An Bahin ni Maria ha Katuyoan han Dios

DURANTE han ministeryo ni Jesus, may babaye nga linabaw an tingog bisan pa han aringasa han damu nga tawo, hiya sininggit: “Bulahan an tiyan nga nagdara ha imo, ngan an mga dughan nga imo ginsus-an.” Kon karuyag ni Jesus nga singbahon an iya iroy, ini an maopay nga higayon nga iaghat ito. Pero waray niya buhata ito, kondi hiya siniring: ‘Lugod burobulahan adton nanmamati han pulong han Dios ngan nagtitipig hito.’—Lukas 11:27, 28.

Waray tagi ni Jesus hin espesyal nga pagpasidungog an iya iroy; waray man niya sugoa an iya mga sumurunod nga buhaton ito. Kon sugad, paonan-o ini nauyon ha pagdayaw nga iginhahatag kan Maria han damu nga sinsero nga tumuroo? Paghisgotan naton an ginsisiring han Biblia may kalabotan ha popular nga katutdoan mahitungod han iroy ni Jesus.

“Puno hin Grasya,” “Darayawon . . . ha mga Kababayin-an”

Iginsumat ni anghel Gabriel kan Maria an magigin bahin ni Maria ha katuyoan han Dios. Hito nga takna, hiya nagsiring kan Maria: “Maghimaya ka, pinalabi ka kaopay! An Ginoo upod ha imo.” (Lukas 1:28) An iba nga pagkahubad hito amo an: “Maghimaya ka, puno ka hin grasya, an Ginoo upod ha imo.” Waray pag-iha katapos hito, hi Elisabet nagsiring kan Maria: “Darayawon ka ha mga kababayin-an! Ngan darayawon an bunga han imo tiyan.” (Lukas 1:42) Diri ba ipinapakita hini nga hi Maria angay kumarawat hin espesyal nga pagsingba?

Ha pagkamatuod, diri. Bisan kon ini nga mga pulong bahin ha usa nga pag-ampo han mga Katoliko nga iginpapahinungod kan Maria, an Biblia mismo waray maghatag hin hinungdan ha pag-ampo ha iya. Ginkilala  nira Gabriel ngan Elisabet an daku nga pribilehiyo ni Maria sugad nga an mananamkon han Mesias, kondi an pag-ampo ha iya waray unabiha ha Biblia. Lugod, han ginhangyo hi Jesus han iya mga disipulo nga tutdoan hira kon paonan-o mag-aampo, nagsiring hiya nga sadang idirekta an pag-ampo ha iya Amay. Ha pagkamatuod, an popular nga modelo nga pag-ampo ni Jesus nagtitikang hini: “Amay namon, nga aada ka ha langit.”—Mateo 6:9.

Usa han mga Magmarando

Usa pa nga popular nga katutdoan mahitungod kan Maria an nasiring nga hiya yana “an Rayna han langit.” Waray gud hiya tawaga hin sugad han Biblia. Kondi, ipinapakita hito nga may-ada hiya espesyal nga bahin ha kahikayan han Dios ha langit. Ano ito?

Hi Jesus nagsiring nga an pipira han iya matinumanon nga disipulo magmamando kaupod niya ha iya Ginhadian. (Lukas 22:28-30) Tatagan niya hin awtoridad ito nga mga pinili basi mag-alagad ‘ha aton Dios [sugad nga] mga saserdote, ngan maghahadi [hira] ha tuna.’ (Pahayag 5:10) Matin-aw nga gintutugwayan kita han Biblia ha paghunahuna nga hi Maria usa han gintagan hinin daku nga pribilehiyo. Kay ano nga makakasiring kita hito?

Bangin mahinumdoman mo nga han mamatay hi Jesus, hi Maria padayon nga ‘nag-ampo’ upod han mga disipulo ngan kabugtoan ni Jesus. Hito nga okasyon, mga 120 an nagkatirok ‘upod an [pipira nga] kababayin-an.’ (Buhat 1:12-15) Samtang nagpapadayon an “adlaw han Pentekostes,” siring han Biblia, “tirok hira ngatanan didto ha usa nga lugar” han igbubo ha ira an baraan nga espiritu han Dios, tungod hito nakagyakan hira hin iba-iba nga yinaknan.—Buhat 2:1-4.

An kamatuoran nga hi Maria usa han ginbuboan han baraan nga espiritu nagpapamatuod nga ginpili liwat hiya magin igkasi-magmarando ni Jesus ha iya Ginhadian. Salit nagpapamatuod ini nga hi Maria nalingkod na yana kaupod ni Jesus ha langitnon nga himaya. (Roma 8:14-17) Tagda an pipira nga pribilehiyo nga makakarawat ni Maria ngan han iba nga igkasi-magmarando ni Jesus ha pagtuman han katuyoan han Dios.

Ha Paghatag hin Urusahon nga mga Bendisyon

An libro han Biblia nga Pahayag nasiring nga 144,000 an babanhawon ngadto ha langitnon nga himaya basi mag-alagad upod kan Jesus sugad nga mga saserdote, hukom, ngan hadi. (Pahayag 14:1, 4; 20:4, 6) Sugad nga mga saserdote, makikigbahin hira ha pagpadapat han bili han halad ni Jesus ha ngatanan nga masinugtanon nga katawohan, ira paghihingpiton hira ha espirituwal, moral, ngan pisikal. (Pahayag 21:1-4) Daku gud nga pribilehiyo para ha maunungon nga magsiringba ni Jehova nga makita iton makalilipay hinduro nga panahon! a

Hi Maria nagkaada bahin ngan may-ada pa gihapon bahin ha katumanan han katuyoan ni Jehova. An iya pagkamapainubsanon, pagtoo, pagkamasinugtanon, ngan debosyon sugad nga iroy, labi na an iya pagkamainantuson ha panahon han kakurian, angay subaron. Tungod han iya bahin ha pagpanamkon han Mesias ngan ha paghatag han waray kataposan nga mga bendisyon ha katawohan, takos gud hiya tahuron.

Kondi, an pinakaimportante nga leksyon nga aton hibabaroan ha kinabuhi ni Maria amo nga hiya, upod an iba nga magtinumanon nga surugoon han Dios, nagsisingba kan Jehova ngan ha Iya gud la. Hi Maria, upod han iba nga igkasi-magmarando ni Kristo ha langit, nagsisinggit ha pagpasamwak: “Ngadto ha nalingkod ha lingkuranan nga hadianon [Jehova nga Dios], ngan ngadto ha Kordero [Jesu-Kristo], magin ira an bendisyon, ngan kadungganan, ngan kahimayaan, ngan kagamhanan, ha mga katuigan ha mga katuigan.”—Pahayag 5:13; 19:10.

[Footnote]

[Blurb ha pahina 10]

An pagkamapainubsanon, pagtoo, ngan pagkamasinugtanon ni Maria angay subaron