Kon Paonan-o Mo Mahisasabtan an Biblia

3. Karawata an Bulig han Iba

Han an eksplorador nga hi Edward John Eyre nagbiyahe ngadto ha hirayo ngan makuri makadtoan nga Nullarbor Plain, gintutdoan hiya han mga nitibo didto kon paonan-o makakatirok hin tubig tikang ha mga bungdo hin baras ngan ha mga puno hin eucalyptus. An pagkarawat han bulig han mga tawo nga maaram han lugar nakasalbar han kinabuhi ni Eyre.

SUGAD han iginpapakita hini nga panhitabo, agsob nga ginkikinahanglan an bulig tikang ha mas eksperyensyado basi maglampos ha makuri nga buruhaton. Ha pariho nga paagi, kinahanglan mo hin bulig kon magbabasa ka han Biblia.

Diri naglalaom hi Jesus nga masasabtan han iya mga sumurunod an Biblia kon diri hira bubuligan han iba. Ha usa nga kahimtang, “iya binuka an ira mga hunahuna, basi hira mahibaro han Santos nga Surat.” (Lukas 24:45) Maaram hi Jesus nga an mga nagbabasa han Biblia nagkikinahanglan hin bulig basi masabtan an mga katutdoan hito.

Hin-o an Makakabulig?

Ginsugo ni Jesus an iya tinuod nga mga sumurunod ha pagtagana hini nga bulig. Antes hiya sumaka ha langit, hiya nagsiring: “Busa, lakat kamo, ngan manhimo kamo hin mga tinon-an ha ngatanan nga mga nasud. . . . Pagtutdui hira han pagbantay han ngatanan nga mga bagay,  nga akon iginsugo ha iyo.” (Mateo 28:19, 20) An nangunguna nga buruhaton han mga Kristiano amo an pagtutdo, nga nag-uupod ha pagsaysay kon paonan-o an mga prinsipyo ha Biblia maiaaplikar kada adlaw. Nabulig hira ha iba nga hisabtan an Biblia.

Waray pag-iha katapos ihatag ni Jesus ha iya mga sumurunod ito nga sugo, may makapainteres hinduro nga nahitabo. An Biblia nag-uunabi mahitungod hin opisyal nga taga-Etiopia nga nagbabasa hin bahin han tagna ni Isaias. May nabasa hiya nga waray niya hisabti. Sumala ha Biblia, ini an nakagupong ha iya nga mga bersikulo: “Hiya sugad han karnero gindara ha kamatayon; ngan sugad han nati nga karnero nga nangula ha atubangan han iya paraarot, amo in diri pagbuka han iya baba. Ha iya pagpaubos, kinuha ha iya an iya paghukom, ngan hin-o man an magsusumat han iya katulinan? Kay an iya kinabuhi kinuha ha tuna.”—Buhat 8:32, 33; Isaias 53:7, 8.

An opisyal nagpakiana kan Felipe, usa nga eksperyensyado nga Kristiano nga may hilarom nga kahibaro ha Kasuratan: “Kanay hitutungod nga iginyakan ini han manaragna? Nahitutungod ha iya ngahaw, o nahitutungod ha iba?” (Buhat 8:34) Inin sinsero nga taga-Etiopia tikang pa la magsingba ha Jerusalem, ngan posible nga nag-ampo hiya nga giyahan hiya. Matin-aw nga  nagbabasa hiya nga may mapainubsanon nga disposisyon ngan hingyap ha paghibaro. Kondi bisan pa hito, waray la gihapon niya hisasabti an iya ginbabasa. Mapainubsanon nga nangaro hiya kan Felipe hin bulig. Nalipay hinduro hiya han esplikasyon ni Felipe salit naaghat hiya nga magin Kristiano.—Buhat 8:35-39.

Padayon nga ginbubuhat han mga Saksi ni Jehova an buruhaton nga ginhimo ni Felipe ngan han iba pa nga Kristiano ha siyahan nga siglo. Ha sobra 235 nga nasud, boluntaryo nga binubuligan han mga Saksi an iba nga hisabtan kon ano gud an igintututdo han Biblia. Ginbubuhat nira ini pinaagi ha pag-aram han kada topiko nga ginhihisgotan ha Kasuratan. Ini nga paagi han pag-aram nag-uupod ha pag-analisar kon ano an ginsisiring han Biblia mahitungod hin espisipiko nga topiko o tema. a—Kitaa an kahon nga  “Pipira nga Pakiana nga Makapatagbaw nga Ginbabaton han Biblia.”

“Nabaton an Ngatanan Ko nga Pakiana”

Hira Steven, Valvanera, ngan Jo-Anne, nga ginkotar ha siyahan nga artikulo, nagtikang pag-aram han Biblia kaupod han mga Saksi ni Jehova. “Diri ako makatoo nga pinaagi la ha pagtanding hin pipira nga prinsipyo o asoy ha Kasuratan, mabibilngan na an kamatuoran,” siring ni Steven. “Han waray pa ako mag-aram han Biblia, waray usa nga nagtutdo ha akon kon paonan-o bubuhaton ito. Nakaginhawa gud ako han hibaroan ko nga an Biblia diri puno hin waray basihan nga mga paghisgot ngan hin nagkakasumpaki nga mga opinyon.”

Inuyon hito hi Valvanera. “An tanan nga akon hinbaroan nagkakauruyon gud ngan makatadunganon,” siring niya. “Tinuod an mga impormasyon, diri la tungod kay ito an siring ‘han Singbahan,’ kondi tungod kay may-ada ito makatadunganon nga esplikasyon.” Hi Jo-Anne siniring: “Tungod kay nabaton han Biblia an ngatanan ko nga pakiana, napuno ako hin hilarom nga pagtahod ha Dios, an Awtor hito, kay maaram hiya nga an mga tawo magkakaada damu nga nakakagupong nga pakiana ngan iya ginsiguro nga mairekord an makapatagbaw nga mga baton hito.”

May kilala ka ba nga Saksi ni Jehova? Kay ano nga diri hangyoon hiya nga ipakita ha imo kon paonan-o gindudumara ini nga pag-aram? Kon waray ka kilala nga Saksi ni Jehova, alayon pagsurat ha usa han mga adres ha pahina 4. Pinaagi han baraan nga espiritu han Dios, abrido nga hunahuna, ngan bulig tikang ha kwalipikado nga magturutdo han Biblia, an Pulong han Dios magigin masayon masabtan nga libro. Mahimo mo hisabtan an Biblia!

[Footnote]

[Kahon/Retrato ha pahina 8]

 Pipira nga Pakiana nga Makapatagbaw nga Ginbabaton han Biblia

Pipira han mga topiko nga ginhihisgotan han mga Saksi ni Jehova ha ira pag-aram han Biblia:

• Ano an katuyoan han Dios para ha tuna?

• Hain an mga patay?

• Nagkikinabuhi na ba kita ha “kataposan nga mga adlaw”?

• Kay ano nga tinutugotan han Dios an pag-antos?

• Ano an akon mahihimo basi magin malipayon an amon pamilya?

[Retrato ha pahina 7]

Basi hisabtan an Biblia, pag-ampo para han bulig han espiritu han Dios, pagbasa nga may abrido nga hunahuna, ngan karawata an bulig tikang ha iba