1, 2. Ano an ginhuhunahuna han iba mahitungod ha Dios?

DAMU an naghuhunahuna nga diri importante ha Dios an ira ginbubuhat. Ngani, natoo an iba nga balewaray la ha Dios an nahitatabo ha mga tawo. Katapos han Super Typhoon Yolanda (Haiyan), nga nagdaot han sentral nga bahin han Pilipinas han Nobyembre 2013, an meyor han usa nga daku nga syudad nagsiring: “Posible gud nga nakadto an Dios ha iba nga lugar.”

² An iba nagios nga baga hin diri nakikita han Dios an ira ginbubuhat. (Isa. 26:10, 11; 3 Juan 11) Pariho hira hadton ginhulagway ni apostol Pablo han hiya nagsiring: “Diri nira karuyag nga magkaada husto nga kahibaro mahitungod ha Dios.” Ito nga mga tawo “puno . . . han ngatanan nga pagkadiri-matadong, pagkamakasasala, kahakog, [ngan] karaotan.”—Roma 1:28, 29.

3. (a) Ano an sadang naton ipakiana ha aton kalugaringon mahitungod ha Dios? (b) Ha Biblia, ano an agsob nga iginpapasabot han mga pulong nga “kamot” ni Jehova?

³ Kumusta man kita? Diri pariho ha mga tawo nga gin-unabi kanina, natoo kita nga nakikita ni Jehova an ngatanan naton nga ginbubuhat. Pero nakikita ba liwat naton an iya interes ngan bulig ha aton?  Dugang pa, upod ba kita hadton gin-unabi ni Jesus nga ‘makakakita han Dios’? (Mat. 5:8) Basi hibaroan an iginpapasabot hini, aton anay hisgotan an mga ehemplo ha Biblia hadton nakakita han paggios han kamot han Dios ngan hadton nagdumiri ha pagbuhat hito. Katapos, hibabaroan naton kon paonan-o naton matin-aw nga makikita an kamot ni Jehova ha aton kinabuhi. Samtang ginhihisgotan ini nga mga punto, hinumdoman naton nga agsob gamiton han Biblia an “kamot” han Dios ha pag-unabi ha iya gahum, nga iya ginagamit ha pagbulig ha iya mga surugoon ngan ha pagpirde ha iya mga kaaway.—Basaha an Deuteronomio 26:8.

4. Kay ano nga waray makita han mga kaaway han Israel an kamot han Dios?

⁴ Ha naglabay, an mga tawo nagkaada higayon nga makita ngan mahibaroan kon paonan-o ginbuligan han Dios an Israel. Milagroso nga gintalwas ni Jehova an iya katawohan ha Ehipto, ngan ginpirde an damu nga hadi ha Tuna nga Iginsaad. (Jos. 9:3, 9, 10) Bisan pa han mga hinbaroan ngan nakita han haros ngatanan nga hadi ha weste nga bahin han Jordan, “hira ngahaw nagtirok ngatanan . . . ha pakig-away kan Josue ngan kan Israel.” (Jos. 9:1, 2) Han nakig-away hira ha Israel, nagkaada hira higayon nga makita an kamot han Dios. Tungod han gahum ni Jehova, “an adlaw hinadong, ngan an bulan waray pagkiwa, ngada nga an nasud nakapanimalos ha ira mga kaaway.” (Jos. 10:13) Kan Jehova ‘ginpatig-a an ira [an mga kaaway] kasingkasing, ha pagkada patok kan Israel ha pakig-away.’ (Jos. 11:20) Waray karawata han mga kaaway han Israel nga an Dios an nakikig-away ha ira, salit napirde hira.

5. Ano an waray toohi han maraot nga hi Hadi Ahab?

⁵ An maraot nga hi Hadi Ahab nagkaada mga higayon nga makita an kamot han Dios. Hi Elias nagsiring ha iya: “Mawawaray tun-og o uran hini nga mga tuig, kondi sumala ha akon pulong.” (1 Hadi 17:1) Mahitatabo gud la ito pinaagi han gahum ni Jehova, pero waray hito tumoo hi Ahab. Ha urhi, nakakita hi Ahab hin kalayo nga nahulog tikang ha langit han nag-ampo hi Elias nga lamuyon an iya halad. Katapos, ginsumatan ni Elias hi Ahab nga tatapuson ni Jehova an huraw: “Lumugsong ka, nga diri ka mabalaong han uran.” (1 Hadi 18:22-45) Nakita ni Ahab ito ngatanan pero waray la gihapon hiya tumoo nga nahitabo ito pinaagi han gahum han Dios. Ini ngan an nauna nga mga ehemplo nagtututdo ha aton hin importante nga leksyon—kinahanglan kilalahon naton an kamot ni Jehova kon nagios ito.

6, 7. Ano an matin-aw nga nakita han pipira ha panahon ni Josue?

⁶ Diri pariho hadton maraot nga mga hadi, nakita han iba an kamot han Dios, bisan kon aada gihap hira ha mga kahimtang nga gin-unabi kanina. Pananglitan, diri pariho ha kadam-an nga nasud nga nakig-away ha Israel ha panahon ni Josue, an mga Gibeonitanhon nakigmurayaw ha Israel. Kay ano? Hira nagsiring: “An imo mga surugoon nakanhi tungod han ngaran ni Jehova nga imo Dios: kay nakabati kami han iya bantog ngan han ngatanan nga iya nabuhat.” (Jos. 9:3, 9, 10) Maaramon nga ginkilala nira nga an tinuod nga Dios an nabulig ha Israel.

⁷ Nakita liwat ni Rahab an kamot han Dios ha mga panhitabo ha iya panahon. Katapos hibaroan kon paonan-o gintalwas ni Jehova an Iya katawohan, nagsiring hiya ha duha nga espiya nga Israelita: “Ako nahibaro nga an tuna ihinatag ha iyo ni Jehova.” Bisan kon maaram hiya nga peligroso an pagpakita han sugad nga pagtoo, tinoo hiya nga mahimo hiya talwason ni Jehova pati an iya pamilya.—Jos. 2:9-13; 4:23, 24.

8. Paonan-o nakita han pipira nga Israelita an kamot han Dios?

⁸ Diri pariho ha maraot nga hi Hadi Ahab, an  pipira nga Israelita nga nakakita han kalayo tikang ha langit sugad nga baton ha pag-ampo ni Elias tinoo nga hi Jehova an nagpahinabo hito. Han nakita nira ito nga kalayo nga naglamoy han halad, hira nagsiring: “Hi Jehova, hiya amo an Dios.” (1 Hadi 18:39) Para ha ira, matin-aw gud ito nga ebidensya han gahum han Dios!

9. Paonan-o naton makikita hi Jehova ngan an iya kamot yana?

⁹ An positibo ngan negatibo nga mga ehemplo nga aton ginhisgotan nabulig ha aton nga masabtan kon ano an karuyag sidngon han pakakita ha Dios o ha kamot han Dios. Samtang nakikilala naton hiya, nakikita naton an iya kamot tungod kay nakikita naton an iya mga kalidad ngan buhat pinaagi han “mga mata han [aton] kasingkasing.” (Efe. 1:18) Sigurado nga karuyag naton magin pariho ha mga indibiduwal hadto ngan yana nga matin-aw nga nakakita han bulig ni Jehova ha iya katawohan. Pero may mga ebidensya gud ba nga ginbubuligan han Dios an mga tawo yana?

10. Ano an aton ebidensya nga ginbubuligan ni Jehova an mga tawo yana? (Kitaa an retrato ha tinikangan hini nga artikulo.)

¹⁰ Damu an aton ebidensya nga padayon nga ginbubuligan ni Jehova an mga tawo. Agsob kita makabati hin mga eksperyensya han mga indibiduwal nga nag-ampo para hin bulig ngan nakakarawat han baton hito. (Sal. 53:2) Pananglitan, samtang nagsasangyaw hi Allan ha usa nga gutiay nga isla ha Pilipinas, may nakaistorya hiya nga babaye nga nagtangis. Hiya nagsiring: “Hito nga aga, nag-ampo an babaye kan Jehova nga mabilngan hiya han mga Saksi. Nag-aram hiya han Biblia upod han mga Saksi han tin-edyer hiya pero han nag-asawa hiya ngan binalhin hito nga isla, waray na hiya igkita hin mga Saksi. Ginbaton gud dayon han Dios an iya pag-ampo salit nabantad hiya.” Waray mag-usa ka tuig, gindedikar han babaye an iya kinabuhi kan Jehova.

11, 12. (a) Paonan-o ginbubuligan ni Jehova an iya mga surugoon? (b) Pag-unabi hin eksperyensya han usa nga nakakarawat han bulig han Dios.

¹¹ Damu nga surugoon han Dios an nakakita han ebidensya han iya bulig han nakaundang hira ha ira mga bisyo sugad han pagsigarilyo, pagdroga, o pagkinita hin pornograpiya. May mga nagsiring nga pauroutro hira nga nagsari pag-undang ha ira la kalugaringon nga pangalimbasog pero waray hira maglampos. Kondi han nangaro hira hin bulig kan Jehova, gintagan niya hira hin “diri-ordinaryo nga gahum,” salit nakaundang hira ha ira bisyo.—2 Cor. 4:7; Sal. 37:23, 24.

¹² Ginbubuligan liwat ni Jehova an iya mga surugoon nga maatubang an ira mga problema. Ito an nahitabo kan Amy. Igintoka hiya nga bumulig ha pagtukod hin Kingdom Hall ngan hin urukyan han mga misyonero ha usa nga gutiay nga isla ha Pasipiko. Hiya nagsiring: “Nag-ukoy kami ha usa nga gutiay nga hotel, ngan kada adlaw nagbabaktas kami ha ginbabaha nga mga kalye tipakadto ha trabaho.” Kinahanglan liwat niya magpahiuyon ha kustomre hito nga lugar, ngan agsob nga waray koryente o tubig didto. Hi Amy nagdugang: “Mas maraot pa gud, naguliatan ko an usa nga sister nga kaupod namon ha trabaho. Inuli ako nga nasusubo gud. Ha akon masirom nga kwarto ha hotel, iginsumat ko kan Jehova an sulod han akon kasingkasing ngan nangaro hin bulig ha iya.” Han nagkakoryente, ginbasa niya an usa nga artikulo ha Barantayan mahitungod ha gradwasyon ha Gilead nga naghisgot han ngatanan nga problema nga iya naieksperyensyahan—bag-o nga kultura, kamingaw, bag-o nga mga kaupod. Hiya nagsiring: “Inabat ko nga nakikiistorya ha akon hi Jehova hito nga gab-i. Nagparig-on ito ha akon nga magpadayon ha akon toka.”—Sal. 44:25, 26; Isa. 41:10, 13.

13. Ano an aton pamatuod nga ginbubuligan ni Jehova an iya katawohan “ha pagdepensa han maopay nga sumat ngan ha pagkaada legal nga katungod ha pagsangyaw hito”?

¹³ An kalamposan han mga Saksi ni Jehova “ha  pagdepensa han maopay nga sumat ngan ha pagkaada legal nga katungod ha pagsangyaw hito” usa pa nga pamatuod han bulig han gamhanan nga kamot ni Jehova. (Fil. 1:7) May mga gobyerno nga nangangalimbasog nga bug-os nga mapaundang an buruhaton han katawohan han Dios. Kondi kon huhunahunaon naton nga an mga Saksi ni Jehova nakakarawat hin diri maminos 268 nga kadaogan ha higtaas nga korte, upod na an 24 nga kadaogan ha European Court of Human Rights tikang la han tuig 2000, matin-aw nga waray makakapugong han kamot han Dios.—Isa. 54:17; basaha an Isaias 59:1.

14. Ano an iba pa nga ebidensya nga ginbubuligan han Dios an iya katawohan?

¹⁴ Naglalampos la an pagsangyaw han maopay nga sumat ha bug-os nga kalibotan tungod han bulig han Dios. (Mat. 24:14; Buh. 1:8) Dugang pa, an katawohan han Dios nagkakaurosa anoman an ira nasyonalidad. Diri gud ito nasusubad han kalibotan, salit bisan an mga diri Saksi nasiring: “An Dios aada gud ha iyo.” (1 Cor. 14:25) Damu an aton ebidensya nga ginbubuligan han Dios an iya katawohan. (Basaha an Isaias 66:14.) Kondi, kumusta ka man? Nakikita mo ba an kamot ni Jehova ha imo kinabuhi?

15. Isaysay kon kay ano nga usahay diri naton nakikita an kamot han Dios ha aton kinabuhi.

¹⁵ Ano an pipira nga hinungdan nga bangin diri naton makita an kamot han Dios ha aton kinabuhi? Tungod han mga problema, bangin hingalimtan naton kon paonan-o kita ginbuligan ni Jehova ha naglabay. Han gin-ikaparatay hi Elias ni Rayna Jesebel, nahingalimtan ni Elias an mga bulig han Dios ha iya hadto. May kalabotan ha iya, an Biblia nasiring: “Hiya nangaro nga hiya mamatay unta.” (1 Hadi 19:1-4) Ano an solusyon ha problema ni Elias? Kinahanglan hiya sumarig ha bulig ni Jehova.—1 Hadi 19:14-18.

16. Paonan-o naton makikita an Dios kon may-ada kita mga problema?

¹⁶ Nakapokus gud hi Job ha iya mga kabaraka salit waray niya makita an iya kahimtang pariho ha pagkita hito han Dios. (Job 42:3-6) Pariho  kan Job, bangin kinahanglan naton mangalimbasog pa gud basi makita naton an Dios. Paonan-o naton ito mahihimo? Kinahanglan naton pamalandungon an ginsisiring han Biblia mahitungod han aton mga problema. Samtang nakikita naton kon paonan-o kita ginbubuligan ni Jehova, magigin mas tinuod hiya ha aton. Katapos, pariho kan Job, makakasiring kita: “Ako nakabati ha imo pinaagi han pamatian han talinga; kondi yana an akon mata nakita ha imo.”

17, 18. (a) Paonan-o mo makikita an kamot ni Jehova ha imo kinabuhi? (b) Pag-unabi hin eksperyensya nga nagpapakita kon paonan-o kita ginbubuligan ni Jehova yana.

¹⁷ Paonan-o naton makikita an kamot ni Jehova? Ini an pipira nga ehemplo: Bangin inaabat mo nga nabilngan mo an kamatuoran tungod han bulig han Dios. Katapos hibatian an usa nga bahin ha katirok, nakasiring ka na ba: “Ito gud an akon ginkikinahanglan”? O bangin nakita mo kon paonan-o ginbaton ni Jehova an imo pag-ampo. Bangin nagdesisyon ka nga pahaluagon an imo ministeryo ngan nahipausa ka kon paonan-o ka ginbuligan ni Jehova nga mabuhat ito. O binaya ka na ba hin trabaho tungod kay nauubos hito an imo panahon nga para unta ha pag-alagad kan Jehova ngan nakita mo nga gintuman niya an iya saad: “Diri ko gud ikaw papabay-an”? (Heb. 13:5) Kon marig-on an aton relasyon kan Jehova, makikita dayon naton an iya kamot ha aton kinabuhi.

¹⁸ Hi Sarah nga taga-Kenya nagsiring: “Nag-ampo ako mahitungod ha usa nga estudyante nga baga hin diri nag-aapresyar han iya pag-aram ha Biblia. Ginpakianhan ko hi Jehova kon angay ko ba iundang an pag-aram. Katapos ko gud la mag-Amen, nagtunog an akon celfon. An estudyante nagpakiana kon puydi hiya tumambong ha katirok kaupod ko! Diri gud ako makatoo!” Kon magigin alerto kita, makikita liwat naton kon paonan-o kita ginbubuligan han Dios. Hi Rhonna nga taga-Asia nagsiring nga kinahanglan naton mahibaro pagkita kon paonan-o kita ginbubuligan ni Jehova. Hiya nagdugang: “Pero kon mahimo mo na ito, makalilipay gud an paghibaro nga may-ada hiya daku nga pagtagad ha aton!”

19. Ano pa an ginkikinahanglan basi makita naton an Dios?

¹⁹ Hi Jesus nagsiring: “Malipayon an mga putli an kasingkasing, kay makikita nira an Dios.” (Mat. 5:8) Paonan-o magigin “putli an [aton] kasingkasing”? Kinahanglan tipigan naton nga limpyo an aton panhunahuna ngan iundang an sayop nga panggawi. (Basaha an 2 Corinto 4:2.) Samtang ginkukultibar naton an marig-on nga espirituwalidad ngan ginpapakita an maopay nga panggawi, magigin usa kita hadton nakakakita ha Dios. Hihisgotan ha sunod nga artikulo kon paonan-o makakabulig ha aton an pagtoo basi makita naton hin mas matin-aw an kamot ni Jehova ha aton kinabuhi.