Kon Paonan-o Mo Mahisasabtan an Biblia

1. Pangaro ha Dios hin Bulig

“May panahon hadto nga nagbabasa ako han Biblia antes kumaturog,” siring ni Ninfa nga taga-Italya. “Ginbuhat ko ito tungod kay maaram ako nga an Biblia an Pulong han Dios, ngan bisan kon diri ako mahilig magbasa, karuyag ko hibaroan kon ano an iginsurat han Dios dida hito. Hingyap ko nga basahon an bug-os nga Biblia. Ha tinikangan baga hin masayon la ito, kondi pagtikaiha nakurian na ako pagsabot han akon binabasa salit inundang ako.”

NAEKSPERYENSYAHAN mo na ba an pariho? Damu na an nakaeksperyensya hito. Kondi, sugad han aton hinbaroan ha nauna nga artikulo, karuyag han Awtor han Biblia, hi Jehova nga Dios, nga hisabtan mo an iya Pulong. Pero, paonan-o mo hisasabtan an Biblia? An siyahan nga pitad amo an pangaro hin bulig ha Dios, an Awtor hito.

An mga apostol ni Jesus gintagad nga “waray hibabroan ngan waray sarabotan” tungod kay waray hira makaeskwela ha mga eskwelahan han mga rabi. (Buhat 4:13) Bisan pa hito, ginpasarig hira ni Jesus nga mahimo nira masabtan an Pulong han Dios. Ha ano nga paagi? Hi Jesus nagsiring: “An Maglilipay, an Espiritu Santo, nga pakakanhion han Amay ha akon ngaran, pagtututdoan kamo niya ha ngatanan nga mga bagay.” (Juan 14:26) Gin-gamit han Dios ini nga baraan nga espiritu, o aktibo nga pwersa, ha paglarang han tuna ngan han ngatanan nga kinabuhi dida hito. (Genesis 1:2) Iya liwat gin-gamit ini ha paggiya han mga 40  nga parasurat nga mairekord ha Biblia an iya panhunahuna. (2 Pedro 1:20, 21) Ito nga espiritu ginagamit liwat han Dios ha pagbulig ha mga naghihingyap nga masabtan an Biblia.

Paonan-o mo makakarawat an baraan nga espiritu han Dios? Kinahanglan may pagtoo ka nga mangangaro hito. Ha pagkamatuod, sadang ka magin mapinadayunon ha pagpangaro hito. “[Padayon ha] pangamuyo, ngan ihahatag ha iyo,” siring ni Jesus. “Kon . . . mahibabaro kamo paghatag hin mag-opay nga mga hatag ha iyo mga kabataan labi pa gud an iyo Amay nga langitnon, nga mahatag han Espiritu Santo ha mga nangangaro ha iya”. (Lukas 11:9, 13) Hi Jehova andam ha paghatag han iya baraan nga espiritu ha sinsero nga nangangaro hito. Iton aktibo nga pwersa makakabulig ha imo nga hisabtan an kahulogan han giniyahan nga mga pulong nga iginsurat ha Biblia yinukot ka tuig na an naglabay. Dugang pa, mabubuligan ka hito kon paonan-o maiaaplikar an gamhanan nga mensahe hito ha imo kinabuhi.—Hebreo 4:12; Jakobo 1:5, 6.

Salit ha kada panahon nga magbabasa ka han Biblia, pag-ampo ha Dios nga nangangaro han iya baraan nga espiritu nga buligan ka nga hisabtan an iya Pulong.