TIKANG han 1992, an Nagmamando nga Lawas nagpipili hin eksperyensyado ngan hamtong nga mga tigurang basi bumulig ha buruhaton han mga komite hito. * Ini nga mga kabulig, nga kaapi han “iba nga mga karnero,” daku gud nga bulig ha Nagmamando nga Lawas. (Juan 10:16) Naatender hira ha sinemana nga miting han komite diin hira nakatoka, ngan naghahatag hin ginkikinahanglan nga mga impormasyon ngan suhestyon. An Nagmamando nga Lawas an naghihimo han ultimo nga desisyon, pero an mga kabulig an nagpapatuman han giya han komite, ngan ginbubuhat nira an anoman nga toka nga iginhahatag ha ira. Gin-uupdan liwat nira an mga membro han Nagmamando nga Lawas ha espesyal ngan internasyonal nga mga kombensyon. Mahimo gihap hira itoka pagbisita ha mga sanga nga opisina sugad nga mga representante han headquarters.

Usa han nagin mga kabulig tikang pa han nagtikang ini nga kahikayan, an nagsiring: “Kon gintutuman ko an akon toka, mas nakakapokus an Nagmamando nga Lawas ha espirituwal nga mga butang.” May kalabotan han iya sobra duha ka dekada nga pag-alagad sugad nga kabulig, usa liwat nga bugto an nagsiring: “Daku gud ini nga pribilehiyo nga labaw pa han akon ginlalaoman.”

Daku nga responsabilidad an igintapod han Nagmamando nga Lawas ha mga kabulig hito, ngan gin-aapresyar hito an bulig hinin maunungon ngan maduruto nga kabugtoan. Hinaot ‘higugmaon naton an sugad nga klase hin mga tawo.’—Fil. 2:29.