1, 2. Ha ano nga importante nga mga paagi naiiba an utok han tawo?

AN MGA tawo nakakabasa, nakakagsurat, nakakayakan, nakakasabot han ginyayakan han iba, nakakag-ampo, ngan nakakakanta hin mga pagdayaw kan Jehova tungod han yinaknan. Urusahon gud an tagsa hini nga mga abilidad, ngan diri bug-os nga nasasabtan han mga syentista kon paonan-o ini nahihimo han aton utok. Tungod kay naiiba an aton utok, may kapas kita mahibaro hin yinaknan. Usa nga propesor ha yinaknan an nagsiring: “An abilidad han mga bata nga mahibaro hin yinaknan usa han mga pangirilal-an han [mga tawo].”

² An abilidad han tawo ha paggamit hin yinaknan regalo han Dios. (Sal. 139:14; Pah. 4:11) An aton hatag-han-Dios nga utok naiiba ha usa pa nga importante nga paagi. Diri pariho han mga hayop, an tawo ginlarang “ha ladawan han Dios.” May-ada kita kagawasan ha pagbuot ngan puydi naton pilion nga gamiton an yinaknan ha pagdayaw ha Dios.—Gen. 1:27.

3. Ano nga makaruruyag nga regalo an ginhatag ni Jehova basi magin maaramon kita?

³ An Maglalarang han yinaknan naghatag hin makaruruyag nga regalo—an Biblia—ha ngatanan nga naghihingyap nga pasidunggan hiya. Mababasa ito ha kabug-osan o ha bahin ha sobra 2,800 nga  yinaknan. Kon ginpapamalandong mo an ginsisiring han Biblia, ginpupuno mo an imo hunahuna han panhunahuna han Dios. (Sal. 40:5; 92:5; 139:17) Salit magpapahimulos ka ha pagpamalandong han mga butang “nga nakakabulig ha imo nga magin maaramon para ha katalwasan.”—Basaha an 2 Timoteo 3:14-17.

4. Ano an karuyag sidngon han pagpamalandong, ngan ano nga mga pakiana an aton hihisgotan?

⁴ An pagpamalandong nangangahulogan hin pagpokus han imo hunahuna ngan paghinunahuna ha usa nga butang, maopay man ito o maraot. (Sal. 77:12; Prob. 24:1, 2) An duha nga pinakamaopay nga topiko para ha pagpamalandong amo an mahitungod kan Jehova nga Dios ngan han iya Anak, hi Jesu-Kristo. (Juan 17:3) Kondi bangin magpakiana kita, ano an koneksyon han pagbasa ngan pagpamalandong? Ano an mahimo naton pamalandungon, ngan paonan-o kita malilipay ha pagpamalandong?

5, 6. Ano an makakabulig nga mas masabtan mo an imo ginbabasa ngan magpabilin ito ha imo hunahuna?

⁵ May mga butang nga nahihimo naton bisan kon diri naton ito ginhuhunahuna, sugad han pagginhawa, paglakat, o pagbisikleta. Makasurubo, usahay nagbabasa kita nga diri liwat naghuhunahuna. Tungod hito, importante an pagpokus ha kahulogan han aton ginbabasa. Katapos basahon an usa nga parapo o antes basahon an sunod nga sub-ulohan, undang anay ngan pamalandonga an imo nabasa basi masiguro nga nasabtan mo ito hin maopay. Oo, an mga disturbo ngan kawara han konsentrasyon mahimo magin hinungdan nga magpatlaag an imo hunahuna, ngan tungod hito magigin diri mapulsanon an imo pagbasa. Paonan-o ini malilikyan?

⁶ Iginpapakita han pagsaliksik han mga syentista nga mas masayon mahinumdoman an imo ginbabasa kon ginluluwas mo an mga pulong samtang nagbabasa. Maaram hini an Maglalarang han aton utok. Ito an rason kon kay ano nga ginsugo niya hi Josue nga ‘pamalandungon’ an Iya libro han Balaud, nga ha Hebreo, mahimo liwat ihubad nga “basahon ha mahinay nga tingog.” (Basaha an Josue 1:8.) Maoobserbaran mo nga an pagbasa han Biblia ha mahinay nga tingog makakabulig ha imo nga magpokus ngan magpabilin ha imo hunahuna an imo ginbabasa.

7. San-o an maopay gud nga panahon ha pagpamalandong ha Pulong han Dios? (Kitaa an retrato ha tinikangan hini nga artikulo.)

⁷ Diri pariho ha pagbasa, an pagpamalandong nagkikinahanglan hin pangalimbasog ngan konsentrasyon. Salit, maopay gud an pagpamalandong ha panahon nga kalmado kita ngan ha lugar nga waray nakakadisturbo. Naobserbaran han salmista nga maopay an pagpamalandong ha gab-i antes hiya kumaturog. (Sal. 63:6) Hi Jesus, nga may hingpit nga hunahuna, maaram nga mapulsanon an pagpamalandong ngan pag-ampo ha mamingaw nga lugar.—Luc. 6:12.

8. (a) Labot la ha Pulong han Dios, ano an iba pa nga butang nga mahimo naton pamalandungon? (b) Ano an inaabat ni Jehova kon ginsusumat naton ha iba an mahitungod ha iya?

⁸ Labot la han imo nababasa ha Biblia, may iba pa nga butang nga mahimo mo pamalandungon. Pananglitan, kon may nakikita ka nga makaruruyag nga linarang, undang anay ngan pamalandong. Magpapagios ini ha imo nga dayawon hi Jehova tungod han iya pagkamaopay. Ngan kon may kaupod ka, maaaghat ka nga isumat ha iya an imo apresasyon. (Sal. 104:24; Buh. 14:17) Ginpapabilhan ba ni Jehova an sugad nga mga pagpamalandong ngan kapahayagan hin pagdayaw? Ginbabaton ito han iya presyoso nga Pulong. May kalabotan hinin makuri nga kataposan nga mga adlaw, mababasa naton ini nga saad: “Dida hito hira nga nahadlok kan Jehova nagyinakanay  an usa ha usa; ngan hi Jehova namati, ngan nakabati, ngan usa nga basahon ha panumdoman iginsurat ha iya atubangan, para ha ira nga nahadlok kan Jehova, ngan naghunahuna [o, namamalandong] ngada ha iya ngaran.”—Mal. 3:16.

9. (a) Ano an gin-aghat ni Pablo nga pamalandungon ni Timoteo? (b) Paonan-o naton maiaaplikar an sagdon ni Pablo kon nangangandam kita para ha ministeryo?

⁹ Hi apostol Pablo nagsiring kan Timoteo nga ‘pamalandungon’ an epekto han iya panyakan, panggawi, ngan pagtutdo. (Basaha an 1 Timoteo 4:12-16.) Pariho kan Timoteo, damu an aton espirituwal nga buruhaton nga mahimo naton pamalandungon. Pananglitan, kinahanglan naton hin panahon ha pagpamalandong kon nag-aandam kita ha pagdumara hin pag-aram ha Biblia. Paghunahuna hin angayan nga pakiana o ilustrasyon nga makakabulig ha tagsa nimo nga estudyante nga mag-uswag. Mapulsanon gud an pagbuhat hini kay nagpaparig-on ini han aton pagtoo ngan nabulig ha aton nga magin mas madasigon ngan epektibo ha pagdumara hin pag-aram ha Biblia. Mapulsanon liwat kon gin-aandam naton an aton kasingkasing para ha pagsangyaw. (Basaha an Esra 7:10.) An pagbasa hin kapitulo ha libro han Biblia nga Mga Buhat mabulig ha aton nga “pasigahon sugad hin kalayo” an aton kadasig ha ministeryo. Daku liwat nga bulig an pagpamalandong ha mga teksto nga karuyag naton gamiton ngan ha mga publikasyon nga plano naton itanyag. (2 Tim. 1:6) Hunahunaa an mga tawo ha teritoryo ngan kon ano an mahimo makapukaw han ira interes. An sugad nga mga pagpangandam mabulig ha aton nga magin epektibo ha pagpamatuod “pinaagi ha pagpakita han espiritu ngan gahum” tikang ha Pulong han Dios.—1 Cor. 2:4.

10. Ano an iba pa nga mag-opay nga butang nga mahimo naton pamalandungon?

¹⁰ Nagsusurat ka ba hin nota durante han mga pahayag publiko, asembleya, ngan kombensyon?  An pagrepaso hito naghahatag hin maopay nga higayon nga pamalandungon an imo hinbaroan tikang ha Pulong han Dios ngan ha iya organisasyon. Dugang pa, an tagsa nga gowa han An Barantayan ngan Pagpamata! pati an mga relis ha kombensyon naghahatag ha aton hin bag-o nga impormasyon nga mahimo naton basahon ngan pamalandungon. Kon nagbabasa ka hin Yearbook, magigin mapulsanon kon maundang ka anay katapos basahon an usa nga eksperyensya. Maghahatag ini ha imo hin higayon nga pamalandungon an imo nabasa ngan mabantad an imo kasingkasing. Kon nagbabasa ka han aton mga publikasyon, bangin karuyag mo bagisan an nangunguna nga mga punto o magsurat hin nota ha ligid han pahina hito. Mabulig ini ha imo ha pagpangandam para ha pagbalik-bisita, pag-shepherding, o ha imo pahayag publiko. Labaw ha ngatanan, an pag-undang ngan pagpamalandong kon nagbabasa ka han aton mga publikasyon maghahatag ha imo hin higayon nga masabtan an imo ginbabasa ngan mag-ampo kan Jehova basi magpasalamat han mag-opay nga butang nga imo hinbaroan.

11. Ano an pinakaimportante nga publikasyon nga sadang naton pamalandungon, ngan kay ano? (Kitaa liwat an footnote.)

¹¹ Syempre, an Biblia an pinakaimportante nga publikasyon nga sadang naton pamalandungon. Pero anoman kon did-an ka nga magkaada Biblia? * Waray makakapugong ha imo ha pagpamalandong ha mga butang nga imo namemorya, sugad han imo paborito nga mga teksto o karantahon ha Ginhadian. (Buh. 16:25) Ngan bubuligan ka han espiritu han Dios nga mahinumdoman an imo hinbaroan, nga mabulig ha imo nga magpabilin nga matinumanon.—Juan 14:26.

12. Ano an usa nga eskedyol ha pagbasa han Biblia nga mahimo magin mapulsanon?

¹² Paonan-o mo ig-ieskedyol an pagbasa han Biblia kada adlaw? Mahimo mo igahin an pipira ka adlaw han semana ha pagbasa ngan pagpamalandong han sinemana nga pagbasa ha Biblia para ha Teokratiko nga Eskwelahan ha Ministeryo. Samtang an iba, mahimo mo igahin ha pagpamalandong ha mga ginyakan ngan ginhimo ni Jesus. Sigurado nga mauyon ka nga an Ebanghelyo, nga asoy han kinabuhi ngan ministeryo ni Jesus, upod han kilala gud nga mga libro han Biblia. (Roma 10:17; Heb. 12:2; 1 Ped. 2:21) May-ada pa ngani kita publikasyon nga naghihisgot han mga panhitabo ha kinabuhi ni Jesus dinhi ha tuna uyon ha pagkasurunod hito. Makakabulig ini ha imo basi magpahimulos ka gud ha imo pagbasa han mga Ebanghelyo.—Juan 14:6.

13, 14. Kay ano nga importante gud an padayon nga pagpamalandong ha espirituwal nga mga butang, ngan mag-aaghat ito ha aton nga buhaton an ano?

¹³ An pagpamalandong ha espirituwal nga mga butang makakabulig ha usa nga magin hamtong nga Kristiano. (Heb. 5:14; 6:1) An Kristiano nga naggagahin hin gutiay la nga panahon ha pagpamalandong mahitungod kan Jehova ngan kan Jesus diri makakagtipig hin marig-on nga pagtoo. Namimeligro hiya nga mahianod pahirayo o bumaya ha kamatuoran. (Heb. 2:1; 3:12) Hi Jesus nagpahamangno nga kon diri naton pamatian an Pulong han Dios “nga may makinarawaton nga kasingkasing,” diri naton ito ‘matitipigan.’ Lugod, bangin masayon kita ‘mahisimang han kabaraka, karikohan, ngan kaliawan ha kinabuhi.’—Luc. 8:14, 15.

¹⁴ Salit, padayon naton nga pamalandungon an Pulong han Dios. Mag-aaghat ini ha aton nga subaron gud an mga kalidad ngan personalidad ni Jehova. (2 Cor. 3:18) Mahimo kita padayon nga mahibaro mahitungod ha aton Amay ha langit  ngan subaron hiya ha waray kataposan. Waray na gud malabaw hito nga kadungganan!—Ekles. 3:11.

15, 16. (a) Paonan-o ka nagpapahimulos ha pagpamalandong ha espirituwal nga mga butang? (b) Kay ano nga bangin makuri usahay an pagpamalandong, pero kay ano nga sadang kita magpadayon ha pagbuhat hito?

¹⁵ Pinaagi ha padayon nga pagpamalandong ha espirituwal nga mga butang, matitipigan naton an aton kadasig para ha kamatuoran. An aton kadasig makakaparig-on ha kabugtoan ngan ha mga interesado nga aton nakakaistorya ha ministeryo. An pagpamalandong ha pinakabirilhon nga regalo han Dios, an halad lukat ni Jesus, mabulig ha aton nga pabilhan an pribilehiyo han pagkaada duok nga relasyon ha aton Baraan nga Amay, hi Jehova. (Roma 3:24; San. 4:8) Hi Mark nga taga-Sur Aprika, nga napriso hin tulo ka tuig tungod han iya pagin neutral, nagsiring: “An pagpamalandong maipapariho ha eksayting nga pagbiyahe. Samtang mas ginpapamalandong naton an espirituwal nga mga butang, mas damu nga bag-o nga butang an aton nadidiskobrehan mahitungod ha aton Dios, hi Jehova. Usahay kon nanluluya ako o nababaraka mahitungod ha tidaraon, ginkukuha ko an Biblia ngan ginpapamalandong an usa nga teksto han Kasuratan. Nagigin kalmado gud ako tungod hito.”

¹⁶ Tinuod, an kinabuhi dinhi ha kalibotan puno hin mga ulang, salit usahay makuri an pamiling hin panahon ha pagpamalandong ha espirituwal nga mga butang. Usa pa nga matinumanon nga bugto nga hi Patrick nga taga-Aprika, an nagsiring: “An akon hunahuna sugad hin mailbox nga puno hin iba-iba nga impormasyon, makaruruyag ngan diri-makaruruyag, nga kinahanglan pagbulagon kada adlaw. Samtang gin-uusisa ko an sulod han akon hunahuna, agsob ako makabiling hin mga kabaraka ngan kinahanglan ko ito ig-ampo kan Jehova antes ako makapamalandong nga may murayaw nga hunahuna. Bisan kon an pagbuhat hini bangin magkinahanglan hin panahon antes ako makagtikang ha pagpamalandong ha espirituwal nga mga butang, inabat ko nga nagin mas duok ako kan Jehova. Gin-aabrihan hini an akon hunahuna basi mas masabtan ko an kamatuoran.” (Sal. 94:19) Oo, nagpapahimulos gud an ngatanan nga ‘nag-uusisa hin maopay han Kasuratan kada adlaw’ ngan namamalandong han ira hinbaroan.—Buh. 17:11.

17. Paonan-o ka naggagahin hin panahon ha pagpamalandong?

¹⁷ An iba temprano pa nga nagmamata ha aga basi magbasa, mamalandong, ngan mag-ampo. Samtang an pipira nagbubuhat hito durante han ira bakante nga oras ha udto. Bangin para ha imo, maopay ito buhaton ha gab-i o antes kumaturog. An iba naruruyag pagbasa han Biblia ha aga ngan ha gab-i antes kumaturog. Hito nga paagi, ginbabasa nira an Biblia ha “adlaw ngan ha gab-i,” o hin regular. (Jos. 1:8) An importante, ibanan naton an panahon nga aton igin-gagahin ha diri importante nga mga butang basi mapamalandong an Pulong han Dios kada adlaw.—Efe. 5:15, 16.

18. Ano an ginsisiring han Biblia mahitungod hadton namamalandong ha Pulong han Dios kada adlaw ngan nag-aaplikar han ira hinbaroan?

¹⁸ An Biblia nagsasaad nga bibendisyonan ni Jehova an ngatanan nga namamalandong han iya Pulong ngan nangangalimbasog pag-aplikar han ira hinbaroan. (Basaha an Salmo 1:1-3.) Hi Jesus nagsiring: “Malipayon an mga namamati han pulong han Dios ngan nagbubuhat hito!” (Luc. 11:28) Labaw ha ngatanan, an pagpamalandong ha espirituwal nga mga butang kada adlaw mabulig ha aton nga pasidunggan an Harangdon nga Maglalarang han aton urusahon nga utok, ngan babalosan kita niya hin kalipay yana ngan hin kinabuhi nga waray kataposan ha iya matadong nga bag-o nga kalibotan.—San. 1:25; Pah. 1:3.