Magin Duok ha Dios

Usa nga Amay nga Waray Kapariho

Mateo 3:16, 17

“AMAY.” Usa ini han pipira la nga pulong nga nakakaaghat hin hilarom nga pagbati ha tawo. An amay nga nahigugma gud han iya mga anak nabulig ha ira nga mag-uswag. Salit may maopay nga hinungdan nga gintawag han Biblia hi Jehova nga Dios nga “Amay.” (Mateo 6:9) Ano nga klase hin Amay hiya? Basi mabaton ito, aton usisahon an ginyakan ni Jehova kan Jesus han ginbawtismohan hiya. Tungod kay an paagi han pakiistorya han amay ha iya anak nagsusumat kon ano nga klase hiya nga kag-anak.

Han mga Oktubre 29 K.P., hi Jesus kinadto ha Salog Jordan basi magpabawtismo. Iginsusumat han Biblia an nahitabo: “Han kabaptisi na kan Jesus, ha gilayon hiya hinaw-as ha tubig, ngan kitaa, an mga langit nabuksan ha iya; ngan iya nakita an espiritu han Dios nga nalusad, sugad hin sarapati ngan kinada ha igbaw niya. Ngan, kitaa, an usa nga tingog tikang ha langit, nga nasiring: Ini amo an akon hinigugma nga Anak, nga akon nalilipayan.” a (Mateo 3:16, 17) Ito nga mga pulong nga puno hin gugma ginyakan ni Jehova mismo, ngan nagsusumat kon ano nga klase nga Amay hiya. Tigamni an tulo nga butang nga iginpahayag ni Jehova ha iya Anak.

Siyahan, pinaagi han mga pulong nga ‘ini an akon Anak,’ hi Jehova sugad hin nasiring, ‘iginpapasigarbo ko nga ako an imo Amay.’ Gintatagbaw han masinabuton nga amay an hingyap han iya anak nga apresasyon ngan kumarawat hin atensyon. Kinahanglan pasarigon an mga anak nga ginpapabilhan hira sugad nga indibiduwal nga membro han pamilya. Handurawa an posible nga gin-abat ni Jesus—bisan sugad nga adulto—ha pakabati han sugad nga apresasyon tikang ha iya Amay!

Ikaduha, pinaagi ha pagtawag ha iya Anak nga “an akon hinigugma,” dayag nga iginpahayag ni Jehova an iya gugma kan Jesus. Sugad hin an Amay nasiring, ‘hinigugma ko ikaw.’ Ginsusumatan han maopay nga amay an iya mga anak nga hinigugma gud niya hira. An sugad nga mga pulong—nga inuupdan hin husto nga pagbati—nabulig ha anak nga mag-uswag. Sigurado nga nakabantad gud ito kan Jesus nga hibatian an tingog han iya Amay nga nagpapahayag hin gugma para ha iya!

Ikatulo, pinaagi han mga pulong nga “akon nalilipayan,” iginpahayag ni Jehova an iya kalipay o pag-uyon ha iya Anak. Sugad ito hin nasiring hi Jehova, ‘Anak, nalilipay ako han imo ginbuhat.’ An mahigugmaon nga amay namimiling hin mga higayon basi pahibaroon an iya mga anak nga nalilipay hiya ha mag-opay nga butang nga ira ginsisiring o ginbubuhat. An anak nakakakuha hin kusog ngan kaisog tikang ha pag-uyon nga iginpapahayag han kag-anak. Sigurado nga nakadasig gud ito kan Jesus nga hibatian nga inuuyonan hiya han iya Amay!

Oo, hi Jehova usa nga Amay nga waray kapariho. Naghihingyap ka ba nga magkaada hin sugad nga amay? Kon oo, malilipay ka ha paghibaro nga posible ka magin duok kan Jehova. Kon may pagtoo ka ha Dios, babalosan ka niya kon nag-aaram ka mahitungod ha iya ngan sinsero nga nangangalimbasog ha pagbuhat han iya kaburut-on. An Biblia nasiring: “Pahirani kamo ha Dios, ngan mahirani man hiya ha iyo.” (Jakobo 4:8) May-ada pa ba iba nga mas makakabulig ha imo nga umabat hin seguridad kay ha pagkaada duok nga relasyon kan Jehova nga Dios, an gimaopayi nga Amay nga mahahanduraw?

[Footnote]