An Imo ba mga Plano Uyon ha Kaburut-on han Dios?

AN TAMSI nga Clark’s nutcracker kolor abo ngan makaruruyag an huni ngan makikita nga naglulupad-lupad ha kagurangan ha weste han Amerika del Norte. Kada tuig, nagtitirok ito hin mga 33,000 nga liso ngan gintatago ito ha mga 2,500 nga dapit ha pagpangandam para ha mga bulan han katugnaw. Oo, ini nga tamsi “labaw hin kamakinaadmananon” ha punto nga nagtitirok ito hin pagkaon para ha tidaraon.—Proberbios 30:24.

Labaw pa gud hito an abilidad han tawo. Ha ngatanan nga linarang ni Jehova ha tuna, an tawo an may-ada diri matupngan nga abilidad ha paghibaro tikang ha mga eksperyensya ha naglabay ngan ha pagtagad han mga leksyon hito ha ira mga plano ha tidaraon. “May-ada damu nga paagi [“plano,” NW] dida ha kasingkasing han tawo,” siring han maaramon nga hi Hadi Salomon.—Proberbios 19:21.

Bisan pa hito, kasagaran nga waray nahihimo an mga tawo kondi ibasar la an ira plano ha kon ano an ira ginhuhunahuna nga mahitatabo ha tidaraon. Pananglitan, ginpaplano mo an imo mga buruhaton kinabuwasan ha paghunahuna nga masirang pa an adlaw ngan buhi ka pa gihapon. An paghunahuna nga masirang pa an adlaw may basihan, kondi waray makakasiguro kon buhi ka pa kinabuwasan. Ha pagkamatuod, an parasurat han Biblia nga hi Jakobo nagsiring: “Diri kamo maaram kon ano an mahinabo buwas.”—Jakobo 4:13, 14.

Hi Jehova nga Dios waray sugad nga limitasyon. Maaram hiya “han kataposan tikang ha tinikangan.” An iya iginpapahayag nga katuyoan, sigurado gud nga matutuman. “An akon sagdon matindog,” siring niya, “ngan akon bubuhaton an ngatanan ko nga karuyag.” (Isaias 46:10) Kon sugad, ano an mahitatabo kon an plano han tawo diri uyon ha katuyoan han Dios?

Kon an mga Plano han Tawo Nagbabalewaray han Katuyoan han Dios

Mga 4,000 ka tuig na an naglabay, an mga magturukod han Torre han Babel nagplano nga an mga tawo mag-ukoy ha usa la nga lugar. “Kadi,” nagsiring hira, “pagtukod kita hin bungto, ngan hin balwarte, nga an iya ugbosan  maabot ha langit, ngan paghimo kita hin ngaran, basi diri kita pagsarangon ha kahigrayoan ha bawbaw han bug-os nga tuna.”—Genesis 11:4.

Kondi, iba gud an katuyoan han Dios ha tuna tungod kay iya ginsugo hi Noe ngan an iya mga anak: “Magmabungahon kamo, ngan magmadamu, ngan pun-on niyo an tuna.” (Genesis 9:1) Ano an ginbuhat han Dios ha plano hinin rebelyoso nga mga taga-Babel? Ginsamok niya an ira pinulongan basi diri hira makagkomunikar ha usa kag usa. Ano an resulta? “Ginpasarang hira ni Jehova ha kahigrayoan tikang hadto ha bawbaw han tuna.” (Genesis 11:5-8) Tungod hito, an mga magturukod han Babel napiritan ha paghibaro hin importante nga leksyon. Kon an plano han tawo supak ha katuyoan han Dios, ‘an sagdon ni Jehova an matindog.’ (Proberbios 19:21) Naiimpluwensyahan ba an imo kinabuhi hinin mga leksyon ha naglabay?

Riko nga Kulang hin Pamurubuot

Bangin waray ka plano magtukod hin torre, kondi damu yana an nagpaplano magtirok hin damu nga kwarta ha bangko ngan panag-iya basi diri magkuri ha ira pagretiro. Natural la nga hingyapon han usa nga pahimulsan an iya gintrabahoan. “An tagsa-tagsa makaon ngan mainom, ngan magpapahimulos han kaopayan dida han ngatanan niya nga buruhaton,” nagsurat hi Salomon. ‘Hiyas [regalo] ito han Dios.’—Eklesiastes 3:13.

May-ada kita baratunon kan Jehova ha paagi han aton paggamit hini nga regalo. Haros 2,000 ka tuig na an naglabay han ginpabug-atan ini ni Jesus ha iya mga disipulo pinaagi hin ilustrasyon. Hiya nagsiring: “An uma han usa nga tawo nga manggaranon, kinuha hin damu. Ngan hiya nagpainoino ha iya kalugaringon; ngan siniring: Ano an akon bubuhaton? Kay ako waray ginhihimosan han akon mga bunga. Ngan hiya siniring: Ini an akon bubuhaton; akon paggugub-on an akon mga buhos, ngan maghihimo hin darodaku, ngan didto ko paghihimosa an akon ngatanan mga bunga, ngan an akon mga manggad. Ngan ako masiring ha akon kalag: Kalag, may damu ka nga manggad, nga gintirok ha kadam-an nga mga tuig: pahuway, kaon inom, ngan paglipay.” (Lukas 12:16-19) Baga hin makatadunganon an plano han riko, diri ba? Pariho ha Clark’s nutcracker nga gin-unabi ha tinikangan, an riko ha ilustrasyon ni Jesus baga hin nangangandam la han iya panginahanglan ha tidaraon.

Pero, may-ada sayop ha panhunahuna hito nga tawo. Hi Jesus nagpadayon: “Kondi an Dios siniring ha iya: Kulangkulang, yana nga gab-i an imo kalag aaroon ha imo, ngan an mga butang nga imo gin-andam, makakankanay man hira?” (Lukas 12:20) Ipinapakita ba hini nga teksto nga diri nauyon hi Jesus ha ginsiring ni Salomon nga an  trabaho ngan an mag-opay nga resulta hito regalo han Dios? Diri. Kon sugad, ano an iya iginpapasabot? Hiya nagsiring: “Amo ini [an nahitatabo ha tawo nga] nagtitirok hin manggad ha iya kalugaringon, ngan diri manggaranon ha Dios.”—Lukas 12:21.

Gintutdoan ni Jesus an iya mamarati nga karuyag ni Jehova nga tagdon naton Hiya ngan an Iya katuyoan kon may-ada kita ginpaplano. Mahimo magin bahandianon ha Dios an riko kon ginpamiling niya an mga paagi nga magpaparig-on han iya relasyon ha Dios ngan magpapauswag han iya kaaram ngan gugma. Kondi, ipinapakita han iya ginsiring nga diri hiya interesado hini, diri man niya buot magbaya hin abot para ha mga pobre, o maghalad kan Jehova. An sugad nga mga buhat nga uyon ha kaburut-on han Dios waray ha iya plano. An iya mga plano nakasentro gud la ha iya mga hingyap ngan pisikal nga kaopayan.

Naoobserbahan mo ba nga an prayoridad han kadam-an yana pariho ha riko nga ginhisgotan ni Jesus? Riko man kita o pobre, masayon gud la magin materyalistiko ngan mabalewaray an relasyon ha Dios tungod han adlaw-adlaw nga panginahanglan ngan mga hingyap. Paonan-o mo malilikyan ito?

Pagplano hin “Normal” nga Kinabuhi

Diri pariho ha riko ha ilustrasyon ni Jesus, bangin nagkukuri ka ha pinansyal. Ngan kon inasaw-an ka, sigurado nga karuyag mo makagtagana han ginkikinahanglan han imo pamilya, kon posible, makapagpaeskwela han imo mga anak tubtob ha hayskul. Kon solo ka, posible nga nagpaplano ka nga makatrabaho o makapabilin hito basi diri makapabug-at ha iba. Mapulsanon ito nga mga tumong.—2 Tesalonika 3:10-12; 1 Timoteo 5:8.

Bisan pa hito, posible nga an pagtrabaho, pagkaon, pag-inom—pagkinabuhi ha gintatagad nga normal—mahimo magresulta ha pagkinabuhi nga supak ha kaburut-on han Dios. Paonan-o? Hi Jesus nagsiring: “Sugad han mga adlaw ni Noe amo man an pagtikanhi han Anak han Tawo. Kay sugad nga, ha mga adlaw han waray pa an paglunop, nga hira nagpipinangaon ngan nagpipinanginom, nga nangangasawa ngan napapangasal, tubtob ha pagsulod ni Noe ha arka; ngan hira waray hibaro tubtob ha pag-abot han paglunop ngan gin-anod hira ngatanan, maaamo man an pagtikanhi han Anak han Tawo.”—Mateo 24:37-39.

Antes han Baha, an mga tawo ha kabug-osan nagkinabuhi ha paagi nga normal para ha ira. Kondi, an ira sayop amo an pagbalewaray han katuyoan han Dios ha pagpoo han magraot pinaagi hin delubyo ha bug-os nga tuna. Sigurado nga ginhunahuna nira nga diri normal an pagkinabuhi ni Noe. Kondi, pag-abot han Baha, napamatud-an nga an pagkinabuhi ni Noe ngan han iya pamilya an tinuod nga maaramon.

Yana, an ngatanan nga ebidensya nagpapamatuod nga nagkikinabuhi na kita ha panahon han kataposan. (Mateo 24:3-12; 2 Timoteo 3:1-5) Ha na diri maiha, ‘pagpipinitpiniton ngan pag-aanawon’ han Ginhadian han Dios an presente nga sistema. (Daniel 2:44) Ilarom hito nga Ginhadian, an tuna magigin paraiso. Wawad-on hito an mga sakit ngan kamatayon. (Isaias 33:24; Pahayag 21:3-5) An ngatanan nga linarang ha tuna magkikinabuhi ha kamurayawan ngan diri na magugutom.—Salmo 72:16; Isaias 11:6-9.

Kondi, antes gumios hi Jehova, katuyoan niya nga an maopay nga sumat han Ginhadian “[igwali] ha bug-os nga kalibotan ha pagpamatuod ha ngatanan nga mga nasud.” (Mateo 24:14) Uyon hito, mga syete milyon nga Saksi ni Jehova an nagsasangyaw hini nga maopay nga sumat ha 236 nga katunaan ha sobra upat ka gatos nga pinulongan.

Para ha katawohan ha kalibotan, an pagkinabuhi han mga Saksi baga hin diri normal ha pipira nga paagi—pataraw-an pa ngani. (2 Pedro 3:3, 4) Pariho ha panahon antes an Baha, an kadam-an yana okupado ha ira adlaw-adlaw nga buruhaton. Para ha ira, diri maaramon an diri nagkikinabuhi ha paagi nga gintatagad han sosiedad nga normal. Pero ha natoo ha mga saad han Dios, an pagkinabuhi nga nakasentro ha pag-alagad ha Dios an tinuod nga maaramon.

Salit, riko ka man o pobre o igo-igo la an kahimtang, maaramon nga usisahon ha panapanahon an imo mga plano ha tidaraon. Samtang ginbubuhat mo ito, pakianhi an imo kalugaringon, ‘An akon ba mga plano uyon ha katuyoan han Dios?’

[Retrato ha pahina 11]

Kon an mga plano han tawo diri nauyon ha katuyoan han Dios, ‘sagdon ni Jehova an matindog’

[Retrato ha pahina 12]

Han nagplano an riko ha parabola ni Jesus, napakyas hiya ha pagtagad han katuyoan han Dios