo gud nga lugar ha bug-os nga tuna.

7. (a) Kay ano nga peligroso an paggamit hin bug-os ha kalibotan? (b) Ano an diri gud naton sadang pabay-an? (Kitaa an footnote.)

⁷ An Biblia nagpapahamangno nga peligroso an sobra nga paggamit ha mga igintatanyag han kalibotan. (Basaha an 1 Corinto 7:29-31.) Masayon la makarag an panahon han usa nga Kristiano ha mga butang nga diri man sayop, sugad han hilangkagan, pagbasa hin sekular nga mga literatura, pagkita hin TV, pamasyada, pag-shopping, ngan pangita ha pinakabag-o nga mga gadyet o iba pa nga marahalon nga gamit. Mahimo liwat makarag an aton panahon ha social networking, pagtineks, pagpinadara hin e-mail, ngan agsob nga pagkinita hin bag-o nga mga balita ngan panhitabo ha isport, ngan puydi pa ngani kita maadik hito. * (Ekles. 3:1, 6) Kon diri naton lilimitahan an panahon nga aton ginagamit ha diri importante nga mga butang, mahimo naton mapabay-an an pinakaimportante nga buruhaton—an aton pagsingba kan Jehova.—Basaha an Efeso 5:15-17.

8. Kay ano nga importante gud an pagsunod ha sagdon nga diri higugmaon an mga butang ha kalibotan?

⁸ Ginbubuhat ni Satanas an ngatanan basi madani kita ha iya kalibotan ngan mawara an aton pokus ha pag-alagad. Ginbuhat niya ito han siyahan nga siglo, ngan labi nga ginbubuhat niya ito yana. (2 Tim. 4:10) Salit kinahanglan naton sundon an sagdon: “Ayaw niyo higugmaa . . . an mga butang ha kalibotan.” Pinaagi ha pagkinabuhi uyon hini nga sagdon, malilikyan naton nga maulang kita ngan maghihilarom an aton ‘gugma ha Amay.’ Hini nga paagi, magigin mas masayon para ha aton an pagbuhat han kaburut-on han Dios ngan an pagpabilin nga duok ha iya.—1 Juan 2:15-17.

9. Ano an ginsiring ni Jesus mahitungod han aton simboliko nga mata, ngan paonan-o hiya nagpakita hin susbaranan?

⁹ An mahigugmaon nga sagdon ni Jesus kan Marta uyon gud ha iya katutdoan ngan susbaranan. Gin-aghat niya an iya mga disipulo nga tipigan nga “nakapokus” an ira simboliko nga mata basi waray makaulang ha ira pag-alagad. (Basaha an Mateo 6:22, 33; ftn.) Hi Jesus waray maulang han materyal nga mga panag-iya; waray hiya kalugaringon nga balay o tuna.—Luc. 9:58; 19:33-35.

10. Ano nga susbaranan an ginpakita ni Jesus ha tinikangan han iya ministeryo?

 ¹⁰ Damu nga panhitabo ha ministeryo ni Jesus an mahimo unta makaulang ha iya, pero waray gud hiya magpaulang hito. Ha tinikangan han iya ministeryo, katapos niya magtutdo ha damu nga tawo ngan maghimo hin mga milagro ha Capernaum, ginhangyo hiya han mga tawo nga diri bumaya ha ira syudad. Kondi ano an ginbuhat ni Jesus? Nagpabilin hiya nga nakapokus ha iya toka. Hiya nagsiring: “Kinahanglan ipasamwak ko liwat an maopay nga sumat han Ginhadian han Dios ha iba nga mga syudad, kay ginsugo ako tungod hini.” (Luc. 4:42-44) Nagbaktas hiya ha hirayo nga mga lugar basi magsangyaw ngan magtutdo. Bisan kon hingpit hiya, ginkapoy gihap hiya tungod han damu nga buruhaton ha pag-alagad ha Dios ngan ginkinahanglan niya pumahuway.—Luc. 8:23; Juan 4:6.

11. Ano an ginsiring ni Jesus ha usa nga tawo nga may problema ha pamilya, ngan ano an iya iginpahamangno ha iya mga disipulo?

¹¹ Ha iba nga higayon, samtang nagtututdo hi Jesus ha iya mga sumurunod, usa nga lalaki an sumagbang: “Magturutdo, sugoa an akon bugto nga bahinan ako han panurundon.” Pero waray manginlabot hi Jesus hini nga problema. Hiya binaton: “Hin-o an nagpili ha akon nga hukom o paragtuhay niyo nga duha?” Katapos, nagpadayon hi Jesus ha iya pagtutdo. Ginpahamangnoan niya an iya mga mamarati nga kon magpupokus hira ha pagkaada hin materyal nga mga butang, mahimo hira maulang ha pag-alagad ha Dios.—Luc. 12:13-15.

12, 13. (a) Kay ano nga binilib kan Jesus an pipira nga Griego ha Jerusalem? (b) Paonan-o ginios hi Jesus ha usa nga panhitabo nga posible unta makaulang ha iya?

¹² Makuri gud an naeksperyensyahan ni Jesus han iya ultimo nga semana dinhi ha tuna. (Mat. 26:38; Juan 12:27) Damu pa an iya kinahanglan buhaton, ngan inatubang hiya hin diri makatadunganon nga pagbista ngan masakit nga kamatayon. Pananglitan, tagda an nahitabo han Domingo, Nisan 9, han 33 C.E. Sugad han igintagna, sinulod hi Jesus ha Jerusalem sakay hin asno, ngan gindayaw hiya han mga tawo sugad nga ira Hadi. (Luc. 19:38) Kinabuwasan, sinulod hi Jesus ha templo ngan maisugon nga ginpaiwas an hakog nga mga negosyante nga ginagamit an balay han Dios basi kwartahan an ira mga igkasi-Judio.—Luc. 19:45, 46.

¹³ Binilib gud kan Jesus an pipira nga Griego nga nakadto ha Jerusalem basi magselebrar han Paskua, salit ginsidngan nira an apostol nga hi Felipe nga karuyag nira makigkita kan Jesus. Pero nagdumiri hi Jesus kay diri hiya namimiling hin mga tawo nga masuporta ngan madepensa ha iya kontra ha iya mga kaaway. Maaram hiya kon ano an mas importante. Nagpokus hiya ha kaburut-on ni Jehova para ha iya—an paghatag han iya kinabuhi sugad nga lukat. Salit katapos isaysay nga hirani na hiya mamatay, ginsidngan niya hira Andres ngan Felipe: “An nahigugma ha iya kalag mawawad-an hito, pero an nasisina ha iya kalag dinhi hini nga kalibotan magpapanalipod hito para ha kinabuhi nga waray kataposan.” Imbes nga tagbawon an pagkamausisa hito nga mga Griego, igin-aghat ni Jesus nga subaron an iya nagsasakripisyo nga disposisyon ngan nagsaad: “An bisan hin-o nga naruruyag mag-alagad ha akon, bibendisyonan hiya han Amay.” Sigurado nga iginsumat ni Felipe inin makapadasig nga mensahe ha mga Griego.—Juan 12:20-26.

14. Bisan kon gin-una ni Jesus ha iya kinabuhi an pagsangyaw, ano an nagpapakita nga timbang hiya?

¹⁴ Waray magpaulang hi Jesus ha iya nangunguna nga katuyoan nga pagsangyaw han maopay nga sumat, pero diri la pagsangyaw an pirme niya ginhuhunahuna. Pananglitan, tinambong hiya hin kasal ngan binulig pa ngani nga magin makalilipay ito nga okasyon pinaagi ha milagroso nga paghimo han tubig nga bino. (Juan 2:2, 6-10) Kinarawat  liwat hiya hin mga imbitasyon nga manihapon kaupod han iya duok nga kasangkayan ngan iba pa nga interesado ha maopay nga sumat. (Luc. 5:29; Juan 12:2) Labaw ha ngatanan, naggagahin pirme hi Jesus hin panahon para ha pag-ampo, pagpamalandong, ngan pagpahuway.—Mat. 14:23; Mar. 1:35; 6:31, 32.

15. Ano an iginsagdon ni apostol Pablo, ngan paonan-o hiya nagpakita hin maopay nga susbaranan?

¹⁵ Iginpariho ni apostol Pablo an pagkinabuhi han mga Kristiano ha usa nga rumba. Hiya nagsurat: “Kuhaon naton an bisan ano nga nakakabug-at.” (Basaha an Hebreo 12:1.) Nagkinabuhi hi Pablo uyon ha iya iginsangyaw. Puydi unta hiya magin riko ngan sikat nga lider han relihiyon han mga Judio, pero iginsakripisyo niya ito. Nagpokus hiya ha “mas importante nga mga butang” ngan nagin maduruto ha pag-alagad ha Dios. Nagbiyahe hiya ha mga lugar han Sirya, Asia Minor, Macedonia, ngan Judea. May kalabotan ha iya paglaom nga mabuhi hin waray kataposan ha langit, hi Pablo nagsurat: “Ginkakalimtan ko an mga butang nga ginbayaan ngan gin-aabot ko an mga butang ha unhan, ngan nangangalimbasog gud ako nga makab-ot an akon tumong basi makarawat an premyo.” (Fil. 1:10; 3:8, 13, 14) Bug-os nga ginsalingabot ni Pablo an iya pagin solo ‘basi waray makaulang han iya padayon nga debosyon ha Ginoo.’—1 Cor. 7:32-35.

16, 17. Solo man o inasaw-an, paonan-o naton masusubad an ehemplo ni Pablo sugad nga disipulo han Kristo? Pag-unabi hin eksperyensya.

¹⁶ Pariho kan Pablo, may mga surugoon han Dios nga nagpapabilin nga solo basi gutiay la an ira responsabilidad ha pamilya ngan makaghatag hin mas daku nga panahon ha pag-alagad. (Mat. 19:11, 12) Kasagaran nga durodamu an responsabilidad ha pamilya han inasaw-an nga mga surugoon han Dios. Pero solo man o inasaw-an, mahimo “kuhaon [han ngatanan] an bisan ano nga nakakabug-at” nga makakaulang ha ira pag-alagad ha Dios. Bangin kinahanglan naton ibanan an mga buruhaton nga nakakaubos hin panahon ngan himoon nga tumong an paghatag hin mas daku nga panahon ha pag-alagad.

¹⁷ Tagda an mag-asawa nga hira Mark ngan Claire nga taga-Wales. An tagsa ha ira nagpayunir katapos nira mag-eskwela ngan nagpadayon hito bisan han mag-asawa na hira. Hi Mark nagsiring: “Mas ginpasimple pa namon an amon kinabuhi pinaagi ha pagbaligya han amon balay nga may tulo nga kwarto ngan pagbaya ha amon part-time nga trabaho basi makaboluntaryo ha internasyonal nga pagpanukod nga buruhaton.” Han naglabay nga 20 ka tuig, nagbiyahe hira ha bug-os nga Aprika basi bumulig ha pagtukod hin mga Kingdom Hall. Makausa, 15 ka dolyar na la an ira kwarta, pero gin-ataman hira ni Jehova. Hi Claire nagsiring: “Naabat gud kami hin katagbaw ha pag-alagad kan Jehova kada adlaw. Damu an amon nagin kasangkayan ngan waray gud kami mawad-i han amon mga panginahanglan. An amon gutiay nga iginsakripisyo diri gud maitatanding ha kalipay nga amon inaabat ha pag-alagad kan Jehova hin bug-os-panahon.” Sugad liwat hito an naeksperyensyahan han damu nga kabugtoan ha bug-os-panahon nga pag-alagad. *

18. Ano nga mga pakiana an sadang naton tagdon?

¹⁸ Kumusta ka man? Ano an imo bubuhaton kon nakikita mo nga diri ka na sugad kamadasigon ha pag-alagad tungod ha diri ginkikinahanglan nga mga ulang? Bangin kinahanglan mo pauswagon an imo pagbasa ngan pag-aram han Biblia. Paonan-o mo ito hihimoon? Hihisgotan ito han sunod nga artikulo.