Pagin “Born Again”—Ano an Nahihimo Hito?

KAY ano nga gin-gamit ni Jesus an mga pulong nga ‘katawo [tikang] ha espiritu’ han naghisgot hiya mahitungod han bawtismo pinaagi han baraan nga espiritu? (Juan 3:5) Kon ginagamit ha simboliko nga paagi, an pulong nga “katawo” nangangahulogan hin “tinikangan.” Tungod hito, an mga pulong nga “bag-o nga katawo” nagpapasabot hin “bag-o nga tinikangan.” Salit, ginpapabug-atan han simboliko nga mga pulong nga “katawo” ngan “bag-o nga katawo” nga an Dios ngan an mga nabawtismohan ha baraan nga espiritu magkakaada bag-o nga relasyon. Paonan-o nahitatabo iton bug-os nga pagbag-o ha relasyon?

Basi isaysay kon paonan-o gin-aandam han Dios an tawo ha langitnon nga pagmando, ginamit ni apostol Pablo an ilustrasyon nga iginbasar ha sitwasyon han pamilya. Hiya nagsurat ha mga Kristiano ha iya panahon nga makakaeksperyensya hira ha “pagkainangkon nga mga anak” ngan tungod hito, mahimo hira tagdon han Dios ‘sugad nga mga anak.’ (Galasia 4:5; Hebreo 12:7) Basi masantop kon paonan-o an kahimtang han pag-ampon nabulig nga hisabtan an klase han pagbag-o kon an usa mabawtismohan ha baraan nga espiritu, tagda utro an ilustrasyon mahitungod han batan-on nga naruyag pag-eskwela ha eskwelahan nga esklusibo para ha nitibo.

Resulta han Pag-ampon

Ha ilustrasyon, waray makaeskwela an batan-on ha eskwelahan nga iya karuyag tungod kay diri hiya nitibo. Kondi, usa ka adlaw, nagkaada daku nga pagbag-o. Legal nga gin-ampon hiya hin amay hin nitibo nga pamilya. Ano an epekto hito ha iya? Aw, tungod kay gin-ampon hiya, posible nga may katungod na hiya pariho ha iba nga nitibo nga batan-on—upod na an katungod nga makaeskwela ha iya karuyag nga eskwelahan. Ito nga pag-ampon bug-os nga nakagbag-o han iya kahimtang.

Gin-iilustrar hini an mas makatirigamnan nga nahitatabo ha mga nakakaeksperyensya han pagin born again. Tagda an pipira nga kaparihoan. An batan-on ha ilustrasyon makakaenrol la ha eskwelahan kon makab-ot niya an kwalipikasyon—an pagin nitibo. Kondi, diri niya makakab-ot ito ha iya kalugaringon la. Ha pariho nga paagi, an pipira nga tawo mahimo la magin magmarando ha Ginhadian han Dios, o ha gobyerno ha langit, kon makab-ot nira an kwalipikasyon—an pagin “igin-anak utro” o pagin born again. Kondi, diri nira makakab-ot ito ha ira kalugaringon la tungod kay an pagin born again nadepende ha Dios.

 Ano an nakagbag-o ha kahimtang han batan-on? An legal nga proseso han pag-ampon. Syempre, waray mabag-o hito nga proseso an iya pagkatawo. Katapos hiya ampunon, amo la gihapon an iya pagkatawo. Bisan pa hito, katapos malegal an pag-ampon ha iya, nagbag-o an iya kahimtang. Ha pagkamatuod, baga hin nagtitikang pa la hiya, sugad hin bag-o pa la hiya nga natatawo. Nagin anak hiya han nag-ampon ha iya nga nakaghatag ha iya hin katungod ha pakaenrol ngan pagin bahin han pamilya hito.

Ha pariho nga paagi, ginbag-o ni Jehova an kahimtang han usa nga grupo han diri-hingpit nga mga tawo pinaagi ha pag-establisar hin legal nga proseso ha pag-ampon ha ira sugad nga mga anak. Hi apostol Pablo nga membro hito nga grupo, nagsurat ha iya mga igkasi-tumuroo: “Nakakarawat kamo han espiritu han pagkapinakaanak, nga tungod hini nangaraba kita: Abba, Amay. An espiritu ngahaw nagtitestigo upod ha aton espiritu, nga mga anak kita han Dios.” (Roma 8:15, 16) Pinaagi ha pag-ampon, ito nga mga Kristiano nagin bahin ha pamilya han Dios, o “mga anak han Dios.”—1 Juan 3:1; 2 Korinto 6:18.

Syempre an pag-ampon han Dios waray makagbag-o han pagkatawo han mga gin-ampon tungod kay hira diri-hingpit la gihapon. (1 Juan 1:8) Bisan pa hito, sugad han dugang nga iginsaysay ni Pablo, han nakab-ot na an legal nga mga kwalipikasyon para ha pag-ampon, nagbag-o an ira kahimtang. Ha pariho nga panahon, iginpasilsil han espiritu han Dios hito nga mga inampon an marig-on nga pagtoo ha pag-ukoy ha langit kaupod ni Kristo. (1 Juan 3:2) Tungod hito, nagkaada hira bag-o nga disposisyon. (2 Korinto 1:21, 22) Oo, nakaeksperyensya hira hin bag-o nga tinikangan—bag-o nga katawo.

Mahitungod han mga gin-ampon han Dios, an Biblia nasiring: “Magkakahihimo hira nga mga saserdote han Dios ngan ni Kristo, ngan maghahadi hira upod niya hin usa ka yukot ka tuig.” (Pahayag 20:6) Ipinapakita hini nga an mga gin-ampon han Dios magigin mga hadi ha Ginhadian han Dios o gobyerno ha langit. Hi apostol Pedro nagsiring ha iya igkasi-tumuroo nga makarawat hira han “panurundon nga diri madinunuton, ngan waray buring, ngan nga diri magkawawara, nga igin-aandam ha [ira] didto ha langit.” (1 Pedro 1:3, 4) Presyoso gud ito nga panurundon!

Kondi, ini nga paghadi nagbabangon hin pakiana. Kon ito nga mga nagin born again maghahadi ha langit, hin-o an ira paghahadian? Ito nga pakiana babatunon han sunod nga artikulo.

[Retrato ha pahina 10]

Ano an ginsiring ni Pablo mahitungod ha pag-ampon?