Dios La An Makakaluwas han Tuna

“NAGRARANGGAT NGA ASUL NGAN BUSAG NGA HIYAS.” Ito an paghulagway ha tuna han astronut nga hi Edgar Mitchell samtang ginkikinita niya ito ha butnga han madulom nga kawanangan.

Daku nga pangalimbasog an ginbuhat han Dios ha paghimo han tuna nga urukyan han tawo. An paglarang hito nakaaghat ha mga anghel ha pagguliat “ha kalipay.” (Job 38:7) Katapos pag-adman an pagkaurusahon hini nga planeta, kita liwat may hinungdan ha paglipay. Pananglitan, may-ada damu nga komplikado nga ekosistema ha tuna nga nagpapahinabo nga magpadayon an kinabuhi. Ha usa han komon nga ekosistema, ginagamit han tanom an sirak, carbon dioxide tikang ha hangin, ngan tubig ha paghimo hin pagkaon. Usa nga produkto hini nga proseso an pagkaada oksihina ha atmospera nga importante hinduro ha aton pag-eksister.

Iginpapakita han Biblia nga igintapod han Dios ha tawo an pag-ataman ha tuna. (Genesis 1:28; 2:15) Kondi, basi magpabilin nga balanse an ekolohiya han tuna, kinahanglan may husto nga disposisyon an tawo. Ha pagkamatuod, kinahanglan niya higugmaon an iya urukyan nga tuna ngan maruyag nga tipigan ito ha maopay nga paagi. Pero, tungod kay gintagan hiya hin kagawasan ha pagbuot, may posibilidad nga abusuhon niya an tuna ngan sayop nga gamiton ito. Ngan ito gud an iya ginbuhat. Nakakadaot an mga resulta han iya kawaray pagtagad ngan kahakog.

Ini an pipira han problema: (1) An pagkalbo han kagurangan nakakaapekto ha kapasidad han tuna ha pagkuha han carbon dioxide ha palibot, tungod hito nagigin diri-normal an pagburobag-o han panahon. (2) An sobra nga paggamit hin pesticide hinungdan han pagkamatay han mga insekto nga may importante nga bahin ha ekolohiya, usa hito an pagpasarang han binhi han mga tanom. (3) An sobra nga pangisda ngan polusyon ha dagat ngan salog nag-uubos han mga isda. (4) An hakugnon nga paggamit han natural nga bahandi han tuna, hinungdan nga maubosan hito an tidaraon nga henerasyon ngan nagpapadagmit han pagpaso han globo. An pipira nga nagpapanalipod han palibot nasiring nga an katunaw han dagku nga yelo ha kabukiran ngan an pagbulag han dagku nga yelo tikang ha gindudugtongan hito ha kadagatan ha Arctic ngan Antartika ebidensya han pagpaso han globo.

Tungod han pagdamu han natural nga kalamidad, bangin sumiring an iba nga nabulos an tuna, salit nagriresulta hin mga kakurian ha tawo. Waray bayad nga ginpapaukoy kita han Dios dinhi ha tuna. (Genesis 1:26-29) Kondi, ipinapakita han mga panhitabo ha kalibotan nga damu an waray hingyap ha pagmintinar han maopay nga urukyan nga tuna. Lugod, okupado la hira ha personal nga mga hingyap ngan buruhaton. Ha pagkatinuod, napamatud-an nga an tawo maraot nga umurukoy—“naghihibang han tuna,” sugad han igintagna ha Pahayag 11:18.

Iginpapakita han tagna ha Biblia nga an Makagarahum-ha-ngatanan nga Dios, hi Jehova—an Maglalarang han mga ekosistema nga nagpapahinabo nga magpadayon an kinabuhi—nagsiring nga inabot na an panahon ha “pagpaiwas” han magraot nga umurukoy. (Sepania 1:14; Pahayag 19:11-15) Antes madaot gud han tawo an tuna, an Dios madagmit nga magios kay han aton ginlalaoman. a (Mateo 24:44) Oo, Hiya la an makakaluwas han tuna.

[Footnote]