Pagin “Born Again”—Mationan-o Kaimportante?

DURANTE han bug-os nga pag-istorya nira Jesus ngan Nikodemo, ginpabug-atan ni Jesus an pagkaimportante han bag-o nga katawo, o pagin born again. Paonan-o niya ginpatin-aw ito?

Hi Jesus nagsiring: “Waray bisan hin-o nga diri ig-anak tikang ha igbaw nga sadang makakita han ginhadian han Dios.” (Juan 3:3) Ginpabug-atan han mga pulong nga “diri” ngan “waray” an pagkaimportante han bag-o nga katawo. Ha pag-ilustrar: Kon may sumiring, “Waray kapawa an kaadlawon kon diri sumirang an adlaw,” karuyag sidngon niya nga an pagsirang han adlaw importante gud ha pagkaada kapawa ha kaadlawon. Ha pariho nga paagi, hi Jesus nagsiring nga importante gud an pagin born again ha pakakita ha Ginhadian han Dios.

Ha kataposan, basi mawara an bisan ano nga pagruhaduha, hi Jesus nagsiring: “Kinahanglan nga ig-anak kamo tikang ha igbaw,” o magin born again. (Juan 3:7) Matin-aw nga sumala kan Jesus, an pagin born again usa nga obligasyon—ginkikinahanglan—basi an usa “makasulod ha ginhadian han Dios.”—Juan 3:5.

Tungod kay gintagad ni Jesus nga importante hinduro an bag-o nga katawo, sadang siguruhon han mga Kristiano nga husto an ira pagsabot hini. Pananglitan, ha imo hunahuna, an Kristiano ba an magbubuot kon karuyag niya magin born again?

[Blurb ha pahina 5]

“Waray kapawa an kaadlawon kon diri sumirang an adlaw”