Kon Ano an Igintututdo ha Aton han Ehemplo ni Maria

Nabug-atan ka na ba tungod hin diri linalaoman nga problema o responsabilidad? Nakakapoy ka na ba pagpinangalimbasog ha pagpaigo han imo gutiay nga kita basi mataparan an adlaw-adlaw nga kagarastohan? Bangin usa ka han minilyon nga nagugupong ngan nahahadlok tungod kay kinahanglan nira pumalagiw ha ira natawhan nga lugar. Ngan hin-o ha aton an waray masakiti ngan masubo hinduro han mamatay an aton hinigugma?

MAARAM ka ba nga hi Maria nga iroy ni Jesus nakaeksperyensya hito ngatanan? Ngan diri la kay naeksperyensyahan niya ito, kondi iya ito nalamposan! Ano an aton mahibabaroan tikang ha iya ehemplo?

Hi Maria sigurado nga kilala ha bug-os nga kalibotan. Ngan diri ito urusahon tungod kay nagkaada hiya waray kapariho nga bahin ha katumanan han katuyoan han Dios. Dugang pa, minilyon an nagtatahod ha iya. Pananglitan, gintatahod hiya han Iglesia Katolika sugad nga hinigugma nga Iroy ngan susbaranan ha pagtoo, paglaom, ngan kalooy. Damu an gintutdoan nga hi Maria an nagtutugway ha mga tawo ngadto ha Dios.

Kumusta ka man? Ano an imo opinyon mahitungod ha iroy ni Jesus? Ngan labaw ha ngatanan, paonan-o hiya gintatagad han Dios?

Waray Kapariho nga Toka

Hi Maria nga anak ni Heli tikang ha tribo ni Juda ha Israel. Siyahan nga gin-unabi hiya han Biblia may kalabotan ha usa nga makatirigamnan nga hitabo. Usa nga anghel an binisita ha iya ngan nagsiring: “Maghimaya ka, pinalabi ka kaopay! An Ginoo upod ha imo.” Ha siyahan, nagupong hi Maria ngan “nagpainoino kon ano daw la ini nga pangumusta.” Salit ginsumatan hiya han anghel nga ginpili hiya para ha urusahon kondi seryoso hinduro nga toka ha pagpanamkon, pagburod, ngan pagpadaku han Anak han Dios.—Lukas 1:26-33.

Daku gud nga responsabilidad an igintapod kan Maria nga hito nga panahon, batan-on ngan waray pa asawa! Ano an iya reaksyon? Bangin naghunahuna hi Maria kon may-ada ba matoo ha iya istorya. Posible ba mawara an gugma ni Jose, an iya maarasawa, o maalohan hiya tungod han iya pagburod? (Deuteronomio 22:20-24) Bisan pa hito, waray hiya mag-alang pagkarawat hinin seryoso nga toka.

Tungod han marig-on nga pagtoo ni Maria nagpasakop hiya ha kaburut-on ni Jehova, an iya Dios. Kombinsido hiya nga diri hiya pababay-an ni Jehova. Salit hiya nagsiring: “Iini ako an surugoon han Ginoo: buhaton ha akon sugad han imo pulong.” Determinado hiya ha pag-atubang ha magkuri nga sitwasyon tungod kay maaram hiya nga pinaagi hini nga toka iya mapapasidunggan an Dios ha espesyal nga paagi.—Lukas 1:38.

Han ginsumatan ni Maria hi Jose nga burod hiya, nagdesisyon hi Jose pakigbulag.  Sigurado nga nagin problemado hira hito nga takna. An Biblia waray magsumat kon mationan-o kaiha ito. Kondi, sigurado nga sugad hin nagabotan hira hin tunok han kaistoryahon hi Jose hin anghel ni Jehova. Iginpatin-aw hito an milagroso nga pagburod ni Maria ngan ginsugo hi Jose nga dad-on hi Maria ha iya balay sugad nga asawa.—Mateo 1:19-24.

Makuri nga mga Panahon

Yana, damu nga burod an nagasto hin mga bulan ha pagpangandam ha katawo han ira anak, ngan bangin ito liwat an ginbuhat ni Maria. Ini an iya magigin suhag. Kondi, nagin komplikado an iya mga plano tungod han diri linalaoman nga panhitabo. Nagsugo hi Cesar Augusto hin pagsensus nga nag-obligar ha ngatanan ha pagparehistro ha ira natawhan nga bungto. Salit igin-upod ni Jose hi Maria—nga hito nga takna siyam ka bulan nga burod—ha pagbiyahe hin mga 150 ka kilometro ngan posible nga asno an ginsakyan! Matawo an Betlehem, ngan nakinahanglan hi Maria hin pribado nga lugar diin hiya mag-aanak, kondi an puydi la amo an usa nga pasungan. Sigurado nga makuri para ha iya an manganak didto. Posible gud nga naawod ngan nahadlok hiya.

Hinin makuri nga sitwasyon, sigurado nga iginpahayag ni Maria kan Jehova an iya kabaraka nga nasarig nga hiya ngan an iya anak diri Niya pababay-an. Katapos inabot an pipira nga magbarantay hin karnero nga karuyag kumita han minasus-an. Nagsiring hira nga gintawag han mga anghel ini nga bata nga “Manluluwas, nga amo hi Kristo, nga Ginoo.” Katapos aton mababasa: “Hi Maria nagtipig hini ngatanan nga mga bagay, ngan ginpainoino niya ha iya kasingkasing.” Ginpamalandong niya ini nga mga pulong ngan naparig-on hito.—Lukas 2:11, 16-19.

Kumusta man kita? Posible mag-antos liwat kita. Dugang pa, nasiring an Biblia nga “an panahon ngan an [diri linalaoman nga] higayon” mahimo mahitabo ha aton, salit naieksperyensyahan  naton an mga kakurian ngan problema. (Eklesiastes 9:11) Kon nahitatabo ito, nasisina ba kita, ngan ginbabasol an Dios? Diri ba mas maopay subaron an disposisyon ni Maria ngan magin mas duok kan Jehova pinaagi ha pag-aram han iya Pulong, an Biblia, ngan pagpamalandong han aton gin-adman? Kon bubuhaton naton ito, sigurado nga mabubuligan kita nga mailob an kakurian.

Pobre Ngan Usa nga Pinalagiw

Nakaeksperyensya liwat hi Maria hin iba pa nga kakurian—an kapobrehan ngan an panginahanglan ha pagpalagiw ha iya natawhan nga lugar. May-ada ka ba pariho nga problema? Sumala ha usa nga report, “katunga han populasyon ha kalibotan—haros tulo ka bilyon—an nag-iigo ha pagkinabuhi ha diri maabot hin duha ka dolyar kada adlaw,” ngan minilyon pa an nangangalimbasog ha pagpaigo han ira gutiay nga kita basi mataparan an adlaw-adlaw nga kagarastohan bisan kon nag-uukoy hira ha gintatawag nga riko nga mga nasud. Kumusta ka man? Nakakapoy ka ba o usahay nabubug-atan pa ngani tungod han adlaw-adlaw nga pagpinangalimbasog basi makagtagana ha imo pamilya hin pagkaon, bado, ngan urukyan?

Ipinapakita han Biblia nga pobre hira Jose ngan Maria. Kay ano nga masisiring naton ito? An pipira nga impormasyon han Ebanghelyo—Mateo, Markos, Lukas, ngan Juan—nagsusumat nga paglabay hin 40 ka adlaw tikang han manganak hi Maria, kinadto hira ni Jose ha templo basi maghimo han ginkikinahanglan nga halad—“usa ka padis nga tukmo, o usa ka padis nga sarapati.” a (Lukas 2:22-24) Ini nga halad igintugot la ha mga pobre hinduro nga diri makakaakos paghalad hin nati nga karnero. Salit, posible gud nga pobre hira Jose ngan Maria. Bisan pa hito, naglampos hira ha pagkaada pamilya nga naghihigugmaay ha usa kag usa. Sigurado nga prayoridad nira an pagsingba ha Dios.—Deuteronomio 6:6, 7.

Waray pag-iha han ipanganak hi Jesus, an kinabuhi ni Maria bug-os nga nabag-o utro. Usa nga anghel an nagsiring kan Jose nga dad-on an iya pamilya ngan pumalagiw ngadto ha Ehipto. (Mateo 2:13-15) Ini an ikaduha nga higayon nga kinahanglan bumaya hi Maria ha iya nahiaraan nga lugar, kondi hini nga takna kinahanglan niya kumadto ha iba nga nasud. An Ehipto may-ada daku nga komunidad han mga Judio, salit posible nga nakaupod nira Maria ngan Jose an ira igkasi-Judio. Bisan pa hito, an pagkinabuhi ha iba nga nasud makuri ngan nakakawurok. Ikaw ba ngan an imo pamilya upod han minilyon nga pinalagiw ha natawhan nga nasud, bangin para ha kaopayan han mga anak o basi makapalagiw ha peligro? Kon ito an imo sitwasyon, hisasabtan mo gud an kakurian nga inatubang ni Maria ha Ehipto.

Debotado nga Asawa Ngan Iroy

Gawas han mga asoy han katawo ni Jesus ngan han bata pa hiya, pipira la ka beses nga gin-unabi hi Maria ha Ebanghelyo. Bisan pa hito, maaram kita nga may-ada hira ni Jose diri maminos unom pa nga anak. Bangin nahipausa ka hini. Kondi, tagda an ginsisiring han Ebanghelyo.

Daku gud an pagtahod ni Jose ha pribilehiyo ni Maria ha pagpanamkon han Anak han Dios. Tungod hito, waray hiya makighilawas kan Maria antes matawo hi Jesus. An Mateo 1:25 nasiring nga hi Jose “waray makighilawas kan Maria tubtob nga nag-anak [hiya].” (Maopay nga Sumat) An pulong nga “tubtob” dinhi nagpapakita nga katapos ipanganak hi Jesus, hira Jose ngan Maria nagkaada seksuwal nga relasyon nga normal ha mag-asawa. An mga asoy han Ebanghelyo nasiring nga sugad nga resulta, hi Maria nagkaada iba nga anak kan Jose. Hira Jakobo, Jose, Simon ngan Judas, mga kabugtoan ha iroy ni  Jesus. Ngan may-ada pa hi Maria diri maminos duha nga anak nga babaye. (Mateo 13:55, 56) Kondi, ini hira iginpanamkon ha normal nga paagi. b

Ginpabilhan gud ni Maria an iya relasyon ha Dios. Bisan kon an Balaud waray mag-obligar ha kababayin-an ha pagtambong ha selebrasyon han Paskua kada tuig, nabatasan na niya an pag-upod kan Jose ha Jerusalem para hito nga pyesta. (Lukas 2:41) Nag-uupod ito hin balikan nga pagbiyahe hin haros 300 kilometro kada tuig—upod an nagtitikadaku nga pamilya! Kondi, sigurado nga makalilipay ini nga panahon para han pamilya.

Damu nga kababayin-an yana an nagsusubad han maopay nga ehemplo ni Maria. Nangangalimbasog ngan nagsasakripisyo hira ha pagtuman han ira Kasuratanhon nga obligasyon. Agsob gud magpakita inin debotado nga mga asawa hin daku nga pagpailob, pag-antos, ngan pagpaubos! An pagpamalandong ha disposisyon ni Maria nabulig ha ira ha pag-una han ira relasyon ha Dios kay han ira hingyap para ha kahimyang ngan kalipay. Maaram hira, sugad han sigurado nga ginbuhat ni Maria, nga an pagsingba ha Dios kaupod han ira bana ngan mga anak nagpaparig-on ngan nag-uusa han pamilya.

Makausa, han tipauli na hira Maria ngan Jose tikang ha pyesta ha Jerusalem—posible upod an pipira nga kabugtoan ni Jesus—nakapanginano hira nga diri na ngay-an nira upod an 12 anyos nga hi Jesus. Mahahanduraw mo ba an kalisang ni Maria durante han tulo ka adlaw nga pagpinamiling ha iya anak? Han hibilngan nira hi Jesus ha templo, hi Jesus nagsiring: “Diri ba kamo maaram nga kinahanglan hahani ako ha balay  han akon Amay?” (Maopay nga Sumat) Ha ikaduha ka beses, an asoy nagsiring nga hi Maria “nagtipig hini nga mga bagay ha iya kasingkasing.” Dugang ini nga pamatuod nga ginpabilhan gud niya an panhunahuna han Dios ngan ginpamalandong an ngatanan nga nahitabo kan Jesus. Paglabay hin katuigan, posible nga iya iginsumat ha mga parasurat han Ebanghelyo an matin-aw nga mga panhitabo nga iya nahinumdoman may kalabotan hini ngan han iba pa nga sitwasyon ha kinabuhi ni Jesus.—Lukas 2:41-52.

Pag-ilob ha Pag-antos Ngan Kamatyi

Kumusta man hi Jose nga pinakaamay ni Jesus? Katapos unabihon hin madaliay ha usa nga hitabo han batan-on pa hi Jesus, waray na hi Jose unabiha ha rekord han Ebanghelyo. Ginhuhunahuna ini han pipira sugad nga ebidensya nga namatay hiya antes magtikang an ministeryo ni Jesus. c Anoman an posible nahitabo, baga hin balo na hi Maria ha pag-ikatarapos han ministeryo ni Jesus. Tungod kay han tikamatay na hi Jesus, iya iginbilin an iya iroy kan apostol Juan. (Juan 19:26, 27) Posible nga diri ini bubuhaton ni Jesus kon buhi pa hi Jose.

Damu gud an naeksperyensyahan nira Maria ngan Jose samtang hira magkaupod! Naeksperyensyahan nira an pagbisitaha hin mga anghel, pagpalagiw ha mapintas nga magmarando, pagbarobalhin hin urukyan, ngan pag-ataman hin daku nga pamilya. Damu nga gab-i nga nalingkod hira ngan nag-iistorya mahitungod kan Jesus, naghuhunahuna kon ano an iya maieksperyensyahan ha tidaraon, ngan nababaraka kon ira ba ginbabansay ngan gin-aandam hiya ha husto nga paagi. Katapos, tigda la nga nag-usahan hi Maria.

Namatay na ba an imo padis? Inaabat mo pa ba an kasakit ngan kasubo tungod han iya kamatay, bisan kon damu ka tuig na an naglabay? Sigurado nga naliaw hi Maria tungod han iya pagtoo ngan kahibaro nga may-ada pagkabanhaw. d (Juan 5:28, 29) Bisan pa hito, waray ini makagwara han iya mga problema. Pariho han damu nga nagsusolo nga iroy yana,  naeksperyensyahan niya an kakurian ha pag-ataman han iya mga anak nga waray bulig hin bana.

Makatadunganon an paghunahuna nga hi Jesus an nanguna ha pagtagana han materyal nga panginahanglan han ira pamilya han mamatay hi Jose. Kondi, samtang nagtutubo an iya kabugtoan nga kalalakin-an, mabubuhat na nira an ira responsabilidad ha pamilya. Han ‘may katloan ka tuig an edad’ ni Jesus, binaya hiya ha ira balay ngan nagtikang pagministeryo. (Lukas 3:23) Kadam-an han kag-anak nalilipay ngan ha pariho nga panahon nasusubo kon nabaya an daku na nga anak ha balay. Daku gud nga panahon, kusog, ngan emosyon an iginhahatag ha mga anak salit nasusubo hinduro an mga kag-anak kon nabaya ito. May-ada ka ba mga anak nga binaya basi kab-uton an ira tumong? Nalilipay ka ba para ha ira, kondi ha pariho nga panahon, naghihingyap nga kaupod mo unta hira? Salit, mahahanduraw mo an inabat ni Maria han bumaya hi Jesus ha ira.

Diri Linalaoman nga mga Problema

Usa han problema nga inatubang ni Maria an bangin waray gud niya laomi. Samtang nagsasangyaw hi Jesus, damu an sinunod ha iya gawas han iya kabugtoan. Ha pagkamatuod siring han Biblia, “an iya mga kabugtoan waray totoo ha iya.” (Juan 7:5) Sigurado nga ginsumatan ni Maria an kabugtoan ni Jesus han ginsiring han anghel ha iya—nga hi Jesus “Anak han Dios.” (Lukas 1:35) Kondi, para kanda Jakobo, Jose, Simon, ngan Judas, hi Jesus ira la magurang. Salit, naeksperyensyahan ni Maria an pagkinabuhi ha pamilya nga magkaiba-iba an relihiyoso nga opinyon.

Nanluya ba hi Maria ngan inundang ha pangalimbasog nga bag-ohon an disposisyon han iya mga anak? Waray gud! Ha usa nga okasyon samtang hi Jesus nagsasangyaw ha Galilea, sinulod hiya hin balay basi kumaon, ngan may nagtirok didto basi manmati ha iya. Maaram ka ba kon hin-o an nakadto ha gawas nga namimiling ha iya? Hi Maria ngan an iya kabugtoan. Salit makikita naton nga kon hi Jesus aada la ha hirani han ira balay, ginsusundan hiya ni Maria ngan matin-aw nga gin-uupod an iya iba nga anak, bangin naglalaom nga magbag-o an ira panhunahuna mahitungod kan Jesus.—Mateo 12:46, 47.

Bangin naatubang ka hin pariho nga problema ha pangalimbasog ha pagsunod kan Jesus samtang an imo iba nga kapamilya nadiri ha pagbuhat hito. Ayaw panluya ngan ayaw undang! Pariho kan Maria, damu an mapailubon nga nag-aghat ha ira kapamilya ha sulod hin mga katuigan antes nira makita an daku nga pagbag-o. An sugad nga pagpailob birilhon ha Dios, makita man ito han iba o diri.—1 Pedro 3:1, 2.

 An Pinakamakuri nga Pagsari

An ultimo nga pagsari ni Maria, sugad han nakarekord ha Biblia, sigurado nga amo an pinakamakuri. Iya nakita an masakit nga kamatayon han iya hinigugma nga anak katapos ito isalikway han iya katawohan. An kamatayon han anak ginsisiring nga amo an “an pinakamasakit nga kawad-i,” “an diri-matupngan nga kasakit han kamatyi,” gutiay pa man ito o adulto na. Sugad la han igintagna mga dekada antes pa, inabat ni Maria nga sugad hin ginbuno hiya hin espada!—Lukas 2:34, 35.

Gintugotan ba ni Maria inin ultimo nga pagsari nga magpaluya ha iya emosyon o ha iya pagtoo kan Jehova? Waray. Han sunod nga gin-unabi hiya ha Biblia, kaupod hiya han mga disipulo ni Jesus nga nagpapadayon ha ‘pag-ampo.’ Ngan diri hiya nag-uusahan. Upod niya an iya iba nga anak nga hito nga takna sigurado nga may pagtoo na ha ira magurang. Sigurado nga naliaw gud hito hi Maria! e—Buhat 1:14.

Makalilipay ngan makapatagbaw gud an kinabuhi ni Maria sugad nga babaye, asawa, ngan iroy. Damu an iya makapatagbaw nga eksperyensya ha pag-alagad kan Jehova. Nalamposan niya an damu nga problema ngan pagsari. Salit, kon nakakaeksperyensya kita hin diri linalaoman nga mga problema o kon nababaraka tungod hin mga problema ha pamilya, sigurado nga may mahibabaroan kita tikang ha iya pagkamatinumanon ngan pagkamapailubon.—Hebreo 10:36.

Kondi, angayan ba an paghatag hin espesyal nga relihiyoso nga debosyon kan Maria? An asoy ba han Biblia mahitungod han iya waray kapariho nga bahin hinungdan nga singbahon hiya?

[Mga footnote]

[Kahon/Retrato ha pahina 6]

 May-ada ba Kabugtoan nga Kalalakin-an Ngan Kababayin-an hi Jesus?

Oo, may-ada. Kondi, bisan kon iginpapatin-aw ini hin damu ka beses han mga Ebanghelyo, nangangalimbasog an iba nga teologo nga pamatud-an nga buwa ini. (Mateo 12:46, 47; 13:54-56; Markos 6:3) Pero, an mga eskolar han Biblia naghisgot hin duha nga hinungdan mahitungod han mga teoriya nga waray iba nga anak hi Maria. Siyahan, may motibo ito nga mga teoriya—basi suportahan an doktrina nga binangon ha urhi, an katutdoan nga hi Maria nagpabilin nga birhen ha iya bug-os nga kinabuhi. Ikaduha, an mga teoriya mismo diri makakombinse ngan diri napapamatud-an nga husto.

Pananglitan, usa hini nga teoriya an nasiring nga an “kabugtoan nga kalalakin-an” ni Jesus iya mga hirupo—mga anak ni Jose ha una nga asawa. Waray basihan ini nga ideya tungod kay ha pagkamatuod, ginwawara hito an legal nga katungod ni Jesus sugad nga suhag nga makakapanunod han pagkahadi ni David.—2 Samuel 7:12, 13.

Usa pa nga teoriya an nasiring nga ini nga kabugtoan, ha pagkamatuod kapatoran ni Jesus, bisan kon an Griego nga Kasuratan nagamit hin magkaiba-iba nga pulong para ha “bugto nga lalaki,” “patod,” ngan “paryente.” Tungod hito, nagsiring an eskolar nga hi Frank E. Gaebelein nga ini nga mga teoriya imposible hinduro. Hiya nagtapos: “An pinakanatural nga paagi ha pagsabot ha ‘kabugtoan nga kalalakin-an’ . . . amo nga ini nga mga pulong nagtutudlok ha anak nga kalalakin-an nira Maria ngan Jose, karuyag sidngon, ha kabugtoan ha iroy ni Jesus.”

[Kahon ha pahina 7]

 May-ada Hiya Kaisog ha Pagbag-o

Hi Maria tikang ha Judio nga pamilya, ngan kaapi hiya ha relihiyon han mga Judio. Natambong hiya ha sinagoga, an tawag ha lugar han pagsingba han mga Judio, ngan napakadto hiya ha templo ha Jerusalem. Kondi, samtang nag-uuswag an kahibaro ni Maria ha katuyoan han Dios, nasantop niya nga an mga gintotoohan han iya kaapoy-apoyan diri na inuuyonan han Dios. Iginpapatay han Judio nga mga lider han relihiyon an iya Anak, an Mesias. Antes ito mahitabo, hi Jesus nagsiring hini nga mga lider: “Kitaa, an iyo balay binabayaan ha iyo.” (Mateo 23:38) Ginkuha han Dios an iya bendisyon ha relihiyon nga gindak-an ni Maria.—Galasia 2:15, 16.

Han naestablisar an Kristiano nga kongregasyon, bangin hi Maria mga 50 anyos na o sobra pa. Ano an iya bubuhaton? Nangatadongan ba hiya nga natawo hiya ha relihiyon han mga Judio salit diri na niya mababayaan an gintotoohan han iya kaapoy-apoyan? Nagsiring ba hiya nga lagas na hiya basi magbag-o? Waray gud! Hinsabtan ni Maria nga an bendisyon han Dios hito nga panahon aada ha Kristiano nga kongregasyon, tungod hito may-ada hiya pagtoo ngan kaisog ha pagbag-o.

[Retrato ha pahina 5]

Pag-ayop ha Ehipto sugad nga mga pinalagiw

[Retrato ha pahina 8]

An pinakamasakit nga eksperyensya nga posible maeksperyensyahan han usa nga iroy