Pagbisita ha Talagsahon nga Imprintahan

POSIBLE nga hadto nakakita ka na hin sugad hini nga magasin nga imo binabasa. Bangin may Saksi ni Jehova nga nagbisita na ha iyo ngan nagtanyag hin An Barantayan ngan Awake! basi buligan ka nga mas masabtan an Biblia. O bangin nakakita ka hin Saksi ha kalsada o ha merkado ha iyo lugar nga nagtatanyag han sugad nga literatura nga basado ha Biblia. Ha pagkamatuod, sobra 35 milyon hini nga magasin an naipapanaltag kada bulan, salit ha ngatanan nga magasin may kalabotan ha relihiyon, ini an may pinakadamu nga naipupublikar ha bug-os nga kalibotan.

Kondi, nahunahuna mo na ba kon diin ngan kon paonan-o ginhihimo ini nga mga literatura? Basi mabaton ito, aton bisitahon an usa han damu nga imprintahan han mga Saksi ni Jehova ha iba-iba nga nasud—an imprintahan ha Wallkill, New York, E.U.A. Damu han magbarasa hini ha bug-os nga kalibotan an diri makakahimo pagkadto, salit pinaagi han paghulagway nga imo mababasa ngan mga retrato nga imo makikita dinhi, sugad hin nakabisita ka na hito nga imprintahan.

Syempre, antes makag-imprinta, kinahanglan hin materyal nga iimprintahon. An Writing Department ha Brooklyn, New York, nagpapadara ha Graphics Department hin mga artikulo nga iimprintahon pinaagi han electronic mail. Ini nga mga artikulo amo an ginbabasihan ha paghimo hin mga printing plate. Ha imprintahan ha Wallkill, mga 1,400 ka rolyo hin papel an naabot kada bulan, ngan mga 80 tubtob 100 ka tonilada hin papel an nagagamit kada adlaw. Ito nga mga rolyo—nga an pipira may timbang nga sobra 1,300 ka kilo—iginsusulod ha lima nga dagku nga makinarya ha pag-imprinta nga may mga plate. Katapos maimprintahan an mga papel, tatabason ngan pipiloon ito basi makahimo hin mga seksyon nga an kada usa may 32 nga pahina. Ini nga magasin nga imo binabasa usa nga seksyon. Kumusta man an paghimo han mga libro? Ha bindery, an mga seksyon gintitirig-ob basi makahimo hin libro. Usa han duha nga bindery lines nakakahimo hin 50,000 nga libro nga matig-a an kobre o 75,000 nga mahumok an kobre ha usa ka adlaw, ngan an usa nakakahimo hin mga 100,000 nga libro nga mahumok an kobre.

Han 2008, ini nga imprintahan nakahimo hin sobra 28,000,000 nga libro, an sobra 2.6 milyon hito mga Biblia. Hito liwat nga tuig, 243,317,564 nga magasin an naimprinta. Nag-iimprinta ini hin mga literatura nga iginbasar ha Biblia ha mga 380 nga yinaknan. Kon nahimo na an literatura, ano man an masunod?

Ini nga imprintahan nakakakarawat hin mga order tikang ha 12,754 nga kongregasyon han mga Saksi ni Jehova ha bug-os nga Estados Unidos ngan 1,369 ha Caribbean ngan Hawaii. Gin-aandam han Shipping Department an ngatanan nga order ngan gin-oorganisa nga  maidul-ong ito ha husto nga mga adres. Kada tuig, mga 14 milyon ka kilo hin literatura an naipapadara ha mga kongregasyon ha Estados Unidos.

An pinakaimportante nga bahin hini nga imprintahan diri an mga makinarya, kondi an mga tawo. May-ada sobra 300 nga nagtatrabaho ha iba-iba nga departamento ha pag-imprinta—Graphics, Scheduling, Pressroom, Bindery, ngan Shipping. Hira ngatanan boluntaryo ngan waray sweldo—19 ngadto ha 92 an pangidaron.

Ito nga mga boluntaryo interesado gud ha katawohan—mga indibiduwal nga naruruyag gud kumarawat hini nga mga literatura ngan matutdoan, madasig, ngan magiyahan han mga prinsipyo ha Biblia nga ginhihisgotan dida hito. Naglalaom kami nga usa ka han sugad nga magbarasa, ngan ini nga mga literatura makabulig ha imo ha padayon nga pagkuha hin kahibaro mahitungod kan Jehova nga Dios ngan kan Jesu-Kristo, nga magriresulta hin kinabuhi nga waray kataposan.—Juan 17:3.