Pagpuasa—Nagpapahinabo ba Ito nga Magin Mas Duok Ka ha Dios?

‘An pagpuasa nakakabulig ha imo ha pagpamalandong han imo relasyon ha Dios ngan nagpapahinumdom nga an materyal nga mga butang diri amo an pinakaimportante ha kinabuhi.’—KATOLIKO NGA BABAYE.

‘An pagpuasa nabulig ha imo nga magin duok ha Dios.’—JUDIO NGA RABI.

‘Ha amon relihiyon, an pagpuasa usa nga obligasyon, importante gud nga paagi ha pagpakita han akon debosyon ngan pagpasalamat ha Dios. Nagpupuasa ako tungod kay hinigugma ko an Dios.’—MEMBRO HAN BAHA’I NGA RELIHIYON.

AN PAGPUASA komon nga ginbubuhat han damu ha relihiyon, upod na ha Budhismo, Hinduismo, Islam, Jainismo, ngan Judaismo. Damu an natoo nga kon an usa diri kumaon ha sulod hin usa ka peryodo hin panahon, magigin duok hiya ha Dios.

Ano an imo opinyon mahitungod hito? Sadang ka ba magpuasa? Ano an ginsisiring han Pulong han Dios, an Biblia, mahitungod hito?

Pagpuasa ha Panahon han Biblia

Ha panahon han Biblia, an mga tawo nagpuasa ha magkadirudilain nga hinungdan nga inuyonan han Dios. Pananglitan, an iba nagpuasa basi magpahayag hin duro nga kasubo o pagbasol (1 Samuel 7:4-6), mangamuyo para ha pag-uyon o giya han Dios (Hukom 20:26-28; Lukas 2:36, 37), o basi magkaada mas maopay nga konsentrasyon samtang namamalandong.—Mateo 4:1, 2.

Kondi, an Biblia naghihisgot liwat hin mga pagpuasa nga waray uyuni han Dios. Pananglitan, hi Hadi Saul nagpuasa antes makipagkita hin espiritista. (Lebitiko 20:6; 1 Samuel 28:20) An magraot nga tawo pariho kan Jesebel ngan ha mga panatiko nga nag-iparatay kan apostol Pablo, nagproklama hin pagpuasa. (1 Hadi 21:7-12; Buhat 23:12-14) An mga Pariseo kilala ha ira regular nga pagpuasa. (Markos 2:18) Bisan pa hito, ginkondenar hira ni Jesus ngan waray nira mapalipay an Dios. (Mateo 6:16; Lukas 18:12) Ha pariho nga paagi, ginbalewaray ni Jehova an pagpuasa han pipira nga Israelita tungod han magraot nga buhat ngan sayop nga motibo.—Jeremias 14:12.

Ito nga mga ehemplo nagpapakita nga diri an pagpuasa mismo an nakakalipay ha Dios. Kondi,  damu nga sinsero nga surugoon han Dios nga nagpuasa an Iya nalipayan. Kon sugad, sadang ba magpuasa an mga Kristiano?

Obligado ba an mga Kristiano nga Magpuasa?

An Balaud nga ginhatag kan Moises nag-obligar ha mga Judio nga “pagbidoon . . . an [ira] mga kalag,” karuyag sidngon, sadang hira magpuasa makausa kada tuig durante han Adlaw han Pagbayad han mga Sala. (Lebitiko 16:29-31; Salmo 35:13) Ini la an pagpuasa nga iginsugo ni Jehova ha iya katawohan. a Ngan an mga Judio nga sakop hito nga Balaud posible gud nga nagtuman hito. Kondi, an mga Kristiano diri obligado ha pagtuman han Balaud nga ginhatag kan Moises.—Roma 10:4; Kolosas 2:14.

Bisan kon hi Jesus nagpuasa uyon ha sugo han Balaud, waray hiya magin kilala hini nga buhat. Iya gintutdoan an iya mga disipulo kon ano an ira mahimo buhaton kon karuyag nira magpuasa, pero waray gud niya sugoa hira nga magpuasa. (Mateo 6:16-18; 9:14) Kondi, kay ano nga nagsiring hiya nga magpupuasa an iya mga disipulo ha iya kamatay? (Mateo 9:15) Diri hiya nagsusugo. Iginpapasabot la han iya mga pulong nga ha iya kamatay an iya mga disipulo masusubo hinduro ngan mawawad-an hin gana pagkaon.

An duha nga asoy ha Biblia han siyahan nga mga Kristiano nga nagpuasa nagpapakita nga kon an tawo nga may maopay nga motibo magdesisyon pagpuasa, nalilipayan ito han Dios. (Buhat 13:2, 3; 14:23) b Kon sugad, an mga Kristiano diri obligado magpuasa. Kondi, an usa nga naruruyag pagbuhat hito sadang magbantay ha pipira nga peligro.

Pag-ikmat ha mga Peligro

Usa nga peligro nga sadang likyan ha pagpuasa amo an pagpakamatadong-ha-kalugaringon. An Biblia nagpapahamangno kontra ha “diri tinuod nga pagpaubos.” (Kolosas 2:20-23, Maopay nga Sumat) An ilustrasyon ni Jesus mahitungod han mapahitas-on nga Pariseo nga inabat nga mas matadong hiya kay ha iba tungod han iya regular nga pagpuasa, matin-aw nga nagpapakita nga diri inuuyonan han Dios an sugad nga disposisyon.—Lukas 18:9-14.

Sayop liwat an pagpinanumat nga nagpupuasa o magpupuasa ka tungod kay may nagsugo ha imo. Sumala ha Mateo 6:16-18, hi Jesus nagsiring nga an pagpuasa sadang magin pribado nga butang ha imo ngan ha Dios, ngan diri ito sadang ipasamwak.

Diri gud sadang hunahunaon nga an pagpuasa makakagwara han mga sala. Basi uyonan han Dios, an usa diri la sadang magpuasa, kondi sadang liwat magtuman han Iya Balaud. (Isaias 58:3-7) An sinsero nga pagbasol, diri an pagpuasa, an nagpapahinabo nga mapasaylo kita.  (Joel 2:12, 13) Ginpapabug-atan han Biblia nga nakakakarawat kita hin kapasayloan tungod han pagkabuotan ni Jehova nga ginpakita pinaagi han halad ni Kristo. Salit, imposible nga mapasaylo kita pinaagi hin bisan ano nga buhat, bisan han pagpuasa.—Roma 3:24, 27, 28; Galasia 2:16; Efeso 2:8, 9.

Gin-iilustrar han Isaias 58:3 an usa pa nga komon nga sayop. Naghunahuna an mga Israelita nga tungod han ira pagpuasa may obligasyon hi Jehova ha pagbendisyon ha ira, nga baga hin may-ada Hiya utang nga kaburut-on ha ira. Hira nagpakiana: “Tungod hin ano an aton pagpuasa, nasiring hira, ngan waray ka ba makakita? Tungod hin ano an aton pagsakit han aton kalag ngan waray ka ba mahibaro?” Yana, damu liwat an naghuhunahuna nga tungod han pagpuasa, bibendisyonan hira han Dios sugad nga balos. Hinaot diri gud naton subaron an sugad nga kawaray-pagtahod ngan diri-Kasuratanhon nga disposisyon!

An iba natoo nga posible makarawat an pag-uyon han Dios kon papasakitan an lawas pinaagi ha pagpuasa, paglatigo ha kalugaringon, o iba pa nga buhat nga pariho hito. Ginkukondenar han Biblia an sugad nga ideya. Ipinapakita hito nga an “pagsakit han lawas . . . waray kapulsanan” ha pag-ato ha sayop nga mga hingyap.—Kolosas 2:20-23.

Makatadunganon nga Panhunahuna

An pagpuasa diri igin-oobligar; diri man liwat ito sayop. Ha pipira nga kahimtang mapulsanon ito kon lilikyan an nahisgotan na nga mga peligro. Kondi, diri ito an sentro han pagsingba nga kinakarawat han Dios. Hi Jehova “malipayon nga Dios,” ngan karuyag niya magin malipayon an iya mga surugoon. (1 Timoteo 1:11, NW) An iya Pulong nasiring: ‘Waray maoroopay para ha ira, nga an tagsa nga tawo kumaon ngan uminom ngan magpahimulos han kaopayan han ngatanan niya nga buhat, [ito] an hiyas han Dios.’—Eklesiastes 3:12, 13.

An aton pagsingba sadang magin makalilipay, kondi waray gud mababasa ha Biblia nga an pagpuasa may koneksyon ha kalipay. Dugang pa, kon an pagpuasa magkakaada maraot nga epekto ha kahimsog o makakagwara han aton kusog ha pagbuhat han makalilipay nga buruhaton nga igintapod han Maglalarang ha tinuod nga mga Kristiano—an pagpasamwak han maopay nga sumat han Ginhadian—matin-aw nga mapupugngan kita hito ha aton buruhaton.

Magpuasa man kita o diri, diri naton sadang hukman an iba. Diri ini sadang magin isyu ha tinuod nga mga Kristiano, “kay an ginhadian han Dios diri an pangaon ngan panginom, kondi an katadongan ngan kamurayawan ngan kalipay tungod ha espiritu santo.”—Roma 14:17.

[Mga footnote]

[Blurb ha pahina 28]

An mga Pariseo nagpakita hin diri tinuod nga pagpaubos samtang nagpupuasa

[Blurb ha pahina 29]

“An ginhadian han Dios diri an pangaon ngan panginom, kondi an katadongan ngan kamurayawan ngan kalipay”

[Kahon ha pahina 29]

Kumusta Man an Kwaresma?

An 40-ka-adlaw nga pagpuasa durante han Kwaresma ginsisiring nga pagsaurog han 40-ka-adlaw nga pagpuasa ni Kristo. Kondi, waray gud sugoa ni Jesus an iya mga disipulo nga isaurog ito, waray man liwat ebidensya nga ginsaurog nira ito. An siyahan nga masasarigan nga pag-unabi han 40-ka-adlaw nga pagpuasa antes han Ester ginhuhunahuna nga mababasa ha mga surat ni Atanasius han tuig 330 K.P.

Tungod kay nagpuasa hi Jesus katapos han iya bawtismo, diri antes han iya kamatayon, an pagsaurog han mga relihiyon han Kwaresma pipira ka semana antes han Ester waray basihan. Kondi, an 40-ka-adlaw nga pagpuasa ha temprano nga bahin han tuig komon hadto ha Babilonya, Ehipto, ngan Gresya. Matin-aw nga ini nga kustomre nga ginsisiring nga kanan Kristiano nagtikang ha ira.