Mahimo Ka ba Makabiling hin Kamurayawan Dinhi Hinin Masamok nga Kalibotan?

MURAYAW ba an imo kinabuhi? Para ha damu, matin-aw nga diri an baton. Nagkikinabuhi hira ha mga lugar nga may girra, kasamok ha politika, kapungot ha iba nga tribo, o terorismo. Bisan kon waray ka pa makaeksperyensya hin sugad, bangin diri ka magin murayaw tungod han krimen, pagmaltrato, ngan samok ha negosyo o kaaramyaw. Dugang pa, agsob nga an panimalay nagigin sugad hin patag-awayan imbes nga lugar hin kamurayawan.

Damu an nag-uungara hin kamurayawan. Ira ito ginbibiling pinaagi ha pag-yoga ngan ha mga relihiyon ngan seminar. An iba naglalaom nga mabibilngan ito ha palibot, salit nagbabakasyon hira, nakadto ha kabukiran, kamingawan, o mga hot spring. Kondi bisan kon baga hin makabiling hira hin kamurayawan ha hunahuna, diri mag-iiha masasantop nira nga an sugad nga kamurayawan hamabaw ngan temporaryo la.

Salit diin ka makakabiling hin tinuod nga kamurayawan? Ha burabod han kamurayawan nga amo an aton Maglalarang, hi Jehova nga Dios. Kay ano? Tungod kay hiya an ‘Dios han kamurayawan.’ (Roma 15:33) Ilarom ha pagmando han iya Ginhadian nga hirani na umabot, magkakaada “kahuraan hin kamurayawan.” (Salmo 72:7; Mateo 6:9, 10) Labaw ini ha kamurayawan nga ginkasarabotan han mga tawo nga agsob magpahinabo hin temporaryo la nga kamurayawan ngan madaliay nga pag-undang han mga girra. Kondi an kamurayawan han Dios magwawara han tanan nga hinungdan han girra ngan samok. Ha pagkamatuod, waray na mag-aaram hin girra. (Salmo 46:8, 9) Tinuod gud nga kamurayawan para ha ngatanan!

Sugad kamakaruruyag hini nga tidaraon, bangin  maghingyap ka nga magin murayaw yana. May-ada ba paagi nga makabiling ka hin kamurayawan nga mabulig ha imo ha paglampos hinin masamok nga panahon? Oo, makalilipay nga ipinapakita ito han Biblia. Tagda an pipira nga giya ha ika-4 nga kapitulo han surat ni apostol Pablo ha mga taga-Filipos. Gin-aaghat ka namon nga basahon an bersikulo 4 tubtob 13 ha imo Biblia.

“An Kamurayawan han Dios”

Ha bersikulo 7 aton mababasa: “An kamurayawan han Dios, nga labaw ha ngatanan nga hibabroan, magbabantay ha iyo mga kasingkasing ngan ha iyo mga hunahuna kan Kristo Jesus.” Ini nga kamurayawan diri nagtitikang ha basta la pagpamalandong o pagpauswag han personalidad. Lugod, nagtitikang ini ha Dios. Gamhanan gud ini salit “labaw [ini] ha ngatanan nga hibabroan,” ngan ha ngatanan naton nga kabaraka, kahibaro, ngan sayop nga panhunahuna. Bangin mahunahuna naton nga waray na kasulbaran an mga problema, kondi an kamurayawan han Dios naghahatag hin marig-on nga paglaom nga usa ka adlaw mawawara na an tanan naton nga ginkakabarak-an.

Imposible ba ito? Ha mga tawo, oo; kondi “an ngatanan nga mga bagay nahihimo ha Dios.” (Markos 10:27) An pagtoo ngan pagsarig ha Dios mabulig ha aton nga mapugngan an sobra nga kabaraka. Handurawa an usa nga bata nga nawara ha daku nga groseri. Sigurado nga maaram hiya nga sadang la niya bilngon an iya nanay ngan magigin murayaw na liwat hiya. Pariho ha bata nga sigurado nga mamayuyuon han iya nanay kon mabilngan, makakasarig kita han pagmayuyo han Dios. Liliawon kita niya ngan ha urhi, wawad-on an ngatanan naton nga kabaraka.

Damu nga magsiringba ni Jehova an nakakaeksperyensya han kamurayawan han Dios bisan pa han magkuri hinduro nga kahimtang. Pananglitan, tagda hi Nadine nga namatayan hin anak antes ito matawo. Hiya nagsiring: “Nakukurian ako pag-istorya han akon inaabat ngan nagios nga baga hin diri apektado han sitwasyon. Kondi ha pagkatinuod, ginsasamad an akon kasingkasing. Haros kada adlaw, sinsero nga nag-aampo ako ngan nanginginyupo han bulig ni Jehova. Inabat ko an gahum han pag-ampo tungod kay ha kada takna nga nakukurian na ako ngan naghuhunahuna nga ‘Diri ko na maaakos an problema,’ nagkakaada ako kamurayawan ngan pag-abat nga waray ko sadang kabarak-an.”

Panalipod ha Imo Kasingkasing Ngan Hunahuna

Aton paghisgotan utro an Filipos 4:7. Nasiring ito nga an kamurayawan han Dios ‘magbabantay han kasingkasing ngan hunahuna.’ Sugad la nga an gwardya nagpapanalipod, an kamurayawan han Dios nagpapanalipod ha kasingkasing basi diri ito maimpluwensyahan han materyalistiko nga mga ideya, kabaraka, ngan diri diosnon nga prinsipyo. Tagda ini nga ehemplo.

Damu dinhi hinin masamok nga kalibotan an natoo nga sadang hira magriko basi magin malipayon ngan murayaw. Tungod han sagdon han mga eksperto, bangin nira ipangapital an ira natirok. Kondi, magigin murayaw gud ba hira? Diri ha ngatanan nga panahon. Bangin mabaraka hira kada adlaw ha pagkwenenta, paghinunahuna kon hira ba magbabaligya, mapalit, o magpapadayon. Ngan kon malugi ito, bangin matarantar hira. An Biblia diri nagkukondenar nga ipuhunan naton an aton natirok, kondi maaramon nga nagsasagdon ito: “Hiya nga nahigugma han salapi diri matatablaw han salapi; diri man hiya nga mahigugma han kahuraan matatablaw han tubo: ini liwat parayaw. An pagkaturog han tawo nga nangangabudlay matam-is, makakaon hiya magutiay la o madamu; kondi an pagkapuno han bahandianon diri makakatugot ha iya hin pagkaturog.”—Eklesiastes 5:10, 12.

An Filipos 4:7 nagtatapos ha pagsiring nga an kamurayawan han Dios nagbabantay han aton kasingkasing ngan hunahuna pinaagi “kan Kristo Jesus.” Ano an koneksyon ni Kristo Jesus ha kamurayawan han Dios? Hi Jesus may-ada importante nga bahin ha katumanan han katuyoan han Dios. Iya iginhatag an iya kinabuhi basi magin posible an aton kaluwasan ha sala ngan kamatayon. (Juan 3:16) Hiya liwat an igintoka nga Hadi ha Ginhadian han Dios. An paghibaro ha bahin ni Jesus makakabulig gud nga magkaada kita kamurayawan ha hunahuna ngan kasingkasing. Ha ano nga paagi?

Kon sinsero kita nga nagbabasol ngan nangangaro hin pasaylo pinaagi han halad ni Jesus, papasayloon kita han Dios, ngan mabulig ito nga  magkaada kita kamurayawan ha hunahuna ngan kasingkasing. (Buhat 3:19) Kon maaram kita nga an kinabuhi diri bug-os nga mapapahimulosan tubtob ha pag-abot han Ginhadian ni Kristo, malilikyan naton an pagkinabaraka ngan pagkinabuhi nga baga hin waray na kabubuwason. (1 Timoteo 6:19) Syempre, diri naton malilikyan an ngatanan nga problema, kondi maliliaw kita ha masasarigan nga paglaom nga hirani na an gimaopayi nga kinabuhi.

Kon Paonan-o Mo Mabibilngan an Kamurayawan han Dios

Paonan-o mo mabibilngan an kamurayawan han Dios? An Filipos 4:4, 5 makakabulig ha aton: “Magkalipay kamo gihapon ha Ginoo: liwat masiring ako, Magkalipay kamo. Ipahayag niyo an iyo kaaghop ha ngatanan nga mga tawo. An Ginoo hirani na.” Han ginsurat ito ni Pablo, priso hiya ha Roma tungod han waray hustisya nga paghukom. (Filipos 1:13) Imbes nga magsinubo tungod han kawaray hustisya, iya gindasig an iya igkasi-tumuroo nga pirme maglipay ha Ginoo. Matin-aw nga an iya kalipay nadepende diri ha iya kahimtang, kondi ha iya relasyon ha Dios. Kita liwat sadang mahibaro nga magin malipayon ha pag-alagad ha Dios anoman an aton kahimtang. Kon mas makikilala naton hi Jehova ngan mas mabubuhat an iya kaburut-on, mas malilipay kita pag-alagad ha iya. Tungod hito, magkakaada kita katagbaw ngan kamurayawan ha hunahuna.

Dugang pa, nadadasig kita nga magin makatadunganon. Kon ginkukultibar naton an pagkamakatadunganon, diri kita maglalaom hin sobra ha aton kalugaringon. Maaram kita nga diri kita hingpit; diri kita mahimo magin an gimaopayi ha tanan nga aspekto han kinabuhi. Tungod hito, kay ano nga magkinabaraka kon paonan-o magin mas maopay kay ha iba o magin hingpit o, maglaom hin kahingpitan ha iba? Salit, mahimo kita magpabilin nga kalmado bisan kon may mabuhat an iba nga makapasubo ha aton. Ha orihinal nga Griego nga pulong, an “makatadunganon” iginhubad liwat nga “pagkamapauyon-uyon.” Kon mapauyon-uyon kita ha mga butang nga nadepende ha karuyag han kada tagsa, nalilikyan an away nga agsob nga waray gud kapulsanan, lugod nagwawara han aton murayaw nga relasyon ha iba ngan han aton kamurayawan.

An sunod nga mga pulong ha Filipos 4:5 nga “an Ginoo hirani na,” baga hin waray kalabotan ha konteksto. Ha diri maiha, inin daan nga sistema liliwanan han Dios hin bag-o ilarom han iya Ginhadian. Kondi bisan yana, mahimo hiya magin duok ha tanan nga napahirani ha iya. (Buhat 17:27; Jakobo 4:8) An paghibaro nga hirani la an Dios mabulig ha aton nga magin malipayon, makatadunganon, ngan diri mabaraka ha mga problema yana o ha tidaraon, sugad han ginsisiring han bersikulo 6.

Kon babasahon an bersikulo 6 ngan 7, mahibabaroan naton nga an kamurayawan han Dios direkta nga resulta han pag-ampo. Gintatagad han pipira an pag-ampo sugad nga usa la nga klase han pagpamalandong, naghuhunahuna nga an bisan ano nga klase hin pag-ampo makakadugang han ira kamurayawan. Kondi an Biblia naghihisgot mahitungod hin sinsero nga komunikasyon kan Jehova, usa nga komunikasyon nga duok pariho kon an bata nagsusumat han iya kalipay ngan kasubo ha iya mahigugmaon nga kag-anak. Nakakaliaw gud an paghibaro nga mahimo kita humirani ha Dios “ha ngatanan nga butang.” Anoman an aton ginhuhunahuna o gintatago ha aton kasingkasing, maisusumat naton ha aton Amay ha langit.

An bersikulo 8 nagdadasig ha pagsentro han aton hunahuna ha positibo nga mga butang. Kondi, diri igo na an pagin positibo la. Sugad han iginsasaysay han bersikulo 9, sadang liwat naton iaplikar an mag-opay nga sagdon han Biblia. An pagbuhat hito maghahatag hin limpyo nga konsensya. Tinuod gud an puplunganon: Maopay an katurog han usa nga may limpyo nga konsensya!

Oo, mahimo mo mabilngan an kamurayawan. Nagtitikang ito kan Jehova, nga naghahatag hito ha mga napahirani ha iya ngan naruruyag ha pagsunod ha iya. Pinaagi ha pag-usisa han iya Pulong, an Biblia, mahimo mo hibaroan an iya panhunahuna. Bangin diri masayon an pagsunod han iya giya. Kondi takos ito han ngatanan nga pangalimbasog tungod kay “an Dios han kamurayaw maupod ha [imo].”—Filipos 4:9.

[Blurb ha pahina 10]

“An kamurayawan han Dios . . . magbabantay ha iyo mga kasingkasing.”—FILIPOS 4:7

[Blurb ha pahina 12]

Naliliaw gud kita ha paghibaro nga mahimo kita humirani ha Dios “ha ngatanan nga butang”