Kon Paonan-o Mo Mahisasabtan an Biblia

2. Basaha an Biblia nga May Abrido nga Hunahuna

May-ada ka ba sangkay nga nagsumat ha imo hin negatibo mahitungod hin usa nga waray mo pa igkita? Han nakilala mo na ito nga tawo, an ginsiring ba han imo sangkay nakaulang ha imo nga makita an iya mag-opay nga kalidad? Ha pariho nga paagi, mahimo liwat maapektohan an usa han ginsisiring han iba mahitungod ha Biblia.

NAGPAHAMANGNO hi apostol Pablo han mahimo mahitabo kon diri abrido an aton hunahuna samtang nagbabasa han Biblia. May kalabotan ha pipira nga Judio ha iya panahon, hiya nagsurat: “Ako nagtitestigo ha ira nga may hira ungod nga pagtalinguha tungod ha Dios, kondi diri sumala ha paghibaro.”—Roma 10:2.

An pipira han mga Judio ha siyahan nga siglo nadiri pagkarawat han kamatuoran nga matin-aw  nga iginpahayag ha Hebreo nga Kasuratan: an pangirilal-an han Mesias. Haom kan Jesus han Nasaret an ngatanan nga paghulagway han Kasuratan ha Mesias ngan hiya an nagtuman han ngatanan nga igintagna nga pagbubuhaton hito. Kondi, an diri-nababag-o ngan nahitanom na ha hunahuna nga mga opinyon nakapugong ha damu han iya kahimungto nga makasabot han Pulong han Dios.

Ano an aton mahibabaroan tikang hito nga panhitabo? Importante nga basahon an Biblia nga may abrido nga hunahuna. An nakatanom na nga negatibo nga opinyon mahimo makapugong ha magbarasa nga masabtan an kamatuoran ha Biblia.

Pananglitan, usa nga propesor han relihiyon ha North Carolina, E.U.A. an naghulagway han Biblia sugad nga “sinurat han tawo nga nagsusulod han opinyon han tawo, diin an damu hito nga opinyon nagkakasumpaki, ngan waray usa hito an nakakahatag hin masasarigan nga giya kon paonan-o magkinabuhi.” Kon tatagdon han usa an Biblia sugad nga “sinurat han tawo,” diri ba hiya maaaghat ha pagbalewaray han instruksyon o mga prinsipyo hito nga diri niya naruruyagan?

Ha kabaliktaran, gin-aaghat kita han Biblia nga maduruto nga adman ito. May kalabotan han mga taga-Berea ha panahon ni Pablo, an Biblia nasiring: “Hira nagkarawat han pulong hin bug-os nga kaabtik, ngan ha adlaw-adlaw ira gin-usisa an Santos nga Surat, kon ini nga mga bagay amo an kamatuoran.” (Buhat 17:11) Pariho ha ira, kinahanglan liwat naton kuhaon an negatibo nga mga opinyon nga bangin makaulang han aton pagsabot. Basaha an Pulong han Dios nga may abrido nga hunahuna, naghihingyap gud ha paghibaro han makaruruyag nga mensahe han Awtor hito.