Mahimo ba Masabtan an Biblia?

“Kada Domingo, an amon pamilya nagbabasa han Biblia. Pero diri gud ako naruruyag hito. Natoo ako nga an Biblia amo an Pulong han Dios, kondi kadak-an han akon nababasa makuri hinduro hisabtan.”—Steven, Britanya.

“Han 17 anyos ako, nangalimbasog ako pagbasa han Biblia. Kondi, nakurian ako pagsabot hito, salit waray ko ipadayon an pagbasa.”—Valvanera, Espanya.

“Makausa ginbasa ko an Biblia tungod kay para ha akon sugad nga Katoliko, kinahanglan ko ito basahon. Inabot hin tulo ka tuig antes matapos ko ito. Kondi gutiay la an akon hinsabtan.”—Jo-Anne, Australia.

AN Biblia amo pa gihapon an pinakapopular nga libro ha kalibotan ngan an may pinakadamu nga napalit nga libro, tungod kay mas masayon ito makuha han mas damu nga tawo, ha mas damu nga yinaknan, ngan ha mas magkadirodilain nga porma. Kondi, damu han may-ada Biblia an nakukurian la gihapon pagsabot hito. Ito ba liwat an imo sitwasyon?

Karuyag ba han Awtor han Biblia nga Hisabtan Naton an Iya Pulong?

“An ngatanan nga mga Baraan nga Surat . . . ginpakaaghat han Dios,” siring han Biblia. (2 Timoteo 3:16) Oo, hi Jehova nga Dios an Awtor han Biblia. Kondi, karuyag ba niya nga hisabtan naton an iya Pulong? O gintuyo ba niya nga pipira la an makasabot hito, sugad han mga klero ngan mga nag-aram gud mahitungod han Biblia?

Tagda an masunod nga mga bersikulo tikang ha Biblia mismo:

“Ini nga sugo nga akon isusugo ha imo hini nga adlaw, ini diri makuri hinduro ha imo, diri man liwat hirayo.”—Deuteronomio 30:11.

“An pagbungat han imo mga pulong nakakalamrag; nahatag ito hin pagsabot ha mga waray kinaadman.”—Salmo 119:130.

“Ha amo nga oras [hi Jesus] nalipay ha espiritu santo, ngan siniring: Ako nagpapasalamat ha imo, O, Amay! Ginoo han langit ngan han tuna, nga imo gintago ini nga mga bagay tikang han mga kamag-araman ngan masinabuton, ngan ipinakita hira ha mga kabataan.”—Lukas 10:21.

Oo, karuyag gud han Awtor han Biblia nga hisabtan mo an iya Pulong! Kondi bisan pa hito, damu pa gihapon nga sinsero nga tawo an nakukurian pagsabot hini nga libro. Ano an makakabulig nga masabtan ito? An masunod nga mga artikulo naghihisgot han tulo nga suhestyon nga makakabulig ha imo nga masabtan an Biblia.