Pakiana han Magbarasa

Itinanda na ba nga Daan an Mahitatabo ha Aton?

An pipira nasiring nga itinanda na han kapalaran an adlaw han aton kamatayon. An iba nainsister nga an Dios mismo an nagbubuot kon san-o kita mamamatay. Dugang pa, an sugad nga mga tawo natoo nga an importante nga panhitabo ha kinabuhi diri malilikyan. Ito ba liwat an imo gintotoohan?

Mahimo mo pakianhan an imo kalugaringon: ‘Kon tinuod nga diri na naton mababag-o an aton kabubuwason, ngan kon itinanda na han Dios o han kapalaran an mahitatabo, ano an pulos han pag-ampo? Ngan kon an aton dadangatan itinanda na nga daan, kay ano nga mangalimbasog pa man ha paglikay ha peligro? Kay ano nga kinahanglan magsul-ot pa hin helmet kon nagmamaneho hin motorsiklo? Ngan kay ano nga sadang likyan pa an pagdrayb kon nakainom?’

Diri gud ginkukonsinter han Biblia an panggawi nga nagriresulta hin kawaray pagtagad ha katalwasan. Imbes sumiring nga an ngatanan itinanda na nga daan, ginsugo han Biblia an mga Israelita nga magin mahunahunaon ha katalwasan. Pananglitan, ginsugo hira nga maghimo hin barandilya ha palibot han patag nga atop han ira balay basi malikyan nga may aksidente nga mahulog tikang hito. Kay ano nga magsusugo pa an Dios hin sugad kon itinanda na nga daan nga an usa mahuhulog ngan mamamatay?—Deuteronomio 22:8.

Kumusta man adton namatay tungod hin kalamidad o trahedya nga diri malilikyan? Itinanda ba nga daan an “petsa han [ira] kamatayon”? Diri, an parasurat han Biblia nga hi Hadi Salomon nagsiring nga an “panahon ngan an [diri-linalaoman nga] higayon nahinanabo ha [aton] ngatanan.” (Eklesiastes 9:11) Salit bisan kon urusahon gud o diri-linalaoman an mga panhitabo, an trahedya diri itinanda nga daan.

Kondi, an iba naghuhunahuna nga nasumpaki ito ha ginsiring ni Salomon: “Ha tagsa nga butang may-ada usa ka panahon, ngan usa ka panahon para ha tagsa nga tinguha ha sirong han langit: May panahon ha pagkatawo, ngan may panahon ha pagkamatay.” (Eklesiastes 3:1, 2) Pero natoo gud ba hi Salomon nga an adlaw han kamatayon itinanda na nga daan? Aton usisahon hin maopay ito nga teksto.

Diri iginpapasabot ni Salomon nga an katawo ngan kamatay han mga tawo itinanda na nga daan. Lugod, an iya iginpapasabot, an katawo ngan kamatay, sugad man han damu nga eksperyensya ha kinabuhi, nahitatabo ha nagpapadayon nga sikolo. Oo, an usa magkakaada mag-opay ngan magraot nga eksperyensya. ‘May-ada panahon ha pagtangis, ngan may panahon ha pagtawa,’ siring ni Salomon. Ipinapakita niya nga an sugad nga pauroutro nga panhitabo ngan diri-linalaoman nga mga kalamidad ordinaryo la ha kinabuhi, ha “tagsa nga tinguha ha sirong han langit.” (Eklesiastes 3:1-8; 9:11, 12) Salit ha kataposan, nagsiring hiya nga diri kita sadang magin sagipo hinduro ha adlaw-adlaw nga buruhaton nga tungod hito mahingangalimtan naton an aton Maglalarang.—Eklesiastes 12:1, 13.

Bisan kon may awtoridad an aton Maglalarang ha kinabuhi ngan kamatayon, waray niya itanda nga daan an mahitatabo ha aton. Igintututdo han Biblia nga igintatanyag han Dios ha ngatanan an paglaom nga mabuhi ha waray kataposan. Kondi diri kita niya ginpipirit nga karawaton ito. Lugod, an iya Pulong nasiring: “An buot uminom, painma hiya han tubig han kinabuhi ha waray bayad.”—Pahayag 22:17.

Oo, kinahanglan maruyag kita ‘pag-inom han tubig han kinabuhi.’ Hito nga paagi, masisiring nga an aton tidaraon diri itinanda na nga daan han kapalaran. An aton mga desisyon, disposisyon, ngan mga buhat an may tinuod nga epekto ha aton tidaraon.