Magin Duok ha Dios

An Amay han Ilo nga mga Bata

Eksodo 22:22-24

“AN AMAY han waray mga amay . . . Amo an Dios ha iya baraan nga puroy-anan.” (Salmo 68:5) Inin giniyahan nga mga pulong nagtututdo hin makapabantad nga leksyon mahitungod kan Jehova nga Dios—karuyag niya itagana an panginahanglan han mga minos an kahimtang. An iya pagpaid ha kabataan nga namatyan hin kag-anak matin-aw nga nakita ha Balaud nga iya iginhatag ha Israel. Aton usisahon an siyahan nga pag-unabi han Biblia ha “ilo nga bata” nga mababasa ha Eksodo 22:22-24.

An Dios nagpapahamangno: “Diri niyo paghatagan hin kagol-anan an bisan hin-o nga . . . ilo nga bata.” (Bersikulo 22) Diri ini basta hangyo la nga buligan an nag-aantos nga kabataan tungod ha kamatyi hin kag-anak; sugo ini han Dios. An bata nga namatyan hin amay—an iya parapanalipod ngan paratagana—masayon abusuhon. Waray gud sadang ‘maghatag hin kagol-anan’ ha sugad nga bata ha bisan ano nga paagi. Ha iba nga hubad han Biblia, an mga pulong nga “paghatagan hin kagol-anan” ginhubad nga “pag-abuso,” “pagmaltrato,” ngan “pagsalingabot.” An pagbuhat hin maraot ha ilo nga bata seryoso para ha Dios. Mationan-o kaseryoso?

An Balaud nagpapadayon: “Kon iyo hira paghatagan hin kagol-anan, ngan magsinggit hira ngadi ha akon; pamamatian ko gud an ira singgit.” (Bersikulo 23) Ha orihinal nga Hebreo nga teksto, an pulong nga “niyo” ha bersikulo 22 ginliwanan hin “imo” ha bersikulo 23. Nagpapakita ini nga an mga indibiduwal ngan an nasud ha kabug-osan pariho responsable ha pagtuman hini nga Balaud. Nagkikita hi Jehova; namamati hiya ha ilo nga kabataan ngan disidido pagbaton ha ira pangaraba.—Salmo 10:14; Proberbios 23:10, 11.

Kon sugad, ano an mahitatabo kon an usa magbuhat hin maraot ha ilo nga tungod hito an bata ‘magsinggit’ ngadto ha Dios? “An akon kasina magpapaso,” siring ni Jehova, “ngan papatayon ko kamo hin kampilan.” (Bersikulo 24) Usa nga reperensya mahitungod ha Biblia an nasiring nga “literal ini ‘ngan an akon irong magpapaso,’ nga usa nga puplunganon para ha duro nga kasina.” Tigamni nga waray ihatag ni Jehova ha tawhanon nga mga hukom ha Israel an pagpatuman hini nga balaud. Hiya mismo an magsisirot ha bisan hin-o nga magsasalingabot ha waray mahihimo nga bata.—Deuteronomio 10:17, 18.

Hi Jehova waray magbag-o. (Malakias 3:6) Napaid hiya ha kabataan nga namatyan hin kag-anak o mga kag-anak. (Jakobo 1:27) Tigamni ini—an Amay han ilo nga kabataan makatadunganon nga nasisina kon gin-aabuso an inosente nga kabataan. An nag-aabuso ha waray mahihimo nga bata, diri makakalikay ha “mabangis nga kasina ni Jehova.” (Sepania 2:2) An sugad nga magraot nga tawo mahibabaro nga ‘makalilisang an kahulog ha mga kamot han buhi nga Dios.’—Hebreo 10:31.