An Biblia Nakakagbag-o han Kinabuhi

Kay ano nga an usa nga nawad-an hin interes ha relihiyon nagamit na yana han kadak-an han iya panahon ha pagbulig ha iba nga mahibaro mahitungod ha Dios? Ano an nagpagios ha usa nga mahilig ha madarahog nga mga isport nga magin mamurayawon? Kay ano nga nagbag-o an usa nga adik, parahubog, ngan pirme nahidadabi ha away? Tagda an ira ginsiring.

PERSONAL NGA IMPORMASYON

NGARAN: PENELOPE TOPLICESCU

EDAD: 40

NATAWHAN NGA NASUD: AUSTRALIA

NAWAD-AN HIN INTERES HA RELIHIYON

AN AKON NAGLABAY: Natawo ako ha Sydney, Australia, kondi han dos anyos ako, an amon pamilya binalhin ha New Guinea. Nag-ukoy kami hin haros duha ka tuig ha Rabaul ngan walo ka tuig ha Bougainville. Hito nga panahon, waray TV ha New Guinea, salit nagdaku kami han akon manghod nga an hilangkagan paglinangoy-langoy, paglinurop-lurop, ngan pagkinamping.

Han mga dyes anyos ako, nagkainteres ako ha relihiyon. Salit ginsidngan ako ni Nanay, nga usa nga Katoliko, nga tumambong hin klase mahitungod ha Biblia nga gindudumara hin madre. Ginkarawat ko an Katolisismo ngan nagpabunyag han dyes anyos ako.

Kondi, han binalik kami ha Australia han tinedyer na ako, nagtikang ako magruhaduha han amon relihiyon. Ha hayskul, nag-aram ako mahitungod han kasaysayan ha kadaan nga panahon, ngan may mga takna nga nag-iistorya kami ni Tatay hin maiha mahitungod han gintikangan han relihiyon ngan han mga istorya ha Biblia nga para ha amon susmatanon la. Ha urhi, iginsalikway ko an Katolisismo.

Han 16 anyos ako, nagbulag an akon mga kag-anak. Nagin makuri ito para kan Nanay, ngan ha urhi binalhin ako kanda Tatay ngan han iya kalungon. An akon manghod nagpabilin kan Nanay, ngan binalhin hira ha iba nga bahin han Australia. Hito nga panahon, inabat ko nga nag-uusahan ako. Linabay anay an duha ka tuig antes nagin maopay utro an amon relasyon ni Nanay. Nagtikang ako mag-ininom, magginamit hin droga, ngan magkinadto ha mga parti. Han sobra 20 anyos ako, inundang ako pag-eskwela, nagtrabaho, ngan nagkinabuhi ha imoral nga paagi.

 Han 25 anyos ako, nahunahuna ko na liwat an Biblia. Nagkaada ako bag-o nga trabaho ngan nakilala ko an mahusay nga hi Liene. Matinalahuron hiya ha iya agaron bisan kon diri gud hiya gintatratar hin maopay. Han ginpakianhan ko hiya kon kay ano nga diri hiya nabulos, nagsiring hiya nga nag-aaram hiya han Biblia upod han mga Saksi ni Jehova ngan nangangalimbasog pag-aplikar han mga prinsipyo hito. Gintanyagan niya ako hin pag-aram ha Biblia. Tungod kay waray kami magkasinabot, kahuna ko nga an iya karuyag sidngon nga mahibabaroan ko an tanan niya nga hinbabaroan mahitungod ha Biblia ha usa la ka oras. Hito nga gab-i, tulo ka oras nga nagbinaton hiya han akon mga pakiana. Diri ako makatoo nga an ngatanan niya nga baton iya ginsuportahan hin mga teksto.

Nahinunumdoman ko pa nga katapos han amon pag-istorya, nagmaneho ako tipauli nga nasisina ha Dios tungod kay waray niya dayon ako pahibaroa han kamatuoran. Maaram ako nga an mga Saksi nagkikinabuhi nga limpyo ha moral, salit nahunahuna ko nga imposible na ako makagbag-o ngan diri gud liwat ako makakahimo pagsangyaw sugad han ira ginbubuhat. Nagpadayon ako pag-aram ha Biblia upod nira, kondi basi la mamiling hin sayop ha ira katutdoan para diri ako makonsensya ha pag-undang ha pag-aram. Pero usa ka adlaw, nasantop ko nga imposible ito.

KON PAONAN-O NABAG-O HAN BIBLIA AN AKON KINABUHI: Samtang nadudugangan an akon kahibaro ha mga suruklan han Biblia ha moral, mas nakukonsensya ako. Salit basi diri na makonsensya, inundang ako paggamit hin droga. Kondi binalhin ako ha iba nga nasud, ngan nagkinadto na liwat ha mga parti ngan nag-ininom. Baga hin ha kada panahon nga nangangalimbasog ako pagkinabuhi uyon ha mga prinsipyo ha Biblia, nabalik ako ha akon daan nga mga bisyo. Bisan kon naaawod, nag-aampo ako kan Jehova, pero nakukonsensya pa gihapon ako.

An paghibaro han nabuhat nga sala nira Hadi David ngan Batseba ngan kon paonan-o nagpakita hin kalooy hi Jehova ha ira, nakabulig ha akon. Maisugon nga ginkarawat ni David an iya sala han ginsagdonan hiya ngan waray hiya mangatadongan ha pagdepensa han iya kalugaringon. Ngan mapainubsanon nga ginkarawat niya an disiplina. (2 Samuel 12:1-13) Salit, ha kada ko pakakasala, ginhuhunahuna ko ito ngan nagigin mas masayon an pangaro hin pasaylo kan Jehova. Katapos, nagdesisyon ako pag-ampo antes umatubang hin pagsulay imbes nga katapos pakasala, ngan maopay an nagin resulta hito.

KON PAONAN-O AKO NAGPAHIMULOS: Putong ako. Kondi, nakabulig ha akon an Efeso 4:29-31 nga masantop an panginahanglan nga likyan an “kapaitan, ngan kangalas, ngan kasina.” Samtang nahibabaro ako pagkontrol han akon emosyon, nahibabaro liwat ako pagkontrol han akon dila. Dugang pa, an sagdon ni Jesus nga an “Oo,” sadang magin “oo,” nakabulig ha akon nga magin mas determinado ha akon desisyon.—Mateo 5:37.

An akon nanay nga nadiri anay han akon pakig-upod ha mga Saksi, ha urhi nagsiring nga iginpapasigarbo niya ako. Nagsiring pa ngani hiya nga, “Maaram ako nga kon ano ka yana diri ito tungod han amon pagpadaku ha imo kondi tungod han imo hinbaroan mahitungod kan Jehova.” Nalipay gud ako hito nga iya ginsiring.

Naabat gud ako yana nga may katuyoan ngan kahulogan na an akon kinabuhi. Siyam ka tuig na yana nga bug-os-panahon nga nag-aalagad kami nga mag-asawa sugad nga magturutdo han Biblia. Oo, nagsasangyaw ako, ngan para ha akon ini an buruhaton nga pinakamapulsanon.

 PERSONAL NGA IMPORMASYON

NGARAN: DENIS BUSIGIN

EDAD: 30

NATAWHAN NGA NASUD: RUSSIA

KARATISTA

AN AKON NAGLABAY: Natawo ako ha syudad han Perm’ ngan nagdaku ha Furmanov, syudad nga may mga 40,000 nga umurukoy, ha rehiyon han Ivanovo ha Russia. Makaruruyag an Furmanov nga may damu nga mag-opay pagkit-on nga puno nga nagigin dulaw ngan pula an dahon kon katrakdag. Durante han dekada han 1980 ngan 1990, nagdamu an krimen didto. Simple la an amon pagkinabuhi tungod kay gutiay la an kita han amon pamilya. Upod han akon mga kag-anak ngan manghod, ha apartment nga usa la an kwarto kami naukoy, salit naghuhuruot kami.

Han syete anyos ako, nagtikang ako pag-aram hin karate. Karuyag ko gud ito; dida na la nalibot an akon kinabuhi. Ha gym ko inuubos an akon bakante nga oras, salit tanan ko nga sangkay mahilig ha isport. Han 15 anyos ako, nagin red belter ako, ngan paglabay hin usa ka tuig nagin brown belter na. Kaapi ako ha grupo han karatista nga nagmulay ha lokal ngan ha internasyonal. Baga hin maopay an akon kabubuwason, kondi han 17 anyos ako, nabag-o an akon kinabuhi.

Ako ngan an pipira ko nga sangkay nakahimo hin krimen ngan nadakop kami. Nasentensyahan ako hin duha ka tuig nga kaprisohan, ngan makuri an kahimtang didto. Kondi, didto ako siyahan nga nakakita hin Biblia. Ginbasa ko an Genesis, Salmo, ngan an Bag-o nga Testamento. Ginmemorya ko pa ngani an Amay Namon ngan kada gab-i nangangadi ako hito antes ako kumaturog, naghuhunahuna nga an pagbuhat hito makakabulig ha akon.

Han 2000, nakagawas ako ha prisohan, kondi an akon kinabuhi waray direksyon ngan katuyoan. Nagtikang ako gumamit hin droga. Hito nga panahon, namatay hi Nanay, an pinakaduok nga tawo ha akon. Masakit gud ito para ha akon. Kondi bisan pa hito, naundang ko an paggamit hin droga ngan nagkinadto na liwat ako ha gym. Binalhin liwat ako ha syudad han Ivanovo. Didto, nakatrabaho ako ha grocery nga Saksi an shop assistant. Iya iginsaysay an pipira nga basihan nga kamatuoran ha Biblia ngan ginhangyo an usa nga Saksi nga lalaki nga regular nga dumarahan ako hin pag-aram ha Biblia.

KON PAONAN-O NABAG-O HAN BIBLIA AN AKON KINABUHI: Durante han akon pag-aram, nabantad ako han hibaroan ko nga katuyoan han Dios nga himoon an tuna nga paraiso, ngan karuyag ko buhaton an ginkikinahanglan basi makapahimulos hito. Waray pag-iha, nasantop ko nga hitaas an suruklan ni Jehova ngan karuyag niya nga an mga tawo magkinabuhi uyon hito. Ha kadak-an nga bahin han akon kinabuhi, kalugaringon ko la an akon ginhinunahuna. Kondi, hinbaroan ko nga karuyag ni Jehova nga hunahunaon ko an iba ngan patuboon an mga kalidad nga waray ha akon sugad han pagkabuotan ngan pagkamamurayawon.

Samtang ginpapamalandong ko an tanan nga ginbuhat ni Jehova para ha akon—sugad han paghatag han iya Anak nga halad para ha akon mga sala—an pagkamapasalamaton ha Iya gugma nagpagios ha akon nga magbag-o. Pananglitan, ha Salmo 11:5 hinbaroan ko nga kinangangalasan ni Jehova an kamadarahog. Salit inundang ako pagkinita hin mga programa ha TV nga nag-aaghat hin kamadarahog ngan  kapungot. Ngan bisan kon makuri, ginbayaan ko an madarahog nga mga isport. An prinsipyo ha 1 Korinto 15:33 nakabulig ha akon nga masantop nga an akon iginkakaupod makakaapekto gud ha akon. An akon kapriso ebidensya han pagin tinuod hito. Salit, nagdesisyon ako nga diri na makig-upod ha mga tawo nga an kinabuhi nakasentro ha madarahog nga mga isport.

KON PAONAN-O AKO NAGPAHIMULOS: An pakig-upod ha mga Saksi ni Jehova ngan pag-aram han Biblia nakabulig ha akon nga magin tangkod. Pananglitan, hinbaroan ko ha Hebreo 13:5 an panginahanglan ha pagin kontento ngan pag-ato ha gugma ha salapi. An pag-aplikar hito nakabulig ha akon nga likyan an pagbuwa ngan pangawat.

Pirme ko ginpapabilhan an akon kasangkayan. Ha naglabay, may naobserbahan ako nga magsarangkay nga nadaot an relasyon tungod han kahakog o kahadlok. An mga Saksi ni Jehova diri hingpit, kondi hinbaroan ko nga ira gintatahod an mga suruklan han Dios ngan nangangalimbasog gud pag-aplikar han iya sagdon ha paagi han ira pakig-upod ha iba. Ngan ha ira, nakabiling ako hin tinuod nga kasangkayan.

Nahuhunahuna ko la an akon kinabuhi kon waray ako mahibaro pagkinabuhi uyon ha mga suruklan han Biblia. Bangin priso na liwat ako o naghihimo hin mga butang nga hinungdan hin kasakit ngan pag-antos han iba. Kondi yana, may-ada ako mahusay nga asawa ngan duha nga anak, ngan sugad nga pamilya, nakakaeksperyensya han tinuod nga kalipay ha pagbulig ha iba nga mahibaro han kamatuoran mahitungod ha Dios.

PERSONAL NGA IMPORMASYON

NGARAN: JOSÉ CARLOS PEREIRA DA SILVA

EDAD: 31

NATAWHAN NGA NASUD: BRAZIL

PIRME NAHIDADABI HA ARAWAY HA KAKALSADAHAN

AN AKON NAGLABAY: Nagdaku ako ha iskwater ha Americana, ha São Paulo. Waray kami limpyo nga irinmon nga tubig ngan mahugaw an amon palibot. An amon lugar kilala ha pagin madarahog ngan puno hin krimen.

Bayolente ngan agresibo ako. Pirme ako nahidadabi ha araway ha kakalsadahan, salit ginkakahadlokan ako ha amon lugar. An akon pamado, pag-ayos, ngan paggios nagpapakita hito. Makusog ako uminom, agsob nga tubtob nga waray na ako sarabotan. Ngan pariho ha akon kamagurangan, nagamit ako hin droga. Ngani, may bugto ako nga namatay tungod kay nasobrahan hito.

KON PAONAN-O NABAG-O HAN BIBLIA AN AKON KINABUHI: Han nasangyawan ako han mga Saksi, ira iginpakita tikang ha Biblia nga hihimoon han Dios an bug-os nga tuna nga paraiso. (Lukas 23:42, 43; Pahayag 21:3, 4) Hinbaroan ko nga an mga patay diri maaram hin bisan ano, salit diri ginsisirotan han Dios an magraot ha naglalaga nga impyerno. (Eklesiastes 9:5, 6) Nakaginhawa gud ako hito! An akon hinbaroan mahitungod ha Dios nakaaghat ha akon nga maghingyap nga magbag-o. Pero diri masayon an pagbuhat hito—an pag-undang ha paggamit hin droga, paghinubog, pag-api ha araway, ngan pagpinanmuyayaw.

 Kondi, nadasig gud ako han ginsiring ni apostol Pablo ha 1 Korinto 6:9-11. Ipinapakita hito nga may mga Kristiano ha siyahan nga siglo nga may-ada anay magraot nga panggawi pariho han akon. Pero ito nga teksto liwat nasiring: “An iba ha iyo mga sugad hini: Kondi mga lininisan kamo, kondi mga ginpakabaraan na kamo, kondi mga ginpakamatadong na kamo ha ngaran han aton Ginoo Jesu-Kristo, ngan ha Espiritu han aton Dios.” Ito nga mga pulong naghatag ha akon hin paglaom nga mahimo liwat ako magbag-o basi mapalipay an Dios.

Han nagtikang ako makig-upod ha mga Saksi, nakombinse ako nga nagkikinabuhi hira ha paagi nga angayan ha tinuod nga mga Kristiano. Maaram hira nga hadto bayolente ngan agresibo ako, kondi bisan pa hito mahigugmaon nga ginkarawat nira ako.

KON PAONAN-O AKO NAGPAHIMULOS: Kon waray ako mag-aram han Biblia ngan magbag-o, posible nga patay na ako. Kondi, naeksperyensyahan ko lugod an kalipay ha pagbulig ha usa ko nga bugto nga mahibaro ha Biblia ngan makaundang ha pagkagiyan ha droga. Ngan naaghat ko liwat an iba ko nga paryente nga mag-aram han Biblia. Mapasalamaton gud ako nga naidedikar ko an akon kinabuhi ha pag-alagad ha Dios, nga nagtatagad gud ha aton!

[Blurb ha pahina 24]

“Nagdesisyon ako pag-ampo antes umatubang hin pagsulay imbes nga katapos pakasala, ngan maopay an nagin resulta hito”