Pakiana han Magbarasa

An Ginhadian ba han Dios Aada ha Imo Kasingkasing?

Damu yana an natoo nga oo an baton ha pakiana ha igbaw. Pananglitan, an The Catholic Encyclopedia nasiring: “An ginhadian han Dios nangangahulogan . . . han paagi han pagmando han Dios ha aton kasingkasing.” Ini nga ideya amo an komon nga igintututdo han mga klero. Igintututdo gud ba han Biblia nga an Ginhadian han Dios aada ha kasingkasing han tawo?

Ha pagkatinuod, naghuhunahuna an iba nga hi Jesus an siyahan nga nagpasarang han ideya nga an Ginhadian han Dios aada ha kasingkasing. Oo, hiya nagsiring: “Kitaa! An ginhadian han Dios aada ha butnga niyo.” (Lukas 17:21, NW) An iba nga hubad hini nga bersikulo nasiring: “An ginhadian han Dios aada ha iyo” o “ha sulod niyo.” Husto ba ito nga hubad han ginsiring ni Jesus? Iginpapasabot gud ba niya nga an Ginhadian han Dios aada ha sulod han kasingkasing han tawo?

Siyahan, tagda kon ano an kasingkasing han tawo. Kon gin-uunabi ha Biblia, an simboliko nga kasingkasing nagtutudlok ha tinuod nga personalidad han tawo, an burabod han iya panhunahuna, disposisyon, ngan pag-abat. Bangin makaruruyag an ideya nga may makatarag-ob nga butang sugad han Ginhadian han Dios ha kasingkasing han tawo—nga nakakagbag-o ngan nakakapaopay ha ira—kondi, makatadunganon ba ito?

An Biblia nasiring: “An kasingkasing malimbungon labaw han ngatanan nga butang, ngan labi hin kamahugaw.” (Jeremias 17:9) Hi Jesus mismo nagsiring: “Ha sulod, tikang ha kasingkasing han mga tawo, nanggugowa an mga maraot nga mga hunahuna, an mga panlibog, an mga pakighilawas, an mga panikas, an mga pagpatay hin tawo; an mga pagkaipa, an mga magraot, an panlimbong.” (Markos 7:20-22) Tagda ini: Diri ba kadam-an han kakurian nga aton nakikita ha kalibotan yana nagtikang ha makasasala nga kasingkasing han tawo? Salit mahimo ba magtikang dida hito an hingpit nga Ginhadian han Dios? Ha pagkatinuod, an kasingkasing han tawo diri gud makakahimo hin Ginhadian han Dios sugad la nga an niyotiyo diri makakagbunga hin igos.—Mateo 7:16.

Ikaduha, tagda an mga kaistorya ni Jesus han iya ginyakan an mga pulong ha Lukas 17:21. An nauna nga bersikulo mababasa: “Han ginpakianhan hiya han mga Pariseo, kon san-o aabot an ginhadian han Dios; dayon [niya] pagbaton ha ira.” (Lukas 17:20) An mga Pariseo kaaway ni Jesus. Nagsiring hiya nga ito nga mga salingkapaw diri makakasulod ha Ginhadian han Dios. (Mateo 23:13) Yana, kon an mga Pariseo diri makakasulod ha Ginhadian han Dios, posible ba mahingada ha ira kasingkasing an Ginhadian? Diri gud! Kon sugad, ano an iginpapasabot ni Jesus?

Ha paghubad hini nga mga pulong ni Jesus, ginamit han pipira nga mabinantayon nga parahubad han Biblia an mga pulong pariho han aada ha New World Translation. An iba nasiring nga an Ginhadian “kaupod niyo” o “aada ha butnga niyo.” Ha ano nga paagi nga an Ginhadian han Dios kaupod hito nga mga tawo hito nga panahon, upod na han mga Pariseo? Aw, hi Jesus an ginpili ni Jehova nga Dios nga magigin Hadi han Ginhadian. Sugad nga an Pinili-nga-Hadi, nakada gud hiya ha butnga hito nga mga tawo. Nagtutdo hiya mahitungod han Ginhadian han Dios ngan naghimo pa ngani hin mga milagro nga naghatag ha ira hin abanse nga kahibaro kon ano an hihimoon hito nga Ginhadian. Kon sugad, ha literal nga kahulogan, an Ginhadian nakada ha ira butnga.

Matin-aw nga waray mababasa ha Biblia nga nasuporta ha ideya nga an Ginhadian han Dios aada ha kasingkasing han tawo. Lugod, tinuod ito nga gobyerno, usa nga magpapahinabo han makatirigamnan nga mga pagbag-o ha tuna, sugad gud han igintagna han mga propeta.—Isaias 9:6, 7; Daniel 2:44.