Subara an Ira Pagtoo

“Iini Ako an Surugoon han Ginoo”

HAN sinulod an bisita ha balay nira Maria, nahipausa hiya. An bisita waray mamiling ha iya tatay o nanay. Kinadto ito basi makigkita ha iya! Ito nga tawo diri taga-Nasaret; hito la nakakasiguro hi Maria. Ha gutiay nga bungto nga pariho han iya gindak-an, masayon makilal-an an estranghero. Ngan naiiba gud an dagway hini nga tawo. Iya gintawag hi Maria ha paagi nga bag-o gud para kan Maria: “Maghimaya ka, pinalabi ka kaopay! An Ginoo upod ha imo. Magin palaran ka ha ngatanan nga mga babaye!”—Lukas 1:28.

Hito nga paagi siyahan nga gin-unabi han Biblia hi Maria nga anak ni Heli ha bungto han Nasaret ha Galilea. Gin-unabi hiya han Biblia ha panahon diin kinahanglan maghimo hiya hin importante nga mga desisyon. Karaslon na hiya ha panday nga hi Jose—diri riko kondi matinumanon. Salit an iya kinabuhi baga hin nakaplano na—simple nga kinabuhi ha pagsuporta kan Jose nga iya bana, ngan pagpamilya kaupod ha iya. Kondi, waray niya hunahunaa nga igkaistorya hini nga bisita nga nagdara ha iya hin toka tikang ha iya Dios, usa nga responsabilidad nga magbabag-o han iya kinabuhi.

Bangin mahipausa ka nga diri damu an impormasyon ha Biblia mahitungod kan Maria. Gutiay la an ginsisiring hito mahitungod han iya gintikangan, mas guti pa mahitungod han iya personalidad, ngan waray mahitungod han iya dagway. Kondi, an ginsisiring han Pulong han Dios nagpapakilala gud han iya pagkatawo.

Basi makilala hi Maria, kinahanglan usisahon naton diri la an damu ngan waray-basihan nga opinyon mahitungod ha iya han mga relihiyon. Salit, diri naton paghihisgotan dinhi an damu nga retrato o inukit. Diri liwat naton paghihisgotan an komplikado nga teolohiya ngan doktrina nga naghatag hinin simple nga babaye hin hitaas nga mga titulo sugad han “Iroy han Dios” ngan “Rayna han Kalangitan.” Lugod, aton paghihisgotan an aktuwal nga ginsisiring han Biblia. Naghahatag ito ha aton hin birilhon nga kahibaro ha iya pagtoo ngan kon paonan-o naton masusubad ito.

Pagbisita hin Anghel

An bisita ni Maria, sugad han bangin hinbabaroan mo na, diri ordinaryo nga tawo. Hiya an anghel nga hi Gabriel. Han gintawag niya hi Maria nga ‘pinalabi kaopay,’ “nalisang gud” hi Maria han iya ginsiring ngan naghunahuna mahitungod hinin naiiba nga pangumusta. (Lukas 1:29) Pinalabi kaopay nin-o? Diri naghuhunahuna hi Maria nga magin pinalabi kaopay ha katawohan. Kondi an karuyag ipasabot han anghel an pagpalabi kan Maria ni Jehova nga Dios. Ngan ito an importante ha iya. Bisan pa hito, waray hiya maghambog ngan maghunahuna nga inuuyonan hiya han Dios. Kon nangangalimbasog kita para han pag-uyon han Dios, diri gud kita magpahitaas ngan maghunahuna nga inuuyonan na kita niya, sadang naton hibaroan an importante nga leksyon nga hinsabtan gud ni Maria. Nangangalas an Dios ha mapahitas-on, kondi ginhihigugma ngan ginsusuportahan an kablas ngan mapainubsanon.—Jakobo 4:6.

Pagkikinahanglanon ni Maria an sugad nga pagkamapainubsanon tungod kay waray katupong nga pribilehiyo an igintanyag ha iya han anghel. Nagsiring ito nga igbuburod niya an bata nga magigin an pinakaimportante ha ngatanan nga tawo. Hi Gabriel nagsiring: “An Ginoo nga Dios mahatag ha iya han lingkoran nga hadianon ni David, nga iya amay; ngan maghahadi hiya ha balay ni Jakob ha kagihaponan ngan an iya ginhadian diri matatapos.” (Lukas 1:32, 33) Sigurado nga maaram hi Maria han saad han Dios kan David sobra usa ka yukot ka tuig na an naglabay—nga usa han iya katulinan an magmamando tubtob ha waray kataposan. (2 Samuel 7:12, 13) Salit an iya anak an magigin Mesias nga maiha na hinduro nga ginpapangandoy han katawohan han Dios!

Dugang pa, ginsidngan hi Maria han anghel nga an iya anak “pagngangaranan nga Anak han  Gihitaasi.” Paonan-o an tawhanon nga babaye mag-aanak han Anak han Dios? Ha pagkatinuod, paonan-o magkakaanak hi Maria? Karaslon hiya kan Jose, kondi hito nga takna daraga pa hiya. Salit prangka nga iya ini iginpakiana: “Uray ngan putli ako. Uunanhon man hin kahimo hini?” (Lukas 1:34, Maopay nga Sumat) Tigamni nga waray ikaawod ni Maria an iya pagin birhen. Ha kabaliktaran, iya ginpabilhan ito. Damu nga batan-on yana an diri nagpapabili han ira pagkabirhen ngan madagmit magtamay han mga birhen pa. Matin-aw nga nagbag-o na an kalibotan. Kondi, waray magbag-o hi Jehova. (Malakias 3:6) Pariho ha panahon ni Maria, Iya ginpapabilhan an nagtitipig han Iya suruklan ha moral.—Hebreo 13:4.

Bisan kon matinumanon nga surugoon han Dios hi Maria, diri hiya hingpit. Kon sugad, paonan-o hiya mag-aanak hin hingpit nga Anak han Dios? Hi Gabriel nagsiring: “An espiritu santo makanhi ha imo, ngan an gahum han Gihitaasi sugad hin landong makakatabon ha imo: tungod hini an baraan nga imo ig-aanak, pagngangaranan hin Anak han Dios.” (Lukas 1:35) An pagin baraan nangangahulogan ha “pagin limpyo,” “putli,” ngan “sagrado.” Ha normal nga kahimtang, naipapasa han mga tawo an ira pagin diri limpyo ngan pagkamakasasala ha ira anak. Kondi, hini nga kahimtang, maghihimo hi Jehova hin milagro nga waray kapariho. Iya ibabalhin an kinabuhi han Iya Anak tikang ha langit ha tagoangkan ni Maria, katapos Iya gagamiton an aktibo nga pwersa, o baraan nga espiritu ha ‘pagtabon’ kan Maria, nga magpapanalipod ha bata ha bisan ano nga sala. Tinoo ba hi Maria ha saad han anghel? Ano an iya reaksyon?

An Reaksyon ni Maria

An mga maruhaduhaon ngan an pipira nga teologo han Kakristianohan diri makatoo nga mahimo mag-anak an birhen. Bisan pa han ira edukasyon, diri nira masabtan an simple nga kamatuoran. Sugad han ginsiring ni Gabriel, “waray pulong nga tikang ha Dios nga waray kagamhanan” o imposible. (Lukas 1:37) Ginkarawat ni Maria an ginsiring ni Gabriel sugad nga kamatuoran tungod kay may-ada hiya daku nga pagtoo. Kondi, diri hiya basta natoo la nga waray basihan. Pariho hin makatadunganon nga tawo, nagkinahanglan hiya hin ebidensya basi basaran han iya pagtoo. Ngan andam hi Gabriel dugangan an iya hinbabaroan. Ginsumatan hiya ni Gabriel mahitungod han iya edaran na nga patod nga hi Elisabet nga maiha na nga hinbabaroan nga baog. Kondi yana, milagroso nga ginpahinabo han Dios nga magburod hiya!

Ha sugad nga kahimtang, ano an bubuhaton ni Maria? Gintagan hiya hin toka han Dios ngan may-ada ebidensya nga bubuhaton han Dios an ngatanan nga ginsiring ni Gabriel. Kondi posible gud nga nagkaada kabaraka ngan kakurian hi Maria tungod hini nga pribilehiyo. Siyahan, ginhuhunahuna niya an iya relasyon kan Jose. Maruruyag pa ba hi Jose pag-asawa ha iya kon hibaroan ni Jose nga burod na hiya? Ikaduha, daku nga responsabilidad an toka mismo. Dadad-on niya an kinabuhi han pinakapresyoso nga linarang han Dios—an Iya kalugaringon nga hinigugma nga Anak! Kinahanglan niya atamanon an waray mahihimo nga minasus-an ngan panalipdan ito ha maraot nga kalibotan. Oo, mabug-at gud ito nga responsabilidad!

Iginpapakita han Biblia nga bisan an magrig-on ngan magtinumanon nga kalalakin-an nag-alang usahay ha pagkarawat hin magkuri nga toka tikang ha Dios. Nagsiring hi Moises nga diri hiya maabtik magyakan salit diri hiya mahimo magin tagapagyakan han Dios. (Eksodo 4:10) Hi Jeremias nagbaribad ha toka nga iginhatag ha iya han Dios tungod  kay para ha iya, “bata” pa hiya hinduro para hito. (Jeremias 1:6) Ngan pinalagiw liwat hi Jonas tikang ha iya toka! (Jonas 1:3) Kumusta man hi Maria?

Nahinunumdoman pa an iya mga pulong nga nagpapakita hin pagkamapainubsanon ngan pagkamasinugtanon. Hiya nagsiring kan Gabriel: “Iini ako an surugoon han Ginoo: buhaton ha akon sugad han imo pulong.” (Lukas 1:38) An “surugoon” amo an pinakahabubo ha mga kabulig; an iya kinabuhi nakadepende gud ha iya agaron. Ito an pagtagad ni Maria ha iya Agaron, hi Jehova. Maaram hiya nga talwas hiya ha Iya, nga maunungon Hiya ha mga tawo nga maunungon ha Iya, ngan Iya bibendisyonan hiya samtang iya bubuhaton an ngatanan para hinin diri-masayon nga toka.—Salmo 18:25.

Usahay may-ada ginpapabuhat an Dios nga para ha aton baga hin makuri o imposible pa ngani. Kondi, ha iya Pulong gintatagan kita niya hin damu nga hinungdan ha pagsarig ha iya sugad han ginbuhat ni Maria. (Proberbios 3:5, 6) Masarig ba kita ha iya? Kon masarig kita, babalosan kita niya, ngan maghahatag ito ha aton hin hinungdan nga maparig-on pa an aton pagtoo ha iya.

An Pagbisita kan Elisabet

Daku an epekto kan Maria han iginsumat ni Gabriel mahitungod kan Elisabet. Ha ngatanan nga kababayin-an ha kalibotan, may-ada pa ba mas makakaintindi han iya kahimtang? Nagdagmit hi Maria pagbiyahe ngadto ha kabukiran nga bahin han Juda, nga kasagaran nga ginbibiyahe hin tulo o upat ka adlaw. Han sinulod hiya ha balay nira Elisabet ngan Sakarias nga saserdote, gintagan ni Jehova hiya hin dugang nga marig-on nga ebidensya nga magpapakusog han iya pagtoo. Hinbatian ni Elisabet an tingog ni Maria ngan tigda nga inabat niya nga an bata ha iya tiyan linukso ha kalipay. Napuno hiya han baraan nga espiritu ngan nagtawag kan Maria sugad nga “an iroy han akon Ginoo.” Iginpahibaro han Dios kan Elisabet nga an anak ni Maria magigin iya Ginoo, an Mesias. Dugang pa, giniyahan hiya ha paghatag hin kumendasyon kan Maria tungod han iya pagkamatinumanon ngan pagkamasinugtanon, hiya nagsiring: “Bulahan hiya nga nagtoo.” (Lukas 1:39-45) Oo, an ngatanan nga iginsaad ni Jehova kan Maria matutuman!

Katapos hi Maria nagyakan. An iya mga pulong gintipigan gud ha Lukas 1:46-55. Ito an pinakahilaba nga ginyakan ni Maria nga nakarekord ha Biblia, ngan damu an iginsusumat hito mahitungod han iya personalidad. Iginpapakita hito an iya pagin mapasalamaton ngan maapresyaron samtang iya gindadayaw hi Jehova ha pagbendisyon ha iya han pribilehiyo han pagin an iroy han Mesias. Iginpapakita liwat hito an kahilarom han iya pagtoo, samtang nag-iistorya hiya mahitungod han pagpaubos ni Jehova han mga mapahitas-on ngan gamhanan ngan han pagbulig ha mga ubos ngan kablas nga nangangalimbasog ha pag-alagad ha Iya. Ngan iginpapakita hito an kahilarom han iya kahibaro. Ha usa nga pagbanabana, iya gin-kotar an Hebreo nga Kasuratan hin sobra 20 ka beses!

Matin-aw nga ginpamalandong gud ni Maria an Pulong han Dios. Bisan pa hito, nagpabilin hiya nga mapainubsanon. Mas karuyag pa ngani niya gamiton an Kasuratan ha pagpatin-aw imbes nga ipahayag an iya opinyon. An bata nga nagtutubo ha iya tagoangkan magpapakita hin pariho nga disposisyon kay ha urhi ito siniring: “An akon pagtutdo, diri akon, kondi kanan han nagpakanhi ha akon.” (Juan 7:16) Maopay nga pakianhan naton an aton kalugaringon: ‘Nagpapakita ba ako hin daku nga pagtahod ngan pagpasidungog ha Pulong han Dios? O mas ginpapabug-atan ko pa an akon kalugaringon nga mga ideya ngan katutdoan?’ Matin-aw gud an baton hito ni Maria.

Nagpabilin hi Maria kan Elisabet ha sulod hin tulo ka bulan, sigurado nga nadasig gud hiya hito nga iya pagbisita ngan nakadasig man liwat hiya ha iba. (Lukas 1:56) Ginpapahinumdom kita han  duha nga kababayin-an han bili han pagkamagsangkay. Kon namimiling kita hin kasangkayan nga nahigugma gud ha aton Dios nga hi Jehova, makakasiguro kita nga magigin mas maopay an aton relasyon ha Dios ngan magigin mas duok kita ha iya. (Proberbios 13:20) Inabot an panahon nga kinahanglan na umuli hi Maria. Ano daw la an magigin reaksyon ni Jose kon hibaroan niya nga burod na an iya uyab?

Maria Ngan Jose

Posible nga waray na hulata ni Maria nga dumaku pa an iya tiyan antes sumatan hi Jose mahitungod hito. Waray ruhaduha nga kinahanglan na niya makiistorya kan Jose. Kondi antes hito, posible nga nahunahuna niya kon ano an magigin reaksyon ni Jose—lalaki nga desente ngan may-kahadlok ha Dios. Bisan pa hito, iya ginsumatan an iya uyab han ngatanan nga nahitabo. Sugad han bangin mo hunahunaon, nagupong gud hi Jose. Karuyag niya toohan an iya hinigugma, kondi an iginsumat ni Maria ha iya waray pa gud mahitabo hadto. An Biblia waray maghisgot kon ano an iya nahunahuna o kon ano an iya reaksyon. Kondi nagsiring ito nga nagdesisyon hiya pakibulag kan Maria tungod kay an mag-uyab hadto gintatagad na nga mag-asawa. Pero, diri niya karuyag sirotan o pakaalohan hi Maria ha kadaygan, salit nagdesisyon hiya ha pakibulag ha tago. (Mateo 1:18, 19) Sigurado nga nasakitan gud hi Maria nga makita an iya uyab nga nagpuproblema hinin naiiba nga sitwasyon. Bisan pa hito, waray hiya masina nga waray tumoo hi Jose ha iya.

Waray tuguti ni Jehova hi Jose nga buhaton an iya ginhuhunahuna nga husto. Ha inop, ginsidngan hiya han anghel han Dios nga milagroso an pagburod ni Maria. Sigurado nga sugad hin nagabutan hiya hin tunok! Yana, ginbuhat ni Jose an ginbubuhat na ni Maria tikang pa ha tinikangan—an pagbuhat uyon han giya ni Jehova. Iya ginkuha hi Maria sugad nga asawa ngan nag-andam ha pagkarawat han waray kapariho nga responsabilidad ha pag-ataman han Anak ni Jehova.—Mateo 1:20-24.

May maopay nga leksyon nga mahibabaroan an mga mag-asawa—ngan adton naghuhunahuna ha pag-asawa—hinin batan-on nga magpadis 2,000 ka tuig na an naglabay. Samtang nakikita ni Jose nga gintutuman han iya batan-on nga asawa an responsabilidad ngan obligasyon han pagin iroy, sigurado nga nalipay hiya nga gin-giyahan hiya han anghel ni Jehova. Sigurado nga nasantop ni Jose an bili ha pagsarig kan Jehova kon naghihimo hin dagku nga desisyon. (Salmo 37:5; Proberbios 18:13) Waray ruhaduha nga nagpabilin hiya nga maikmat ngan matinagaron ha pagdesisyon sugad nga ulo han pamilya.

Ha luyo nga bahin, ano an aton mahibabaroan ha pagin andam ni Maria ha pag-asawa kan Jose? Siyahan, bisan kon ha tinikangan bangin nakurian hi Jose pagtoo han iya istorya, naghulat hiya kan Jose sugad nga an lalaki nga magigin ulo han pamilya. Sigurado nga nakahatag ito hin maopay nga leksyon ha iya ngan ha Kristiano nga kababayin-an yana. Ikaduha, ini nga panhitabo posible gud nga daku an naitutdo kanda Jose ngan Maria mahitungod han bili han waray-igintatago ngan abrido nga komunikasyon.

Sigurado nga gintikangan han batan-on nga magpadis an ira pag-asawa ha pinakamaopay nga pundasyon. Labaw ha ngatanan, hinigugma nira hi Jehova nga Dios ngan naghihingyap ha paglipay ha iya sugad nga responsable ngan mahigugmaon nga mga kag-anak. Syempre, makarawat hira hin mas dagku nga bendisyon ngan maatubang hin mas makuri nga mga sitwasyon. Ira aatamanon hi Jesus nga magdadaku ha pagin an pinakabantogan nga tawo ha kalibotan.

[Retrato ha pahina 17]

An gugma ha Dios an pinakamaopay nga pundasyon han pag-asawa