Pakiana han Magbarasa

Kay Ano nga an Mga Saksi ni Jehova Diri Nakikigbahin ha Girra?

An mga Saksi ni Jehova, diin man hira naukoy, maiha na gud nga kilala nga diri nakikigbahin ha girra han mga nasud o ha mga girra sibil. “Ha panahon han girra, waray gud dinadapigan an mga Saksi ni Jehova,” siring han Australian Encyclopædia singkwenta ka tuig na an naglabay.

Diri nakikigbahin an mga Saksi ha girra tungod han nangunguna nga hinungdan—diri ito igintutugot han ira konsensya sugad nga Kristiano. Nabansay an ira konsensya han mga sugo ngan susbaranan ni Ginoo Jesu-Kristo. Iya ginsugo an iya mga sumurunod nga higugmaon an ira igkasitawo. Dugang pa, hiya nagsugo: “Higugmaa an iyo mga kaaway: buhata niyo an maopay hadton mga nagdudumot ha iyo.” (Lukas 6:27; Mateo 22:39) Han gumamit hin kampilan an usa han iya disipulo basi depensahan hiya, ginsidngan niya ito: “Itakob mo an imo kampilan, kay an ngatanan nga nagamit hin kampilan, ha kampilan man kamamatay.” (Mateo 26:52) Hito nga paagi, matin-aw nga iginpakita niya ha pulong ngan ha buhat nga diri sadang gumamit hin hinganiban an iya mga sumurunod.

Usa pa nga hinungdan kon kay ano nga an mga Saksi diri nakikigbahin ha girra amo an kamatuoran nga may-ada hira mga karelihiyon ha bug-os nga kalibotan. Tungod ha girra nagigin magkaaway an magbugto ngan supak ito ha sugo ni Jesus nga ‘maghigugmaay ha usa kag usa.’—Juan 13:35.

An prinsipyo han basihan nga gugma nga ginhisgotan kanina, diri kay ha pulong la han mga Saksi ni Jehova kondi ha buhat man. Pananglitan, tagda an ira disposisyon durante han Girra ha Kalibotan II, 1939-1945. Ha Estados Unidos, sobra 4,300 nga Saksi an napriso tungod ha pagdumiri ha pagsundalo. Ha Britanya, an ira diri pagsuporta ha girra nagresulta ha kapriso han sobra 1,500, upod na an sobra 300 nga kababayin-an. Ha Nazi nga Alemanya, iginpapatay han Estado an sobra 270 nga Saksi tungod ha pagdumiri ha pakig-away. Ha panahon han Nazi, sobra 10,000 ha ira an gindakop, an iba ginpriso ha mga selda ngan an iba ha mga concentration camp. Nag-antos liwat hinduro an mga Saksi ha Japan. Tungod hito, an bisan hin-o nga namatayan hin hinigugma durante han Girra ha Kalibotan II—o ha mga girra katapos hito—makakasiguro nga diri gud Saksi ni Jehova an responsable han kamatayon hito.

An panhunahuna han mga Saksi ha girra matin-aw ha ultimo nga mga pulong ni Wolfgang Kusserow. Han 1942, ginpugotan han mga Nazi inin 20 anyos nga Aleman tungod kay waray hiya makigbahin ha girra. (Isaias 2:4) Nagsiring hiya ha korte militar: “Nagdaku ako sugad nga Saksi ni Jehova uyon ha pulong han Dios nga aada ha Baraan nga Kasuratan. An pinakaimportante ngan pinakabaraan nga balaud nga iya iginhatag ha katawohan amo ini: ‘Higugmaon mo an imo Dios labaw ha ngatanan ngan an imo igkasitawo sugad ha imo kalugaringon.’ An iba pa nga sugo nasiring: ‘Diri ka magpatay.’ Iginpasurat ba ini han aton Maglalarang para ha kakahoyan?”—Markos 12:29-31; Eksodo 20:13.

An mga Saksi ni Jehova natoo nga hi Jehova la—an Dios nga makagarahum ha ngatanan—an makakahatag ha tuna hin kamurayawan nga magpapadayon ha waray kataposan. Nasarig hira nga tutumanon niya an iya saad nga ‘paukyon an mga araway tubtob ha kataposan han tuna.’—Salmo 46:9.