Usa nga Hangyo han Minilyon nga Tawo

HANDURAWA an ginatos ka milyon, o binilyon pa ngani nga naghahangyo hin pariho nga butang. Nanginginyupo hira ha gihitaasi nga awtoridad ha uniberso nga ihatag an usa ka espisipiko nga hangyo. Kondi, gutiay gud la ha ira an maaram kon ano an ira pinapangaro. Posible gud ba ito mahitabo? Ha pagkamatuod, nahitatabo ito kada adlaw. Ano an ginhahangyo hini ngatanan nga mga tawo? An pag-abot han Ginhadian han Dios!

Sumala ha usa nga surbey, mga 37,000 nga relihiyon an nag-aangkon nga Kristiano ngan natoo nga hi Jesu-Kristo an ira Lider. Ito nga mga relihiyon sobra duha ka bilyon an membro. Damu ha ira an nag-aampo han agsob tawagon nga Amay Namon o an Pag-ampo han Ginoo. Maaram ka ba hini nga pag-ampo? Sugad han igintutdo ni Jesus ha iya mga sumurunod, nagtitikang ito hini nga paagi: “Amay namon, nga aada ka ha langit, gindadayaw an imo ngaran; Kumanhi an imo ginhadian. Matuman an imo pagburut-an, sugad ha langit, amo man ha tuna.”—Mateo 6:9, 10.

Ha sulod hin mga siglo na, an mga tawo pauroutro nga nag-aampo hito ha mga singbahan. Gin-aampo liwat nira ito sugad nga pamilya ngan sugad nga indibiduwal, ha maopay ngan maraot nga panahon. Diri la kay sinsero nga igin-aampo nira ito, kondi gin-aampo nira ito nga puno hin pagbati. Damu an nagmemorya ngan nagyayakan hito nga diri naghuhunahuna han kahulogan. Ini nga mga membro han Kakristianohan diri amo la an naglalaom ngan nag-aampo han pag-abot han Ginhadian han Dios.

Usa nga Hangyo han Magkalain-lain an Relihiyon

An Kaddish, usa nga popular nga pag-ampo han mga Judio nga nagtataguminatay. Bisan kon diri direkta nga naghihisgot ito ha kamatayon o kabidoan, kasagaran nga gin-aampo ito kon may namatay. Naghahangyo ito: “Hinaot iya [Dios] ig-establisar an iya Ginhadian ha imo panahon . . . ngan ha kadagmitan.” a Usa pa nga kadaan nga pag-ampo ha sinagoga an naghihisgot mahitungod  han paglaom para han Ginhadian han Mesias tikang ha panimalay ni David.

An iba nga diri-Kristiano an relihiyon naruruyag han ideya han Ginhadian han Dios. Sumala ha The Times of India, usa nga prominente nga lider han relihiyon nga taga-India han ika-19 ka siglo nga interesado nga magkaurosa an mga Hindu, Muslim, ngan Kristiano, nagsiring: “Diri maiestablisar an tinuod nga ginhadian han Dios kon diri magkaurosa an este ngan weste.” Dugang pa, an administrador han Islam nga kolehiyo ha Strathfield, Australia, bag-o la nga nagsurat ha usa nga peryodiko: “Pariho han ngatanan nga Muslim, natoo ako [nga] mabalik hi Jesus ngan mag-iestablisar han tinuod nga Ginhadian han Dios.”

Waray ruhaduha nga binilyon an naglalaom ngan naghahangyo yana para han Ginhadian han Dios. Kondi, tagda an makapainteres nga kamatuoran.

Posible nga maaram ka nga kami nga mga Saksi ni Jehova nga nagpupublikar hini nga magasin, nagbabalay-balay ha iyo lugar basi makiistorya mahitungod han Biblia. Ha panahon nga ginsurat ini nga artikulo, ginbubuhat namon ini ha 236 nga nasud ngan ha sobra 400 nga yinaknan ha bug-os nga kalibotan. An nangunguna nga tema han amon pagsangyaw amo an Ginhadian han Dios. Ha pagkamatuod, tigamni nga an bug-os nga ngaran hini nga magasin amo An Barantayan Nagsasamwak han Ginhadian ni Jehova. Agsob nga nagpapakiana kami ha mga tawo kon nag-aampo ba hira para hito nga Ginhadian. Damu an nabaton hin oo. Kondi kon ginpapakianhan kon ano ito nga Ginhadian, kadam-an an nabaton nga diri hira maaram. Usahay an ira baton diri matin-aw ngan diri sigurado.

Kay ano nga damu hinduro an naghahangyo han Ginhadian han Dios nga diri man ngani hira maaram kon ano ito? Tungod ba kay an ideya han Ginhadian han Dios komplikado ngan diri matin-aw? Diri. An Ginhadian detalyado ngan matin-aw nga iginsaysay ha Biblia. Dugang pa, an mensahe mahitungod han Ginhadian makakahatag ha imo hin tinuod nga paglaom hinin madulom nga panahon. Ha masunod nga artikulo, hibabaroan naton kon paonan-o iginsasaysay han Biblia ito nga paglaom. Katapos aton paghihisgotan kon san-o matutuman an pag-ampo ni Jesus nga kumanhi an Ginhadian.

[Footnote]