MAY-ADA hadto panahon nga makangingirhat an kahimtang ha Jerusalem, an syudad nga hinmumutangan han templo han Dios. Ginpatay pa la an hadi hito nga hi Ahasia. Ngan diri ngani katoohan an ginbuhat ni Rayna Atalia, an nanay ni Ahasia. Iya iginpapatay an mga anak ni Ahasia, an iya kalugaringon nga mga apo! Maaram ka ba kon kay ano?— * Basi hiya an magin magmarando, imbes nga an usa ha ira.

Kondi, usa han apo ni Atalia, an minasus-an nga hi Jehoas, naluwas ngan diri ngani maaram hito an iya lola. Karuyag mo ba hibaroan kon kay ano nga naluwas hiya?— Aw, hi Jehoas may-ada dadâ nga hi Jehoseba nga nagtago ha iya ha templo han Dios. Mahimo niya buhaton ito tungod kay Hitaas nga Saserdote an iya bana, hi Jehoyada. Salit ira ginsiguro nga talwas hi Jehoas.

Ha sulod hin unom ka tuig, sekreto nga igintago hi Jehoas ha templo. Didto, gintutdoan hiya han ngatanan mahitungod kan Jehova nga Dios ngan han Iya mga balaud. Han syete anyos na hi Jehoas, gumios hi Jehoyada basi himoon hi Jehoas nga hadi. Karuyag mo ba hibaroan kon paonan-o niya ginhimo ini ngan kon ano an nahitabo ha maraot nga lola ni Jehoas?—

Aw, patago nga ginpatawag ni Jehoyada an espesyal nga mga gwardya hadto han mga hadi ha Jerusalem. Iya iginsumat ha ira kon paonan-o nira nga mag-asawa ginluwas an anak han hadi. Katapos iya iginpakita hi Jehoas ha mga gwardya, ngan nasantop nira nga hi Jehoas an may katungod maghadi. Salit nagplano hira han ira bubuhaton.

Igin-gawas ni Jehoyada hi Jehoas ngan ginkoronahan hiya. Ngan an mga tawo ‘namakpak ngan nagsiring: Mabuhi ha kadugayan an hadi.’ Ginpalibotan han mga gwardya hi Jehoas basi panalipdan. Han hibatian ni Atalia an pagrayhak, dinalagan hiya tipagawas ngan nagsinggit nga may nagtatraydor ha iya. Kondi, ha sugo ni Jehoyada, ginpatay hiya han mga gwardya.—2 Hadi 11:1-16.

Ha imo hunahuna, padayon ba nga namati hi Jehoas kan Jehoyada ngan nagbuhat han husto?— Oo, samtang buhi hi Jehoyada. Ginsiguro pa ngani ni Jehoas  nga maghatag hin kwarta an mga tawo basi maipaayad an templo han Dios nga napabay-an han iya tatay, hi Ahasia, ngan han iya lolo, hi Jehoram. Kondi aton usisahon an nahitabo han mamatay an Hitaas nga Saserdote.—2 Hadi 12:1-16.

Hito nga panahon, mga 40 anyos na hi Jehoas. Imbes magpadayon ha pakig-upod ha mga nag-aalagad kan Jehova, nakigsangkay hiya ha mga nagsisingba ha palso nga mga dios. Hi Sakarias nga anak ni Jehoyada, an saserdote ni Jehova hito nga panahon. Ha imo hunahuna, ano an ginbuhat ni Sakarias han hibaroan niya an magraot nga ginhihimo ni Jehoas?—

Hi Sakarias nagsiring kan Jehoas: “Tungod kay binmaya [ka] kan Jehova, hiya man binmaya ha [imo].” Nasina gud hi Jehoas hito nga mga pulong salit iya iginsugo nga batuhon hi Sakarias tubtob mamatay. Handurawa la—makausa ginluwas hi Jehoas ha pagpataya, kondi yana nagsusugo na mismo ha pagpatay kan Sakarias!—2 Kronikas 24:1-3, 15-22.

Nasasabtan mo ba an leksyon nga aton mahibabaroan tikang hini?— Aw, diri gud naton karuyag magin pariho kan Atalia nga mapungtanon ngan madarahog. Lugod, sadang naton higugmaon an aton igkasi-magsiringba ngan bisan an aton kaaway, sugad la han iginsusugo ni Jesus. (Mateo 5:44; Juan 13:34, 35) Ngan hinumdumi, kon nagtikang kita pagbuhat hin maopay, sugad han ginbuhat ni Jehoas, kinahanglan padayon kita nga makigsangkay ha mga nahigugma kan Jehova ngan nagdadasig ha aton nga mag-alagad ha Iya.