Sayop ba Gamiton an Ngaran han Dios?

HA Hebreo nga Kasuratan nga agsob unabihon sugad nga an “Daan nga Testamento,” mababasa an ngaran han Dios hin haros 7,000 ka beses ha יהוה (ginbabasa tikang ha too tipawala). Ha iba nga pagkayakan, an ngaran han Dios ginrirepresentaran hin upat nga letra ha Hebreo nga Yohdh, He, Waw, ngan He, nga komon nga iginhubad nga YHWH.

Ha maiha na nga naglabay, nagkaada patootoo an mga Judio nga sayop an paggamit han ngaran han Dios. Tungod hini, nagdumiri hira ha pagluwas hito, ngan ha ira mga sinurat ginsaliwanan nira ito. Kondi, damu nga parahubad han Biblia an nagamit han ngaran nga “Yahweh,” o “Jehova.” Usa han sugad nga bersyon an Jerusalem Bible han Katoliko. Sumala hini, han ginpakianhan ni Moises an Dios kon ano an iya ibabaton kon pakianhan hiya han mga Israelita kon hin-o an nagsugo ha iya, an Dios binaton: “Ini an imo isisiring ha mga anak ni Israel: ‘Yahweh, an Dios han imo mga amay, an Dios ni Abraham, an Dios ni Isaak, ngan an Dios ni Jakob, an nagsugo ha akon nganhi ha iyo.’ Ini an akon ngaran ha waray kataposan; pinaagi hini nga ngaran tatawagon ako han ngatanan nga katulinan.”—Eksodo 3:15.

Samtang nag-aampo, gin-unabi ni Jesus an paagi han iya paggamit han ngaran han Dios: “Akon iginpakilala an imo ngaran ha ira ngan padayon nga ipapakilala ito.” Ngan ha pag-ampo nga tinatawag nga Amay Namon, hi Jesus nagsiring: “Amay namon nga aada ka ha langit, baraanon an imo ngaran.”—Juan 17:26; Mateo 6:9, JB.

Salit, bangin mahipausa ka han ginsiring ni Papa Benedict XVI ha iya bag-o nga libro nga Jesus of Nazareth mahitungod ha paggamit han ngaran han Dios: “An mga Israelita . . . husto gud ha pagdumiri ha pagluwas han ngaran nga gin-gamit han Dios ha pagtawag ha iya kalugaringon hin YHWH, basi diri ito maipariho ha minos nga mga ngaran han pagano nga mga dios. Ha pariho nga hinungdan, sayop an bag-o nga mga bersyon han Biblia ha paggamit hini nga ngaran—nga gintagad pirme han Israel nga misteryoso ngan diri sadang luwason—sugad nga pariho la ito ha bisan ano nga kadaan nga ngaran.”

Ano an imo opinyon may kalabotan hini? Husto ba o sayop an paggamit ha ngaran han Dios? Kon hi Jehova mismo nasiring: “Ini an akon ngaran ha waray kataposan; pinaagi hini nga ngaran tatawagon ako han ngatanan nga katulinan,” may-ada ba may katungod nga rumiwa ha iya?

[Retrato ha pahina 30]

Gin-gamit ni Jesus an ngaran han Dios ha iya pag-ampo