Magin Duok ha Dios

“Hiya Diri Hirayo ha Tagsa-tagsa ha Aton”

Buhat 17:24-27

KON itanding an tawo ha haluag hinduro nga uniberso, gutiay ngan maluya gud ito. Tungod hito bangin ka magpakiana, ‘Posible gud ba an minos nga tawo magkaada duok nga relasyon ha Dios nga Makagarahum-ha-ngatanan?’ Magigin posible la ito, kon maruyag hi Jehova nga Dios nga magin duok kita ha iya. Naruruyag ba hiya? An nakakaliaw nga baton mabibilngan ha matin-aw nga mga pulong ni apostol Pablo ha mga edukado ha Atenas sugad han nakarekord ha Buhat 17:24-27. Tigamni an upat nga punto nga iya gin-unabi mahitungod kan Jehova.

Siyahan, hi Pablo nagsiring nga an Dios “naghimo han kalibotan, ngan han ngatanan nga mga butang nga nahisulod hito.” (Bersikulo 24) An pagkamaopay ngan pagkaiba-iba han mga linarang nga nakakahatag hin kalipay ha kinabuhi nagpapamatuod han pagtagad ngan gugma han Naghimo ha aton. (Roma 1:20) Kalurongan an paghunahuna nga an sugad nga matinagaron ngan mahigugmaon nga Dios magpapahirayo ha iya mga hinigugma.

Ikaduha, hi Jehova ‘naghahatag ha ngatanan hin kinabuhi ngan gininhawa ngan ngatanan nga butang.’ (Bersikulo 25) Hiya an Nagsusustinir han kinabuhi. (Salmo 36:9) An hangin, tubig, ngan pagkaon nga importante gud ha kinabuhi regalo han aton Maglalarang. (Jakobo 1:17) Makatadunganon ba an paghunahuna nga ipapahirayo han mahinatagon nga Dios an iya kalugaringon salit diri kita makakahigayon nga makilala hiya ngan magin duok ha iya?

Ikatulo, ‘tikang ha usa, ginbuhat [han Dios] an ngatanan nga nasud han mga tawo.’ (Bersikulo 26) Hi Jehova waray ginpapasulabi ngan waray gud paboritismo. (Buhat 10:34) Imposible gud nga magpapasulabi hiya! Iya ginlarang an “usa” nga tawo, hi Adan, an gintikangan han ngatanan nga rasa ngan nasyonalidad. ‘Kaburut-on han [Dios] nga an ngatanan nga tawo maluwas.’ (1 Timoteo 2:4) Salit, an higayon nga magin duok ha iya abrido ha ngatanan, anoman an aton rasa, nasyonalidad, o tribo.

Ikaupat, iginpahayag ni Pablo an nagpapasarig gud nga kamatuoran: hi Jehova “diri hirayo ha tagsa-tagsa ha aton.” (Bersikulo 27) Bisan kon mahimayaon gud, mabibilngan pirme hiya han sinsero nga naghihingyap nga magin duok ha iya. Ginpapasarig kita han iya Pulong nga diri hiya hirayo, kondi ‘hirani ha ngatanan nga nasangpit ha iya.’—Salmo 145:18.

Matin-aw ha ginsiring ni Pablo nga karuyag han Dios nga magin duok kita ha Iya. Kondi, nagigin duok la Hiya ha mga disidido ha ‘pagpamiling’ ngan ‘pagpangarapkap’ (NW) ha Iya, siring ni Pablo. (Bersikulo 27) Usa nga reperensya han mga parahubad han Biblia nasiring nga “an duha nga berbo ginsasabot ha pagpahayag hin makakab-ot nga posibilidad . . . o hin makakab-ot nga hingyap.” Ha pag-ilustrar: Ha masirom kondi pamilyar nga kwarto, bangin mangarapkap ka kon hain an purtahan o switch han suga, kondi maaram ka nga mabibilngan mo ito. Ha pariho nga paagi, kon sinsero nga mamiling kita ha Dios ngan mangarapkap basi hibilngan hiya, makakasiguro kita nga maglalampos an aton pangalimbasog. Aton ‘hiaagian hiya,’ nagpasarig hi Pablo.—Bersikulo 27.

Hingyap mo ba nga magin duok ha Dios? Kon tungod han imo pagtoo magtikang ka ha ‘pagpamiling ha Dios’ ngan ha ‘pagpangarapkap ha iya,’ diri ka mapapakyas. Diri makuri bilngon hi Jehova tungod kay “hiya diri hirayo ha tagsa-tagsa ha aton.”