Pakiana han Magbarasa

Inuuyonan ba han Dios an Poligamiya?

Diri; an suruklan nga gin-establisar han Dios ha Eden ha siyahan nga mag-asawa amo an monogamiya o pagkaada usa la nga asawa. Ha urhi, ginparig-on utro ito ni Jesu-Kristo ha iya mga sumurunod.—Genesis 2:18-24; Mateo 19:4-6.

Kondi, diri ba hira Abraham, Jakob, David, ngan Salomon nga nabuhi antes han panahon han mga Kristiano may-ada sobra usa nga asawa? Oo, pero paonan-o iginhulagway han Biblia ito nga kahimtang? Ipinapakita hito an mga problema ngan diri pagsinabtanay ha pamilya nira Abraham ngan Jakob sugad nga resulta hito. (Genesis 16:1-4; 29:18–30:24) Ha urhi, an Balaud han Dios nag-upod hini nga sugo para ha tagsa nga hadi: “Diri hiya magdamu hin asawa para ha iya, basi nga an iya kasingkasing diri mahisimang.” (Deuteronomio 17:15, 17) Ginbalewaray ni Salomon ito nga sugo pinaagi ha pagkaada sobra 700 nga asawa! Makasurubo, nahisimang an iya kasingkasing tikang kan Jehova tungod han maraot nga impluwensya han iya mga asawa. (1 Hadi 11:1-4) Matin-aw, ginhihisgotan han Biblia an poligamiya o an pagkaada damu nga asawa ha negatibo nga paagi.

Pero, bangin may maghunahuna kon kay ano nga gintugotan han Dios an iya katawohan nga mag-asawa hin damu. Tagda ini: May-ada na ba panahon nga nagpadayon ka ha pagtrabaho ha diri mo karuyag nga trabaho, nangangatadongan nga an pag-undang o pagpamiling hin iba, hito nga panahon, diri pa praktikal o makakadaot ha imo pamilya? Syempre, an mga paagi ngan panhunahuna han Dios mas hitaas kay ha aton panhunahuna. (Isaias 55:8, 9) Bisan pa hito, mahimo naton hibaroan an pipira nga praktikal nga rason kon kay ano nga gintugotan anay han Dios an poligamiya.

Hinumdumi nga ha Eden, hi Jehova nagsaad hin “binhi” nga ha kataposan bug-os nga magbubungkag kan Satanas. Ha urhi, ginsumatan hi Abraham nga magigin amay hiya hin daku nga nasud ngan an igintagna nga Binhi magtitikang ha iya katulinan. (Genesis 3:15; 22:18) Hi Satanas disidido nga pugngan an pag-abot hito nga Binhi. Tungod hito, determinado hiya ha pagbungkag han kadaan nga nasud han Israel. Agsob niya sulayon an Israel nga makasala basi mawad-an ito han pag-uyon ngan panalipod han Dios.

Basi maatohan an mga pagsulay, pauroutro nga ginsugo ni Jehova an iya mga propeta ha pagpahamangno han iya katawohan ha panahon nga nasimang hira tikang ha iya suruklan. Kondi, maaram hiya nga daan nga an iya katawohan agsob nga mapapakyas ha pagsunod bisan ha magsayon la sundon nga sugo, sugad han sugo kontra ha idolatriya. (Eksodo 32:9) Kon makukurian hira pagsunod bisan han pinakamasayon la sundon nga sugo, paonan-o nira masusunod an balaud kontra ha poligamiya? Tungod kay hinsasabtan gud ni Jehova an kinaiya han tawo, nakita niya nga diri pa panahon nga igdiri ito nga buhat, nga maiha na nga nahiaraan hito nga panahon. Kay kon iya igdiri na ito, makakabiling hi Satanas hin masayon hinduro nga paagi ha pag-aghat han Israel ha pakasala.

An temporaryo nga pagtugot han Dios ha poligamiya may iba pa nga bentaha. Nakabulig ito ha madagmit nga pagdamu han Israel, tungod hito nasiguro an padayon nga pag-eksister han nasud tubtob ha pag-abot han Mesias. Dugang pa, tungod han poligamiya napanalipdan an pipira nga kababayin-an, nahatagan hira hin urukyan ngan panimalay durante han peligroso nga mga panahon.

Kondi, tigamni nga diri hi Jehova an nagpatikang han poligamiya. Oo, iya anay igintugot ito, pero naghatag hiya hin mga balaud basi malikyan an pag-abuso. (Eksodo 21:10, 11; Deuteronomio 21:15-17) Han igdiri na niya ito ha iya magsiringba, gin-gamit niya an iya Anak ha pagparig-on utro han suruklan ha pag-asawa nga iya gin-establisar ha Eden. Tungod hito, igindiri ni Jesus an poligamiya ha iya mga sumurunod. (Markos 10:8) Salit, ini nga kamatuoran nagin mas matin-aw: An Balaud nga iginhatag pinaagi kan Moises mapulsanon hito nga panahon, kondi an “balaud ni Kristo” mas labaw nga mapulsanon.—Galasia 6:2.