Magin Duok ha Dios

“Ako hi Jehova nga Iyo Dios Baraan”

Lebitiko Kapitulo 19

“BARAAN, baraan, baraan, an Ginoo nga Dios.” (Pahayag 4:8) Pinaagi hito nga mga pulong, ipinapakita han Biblia nga hi Jehova nga Dios baraan, karuyag sidngon nga putli ngan matadong hiya ha gihitaasi nga sukol. Waray gud hiya sala ngan diri mahuhugawan han sala ha bisan ano nga paagi. Iginpapasabot ba hito nga an diri hingpit nga tawo waray paglaom nga magkaada maopay nga relasyon ha gibabaraani nga Dios? Diri. Aton tagdon an mga pulong nga naghahatag hin paglaom nga nakarekord ha Lebitiko kapitulo 19.

Hi Jehova nagsiring kan Moises: “Pagyakni an bug-os nga katiringban han mga anak ni Israel.” An Iya sunod nga ginsiring naaplikar ha tagsa nga Israelita. Ano an isisiring ni Moises ha ira? An Dios nagpadayon: “Sidnga hira: Magpakabaraan kamo; kay ako hi Jehova nga iyo Dios baraan.” (Bersikulo 2) An tagsa nga Israelita sadang magpakita hin pagkabaraan. Diri ini suhestyon, kondi sugo. Nagsusugo ba an Dios hin diri mahihimo han tawo?

Tigamni nga gin-unabi ni Jehova an iya pagkabaraan, diri sugad nga suruklan nga kinahanglan abuton, kondi sugad nga hinungdan han sugo. Ha iba nga pagkayakan, waray niya sugoa an iya diri hingpit nga mga magsiringba ha Israel nga tupngan an iya pagkabaraan. Imposible nira mabuhat ito. Hi Jehova, an “Baraan nga Uusa,” labaw gud ha ngatanan ha pagin baraan. (Proberbios 30:3) Kondi, tungod kay hiya baraan, ginlalaoman niya an iya mga magsiringba nga magin baraan—tubtob ha mahihimo han diri hingpit nga tawo. Ha ano nga mga paagi maipapakita nira an pagin baraan?

Katapos ihatag an sugo nga magin baraan, ginsumaryo ni Jehova pinaagi kan Moises an mga ginkikinahanglan nga nakakaapekto ha ngatanan nga bahin han kinabuhi. Ginlalaoman nga susundon han tagsa nga Israelita an sugad hini nga mga suruklan ha paggawi: magin matinalahuron ha mga kag-anak ngan mga lagas (bersikulo 3, 32); magin makonsiderasyon ha mga bungol, buta, ngan tinalumpigos (bersikulo 9, 10, 14); magin tangkod ngan diri magpasulabi (bersikulo 11-13, 15, 35, 36); ngan higugmaon an igkasi-magsiringba sugad ha iya kalugaringon. (Bersikulo 18) Pinaagi ha pagsunod hini ngan han iba pa nga suruklan nga gin-unabi, mapapamatud-an han tagsa nga Israelita an iya ‘pagkabaraan ha [iya] Dios.’—Numeros 15:40.

An sugo may kalabotan ha pagin baraan nabulig ha aton nga hibaroan an panhunahuna ngan mga paagi ni Jehova. Hinbaroan naton nga basi magkaada duok nga relasyon ha iya, kinahanglan buhaton naton an gimaopayi ha pagkinabuhi uyon ha iya mga suruklan ha baraan nga paggawi. (1 Pedro 1:15, 16) Ha pagsunod hito, makakapahimulos kita han gimaopayi nga paagi han pagkinabuhi.—Isaias 48:17.

Ipinapakita liwat hito nga sugo an pagsarig ni Jehova ha iya mga magsiringba. Diri gud hiya naglalaom hin labaw kay ha aton mahihimo. (Salmo 103:13, 14) Maaram hiya nga an mga tawo nga ginlarang ha Iya dagway may-ada potensyal nga magin baraan, bisan tubtob la ha ira mahihimo sugad nga diri hingpit. (Genesis 1:26) Diri ka ba napapagios nga kumuha hin dugang nga kahibaro kon paonan-o magigin duok kan Jehova, an baraan nga Dios?

[Retrato ha pahina 9]

May-ada kita potensyal nga magin baraan